Wok blong Tempol mo Famli histri—Wan mo Semmak Wok
Wan impoten lukluk long plan blong Papa blong yumi long Heven i blong joenem ol famli long laef ia, mo long taem we i no save finis.
Mi mi glad tumas we wok blong stap bildim tempol i stap gogohed long “dispensesen ia blong taem blong evri wok blong God i kamtru” (Doktrin mo Ol Kavenan128:18). Long ol dei we Gospel i bin Kambak, ol fetful Sent oli bin mekem plante sakrifaes blong kasem ol tempol odinens mo ol kavenan. Folem ol gudfala eksampol blong olgeta, long 1975, afta plante sakrifaes long saed blong mane blong travel i go long Meksiko Siti, mi mo waef blong mi, Evelia, wetem papa mo mama blong mitufala we oli bin folem mitufala, mitufala i sil olsem hasban mo waef blong taem we i no save finis long Mesa Arisona Tempol. Long dei ia, taem we mifala i kam wan, tru long atoriti blong prishud insaed long haos blong Lod, mifala i bin eksperiensem wan lukluk blong heven.
Wok mo Stamba Tingting blong Ol Tempol
Eksperiens ia i helpem mi blong filim glad ia, afta long tri yia blong had wok mo sakrifaes, we ol Sent long Ketlan, Ohaeo, oli bin finisim naesfala tempol blong olgeta long spring blong 1836—faswan long dispensesen ia. Long Maj blong semmak yia, ova long wan taosen pipol oli bin kam tugeta long tempol mo fulumap gud ples long taem blong dedikesen. Profet Josef Smit i stanap blong talem prea blong dedikesen, we hem i bin kasem tru long revelesen (luk long Doktrin mo Ol Kavenan 109). Long prea ia hem i talem plante gudgudfala blesing we bae kam long olgeta we oli klin inaf blong go insaed blong ol tempol blong Lod. Afta long prea, kwaea i singsing long hym ia “Spirit blong God” mo evri man oli stanap mo singaot long Singaot blong Hosana “wetem plante [paoa] we i luk olsem … bae leftemap ruf blong haos” (Teachings of Presidents of the Church: Joseph Smith [2007], 307).
Wan wik afta, Profet i tokbaot we Lod i kamaot insaed long tempol, Hem i se:
“From luk, mi akseptem haos ia, mo nem blong mi bae i stap long ples ia; mo bae mi kamaot long ol pipol blong mi wetem sore insaed long haos ia.
“Mo nem blong haos ia bae i go kasem ol kantri long narafala ples; mo hemia i stat blong blesing we bae mi kapsaetem long hed blong ol pipol blong mi. ” (Doktrin mo Ol Kavenan 110:7, 10).
Afta long hemia mo ol nara visen, profet Elaeja, we Lod i bin tekemaot hem i go long heven mo i no testem ded, i bin kamkamaot long Profet Josef Smit mo Oliva Kaodri mo i talem:
“Luk, taem i kam fulwan, we maot blong Malakae—i testifae se hem [Elaeja] [we i profet] bae Lod i sendem hem, bifo long bigfala dei blong Lod we man bae i fraet long hem—
“Blong tanem hat blong ol papa i go long ol pikinini, mo hat blong ol pikinini i go long ol papa, nogud bae mi kilim ful wol ia wetem wan strong nogud tok—
“From hemia, Lod i givim ol ki blong dispensesen ia i go long ol han blong yutufala; mo tru long ol ki ia, bae yutufala i save se bigfala dei blong Lod we man bae i fraet long hem i stap kolosap, i stap long ol doa” (Doktrin mo Ol Kavenan 110:14–16).
Tempol mo Famli Histri
Afta we Lod i putumbak fulwan ol ki blong siling long Josef Smit, wok blong sevem man long tugeta saed blong vel i stat long dispensesen blong yumi (luk long 1 Korin 15:22, 29; Doktrin mo Ol Kavenan 128:8–18).
Presiden Boyd K. Packer i bin tijim se “impoten taem ia wol i no luk save, be i gat paoa ova long sol blong evri man we oli bin laef o bae oli laef long wol ia. Ol ting oli stap hapen sloslo. Jos ia i kam wan jos blong bildim tempol.
“Long wol ia tempol oli girap long evri ples, long wan wei, wan samting i no save stopem, pipol mo ol oganaesesen mo ol sosaeti oli interes blong faenem ol famli laen blong olgeta. Evri samting ia i tekem ples afta we Elaeja i kamkamaot long Ketlan Tempol” (The Holy Temple [1980], 141).
“Stat long dei ia, Epril 3, 1836, hat blong ol pikinini i stat blong tanem i go long ol papa. From hemia ol odinens oli no blong sot taem, be oli stap blong taem we i no save finis. Siling paoa i stap wetem yumi. I no gat wan atoriti we i bigwan bitim valiu blong hem. Paoa ia hem i givim pruf mo wan lukluk we i no save finis long evri odinens we i hapen wetem stret atoriti blong olgeta we oli laef mo ol ded man” (Preparing to Enter the Holy Temple [2002], 28).
