![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F53%2F0c%2F530cda21e5c78969b5ab0ce9c093269420e4d10a%2F530cda21e5c78969b5ab0ce9c093269420e4d10a.jpeg/full/!250,/0/default)
Manaman en Katengtengpene
Manaman en katengtengpene kin sewese komourlahn emen emen oh lapalapalahn peneinei pwe en kak pweida ong serien Koht akan.
E kokohpdahr nan mwein Aiseiahu1 me ni imwin rahn akan, Sapwellimen Kauno aramas en inou kan, keinek en Isrehl, pahn “kopwurpwurpene sang ni arail kamwermwerpeseng en mahso, sang ni sahpw dekehkan, oh keimw pahieu en sampah”2 oh kopwurpwurlahng nan “sapwarail sapwen sohsohkan.”3 Preseden Russell M. Nelson masaniher pak kei oh ni kehlail duwen kopwurpwurpene wet, me e kahdanki “mehkot me keieu kesempwal me wihwiawi nan sampah rahnwet.”4
Ia kahrepen kopwurpwurpene wet?
Sang ni kaudiahlo me kohieng Soukohp Joseph Smith, Kauno ketin kasalehda ehu kahrepehu me iei doarepen aramas en inou kan. E masanih, “Kopwurpwurpene me pahn wiawi ong nan sahpw en Saiohn, oh pil wasah kan me wia kisehn Saiohn, kakete wia mehn poadoandoar, oh perepen melimel, oh engieng laud me pahn ikipar peseng pohn sampah pwon.”5 “Engieng laud” wet kakete wehwehki imwilahn sapeik laud ong mahsen oh kosonned en Koht akan.
Ahpw me keieu kesempwal, kahrepen kopwurpwurpenehu pahn wahdo kapai kan en komour oh lapalapala ong irail kan me pahn alehda. Ih mwomwen inou kan me kohieng Eipramo eh pahn sansalada. Kauno mahsaniheng Eipram me sang ni kadaudokeh kan oh prihsduhdo “peneinei koaros pohn sampah [pahn] kapaidkihda, pil iangahki kapai en Rongamwahuo, me iei kapai kan en komouro, oh pil mour soutuk.”6 Preseden Nelson kasalehda ni duwe met: “Ni ansou me kitail alehda rongamwahuo oh pepdaisla, kitail kin alehda mwahr sarawi en Sises Krais. Pepdais iei ewen kehl me kahluwa kiitailahng inou kan koaros me Kauno ketkiheng Eipram, Aisek, Seikop, oh kadoudok arail ko nan mweihn kawaho.”7
Nan pahr 1836 [kid welipwuki silihsek weneu], Moses pwarohng Joseph Smith nan Tehpas Sarawi en Kirtland oh “patohwanong … kih kan en kapwurepene mehn Isrehl kan sang nan keimw pahieu en sampah.”8 Ni ahnsouohte, Elias pwarada oh “patohwanda koasoandi en rongamwahu en Eipram, oh koasoia me pwehki kitail oh kadaudokatail kan dih kan koaros me pahn kohdo mwuhr pahn kapaida.”9 Sang ni mweimwei wet, kitail koaros weuwa rongamwahu en Sises Krais—rohng mwahu en komour me sang Reh—ong aramas koaros en sampah oh wahdo koaros me men kohdo nan inou en rongamwahu wet. Irail kin wiahla “keinek en Eipram, tohn mwomwohdiso oh wehio, oh wiahla sapwellimen Koht aramas pilipil.”10
Pil nan ansouohte nan Tehnpas Sarawi en Kirtland mie kesilimen en meninkeder en nanleng men me pil pwaredohng Joseph Smith oh Oliver Cowdery. Soukohp Elaisa me I koasoia, oh mweimwei oh kih kan me e kapwurehdohu me I men koasoia rahnwet.11 Manaman en utung tiahk sarawi kan en prihsduhd oh wiahda ren tengeteng pohn sampah oh nanleng—manaman en katengtengpene—kesempwal ong kopwurpwurpenehu oh kaunopdahn irail aramas en inou kan nan mouret oh mour en mwurin mehla.
