Ua Manaomia i Latou e Faatupuina le Filemu
Ua ia te oe lau faitalia e filifili ai ia finauga po o le faaleleiga. Ou te uuna’ia outou ia filifili e avea o sē e faatupuina le filemu, i le taimi nei ma aso uma.
O’u uso e ma tuafafine pele e, o se fiafiaga le i ai faatasi ma outou. I nei masina e ono ua tuana’i atu, sa outou i ai pea lava pea i lo’u mafaufau ma i a’u tatalo. Ou te tatalo o le a faafesoota’i atu e le Agaga Paia mea e finagalo le Alii tou te faalogo i ai a’o o’u talanoa atu ia te outou i le taimi nei.
I le taimi o o’u galue faata’ita’i i le faiga o taotoga i le tele o tausaga ua mavae, sa ou fesoasoani ai i se foma’i tipitipi sa tipiesea [tulou] se vae na faatumulia i ‘afu’afu ua āfāina. Sa faigata le ta’otoga. Ona, faaopoopo atu lea i le to’atuga, sa le lelei le faatinoga o le pitola’au a se tasi o le ‘au tipitipi, ma sa faafuase’i ona faali’i le foma’i tipitipi. I le totonugalemu o lona mateletele, sa ia petia ai lana naifi faamoe sa tumu i siama. Na tu i le va o lo’u tapulima ma le tulilima!
O tagata uma sa i le potu tipitipi—vagana ai le foma’i tipitipi ua lē lava le onosa’i—sa fememea’i i le mata’utia o lona solia o faiga faavae tau i ta’otoga. O le mea e faafetai ai, ou te le’i āfāina. Ae o lenei aafiaga na tuua ai se uunaiga tumau ia te a’u. I lena lava itula, sa ou folafola ai ia te a’u lava e faapea po o le a lava se mea e tupu i totonu o lo’u potu tipitipi, o le a ou lē faatalaloaina lava o’u lagona. Sa ou tauto foi i lena aso e aua lava ne’i togiina soo se mea i le ita—pe o se naifi faamoe po o ni upu.
E oo lava i le taimi nei, ua fiasefulu tausaga mulimuli ane ai, ou te mafaufau ai lava a’u ia pe na sili atu le ‘ona o le naifi faamoe eleelea lea sa tu i lo’u lima, nai lo finauga fe’aina’i ia o loo āfāina ai a tatou talatalanoaga faalaua’itele ma le mau sootaga patino i ona po nei. Ua foliga mai ua mou atu aga faatamalii ma le vatapuia i lenei vaitau o feeseesea’iga fevaevaea’i ma le faatauagafau.
Ua matua’i fai ma mea masani le fai upu masoā, sa’ili masei, ma le tautala leaga e uiga i isi. Ua to’atele na’uā le au tomai faapitoa, ‘au fai polotiki, ‘au faafiafia, ma isi ‘au faatosina e soona lafoina pea upu faatiga. Ua ou matuā popole lava ona ua matua’i toatele na’uā tagata ua foliga mai ua talitonu faapea, ua taliaina atoatoa le ta’usalaina, faatauma’oia, ma faamaasiasia soo se tasi e le ioeina faatasi ma i latou. E toatele e foliga mai ua naunau e faaleaga le ta’uleleia o se tasi i nai fasifuaitau matagā ma faatigā.
O le ita e lē faasufia ai lava. O le faali’i e le mafai ona malosi ai se tasi. O finauga e le mafai lava ona maua ai ni faai’uga musuia. O le mea e faanoanoa ai, o nisi taimi tatou te vaaia ai amioga fefinaua’i i totonu lava o o tatou au paia. Ua tatou faalogo e uiga ia i latou o ē e tu’umaualaloina o latou ta’itoalua ma fanau, i latou o ē e faaaogaina le ita mateletele e pulea ai isi, ma i latou o ē e faasalaina tagata o le aiga i le “faiga faagūgū.” Ua tatou faalogo e uiga i talavou ma fanau e faafia malolosi ma tagata faigaluega e tu’umaualaloina ē latou te galulue.
