Wetaem blong Kasem Petriakel Blesing blong Yu
Taem yu kasem blesing blong yu, bae yu luksave mo filim hao Papa long Heven mo Jisas Kraes i lavem yu mo hao Oli lukluk nomo long yuwan.
Yestedei dia fren blong mi Elda Randall K. Bennett i bin tokbaot Petriakel blesing. I bin wan naesfala mesej mo i givim insperesen long yumi evriwan. Ol dia brata mo sista blong mi, ?bae mi save tokbaot Petriakel blesing tu? Ol Petriak, taem we ol rikwes blong petriakel blesing bae i kam antap, mi prea se Lod bae i blesem yufala taem yu gohed blong wok moa long koling blong yu.
Taem mi stap go long ol stek konfrens, oltaem mi visitim stek petriak wetem waef blong hem. Ol petriak oli naes, gat fasin blong obei, mo oli ol spesel lida we God i singaotem olgeta. Oli talem long mi plante gudfala eksperiens long saed blong spirit. Mi bin askem ol yia blong olgeta we oli yangfala go kasem olfala we oli bin givim blesing long olgeta. So hemia we i moa yang i gat 11 yia mo moa olfala, i gat 93 yia.
Mi bin kasem petriakel blesing blong mi olsem wan niu memba blong Jos, taem mi gat 19 yia, hemia 2 yia afta we mi bin baptaes. Petriak blong mi i bin wan olfala man. Hem i bin joenem Jos long 1916 mo i bin wan paeonia blong Jos long Japan. Hem i bin wan ona blong mi blong kasem petriakel blesing long wan spesel disaepol blong Lod. I had smol blong andastanem Japanis blong hem, be mi filim paoa long hem.
Plante long ol petriak we mi bin mitim oli talem long mi se plante we oli kasem petriakel blesing, hem i olgeta we oli rere blong go long misin. Ol dia yang man mo woman, ol papa mo mama, mo ol bisop, ol petriakel blesing oli no blong rere long olgeta nomo blong go long misin. Ol memba we oli klin inaf mo kasem baptaes oli save kasem petriakel blesing blong olgeta taem we i stret long olgeta.1
Ol dia adalt memba, sam long yufala i no bin kasem ol petriakel blesing blong yufala yet. Tingbaot se i no gat wan yia we i stop long hem.
Apu woman blong mi i bin wan aktiv Jos memba, mo stap olsem wan Rilif Sosaeti tija kasem we hem i bin ded taem hem i gat 90 yia. Mi bin sori tumas se hem i no bin kasem wan petriakel blesing. Hem i bin fesem plante hadtaem long laef blong hem, mo from hem i no bin gat wan we i holem prishud long hom, hem i no bin kasem plante prishud blesing. Wan petriakel blesing i save givim kamfot long hem long taem ia we hem i nidim moa.
Ol adalt, sapos yufala i no bin kasem wan petriakel blesing, !plis yu no wari! Laef blong evriwan long saed blong spirit i defdefren. Sapos yu gat 35 o 85 mo yu wantem blesing blong yu, toktok long bisop blong yu abaot hao blong kasem blesing.
Ol niu memba blong Jos, ?yufala i bin harem abaot petriakel blesing? Mi no bin save abaot janis ia blong kasem wan, taem mi joenem Jos, be bisop we mi lavem tumas i bin talem long mi abaot petriakel blesing mo leftemap tingting blong mi blong rere blong kasem, afta we mi baptaes. Ol dia niu memba, yu save kasem wan petriakel blesing tu. Lod bae i helpem yu taem yu rere from tabu janis ia.
Bae yumi tingting long tu stamba tingting blong kasem wan petriakel blesing:
-
Wan petriakel blesing i gat kaonsel insaed blong yuwan, we i kam long Lod.2
-
Wan petriakel blesing i talemaot laen blong yu insaed long haos blong Isrel.
Petriakel blesing i wan mesej we i kam long Papa long Heven we i gat ol promes mo ol kaonsel wetem insperesen insaed, blong givhan long yu truaot long laef blong yu. Wan petriakel blesing bae i no soemaot ful laef blong yu o ansarem evri kwestin blong yu. Sapos i no talemaot wan impoten taem long laef blong yu, yu no tekem se i minim se bae yu no save gat janis ia. Semmak, i no sua fulwan tu se evri samting long blesing blong yu bae i hapen long laef ia. Wan petriakel blesing i blong taem we i no save finis, mo sapos yu stap klin inaf, ol promes we oli no fulfil long laef ia bae yu save kasem long laef afta.3
Taem yu kasem blesing blong laen we yu kamaot long hem, bae yu kam blong save se yu kamaot long haos blong Isrel mo sid blong Ebraham.4 Blong andastanem se hemia i impoten, lukluk moa long ol promes we Lod i bin mekem long haos blong Isrel tru Ebraham.
