මහත්මයා, අපිට යේසුස්වහන්සේව දකින්න අවශ්යයි
අපට යේසුව දැකීමට අවශ්ය වන්නේ උන්වහන්සේ කවුද කියා දැනගැනීමට සහ උන්වහන්සේගේ ආදරය දැනීමටයි.
මුහුණු අන්ධභාවය
1945 වසන්තයේ දිනක, එක් තරුණයෙක් හමුදා රෝහලකදී අවදි වුණා. ඔහු ජීවත් වීමට වාසනාවන්ත වී තිබුණා—ඔහුගේ කනට පිටුපසින් වෙඩි වැදී තිබුණා, නමුත් වෛද්යවරුන් සැත්කම් කළ අතර, ඔහුට දැන් සාමාන්ය ලෙස ඇවිදීමට හා කතා කිරීමට පුළුවන්.
ඛේදජනක ලෙස ඒ උණ්ඩයෙන් ඔහුගේ මොළයේ මුහුණු හඳුණාගන්නා කොටසට හානි සිදු වී තිබුණා. ඔහු තම බිරිඳ දෙස බලා ඇයව හඳුනාගැනීමට නොහැකිව ඔහේ බලා සිටියා; ඔහු තම මවවත් හඳුනා ගත්තේ නෑ. කණ්නාඩියෙන් පෙණුනු මුහුණ පවා ඔහුට ආගන්තුක වුණා—එය පිරිමියෙකු හෝ ගැහැණියක් දැයි පවා ඔහුට හඳුනාගත නොහැකි වුණා.1
ඔහු මුහුණු අන්ධභාවය ලබා තිබුණා—එය මිලියන ගණනක් මිනිසුන්ට බලපාන තත්වයක්.2
දැඩි ලෙස මුහුණ අන්ධභාවයට පාත්ර වුණු පුද්ගලයන් නීති කටපාඩම් කිරීමෙන් අන් අයව හඳුනා ගැනීමට උත්සාහ කරනවා—දියණියක්ව ඇයගේ ලප කැළැල් රටාවෙන් හෝ මිතුරියක්ව ඇගේ කකුල අද්දවා ඇවිදින රටාව වැනි නීති හාවිතයෙන් හඳුනාගන්න පුළුවන්.
වැඩීම
මෙන්න මගේ නිවසට ආසන්න දෙවන කථාව: කුඩා පිරිමි ළමයෙකු ලෙස, මම බොහෝ විට නීති සම්පාදනය කරන්නා ලෙස දැක්කේ මගේ අම්මාව. මට සෙල්ලම් කළ හැක්කේ කොයි වෙලේද සහ මම නින්දට යා යුත්තේ කොයි වෙලේද, නැත්නම් දරුණුම දේ තමා මිදුලේ වල් පැලෑටි ගලවන්න ඕනෙ කොයි වෙලේද කියලා ඇය තීරණය කළා.
ඇය ඇත්තෙන්ම මට ආදරය කළා. නමුත් මගේ ලැජ්ජාවට කරුණ තමයි බොහෝ විට මම ඇයව දුටුවේ “කීකරු විය යුතු කෙනා” ලෙස පමණයි.
අවුරුදු ගාණකට පස්සේ තමයි මම ඇයව සැබෑ කෙනෙක් විදිහට දැක්කෙ. අවුරුදු ගණනාවක් තිස්සේ ඇය පැරණි සායවල් දෙකක් (මම අලුත් පාසල් ඇඳුම් ලබා ගන්නා විට) පමණක් ඇඳසිටින විට, නැතහොත් දවස අවසානයේදී ඇය බොහෝ වෙහෙසට පත්වී සිටින විට මාව ඉක්මනින්ම නින්දට යැවීමට බොහෝ උනන්දු වන විට ඇගේ පරිත්යාගය මා කිසිවිටෙකත් නොදැකීම මෙන්ම ඒ ඇයි දැයි කල්පනා නොකිරීම ගැන මම ලැජ්ජා වනවා.
අපිටත් මුහුණ අන්ධභාවය තිබෙන්න පුළුවන්.
සමහර විට ඔබට මේ කතා දෙක ඇත්තටම එක කතාවක් බව පෙනෙනවා ඇති—වසර ගණනාවක් තිස්සේ, මම, ඇත්ත වශයෙන්ම, මුහුණු අන්ධභාවයෙන් විපාක ලබා තිබෙනවා. මගේ අම්මාව සැබෑ පුද්ගලයෙක් ලෙස දැකීමට මට නොහැකි වෙලා. මම ඇගේ නීති දැක්කා, නමුත් ඒවා තුළ ඇගේ ආදරය දැක්කෙ නෑ.
