!Hem I Save Mekem Mi Kam Gud Bakegen!!
Paoa blong hilim mo pemaot man blong Sevya, i aplae long ol mistek blong ol aksiden, pua desisen, ol jalenj mo ol defren kaen hadtaem—semmak tu long ol sin blong yumi.
Moronae i promesem se sapos yumi ridim Buk blong Momon mo afta, askem God, Papa we i no save finis, wetem wan tru hat, wetem wan tru tingting blong wantem save, wetem fet long Kraes, sapos ol samting ia oli tru, bae hem i soemaot trutok blong ol samting ia long yufala, tru long paoa blong Tabu Spirit.1 Milian long ol pipol oli bin yusum promes ia mo kasem wan sua witnes abaot Restoresen blong gospel we i fulwan blong Jisas Kraes.
Moronae i askem strong long yumi se taem yumi ridim Buk blong Momon, i blong “tingbaot hamas sore Lod i bin gat long ol pikinini blong ol man, stat long taem we hem i mekem Adam we i kam daon kasem taem [ia] … mo [blong] tingting hevi long hem insaed long hat blong [yumi].”2 Ol stori mo ol tijing insaed long Buk blong Momon oli rimaenem yumi mo testifae abaot lav blong Sevya, mo bigfala sore blong Hem.
Papa blong mi i ded long Epril 2013. Taem mi rere blong toktok long fenerol seves blong hem, mi luksave olsem wanem mi kasem blesing blong save mo lavem ol fevret skripja blong hem. Hem i serem olgeta long ol kam tugeta blong famli, mo hem i ridim olgeta wetem mi taem mi nidim kaonsel, daereksen blong spirit, o blong mekem fet blong mi i kam strong. Mi bin harem hem i serem olgeta long taem i givim ol toktok mo ol asaenmen. Mi no save olgeta nomo, be mi save tingbaot yet saon blong voes blong hem mo ol filing we i kam tru long Spirit taem hem i serem olgeta. Tru long fasin blong stap serem ol skripja mo ol filing, papa blong mi i helpem mi blong bildimap wan strong fandesen blong fet long Lod, Jisas Kraes.
Papa blong mi i laekem tumas, speseli stori blong Sevya we i visitim ol pipol blong Nifae.3 Tabu stori ia hem i abaot Lod, Jisas Kraes we i laef bakegen long ded mo we i kam antap. Hem i bin drink kap ia we i konkon mo safa evri samting blong evriwan, blong oli no save safa sapos oli sakem sin.4 Hem i bin visitim spirit wol mo oganaesem fasin blong prijim gospel long ples ia.5 Hem i girap bakegen long ded, mo Hem i bin stap wetem mo kasem ol komanmen long Papa blong serem ol skripja wetem Ol Man blong Nifae we bae i save blesem ol fiuja jeneresen.6 Hem i bin kam antap mo gat evri paoa we i no save finis mo paoa. Yumi save lanem samting long evri smosmol ditel abaot ol tijing blong Hem.
Long 3 Nifae 11, yumi ridim abaot Sevya we i kam daon long heven blong tijim Ol Man blong Nifae se Hem i Jisas Kraes, we ol profet oli bin testifae se bae i kam long wol. Hem i talemaot se Hem i Laet blong Wol mo we Hem i leftemap nem blong Papa taem we Hem i tekem antap long Hem, ol sin blong wol. Hem i invaetem ol pipol blong kam mo putum han blong olgeta long saed blong Hem blong filim ol mak blong nil long han mo leg blong Hem. Hem i wantem olgeta blong save se, Hem i God blong Isrel we oli kilim Hem i ded from ol sin blong wol. Ol pipol oli ansa wetem glad, oli kam wan afta wan kasem taem we evriwan oli bin luk Hem mo filim se i tru, i Hem, we ol profet oli raet abaot Hem, se bae i kam.7
Jisas i tijim Ol Man blong Nifae abaot hamas fasin blong sakem sin i impoten, abaot fasin blong kam olsem ol smosmol pikinini, mo abaot nid ia blong kasem baptaes tru long wan we i gat atoriti. Afta, Hem i tijim plante long ol doktrin we yumi stap stadi long olgeta, long yia ia, long Niu Testeman.
Long 3 Nifae 17, yumi ridim se Jisas i talem long ol pipol se i taem nao blong Hem i gobak long Papa mo tu, blong soem Hemwan long ol laen blong Isrel we oli bin lus.8 Taem Hem i sakem ae blong hem i go long grup blong ol pipol, Hem i luksave wota blong ae blong olgeta we oli lukluk stret nomo i go long Hem olsem se bae oli askem Hem blong i stap smol moa taem wetem olgeta.9
Ansa blong Sevya long Ol Man blong Nifae, tugeta i tajem hat mo i givim instraksen long olgeta. Mo Hem i talem: “Luk, ol insaed blong mi oli fulap wetem lav mo sore long yufala.”10
Mi biliv se bigfala sore blong Hem i moa bigwan bitim wan ansa we i go from ol wota blong ae blong ol pipol. I olsem se, Hem i save luk olgeta tru long ae blong atonmen mo sakrifaes blong Hem. Hem i luk evri soa, hadtaem, mo temtesen. Hem i luk sik blong olgeta. Hem i luk ol samting blong olgeta we oli no strong long olgeta, mo Hem i bin save tru long bigfala harem nogud blong Hem long Getsemane mo long Golgota, mo Hem i save olsem wanem blong helpem ol man blong hem long saed blong ol samting blong olgeta we oli no strong long olgeta.11
Long semmak wei, taem Sevya blong yumi, Jisas Kraes, i lukluk long yumi, Hem i luk mo andastanem soa mo hamas ol sin blong yumi oli hevi. Hem i luk ol samting we i had long yumi blong kontrolem mo ol jalenj blong yumi. Hem i stap luk ol defdefren kaen traehad mo hadwok blong yumi—mo Hem i fulap long bigfala sore mo lav long yumi.
