Jerbal in Tampeļ im Menmenbwij an Baam̧le—Rej Juon Wōt Jerbal
Juon pedped eo ioļapļap ilo karōk eo an Jemedwōj Ilan̄ ej kakobaik baam̧le eo n̄an mour in im n̄an mour indeeo.
Eļap aō kam̧m̧oolol kōn ekkal ko an tampeļ ilo “tarlep in tōrean iien bōk eddo ko” (Katak im Bujen Ko 128:18 Jān tōre in Jepļaaktok eo, ritōmak ro Rekwojarjar raar kōm̧m̧ani elōn̄ kaarmejete ko n̄an būki kain̄i ko im bujen ko an tampeļ. Ļoor waanjon̄ak eo aer eļap, ilo 1975, ālkin elōn̄ kaarmejete ko n̄an etal jān Mexico City, kōrā eo ippa, Evelia, im n̄a, ippānļo̧k ro jinōm im jem̧ōm̧ rejitenbōro, raar liāp āinwōt ļeo im lieo pālele ilo Mesa Arizona Tampeļ. Raan eo, ke kōm kar liāp kōn kajoor eo an priesthood eo ilo m̧weo im̧ōn Irooj, kōm eaar lukkuun en̄jake jidikin lan̄.
Jerbal eo im Kōttōpar ko an Tampeļ
En̄jake in ekōm̧m̧an bwe en ļapļo̧k aō kam̧m̧oolol, ālkin jilu iiō in jerbal im kaarmejete eļap, ro Rikwojarjar ilo Kirtland, Ohio, raar kadedeļo̧k tampeļ eo aer eaiboojoj ilo jibriin̄ in 1836—tampeļ eo jinointata ilo epepen in. Ilo M̧aaj in iiō eo, enan̄in juon taujin armej raar kuk ippān doon ilo tampeļ eo n̄an deļo̧n̄e iien aje eo. Rikanaan Josep Smith eaar jutak im kōm̧m̧ane jar in aje eo, eo me eaar bōke kōn revelesōn (lale Katak im Bujen Ko 109). Eaar kōmeļeļeik bwe elōn̄ kōjeraam̧m̧an ko ejej uwaer me renaaj lutōkleplep ioon ro rej erreeo n̄an deļo̧n̄e tampeļ ko an Irooj. Innām kumi in al eo raar al “Jitōb An Anij Ej Einwōt Kijeek” im jarlepju eo raar jutak im lam̧ōj Hosana “kōn [kipel jon̄an] āinwōt eiten… n̄an wanlōn̄ļo̧k boro̧waj in m̧weo” (Teachings of Presidents of the Church: Joseph Smith [2007], 307).
Juon wiik tokālik rikanaan eo eaar kōmeļeļeik waļo̧ktok eo an Irooj ilo tampeļ eo, eo ekar ba:
“Bwe lo, Iaar bōke m̧wiin, im Eta enaaj pād ijin; im Inaaj kwaļo̧k Eō make n̄an armej ro Aō ilo tūriam̧o ilo m̧wiin. …
““Im bun̄bun̄ eo an m̧wiin enaaj erakrakļo̧k n̄an āne ko rettoļo̧k; im en̄in ej jinoin kōjeraam̧m̧an eo me enaaj lutōkleplepļo̧k ioon bōran armej ro Aō” (Katak im Bujen Ko 110:7, 10).
Ālkin menin im visōn ko jet, Ilaija rikanaan eo, eo kar bōkļōn̄ļo̧k n̄an lan̄ ilo ejjeļo̧k nemake mej, eaar jutak im̧aan mejen Rikanaan Josep Smith im Olivery Cowdery im ba:
“Lo, iien eo em̧ōj an kanooj itok, eo kar kōnono kake jān lo̧n̄iin Malakai—im kam̧ool bwe e [Ilaija] [rikanaan eo] naaj kar jilkintok, m̧okta jān an itok raan eo eļap im kaammijak an Irooj—
“N̄an ukōtļo̧k būruōn ro jemāer n̄an ro nejier, im ro nejier n̄an ro jemāer, n̄e aolepān laļ ab jorrāān kōn juon lia—
“Kōn menin, ki ko an tōrean bōk eddo jab in rej wūjlepiwaj ilo peimiro; im jān men in kom̧ro maron̄ jeļā bwe raan eo eļap im kaammijak an Irooj ej epaak, em̧ool epād im̧aan kōjām ko.”Katak im Bujen Ko 110:14–16).