Pahr ekei mwowe, Moronai kasalehiongehr Joseph Smith ni sansal me Elaisa pahn wahdo manaman oh mweimwei kesempwal ehu en prihsduhd: “I pahn kasalehiong uhk prihsduhdo, sang nan pehn soukohp Elaisa.”12 Mwurin mwo Joseph Smith kawehwehda: “Dahme Elaisa pahn pekederkihdo? Pwehki e kolokol kih kan en mweimwei en wia tiahk sarawi kan koros en Prihsduhd; oh [ma] mweimwei wet sohte kohda, tiahk sarawi kan sohte pahn kak wiawi ni pwung”13—ihme kahrehda, tiahk sarawi wet sohte pahn manaman nan ansouet oh mour kokodoh.14
Nan padahk me sansal sang nan Doctrines and Covenants, Soukohp kasalehda: “Ekei aramas pahn wiahki me mehkot kesempwal iren pwuhk sarawi me kitail kin kosoia—manaman me kin kilelehdi de katengtengdi pohn sampah oh nanleng. Ni ansouohte, erein dih kan pohn sampah wet, ansou ieu me Kauno pahn ketkihdo prihsduhd wet ong emen emen ohl sang ni kaudiahl, de pwihn en ohl ehu, manaman wet udahn pahn mimiehte. Pil duwehte, ma ohl akan pahn doadoahki mweimwei wet, ni mwaren Kauno, oh doadoahki ni pwung oh pwoson, kolokol rekoht en irail me pwoson kan, e wialahr kosonned ehu pohn sampah oh nanleng, oh e sohte pahn wekidekla, sang ni kosoandi en Siohwa.”15
Kitail kin kamehlele oh medewe me mweimwei en katengteng wet kin wiawi ongete ekei tiahk sarawi kan nan tehnpas sarawi, ahpw mweimwei wet inenen kesempwal ong tiahk sarawi teikan pwe en kak katengtengdi sampah oh nanleng.16 Manaman en katengtengpenehu katengediong pohmw kilel sansal ehu ansou me ke papdaiso, ni karasepe, en kak sansal sampa wet oh nanleng. Ni mehlel, tiahk sarawi koaros en prihsduhd kin wiawi pahn manaman en Preseden en Mwomwohdiso, nin duwen me Joseph Fielding Smith kawewehda: “Ih [Preseden en Mwomwohdisoh] kiheng kitail mweimwei, e kihong manaman en katengteng pene nan atail prihsduhd kan, pwehki e kolokol kih kan.”17
Pil mie ehu kahrepe kesempwal nan kopwurpwurpenehn mehn Isrehl kan me wewehu inenen kesempwal ansou me kitail kin koasoia me pid katengtengdi sampah oh nanleng, me iei, kokouda oh kosondien tehnpas sarawih kan. Duehte me Soukohp Joseph Smith kawehwehda: “Ia kesempwalpen kapokon kan … aramas en Koht kan sohte lipilipil sounpar depe nan sampa? … Kahrepe keieuo iei en kauwada ehu tehnpas en Kauno wasa me E kak ketin kasalehiong Sapwellime aramas akan tiahk sarawi kan en Tehnpase oh lingan pen Sapwellime wehio oh padahkihong aramas akan duwen komour; pwe mie tiahk sarawi kan oh kosonned akan me, kasukuhlparail oh wieparail kan, kin anahne en wiawi nan wasa, de tehnpas ehu me kokouda ong kahrepeo.”18
Manaman en tiahk sarawi kan en katengetengpene me kohieng prihsduhd me iangahki, ei, tiahk sarawih kan me kin wiawi sang me momour kan ahr weliandi me melahr akan nan wasa ehu me koasoandi sang Kauno—Sapwellime tehnpas sarawi. Kitail kak kilang lingan oh sarawi en manaman en katengteng pene—e kiong mour ong emen emen aramas oh lapalapala ong peneinei mweimwei ong sapwellimen Koht seri kan sohte lipilipil ahnsou oh wasa irail miher pohn sampah. Sohte ehu kaskuhl en Koht de loalokong de mweimwei ehu me kak pahrekiong doadoahk kesempwal wet. Manaman en katengtengpene wet wia kasalepe kaselel en pwung, mahk, oh limpoak en Koht.