O’u uso e ma tuafafine pele, e le tatau ona tupu lenei mea. I le avea ai o ni soo o Iesu Keriso, e tatau ona avea i tatou o faaa’oa’o o le ala e fegalegalea’i ai ma isi—aemaise pe a i ai ni eseesega o o tatou manatu. O se tasi o ala aupito faigofie e faailoa ai se soo moni o Iesu Keriso o le ala e taulima ai ma le agaalofa e lena tagata isi tagata.
Na faamanino mai e le Faaola lenei mea i Ana lauga i soo i itulagi uma e lua. “Amuia e faatupuina le filemu,” na Ia fetalai ai.1 “Ai se na te po mai i lou alafau taumatau, ia liliu atu foi ia te ia le isi.”2 O le mea moni, ona, Ia tuuina atu lea o le apoapoa’iga lea ua lu’iina ai i tatou taitoatasi: “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.”3
A o lumanai Lona maliu, sa poloaiina e le Faaola Ana Aposetolo e Toasefululua ia alofa atu le tasi i le isi e pei ona Ia alofa mai ia i latou.4 Ma ona Ia faaopoopo atu lea, “O le mea lea e iloa ai e tagata uma lava o o’u soo outou, pe afai ua outou fealofani.”5
E manino lava le savali a le Faaola: O Ona soo moni e atia’e, siitia, faamalosiau, faasufi, ma musuia—po o le a lava le faigata o le tulaga. O soo moni o Iesu Keriso o tagata e faatupuina le filemu.6
O le asō o le Aso Sa o le Lau Pama. O loo tatou sauniuni e faamanatu le mea aupito sili ona taua ma maoa’e na tupu, ua tusifaamaumauina i le lalolagi, o le Togiola lea ma le Toetu o le Alii o Iesu Keriso. O se tasi o auala pito sili e mafai ai ona tatou faamamaluina le Faaola o le avea lea ma sē e faatupuina le filemu.7
O le Togiola a le Faaola ua mafai ai e i tatou ona manumalo i mea leaga uma —e aofia ai finauga. Aua lava ne’i e sese ai: o finauga e leaga! Na ta’utino mai e Iesu Keriso e faapea o i latou ua i ai “le agaga o le finauga” e lē mai ia te Ia lea, ae “mai le tiapolo, o le tamā lea o finauga, ma [o le tiapolo] e faaosoina foi loto o tagata e fefinauai ma le ita, o le tasi i le isi.”8 O i latou o ē faaosoina le finauga ua latou faia foi le mea lea e faia e Satani, pe o latou iloaina pe leai foi. “E leai se na te mafaia ona auauna i alii e toalua.”9 E le mafai ona tatou lagolagoina Satani i a tatou osofa’iga i upu ona manatu lea faapea e mafai lava ona tatou auauna atu i le Atua.
O’u uso e ma tuafafine pele, e matuā taua lava le auala tatou te taulima ai e le tasi le isi! O le ala tatou te tautatala atu ai i isi ma e uiga i isi i le fale, i le lotu, i le galuega, ma upega tafa’ilagi e taua tele. O le asō o le a ou talosagaina ai i tatou e fegalegalea’i ma isi i se ala maualuga atu ma sili ona pa’ia. Faamolemole faalogo lelei. “Afai o i ai ni isi mea e mamā, matagofie, pe logoleleia pe ta’uleleia,”10 e mafai ona tatou fai atu ai e uiga i se isi tagata—pe a o tilotilo mai pe i ona tua atu—o le mea lena e tatau ona avea ma ala masani o a tatou fesootaiga.
Afai e tatala le faaipoipoga a se ulugalii i la outou uarota, po o se faifeautalai talavou ua vave faafo’i mai i le fale, po o se talavou ua faaletonu lana molimau, latou te le manaomia lau faamasinoga. Latou te manaomia ona iloa le alofa mama o Iesu Keriso o atagia atu i au upu ma faatinoga.
Afai e i ai se uo i luga o fesootaiga faaagafesootai e i ai ni manatu malolosi faaupufai pe faaagafesootai ia e faalavelaveina ai mea uma e te talitonu i ai, o sau tali atu ma le ita, ma faatiga o le a lē fesoasoani. O le fauina o alalaupapa o le malamalama, o le a manaomia tele ai lou taimi, ae o le mea tonu lava lena e manaomia e au uo.