Tampeļ im Menmenbwij an Baam̧le
Ālkin an Irooj kar kōjepļaaktok ki in liāp ko n̄an Josep Smith, jerbal in lo̧mo̧o̧r ilo jim̧or ron̄ōļ eo raar jino ilo epepen in ad (lale 1 Korint 15:22, 29; Katak im Bujen Ko 128: 88–18).
Būreejtōn Boyd K. Packer eaar kwaļo̧k bwe “men in eaorōk ekar jab kōm̧akūt jen laļ in, ak enaaj im̧we mejen kajjik eo an aolep jetōb ro raar mour ak renaaj mour. Men kein raar jino bōk jikier. Kabun̄ in eaar jino erom̧ juon kabun̄ in ekkal tampeļ ko.
“Laļ in eaar jino em̧akūt ijin im ijeņ, ilo juon wāween ekabwilōn̄lōn̄, doulul ko im jukjuk in pād ko raar jino itok limo ilo kōm̧m̧ani menmenbwij ko. Menin eaar bōk jikin jān tōre eo Ilaija eaar waļo̧k ļo̧k ilo Kirtland Tampeļ” (The Holy Temple [1980], 141).
“Jān raan eo, Eprōļ 3, 1836, būruwōn ro nejier renaaj jino oktakļo̧k n̄an jemāer. Raar jab jeļā kōn kain̄i ko, ak raar alikkar. Kajoor in liāp in ekar pād ippād. Ejjeļo̧k mālim eaorōkļo̧k. Kajoor in letok m̧ool eo im alikkar eo indeeo kōn aolep kain̄i ko kar kōm̧m̧ani jān mālim eo ekkar n̄an jim̧or ro remour im remej”(Preparing to Enter the Holy Temple [2002], 28).
Ro jeiū im jatū, jerbal in ekkal im jim̧we in kōjerbal tampeļ ko eaar baj pād wōr ilo aolep epepen juon kōkkaļļe in Kabun̄ eo em̧ool an Jisōs Kraist. Ālkin aje eo an Salt Lake Tampeļ ilo 1893, Būreejtōn Wilford Woodruff eaar kōketak membōr ro an Kabun̄ in n̄an pukot rekoot ko an ro jibwier im jim̧m̧aer im n̄an rekoote menmenbwij eo aer ilo aer ro̧o̧l likļo̧k jon̄an wōt eo remaron̄e n̄an boktok āt ko n̄an tampeļ n̄an kōm̧m̧ani kain̄i ko an lo̧mo̧o̧r im mour ijo eutiejtata (lale Teachings of Presidents of the Church: Wilford Woodruff [2004], 174).
Menmenbwij an Baam̧le im Jerbal in Tampeļ—Juon Wōt Jerbal
Juon iiō tokālik (1894), ejja Būreejtōn Woodruff wōt ekar bōk eddoin ejaak eo an Genealogical Society ilo Utah. Jibukwi iiō tokālik, ilo 1994, Elder Russell M. Nelson, kar juon membōr in Doulul eo an Jon̄oulruo Rijilōk ro ekar ba, “M̧akūtkūt ko ilo iiō eo raar ejaake research menmenbwij an baam̧le im jerbal in tampeļ āinwōt juon wōt jerbal ilo Kabun̄ in” (“The Spirit of Elijah,” Ensign, Nov. 1994, 85).