Insaed ol promes ia i gat:
-
“Laen blong Hem bae i plante (luk long Jenesis 17:5–6; Ebraham 2:9; 3:14).
-
“Ol laen blong Hem bae i kasem gospel mo gat prishud (luk long Ebraham 2:9).
-
“Tru long seves blong laen blong hem, bae evri famli blong wol ia bae oli kasem blesing, we oli ol blesing blong Gospel, we oli ol blesing blong fasin blong sevem man, we i laef we i no save finis’ (Ebraham 2:11).”5
Olsem ol memba blong Jos, yumi ol pikinini blong kavenan.6 Yumi kasem ol blesing blong kavenan blong Ebraham, taem yumi obei ol loa mo odinens blong gospel.
Priperesen blong kasem petriakel blesing bae i helpem fet blong yu long Papa long Heven mo Jisas Kraes i kam antap. Mo taem yu kasem petriakel blesing blong yu mo rid mo tingting hevi long hem, bae yu save lukluk moa long hem plante taem.
Presiden Thomas S. Monson i eksplenem, “Semfala Lod ia we i bin givim wan Liahona long Lihae, i stap givim long yu, mo long mi, tedei, wan presen we oli no save faenem tumas, mo wan presen we praes blong hem i bigwan, we i stap givim daereksen long laef blong yumi, blong makem ol ples blong stap sef aot long hem, mo blong soem rod, iven ol rod we i sef—i no go long wan promes graon, be long hom blong yumi long heven.”7
Ol dia bisop, papa mo mama, presiden blong kworom mo Rilif Sosaeti, wod misin lida, ol givhan brata mo sista, plis leftemap tingting blong ol yang man mo yang woman, ol adalt memba, mo ol niu memba we oli no kasem petriakel blesing yet blong lukaotem daereksen mo help blong Lod taem oli stap rere long olgetawan.
Oltaem mi ridim petriakel blesing blong mi wetem prea; mo i stap leftemap tingting blong mi oltaem. Mi luksave wanem we Lod i wantem long mi, mo i helpem mi blong sakem sin mo gat tingting i stap daon. Taem mi rid mo tingting hevi, mi wantem tumas blong stap klin inaf blong save kasem ol promes blesing.
Olsem ol skripja we yumi ridim plante taem mo faenem niu mining afta, petriakel blesing blong yumi bae i gat defren mining long yumi long ol defdefren taem. Hemia blong mi i gat defren mining naoia bitim we taem mi gat 30 yia mo 50 yia. I no se ol toktok i jenis, be yumi luk olgeta long wan defren wei.
Presiden Dallin H. Oaks i talem se wan petriakel blesing oli givim anda long insperesen blong Tabu Spirit mo taem ridim mo intepretem, i mas anda long paoa ia blong sem Spirit. Mining blong wan petriakel blesing mo hamas i impoten, bae oli givim tijing folem tijing folem taem tru long paoa blong sem Spirit we i givim insperesen [ia].”8
Ol brata mo sista, mi talem witnes blong mi se Papa long Heven mo Wan Stret Pikinini Ia Nomo We Hem I Lavem, we I Lod Jisas Kraes, tufala i laef. Tufala i lavem yumi. Ol petriakel blesing, oli ol tabu presen we i kam long tufala. Taem yu kasem blesing blong yu, bae yu luksave mo filim hao Oli lavem yu mo hao Oli lukluk nomo long yuwan.
Buk blong Momon hem i wan narafala testeman blong Jisas Kraes. Tangkyu from wan profet we i stap laef i lidim yumi, Presiden Russell M. Nelson.
Tangkyu tumas from Sevya blong yumi, Jisas Kraes. Ista Sandei ia, bae mi lukluk long Hem mo long Resureksen blong Hem mo wosipim Hem mo talem tangkyu from sakrifaes blong Hem. Mi save Hem i safa bigwan, from lav we Hem i gat long yumi i bigwan. Mi save se Hem i bin girap bakegen long ded from I lavem yumi bigwan. Hem i ril. Mi testifae olsem, long nem blong Jisas Kraes, amen.