Pwehki atail ahniki manaman en katengtengpene wet, atail mohngiong kan en wekdekiong irail me tienglahr mwohtail. Kopwurpwurpenehn imwin rahn-akan ohng nan inou sarawio pahn lelohng irail me pil melahr akan. Nan koasoandi pwung en Koht, me momour kan sohte kak alehdi mour soutuk ni unsek ma irail sohte katengteng ohng “arail pahpa kan” atail keinek kan. Pil duwehte, keirdahn irail kan me melahr, de irail kan me pahn mehsang sampah wet ahpw sohte katengteng pene, sohte unsek lao arail tiahk sarawi en katengteng wiawihda ohng kitail, arail keinek, oh kitail ohng irail nin duwen koasoandi en Kauno.19 Inou en sewese emen emen ohng palio peilo kak wia inou sarawi ehu, me wia kisehn inou kapw en mour soutuk. Ni en Joseph Smith koasoai, kitail anahne “katengteng ohng atail peneinei me melahr akan pwe irail en [iang kitail] nan iasada keieuo.”20
Doadoahk en manaman en katengteng me keieu ileile oh sarawi iei kopwopwoud soutuk nan pwungen ohl oh lih oh doadoahk en kadokepene peneinei nan dih koaros. Pwehki mweimwei en wia tiahk sarawi pwukat me inenen sarawi, Preseden en Mwomwohdiso wet kin me kin ketkihda pwukoah pwukat ong mehteikan. President Gordon B. Hinckley kosoia ni ehu kapokono, “I koasoaiahier pak tohto me ma sohte mehkot ehu me kohsang ni weirek oh lokolok oh medek kan en kopwurupwurdohu sang manaman en katengteng en prihsduhd sarawi me kin katengepene peneinei kohkohlahte, ah e pahn udahn mie katepen mehkoaros me wiawiher.”21
Ma sohte katengteng penehu me kin kihpene peneinei soutuk oh kadokepene dih kan met oh pil ansou kohkodoh, kitail pahn momour kokolahte rehn kadoudok petail kan de peneinei teikan—me iei, pahn sohte atail keinek de kadaudok. Duehte peipei seli-mwahl sohte soandi, sohte ehuong emen, de, ehupene kan me uhweng pwopwoud oh ehupenehn nan pwungen peneinei me Koht ketin koasoanehdier,22 me kin kapingada kahrepen kepikipikdahn sampah oh soahng kan kitail pahn esehla nan mouret. Ma mepwukat pahn manla, e pahn duwehte ma sampah keriahla de “e wia mehkot mwahl ehu” ong rahn me Kauno pahn ketdo.23
Kitail kak kilang kahrepen “pwopwoud nan pwungen ohl oh lih ah kasarawihla sang Koht oh me peneinei me wia poahsoan en Sapwellimen Koht pilahn ong mour soutik en Sapwellime serih kan.”24 Ni ansouohte, kitail kak kasawihada me nan rahn pwukat sohte mehkot unsek, me kohieng kitail me dipan akan sohte wia mehkot kesempwal oh mehlel ohng ekei. Ahpw kitail kin koapwoaroapwoarki Krais. Ni atail pahn awiawih Kauno, Preseden M. Russell Ballard katamankin kitail me “pwuhk sarawi oh soukohp en imwin rahn-akan kamehleleiong kitail me koaros me pahn kolokol arail pwoson inou en rongamwahuo pahn ahniki ansou mwahu en lapalapala nan wein Koht.”25
Me tohto ahnekiher kansensued oh irair sohte mwahu nan arail peneinei kan oh sohte ahneki ineng en wia kisehn peneinei soutik ehu. Elder David A. Bednar wia kamwomwadaht: “Ohng kumwail me iangehr kehn mohngiong olahn mweipeseng en pwopwoud nan amwail peneinei de kehnehr soahngen tiahk me kin kawehla koapworopwor kan, menlau tamataman [Sapwellimen Koht koasoandi ong peneinei] pahn pwurehng tepda rehmw! Ehu mehn kadokepene sein en ahmw keinek mwein kak ohla, ahpw ekei mehn kadoke pwung kan oh me luwehdi ni seino kesempwal ong mour poatoapoat. Ke kak kapatahiong ahmw kehl ni seino oh e ahpw pahn sewese kapwurehdo me olahr koa. Doadoahk wet pahn pweida ekis ekis.”26