O finauga e tata’iese ai le Agaga—i taimi uma. O finauga e saga faamalosia ai manatu sese faapea o le fevataua’i ole ala lea e fo’ia ai eseesega; ae e leai lava. O finauga o se filifiliga. O le faatupuina o le filemu o se filifiliga. Ua ia te oe lau faitalia e filifili ai ia finauga po o le faaleleiga. Ou te uuna’ia outou ia filifili e avea o sē e faatupuina le filemu, nei ma aso uma.11
Uso e ma tuafafine, e mafai ona tatou suia totino le lalolagi—tasi le tagata ma tasi le fegalegalea’iga i le taimi. E faapefea? E ala i le faata’ita’i atu o le ala e faafoe ai eseesega faamaoni o manatu faatasi ma le faaaloalo moni ma talanoaga faamamaluina.
O eseesega o manatu o se vaega o le olaga. Ou te galue i aso taitasi ma ni auauna tuuto a le Alii, o ē lē vaai atu i se faafitauli i le ala lava e tasi. La te silafia ou te fia faalogo i o la’ua manatu ma lagona faamaoni e uiga i mea uma matou te talanoaina—aemaise o mataupu ma’ale’ale.
O o’u fesoasoani tamaalii, o Peresitene Dallin H. Oaks ma Peresitene Henry B. Eyring, e tumatila i le ala la te faaalia ai o la’ua lagona—aemaise pe a ono eseese. La te faia lava ma le alofa mamā mo le tasi ma le isi. E le faapea mai se tasi e sili atu lona silafia ma o lea e tatau ai ona puipuia ma le toto’a lona tulaga. E le faaalia foi e se tasi le manaomia ona faatautavā le tasi i le isi. Ona e tofu faatumulia i la’ua i le alofa mama, “o le alofa mama o Keriso,”12 e mafai ai ona ta’iala a matou felafolafoa’iga e le Agaga o le Alii. E ma’eu lo’u alofa ma faamamaluina o ia tamaalii maoa’e!
O le alofa mama o le vailaau lea o finauga. O le alofa mama o le meaalofa faaleagaga e fesoasoani ia i tatou e lafoa’i ese ai le tagata natura, o lē e manatu faapito, taupunipuni, faamaualuga, ma lotoleaga. O le alofa mama o le uiga ‘autu lea o se soo moni o Iesu Keriso.13 O le alofa mama e faamatalaina ai sē e faatupuina le filemu.
Pe a tatou faalotomaualaloina i tatou lava i luma o le Atua ma tatalo atu ma le malosi uma o o tatou loto, o le a faaee mai e le Atua ia i tatou le alofa mama.14
O i latou e faamanuiaina i lenei meaalofa faalelagi, e tali-tiga ma agalelei. Latou te le losilosivale i isi ma e lē faafefeteina foi. E le faaitaitagofie, ma e le tuuina atu foi i nisi le leaga.15
Uso e ma tuafafine, o le alofa mama o Keriso o le tali lea i finauga ia ua āfāina ai i tatou i le taimi nei. O le alofa mama e uuna’ia ai i tatou e “tauave avega a le tasi”16 nai lo le faafaupu’e o avega i luga o le tasi. O le alofa mama o Keriso e mafai ai ona tatou “tutu o ni molimau o le Atua i taimi uma ma i mea uma, ma i nofoaga uma”17—aemaise i tulaga popolevale. O le alofa mama e mafai ai e i tatou ona faapupula atu le ala e tautatala atu ai alii ma tamaitai o Keriso ma faatino—aemaise le taimi e osofa’ia ai e faitioga.
Ia, ou te le o talanoa atu e uiga i le “filemu e ono le amana’ia ai po o le a le mea e le iloa pe lafoa’i foi.”18 O loo ou talanoa atu e uiga i le taulimaina o isi i auala e ogatusa ma le tausiga o le feagaiga tou te osia pe a taumamafa i le faamanatuga. Tou te osifeagaiga e manatua pea le Faaola. I tulaga e maualuga ai le popolevale ma tumu i finauga, ou te valaaulia outou ia manatua Iesu Keriso. Tatalo ia maua le lototele ma le poto e ta’u atu ai pe faia le mea semanu Na Te faia. A o tatou mulimuli i le Alii o le Filemu, o le a avea i tatou ma ē e faatupuina le filemu.