මම මේ කතා දෙක ඔබට කියන්නේ එක් කරුණක් ඉදිරිපත් කරන්නයි: යම් ආකාරයක ආධ්යාත්මික මුහුණු අන්ධභාවයකින් පෙළෙන කෙනෙකු (සමහර විට ඔබ විය හැකියි) ඔබ හඳුනනවා ඇති කියා මම සිතනවා.
දෙවියන්වහන්සේව ප්රේමණීය පියෙකු ලෙස දැකීමට ඔබ අරගල කරනවා වෙන්න පුළුවන්. ඔබ ස්වර්ගය දෙස බලා, ප්රේමයේ සහ දයාවේ මුහුණ නොව, ඔබ ගමන් කළ යුතුම මාර්ගයේ ඇති නීති රැසක් දකිනවා වෙන්න පුළුවන්. දෙවියන්වහන්සේ ස්වර්ගයන් පාලනය කරමින්, උන්වහන්සේගේ අනාගතවක්තෘවරුන් හරහා කථා කරමින්, සහ ඔබේ සහෝදරියට ආදරය කරනවා යැයි විශ්වාස කරන විට, ඒත් උන්වහන්සේ ඔබට ආදරය කරන්නේ දැයි රහසින් කල්පනා කරනවා විය හැකියි.3 සමහර විට යකඩ අත්වැට ඔබේ අත්වලට දැනී ඇති නමුත් එය ගෙන යන ඔබේ ගැලවුම්කරුවාගේ ආදරය තවමත් ඔබට දැනී නැතිවන්නට පුළුවන්.4
ඔබ මෙවැනි අයව හඳුනනවා ඇති කියා මම හිතනවා, මොකද මම දිගු කලක් මෙවන් කෙනෙක් වෙලා සිටියා—මම අධ්යාත්මිකව මුහුණු අන්ධබවේ සිටියා.
නීති රීති අනුගමනය කිරීම සහ නොපෙනෙන ප්රමිතීන්ට අනුව ජීවත්වීම මාගේ ජීවිතය කියා සිතුවා. දෙවියන්වහන්සේ ඔබට ආදරය කරනවා කියා මම දැනසිටියත් එය මට දැනී තිබුනේ නැහැ. මගේ ස්වර්ගික පියාණන් සමඟ සිටිනවාට වඩා ස්වර්ගයට යාම ගැන සිතුවාදැයි කියා මම කරදරයට පත්වනවා.
ඔබත් මම මෙන්ම සමහර විට තොල් සොලවන නමුත් “ප්රේමයේ මුදවා ගැනීමේ ගීතය”5 ගායනා නොකරන්නේ නම්, අපිට කරන්න පුළුවන් මොකක්ද?
සභාපති නෙල්සන් අපට මතක් කරන පරිදි පිළිතුර සෑම විටම යේසුස්වහන්සේයි.6 ඒ වගේම එය ඉතා හොඳ ආරංචියක්.
මහත්මයා, අපිට යේසුස්වහන්සේව දකින්න අවශ්යයි
යොහාන් පොතේ මම ආදරය කරන කෙටි පදයක් තිබෙනවා. වැදගත් ඉල්ලීමක් සමඟ උන්වහන්සේගේ ගෝලයන් වෙත ගමන් කරන පිටස්තරයින් පිරිසක් ගැන එහි සඳහන් වෙනවා. “මහතාණෙනි, අපි යේසුස්වහන්සේ දකින්ට කැමැත්තෙමු”7 කියා ඔවුන් කියනවා.
අප සැමට අවශ්ය වන්නේ එයයි—එනම් යේසුස්වහන්සේව සැබෑ ලෙස දැකීම සහ උන්වහන්සේගේ ආදරය දැනීමයි. සභාවේ අප කරන බොහෝ දේට සහ නිසැකවම සෑම සක්රමේන්තු රැස්වීමකටම හේතුව මෙය විය හැකියි. කුමන ආකාරයේ පාඩමක් ඉගැන්විය යුතුද, කුමන ආකාරයේ රැස්වීමක් සැලසුම් කළ යුතුද, ඒවගේම උපස්ථායකයින්ව අතහැර ඩොජ්බෝල් ක්රීඩා කළ යුතුද යන්න ඔබ කල්පනා කරන්නේ නම්, ඔබට මෙම වැකිය ඔබේ මාර්ගෝපදේශය ලෙස ගන්න පුළුවන්: මෙය මිනිසුන්ට යේසුස් ක්රිස්තුස්වහන්සේව දැකීමට සහ උන්වහන්සේට ආදරය කිරීමට උපකාර කරයිද? එසේ නොවේ නම්, සමහර විට වෙනත් දෙයක් උත්සාහ කරන්න.