Ol dia brata mo sista, konstraksen mo stret fasin blong yusum ol tempol long eni dispensesen hem i wan saen blong tru Jos Ia blong Jisas Kraes. Afta long dedikesen blong Sol Lek Tempol long 1893, Presiden Wilford Woodruff i leftemap tingting blong ol memba blong Jos blong faenem ol rekod blong ol bubu blong olgeta mo rekodem ol famli laen blong olgeta i go bak biaen we oli save kasem blong mekem se oli save karem ol nem i go insaed long tempol mo mekem ol odinens blong sevem man mo fasin blong kam olsem wan god (luk long Teachings of Presidents of the Church: Wilford Woodruff [2004], 174).
Wok blong Tempol mo Famli Histri—Wan Wok
Wan yia afta long (1894), semmak Presiden Woodruff i lukaotem wok blong Genealogical Society blong Yuta. Wan handred yia i pas, long 1994 Elda Russell M. Nelson, long taem ia hem i wan memba blong Kworom blong Olgeta Twelef i talem se, “Ol samting we oli hapen long yia blong histri ia hem i stat blong famli histri risej mo tempol seves olsem wan wok insaed long Jos” (“The Spirit of Elijah,” Ensign, Nov. 1994, 85).
Famli Histri Wok
Ol dia brata mo sista, Lod i leftemap tingting blong yumi olsem ol memba blong Jos Ia blong Hem blong kipim famli histri blong yumiwan, blong lanem abaot ol bubu blong yumi, mo blong mekem ol impoten arenjem blong olgeta blong oli kasem ol odinens blong gospel insaed long ol tempol blong helpem olgeta blong gro long kavenan rod ia, we bae i blesem olgeta wetem wan famli we i no save finis. Hemia i wan stamba lukluk blong plan blong Papa long Heven blong: karem tugeta ol famli long wol ia, mo long taem we i no save finis.
Long yufala we i no filim se yufala i save mekem wok ia, yu mas save se yu no stap yuwan. Yumi evriwan i save yusum ol tul we Jos i rere long hem mo we i stap long FamilySearch senta, we yumi save olsem ol famli histri senta. Olgeta FamilySearch senta ia oli disaenem blong mekem se evriwan, wetem smol help, i save faenem ol infomesen blong ol bubu blong olgeta mo oganaesem gud blong mekem se oli save tekem i go long haos blong Lod. Plis kontaktem ol famli histri konsalten long wod o branj blong yu blong oli gaedem yu long evri step long wanem yu nidim.
Taem yumi folem gaed blong ol profet mo lanem olsem wanem blong mekem famli histri mo mekem ol odinens long tempol blong ol bubu blong yumi, bae yumi eksperiensem bigfala glad kasem mak ia we yumi no save stop blong stap mekem. Yumi bae filim spirit i strong long ol hat blong yumi, we i mekem yumi yusum ol skil mo talen blong yumi blong mekem, mo gaedem yumi taem yumi stap lukaotem ol nem blong ol bubu blong yumi. Be bae yumi tingbaot se famli histri i moa bitim blong stap lukaot ol nem, ol deit, mo ol ples. Hem i blong stap tekem ol famli oli kam tugeta mo filim glad ia we i kam taem yumi stap givim long olgeta ol odinens blong gospel.
Mi lavem ol tijing blong insperesen blong profet blong yumi we yumi lavem tumas, Presiden Russell M. Nelson, we i talem se: Tempol i stap long medel blong mekem fet mo paoa blong yumi long saed blong spirit i kam strong moa, from se Sevya mo doktrin blong Hem oli stap long hat blong tempol. Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol Impoten odinens blong Hem oli fasem yumi wetem Hem tru long ol tabu prishud kavenan. Taem yumi kipim ol kavenan blong yumi, Hem i kavremap yumi wetem paoa blong Hem paoa ia i save hilim mo givim moa strong paoa long yumi” (“Tempol mo Fandesen blong Yu long Saed blong Spirit,” Liahona, Nov. 2021, 93).
I tru we wok blong tempol mo Famli Histri i wan mo semmak wok insaed long Jos ia.
Mi testifae long ol tru tok ia. Mi save se hemia i Jos Ia blong Jisas Kraes, Sevya mo Ridima blong yumi, we yumi tingbaot mo onarem moa long Ista taem ia. Mi save se Hem i lavem yumi, mo taem yumi kipim ol kavenan blong yumi mo putum tras blong yumi long Hem, Hem i kavremap yumi wetem hiling blong Hem mo paoa blong kam strong. Long nem blong Jisas Kraes, amen.