Wetem bigfala gladhat blong Hem tru long invitesen we i go long Ol Man blong Nifae olsem “?Yufala i gat eniwan we i sik long medel blong yufala? Karem olgeta oli kam long ples ia. ?Yufala i gat eniwan we bodi blong olgeta i nogud, o oli blaen, o we leg blong olgeta i nogud, o we i handikap, o we i gat leprosi, o we haf bodi blong olgeta i ded, o we sora blong olgeta i fas, o we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala; ol insaed blong mi oli kam fulap wetem sore.”12
Mo ol pipol oli go fored “wetem evriwan we i gat hadtaem long eni fasin; mo hem i bin mekem olgeta evriwan oli kam oraet taem we oli karem olgeta oli go fored long hem.”13
Long 1990 mifala i stap laef long wan taon blong Sale, long Viktoria, Ostrelia. Mifala i hapi mo bisi wetem ol komitmen blong famli, Jos mo wok. Long wan naesfala sama long Satedei bifo Krismes, mifala i disaed blong visitim sam ples blong spel mo wan fevret ples long solwota. Afta we mifala i gat wan gudtaem wetem famli long wan naesfala dei, mifala putum evriwan i go long trak mo stap go hom. Long taem we mi stap draev, sot taem nomo mi slip mo mi aksiden from hed blong mi i lei long stia. Afta smoltaem mi oraet smol, mi lukluk raon long trak. Waef blong mi, Maxine, leg blong hem i brok we i nogud tumas, mo i stap traehad blong pulum win. Bigfala bun blong bak i brok. Trifala gel blong mitufala oli sek bigwan, be tangkyu se oli Oraet nomo. Mi kasem sam smosmol kil. Be bebi boe we i gat faef manis i no muvmuv o toktok.
Long medel blong bigfala wari mo tingting i fasfas from wanem we aksiden ia i mekem, bigfala gel blong mitufala, Kate we i gat 11 yia i talem hariap se, “Papa, yu nid blong givim wan blesing long Jarom.” Afta we mifala traehad, ol gel blong mi mo mi, mifala save kamaot long trak. Maxine i no save muv. Mi leftemap Jarom sloslo; afta mi ledaon long bak blong mi long graon, mi putum gud hem long jes blong mi mo givim wan prishud blesing long hem. Long taem we Ambulens i kasem ples ia, abaot 40 minit i pas, Jarom i openem ae blong hem.
Long naet ia, mi lego tri memba blong famli blong mi long hospital mo kasem wan taksi we i hariap nomo i dropem mi mo tufala gel blong mi. Tru long longfala naet ia, mi prea long Papa long Heven se famli blong mi mo olgeta we oli kasem kil long ol narafala trak, se bae oli kam oraet bakegen. Wetem bigfala sore, ol prea blong mi mo ol prea we i kam long hat blong plante long ol narawan, oli bin kasem ansa. Samtaem i pas, evriwan oli kam gud bakegen, wan bigfala blesing mo sore we i fulap.
Be yet, mi gohed blong gat ol dip filing blong sem mo rigret blong mekem wan nogud aksiden olsem. Bae mi stap wekap long naet mo tingbaot nogud aksiden ia mo wanem we i hapen afta long aksiden, i klia. Mi traehad blong plante yia blong fogivim miwan mo faenem pis. Afta, olsem wan we i gat prishud, taem mi stap helpem ol narawan blong sakem sin mo helpem olgeta blong filim sore mo lav, mo lav blong Sevya, mi luksave se Hem i save mekem mi kam gud bakegen.
Paoa blong hilim mo pemaot man blong Sevya, i aplae long ol mistek blong ol aksiden, pua desisen, ol jalenj mo ol defren kaen hadtaem—semmak tu long ol sin blong yumi. Taem mi tanem mi i go long Hem, ol filing blong mi blong sem mo rigret, sloslo, filing blong pis mo spel i tekem ples blong olgeta.
Presiden Russell M. Nelson i tijim: “Taem we Sevya i bin pem praes blong evri kaen man, Hem i bin openem wan rod blong olgeta we oli folem Hem blong save kasem hiling, paoa blong Hem mo paoa we i blong pemaot man. Ol janis ia long saed blong spirit oli stap long evriwan we oli wantem lisin gud long Hem mo folem Hem.”14
Ol brata mo sista, nomata se yu stap hevi wetem ol sin we yu no stretem, stap harem nogud from wan strong toktok we i kam agensem yu longtaem finis, o stap traehad blong fogivim yuwan from wan aksiden we i wan mistek, yu save kasem hiling paoa mo paoa blong pemaot man blong Sevya, Jisas Kraes.
Mi testifae se Hem i stap laef. Hem i Sevya mo Ridima blong yumi. Hem i lavem yumi. Hem i gat sore mo lav long yumi, mo Hem i fulap long sore, mo Hem i save hilim yu. Long nem blong Jisas Kraes, amen.