මම අධ්යාත්මිකව මුහුණු අන්ධතාවයෙන් පෙළෙන බව, සහ මම නීතිරීති දුටුවත් පියාණන්ගේ දයාවේ මුහුණ නොදුටු බව මට වැටහුණු විට, එය සභාවේ වරදක් නොවන බව මම දැන සිටියා. එය දෙවියන්වහන්සේගේ වරදවත්, එයින් අදහස් කරන්නේ සියල්ල නැති වූ බවවත් නොවේ; එය අපි සෑම කෙනෙක්ම ඉගෙන ගත යුතු දෙයක්. නැවත නැඟිටීම පිළිබඳ මුල් සාක්ෂිකරුවන් පවා නැවත නැඟිටුවනු ලැබූ ස්වාමින්වහන්සේ සමඟ බොහෝ විට මුහුණට මුහුණ ලා පැමිණි නමුත් උන්වහන්සේව හඳුනා ගත්තේ නැහැ; උද්යාන සොහොන්ගැබේ සිට ගලීලයේ වෙරළ දක්වා, උන්වහන්සේගේ පළමු අනුගාමිකයන් “යේසුස්වහන්සේ සිටගෙන සිටිනු දුටු අතර ඒ යේසුස්වහන්සේ බව දැන සිටියේ නැහැ.”8 ඔවුන්ට උන්වහන්සේව හඳුනා ගැනීමට ඉගෙන ගැනීමට සිදු වුණා, අපිටත් එසේමයි.9
පිවිතුරු ප්රේමය
මම ආත්මික මුහුණු අන්ධතාවයෙන් පෙළෙන බව දුටු විට, උන්වහන්සේගේ ගෝලයන්ට පොරොන්දු වී ඇති ප්රේමයෙන් පූර්ණ වීමට “හදවතේ මුළු ශක්තියෙන්” යාච්ඤා කරන ලෙස වූ මොර්මොන්ගේ උපදේශය අනුගමනය කිරීමට මම පටන් ගත්තා, ඒ—උන්වහන්සේ වෙනුවෙන් ඇති මගේ ප්රේමයෙන් සහ මා වෙනුවෙන් ඇති උන්වහන්සේගේ ප්රේමයෙන් පූර්ණ වී, එමෙන්ම “උන්වහන්සේව උන්වහන්සේ ලෙසම දකින පිණිස,” “සහ මෙම බලාපොරොත්තුව ඇතිවන පිනිසය.”10 දෙවියන්වහන්සේට ප්රේම කිරීමේ පළමු ශ්රේෂ්ඨ ආඥාව පිළිපැදීමටත් එමෙන්ම “සියලු සදාකාලිකත්වයේ පළමු ශ්රේෂ්ඨ සත්යය වන … දෙවියන්වහන්සේ උන්වහන්සේගේ මුළු හදවතින්, බලයෙන්, මනසින් සහ ශක්තියෙන් අපට ප්රේම කරන බව” දැනීමටත් හැකි වන ලෙස මම වසර ගණනාවක් යාච්ඤා කළා.11
ශුභාරංචීන්
මම ශුභාරංචි හතර කියවා, නැවත කියවා, නැවතත් කියෙව්වේ—මෙවර කියෙව්වේ උන්වහන්සේගේ නීති උකහා ගැනීමට නොවේ, නමුත් උන්වහන්සේ කවුද සහ උන්වහන්සේ ආදරය කරන්නේ මොනවාටද කියා බැලීමටයි. ඒවගේම, කාලයාගේ ඇවෑමෙන්, උන්වහන්සේගෙන් ගලා ආ ප්රේම ගංගාවෙන් මාව ගසාගෙන ගියා.
උන්වහන්සේව එවා ඇත්තේ “බිඳුණු හදවත් ඇති අයව සුව කිරීමටත්, වහලුන්ට නිදහස ප්රකාශ කිරීමටත්, අන්ධයන්ට පෙනීම ලබා දීමටත්” බව උන්වහන්සේ පැවසුවා.12
මෙය කළ යුතු දේවල් වල ලැයිස්තුවක් හෝ හොඳ මහජන සම්බන්ධතාවක් පමණක් නොවේ; එය උන්වහන්සේගේ ආදරයේ හැඩයයි.