Jerbal in Menmenbwij an Baam̧le
Ro jeiū im jatū, Irooj ej rōjan̄ kōj āinwōt membōr in Kabun̄ eo An n̄an kōjparok menmenbwij an baam̧le ko ad, n̄an jeļā kōn ro jibwid im jim̧m̧ad, im bōki karōk ko rekkar n̄an er n̄an būki kain̄i ko an gospel in ilo tampeļ ko n̄an jipan̄ er eddōkļo̧k ilo iaļan bujen in, eo enaaj kōjeraam̧m̧an er kōn juon baam̧le indeeo. En̄in ej pedped eo ioļapļap ilo karōk eo an Jemedwōj Ilan̄: kobaik baam̧le ko ilo mour in im n̄an indeeo.
N̄an ro rej en̄jake ke rejjab maron̄ kōm̧m̧ane jerbal in, kwoj aikuj jeļā bwe kwojjab make iaam̧. Jemaron̄ etal n̄an aolep kein jipan̄ ko me em̧ōj an Kabun̄ in kar kepooje im bwe rej pād ilo FamilySearch jentōr ko, eo me jekar jeļā kake ej jentōr in menmenbwij an baam̧le. FamilySearch jentōr kein em̧ōj āji n̄an aolep, kōn jipan̄ jidik, maron̄ pukot meļeļe ko an ro jibwier im jim̧m̧aer im karōki bwe ren maron̄ būkiļo̧k n̄an m̧weo im̧ōn Irooj. Jouj kūrļo̧k rijipan̄ ro an menmenbwij an baam̧le ilo ward ak branch eo am̧ ro renaaj jipan̄ eok ilo elōn̄ wāween.
Ilo ad ļoor tōl eo an rikanaan ro im katak elmen ad kōm̧m̧ane menmenbwij an baam̧le eo ad n̄an kōm̧m̧ani kain̄i ko an tampeļ n̄an ro jibwid im jim̧m̧ad, jenaaj en̄jake eļap m̧ōņōņō ke jeban kōņaan bōjrak in kōm̧m̧ane. Jetōb enaaj kam̧weiūr būruōd, enaaj karuj im ļujur ad n̄an kōm̧m̧ane, im tōl kōj ilo ad pukot etan ro jibwid im jim̧m̧ad. Ak jen keememej bwe menmenbwij an baam̧le eļapļo̧k jān baj kappukot āt ko, raan/allōn̄/iiō, im jikin ko. Ej n̄an kobaik baam̧le ko n̄an en̄jake m̧ōņōņō eo ej itok jān aer leļo̧k n̄an er kain̄i ko an gospel in.
Em̧m̧an ippa katak eo an rikanaan eo ad ejitenbōro, Būreejtōn Russell M. Nelson, eo eaar ba: “Tampeļ eo ej pād ilo ioļapļap in kōkajoorļo̧k eo an tōmak eo ad im kajoor in jetōb eo ad kōnke Rilo̧mo̧o̧r im katak ko An rej lukkuun mour eo an tampeļ eo. Men otemjej katakin ilowaan tampeļ eo, jān kōmeļeļe im jān Jetōb eo, ej kōļapļo̧k ad meļeļe kōn Jisōs Kraist. Kain̄i ko An raorōk rej liāpe kōj n̄an E kōn bujen ko rekwojarjar an priesthood. Innām, ilo ad kōjparoki bujen ko ad, Ej letok n̄an kōj An kōmour, im kajoor in kōkajoorļo̧k” (“Tampeļ Eo im Pedped Eo Am ilo Jetōb,” Liaona, Nob. 2021, 93–94).
Ilo m̧ool, jerbal ko an tampeļ im menmenbwij an baam̧le rej juon wōt jerbal ilo Kabun̄ in.
Ij kam̧ool kōn m̧ool kein. Ijeļā en̄in ej Kabun̄ eo an Irooj Jisōs Kraist, ad Rilo̧mo̧o̧r im Ripinmuur, eo jej keememej im kaorōk ilo iien Ijtō in. Ijeļā Ej iakwe kōj, im n̄e jej kōjparok bujen ko ad im likūt ad lōke ilo E, E ej letok n̄an kōj An kōmour im kajoor in kōkajoorļo̧k. Ilo etan Jisōs Kraist, amen.