I le taimi lenei, atonu o e mafaufau faapea o le a fesoasoani moni lenei savali i se tasi e te iloaina. Atonu o loo e faamoemoe o le a fesoasoani ia te ia, ia lelei atili atu ai ia te oe. Ou te faamoemoe o le a tupu! Ae ou te faamoemoe foi o le a vaavaai loloto ifo ai i lou loto, e vaai ai pe o i ai ni nai nutigāmea o le faamaualuga po o le lotoleaga o loo taofiofia ai oe mai le avea ai o sē e faatupuina le filemu.19
Afai e te faamaoni e uiga i lou fesoasoani e faapotopoto Isaraelu ma le fauina o sootaga o le a tumau e oo i le faavavau, o le taimi lenei e lafoa’iese ai mea inosia. O nei o le taimi lea ia faamuta ai lou tausiusi pea a lē o lau ala ia e leai. O nei o le taimi lea ia taofi ai le faia o mea e faaeteetegatā ai isi ona o le popole i e ita. O nei o le taimi lea e tatanu ai au auupega o le taua.20 Afai ua tumu lau ma’a faaleo i mea faatiga ma tu’uaiga, o nei o le taimi lea e lafoa’ia ai.21 O le a e tula’i a’e o se alii po o se tamaitai malosi o Keriso.
E mafai ona fesoasoani le malumalu ia i tatou i la tatou tulimata’iga. O iina e faaeeina ai i tatou i le mana o le Atua, ma aumaia ai ia i tatou le tomai e faatoilalo ai Satani, o le faama’ite o finauga uma .22 Lafoai ese o ia mai au sootaga! Manatua tatou te a’oa’ia foi le fili i taimi uma tatou te faamalolo ai se lē malamalama, pe teena foi le faia o se solitulafono. Nai lo lena, e mafai ona tatou faaali atu le alofa mutimutivale o le uiga iloga lea o soo moni o Iesu Keriso. O ē faatupuina le filemu e faafememea’ia le fili.
Ia avea i tatou o se nuu ua avea o se malamalama moni i luga o le maupu’epu’e—o se malamalama e “le mafai ona lilo.”23 Se’i o tatou faaali atu e i ai se auala filemu ma faaaloalogia e foia ai faafitauli lavelave ma se ala a’oa’oina e soalaupule ai ni feeseesea’iga. A e faata’ita’ia le alofa mama lea e faaalia e soo moni o Iesu Keriso, o le a faalautele e le Alii au taumafaiga i talaatu o ou mafaufauga sili’ilagi.
O le upega o le talalelei o le upega aupito sili lea i le lalolagi. Ua valaaulia e le Atua tagata uma e o mai ia te Ia, “uliuli pe paʼepaʼe, e pologa pe saoloto, o tane ma fafine.”24 O loo i ai se avanoa mo tagata uma. Peitai, e leai se avanoa mo le faamasinosino, faitioga, po o finauga o soo se ituaiga.
O’u uso e ma tuafafine pele, e i ai mea aupito sili o le a oo mai mo i latou o ē faaalu o latou olaga e atia’e ai isi. O le asō ou te valaaulia outou e suesue lou tulaga faaleso’o i totonu o le vaaiga i le auala e te taulimaina ai isi. Ou te faamanuia ia te oe ina ia e faia soo se fetuuna’iga e ono manaomia ina ia malualii, ma faaaloalogia lau amio, ma o se sui lava o se soo moni o Iesu Keriso.
Ou te faamanuia ia te oe ia suia le ‘ina’inā i le ‘aioi, o le inoino i le malamalama, ma finauga i le filemu.
O loo soifua le Atua! O Iesu o le Keriso. O loo tu o Ia i le ao o lenei Ekalesia. O i tatou o Ana auauna. O le a Ia fesoasoani mai ia avea i tatou ma Ana faatupu filemu. O lea ou te molimau atu ai i le suafa paia o Iesu Keriso, amene.