ශුභාරංචි අහඹු ලෙස විවෘත කරන විට; සෑම පිටුවකම පාහේ අප දකින්නේ උන්වහන්සේ සමාජීය, අධ්යාත්මික සහ ශාරීරික වශයෙන් දුක් විඳින මිනිසුන්ට සැලකිල්ල දක්වන බවයි. දූෂිත හා අපිරිසිඳු13 කියා සලකන මිනිසුන්ව උන්වහන්සේ ස්පර්ශ කළ අතර කුසගින්නෙන් පෙළෙන අයව පෝෂණය කළා.14
යේසුස්වහන්සේ ගැන ඔබ කැමතිම කතාව කුමක්ද? ලාදුරු රෝගියා,15 වෛරයට ලක් වූ සමානුතාරිතවරයා,16 චූදිත සහ අපකීර්තිමත් පව්කාරයා,17 හෝ ජාතික සතුරා,18—දෙවියන්වහන්සේගේ පුත්රයා මායිම්වල සිටින කෙනෙකු වැළඳ ගැනීමට හෝ බලාපොරොත්තුවක් දීමට අත දිගු කරන බව ඒවා පෙන්නුම්කරනවා කියා මම සිතනවා. ඒ වගේ කරුණාවක් හරිම පුදුමාකාරයි.
උන්වහන්සේ පිටස්තරයෙකු ප්රශංසා කරන හෝ සුව කරන හෝ ආහාර ගන්නා සෑම අවස්ථාවක් ගැනම ලිවීමට උත්සාහ කරන්න, ඔබ ලූක් කියවා අවසන් කිරීමට පෙර ඔබේ පෑනේ තීන්ත අවසන් වේවී.
මම මෙය දුටු විට, මගේ හදවත ආදරණීය පිළිගැනීමකින් ඉපිල ගියා, උන්වහන්සේ මට ආදරය කරනවා ඇති කියා මට දැනෙන්නට පටන් ගත්තා. සභාපති නෙල්සන් මෙසේ ඉගැන්වුවා, “ගැලවුම්කරුවාණන් ගැන ඔබ වැඩි වැඩියෙන් ඉගෙනගන්නා තරමට, උන්වහන්සේගේ දයාව, උන්වහන්සේගේ අසීමිත ප්රේමය, කෙරෙහි විශ්වාසය තැබීම පහසු වෙනවා.”19 තවද ඔබ වැඩි වැඩියෙන් ඔබගේ ස්වර්ගික පියාණන්වහන්සේව විශ්වාස කර ප්රේම කරනවා.
යේසුස් ක්රිස්තුස්වහන්සේ පැමිණියේ “දෙවියන් වන සදාතනික පියාණන්වහන්සේ කවුරුන්ද සහ මොණවගේද කියා සහ සෑම කාලයක මෙන්ම ජන සමූහයකට සිටින උන්වහන්සේගේ දරුවන් වෙනුවෙන් උන්වහන්සේ කෙතරම් කැපවනවාද කියා පෙන්වීමට බව වැඩිහිටි ජෙෆ්රි ආර්. හොලන්ඩ් අපට උගන්ව තිබෙනවා.20
පාවුල් පවසන්නේ දෙවියන්වහන්සේ “[සියලු] දයාවේ පියා සහ සියලු සැනසිල්ලේ දෙවියන්” කියායි21
ඔබ උන්වහන්සේව දකින්නේ වෙනස් ලෙස නම්, දිගටම උත්සාහ කරන්න.