Ni kasarawi en melahn Sister Pat Holand o, ahn Elder Jeffrey R. Holland pwoud, sounpwong en Sulahi samwalahro, Preseden Russell M. Nelson koasoia: “Ehu ansou Patricia oh Jeffrey pahn pwurehng tuhpene. Ehu ansou ira pahn patehng neira serih kan oh ara keinek kan me kolokol arail inou sarawi kan oh iang alehda popohl unsek me Koht neknekid ong Sapwellime seri pwung kan. Kitail en ese me , rahn me keieu kesempwal ong nan ahn Patricia mour kaidehn ah rahn en ipwidi de mehla. Ah rahn me keieu kesempwal iei Suhn 7, 1963, ansou me ih Jeff katengteng pene nan Tehnpas Sarawi en St George. … Dahme ire wet kesempwalki? Pwehki kahrepen sampah ah kepikpikda iei pwe peneinei kan en kak wiawihda oh katengteng ong emen emen. Komourla wia pwukoahn emenemen aramas, oh lapalapala nan wein Koht wia pwukoahn peneinei. Sohte emen kak lapalapala kelehpw.”
Ansou ehu samwalahro, ngehi oh ahi pwoud iangih kempoakepaht emen nan perehn katengteng en Tehnpas Sarawi en Bountiful Utah. Tepin ahi tuhong kempoakepaht menet iei ni ansou me e kisin seri nan Cordoba Argentina. Ngehi oh iengei misinerio kin wie raparapahki aramas wasahn kousoan ehu ekiste palio aht ohpis en misino, oh e ahpw ritingadahng kit imwarailo ansou me se lel mwo. Mwurin ansouo, ih oh ah nohnohu oh rieh kan ahpw iangalahr Mwomwohdiso wet, oh irail wia souleng kehlail kei. Ansou wet e wia lih mwahu men, oh rahno se iang mih nan tehnpas sarawio pwe sen katengepene ah nohno oh pahpa me melahr oh mwuri ih katengteng ong ira.
Pwopwoud ehu me wia kempoakepah ansou reirei ehu me weliandi ah nohno pahpa ni pehi sarawio. E wia ahnsou kalaloid oh kaselel ehu ni kempoakepaht menet sang Argentine ah katengteng ong ah nohno pahpa. Kiht mehte wenemen me mih wasahu ni mwurin souwas meleilei ehu dohwei sang sampah, oh dahme keieu kesempwal en wiawi nan sampah wihwiawi. I kapingki pwehki ahi letelet ni ah wenihmwo ni ansou me I wia misineri pwulopwul men ong met, sounpar tohto mwuri, wiewia tiahk sarawi en katengteng me kadokepene ih ong ah nohno pahpa oh ah keinek me melahr akan.
Mwekid wet kin wihwiawi wasa koaros nan tehnpas sarawi kan nan sampah. Met me wia keimwsekpen doadoahk en kapwurepene aramas en inou kan. Met me wia pwuhng keieu ileile ni omw wia towe mehlel en Mwomwohdiso en Sises Krais I inoukiheng kumwail ma kumwail pahn rapahki pwuhng wet, e pahn wia amwail ansou wet oh pil kokolahte.
I kadehde me manaman en katengteng oh mweimwei me kopwurpwurdo pohn sampah sang rehn Joseph Smith udahn mehlel, me dahme katengtengdi sampah pil pahn tengedi nanleng. I kadehde me Preseden Russell M. Nelson, me wia Preseden en Mwomwohdiso wet, ih kelehpw pohn sampah rahn wet me kin kaweid pwukoah oh doadoahkepen manaman wet. I kadedeh me Tomwpen Sises Krais wiadahr kesempwalpen padahk en mour soutik oh kapwaiadahr lapalapalahn peneinei. Ni mwaren Sises Krais, ahmen.