ගිවිසුම් සහ දෙවියන්වහන්සේගේ වැළඳගැනීම්
උන්වහන්සේගේ මුහුණ සෙවීමට අනාගතවක්තෘවරුන් අපෙන් ඉල්ලා සිටිනවා.22 මෙය අපගේ පියාණන්ට කරන නමස්කාරයක් මිස, සූත්රයක් නොවන බවත්, අපගේ පියාණන්ගේ ප්රේමයේ මුහුණ ලෙස ජේසුස්වහන්සේ දැක23 උන්වහන්සේගේ නීතිරීති පමණක් නොව උන්වහන්සේව අනුගමනය කරන තෙක් අප අවසන් නොවන බවත් මතක් කිරීමක් ලෙස මම මෙය සලකනවා.24
අනාගතවක්තෘවරුන් සහ ප්රේරිතයන් ගිවිසුම් ගැන කතා කරන විට, ඔවුන් “තවත් උත්සාහ කරන්න!” කියා කෑගසන පුහුණුකරුවන් මෙන් නොවේ. අපගේ ගිවිසුම් මූලිකවම අපගේ සබඳතාවන් පිළිබඳව 25 මෙන්ම අපගේ ආත්මික මුහුණු අන්ධභාවයට පිළියමක් ලෙස දැකීම ඔවුන්ට අවශ්ය වනවා.26 ඒවා උන්වහන්සේගේ ආදරය උපයා ගැනීමට ඇති නීති නොවේ; උන්වහන්සේ දැනටමත් ඔබට සම්පූර්ණයෙන්ම ආදරය කරනවා. ඒ ආදරය තේරුම් ගෙන ජීවිතය හැඩගස්වා ගැනීම අපේ අභියෝගයයි.27
අපි අපේ ගිවිසුම් හරහා ජනේලයකින් පිටුපස ඇති පියාණන්ගේ දයාවේ මුහුණ දෙස බැලීමට උත්සාහ කරනවා මෙන්, බැලීමට උත්සහ කරනවා.
ගිවිසුම් යනු දෙවියන්වහන්සේගේ වැලඳගැනීමේ ආකාරයයි.
දෙවියන්ගේ ආදරයේ ගංගාව
අවසාන වශයෙන්, උන්වහන්සේට සේවය කිරීමෙන් අපට උන්වහන්සේ දැකීමට ඉගෙන ගත හැකියි. “මක්නිසාද මනුෂ්යයෙකු ඔහු විසින් සේවය නොකරන ලද ස්වාමියෙකුව දැනගන්නේ කෙසේද?”28
මීට වසර කීපයකට පෙර, මට සුදුසුකමක් නැතැයි මට හිතුණු කැඳවීමක් ලැබුණා. මම නොසන්සුන්ව වේලාසනින් අවදි වුණා—නමුත් මම මීට පෙර අසා නොතිබූ වාක්ය කණ්ඩයක් මගේ මනසේ තිබුණා: ඒ තමයි මෙම සභාවේ සේවය කිරීම යනු දෙවියන්වහන්සේගේ දරුවන් කෙරෙහි ඇති ප්රේමයේ ගංගාවේ නැගී සිටීමයි. මෙම සභාව, පේළිය අවසානයේ සිටින දෙවියන්වහන්සේගේ දරුවන්ට උන්වහන්සේගේ ප්රේමයේ ගංගාවට ළඟා වීම පිණිස ඒ සඳහා ඇති ඇළ මාර්ගය පිරිසිදු කිරීමට උදව් කිරීමට උත්සාහ කරන ගල් කටු සහ සවල් අතැතිව සිටින මිනිසුන්ගෙන් යුත් ඛණ්ඩායමකි.
ඔබ කවුරුන් වුවද, ඔබගේ අතීතය කුමක් වුවත්, මෙම සභාවේ ඔබට ඉඩ ඇත.29
කොල්ලුවක් සහ සවලක් අරගෙන මේ කණ්ඩායමට එකතු වන්න. උන්වහන්සේගේ ආදරය උන්වහන්සේගේ දරුවන් වෙත ගෙන යාමට උදව් කරන්න, එයින් සමහරක් ඔබ මතට විසිරී යයි.30
අපි උන්වහන්සේගේ ආදරණීය මුහුණ, උන්වහන්සේගේ වැලඳගැනීමේ ගිවිසුම සොයමු, පසුව උන්වහන්සේගේ දරුවන් සමඟ අත්වැල් බැඳ, එක්ව “ඊශ්රායෙල් මිදුම්කාරයා” [Redeemer of Israel] ගීතය ගායනා කරමු:
මිදුම්කරුණි, යලි දෙන්,
ඔබ මුහුණේ ආලෝකේ,
මා ප්රාණේ සනහාලන්නට.
ආශා ඇතේ රැඳෙන්න
ඔබේ ලෝකේ
මගේ පාළු හදවතට බලාපොරොත්තුවක් ගෙනඑන්න.31
අපි උන්වහන්සේගේ ආදරණීය මුහුණ සොයමින් පසුව උන්වහන්සේගේ දරුවන්ට උන්වහන්සේගේ දයාවේ භාජන වෙමු.32 යේසුස් ක්රිස්තුස්වහන්සේගේ නාමයෙන්, ආමෙන්.