Riei Souleng kan en Krais
Kitail en kin perenki laud duen ehupene me mie rehtail oh kesempwaliki songesongen wiepe kan oh songen kisakis me mihmi rehtail.
Kompokepai ko, kitail wia ier ehu tiepene kaselel rahn wet. Kitail koaros kehn ehr Sapwelimen Kauno Ngehn Sarawio oh Sapwelime limpoak sang ni padahk kan me atail kaun kan ehukieng kitail ehr. Ih kapingki ahi kak kosoaieng kumwail ninsoutik wet ni ah ngehi me kaimwsekala sounpadahk en tiepene wet. Ih kapakapki me Sapwelimen Kauno Ngehn Sarawi pahn kin ketiket rehtail ni atail pahn kin pereperen pene ni atail wia perien mehlel en Krais.
Atail Soukohp, Russell M. Nelson, masanihong kitail: “I peki rehn tohn Mwomwohdiso kan koaros wasa koaros en wia soun kaweid en soikala mwekid oh wiewia en peirin. I peki ni ngidingid rehmwail en koangoangoahki wahu en mie ong Sapwellimen Koht seri kan koaros.”1 Ni Mwomwohdiso dehde oh wie kekeirda wet, idawehn luhk wet sang atail soukohpo wia mehkot kesempwal ehu ong koukoudahn sapwellimen Sounkomouro wehi nan wasa koaros nan sampah wet.
Rongamwahu en Sises Krais padahngki me kitail koaros wia sapwellimen pahpa oh nohno en nanleng seri ngehn kei me ira poakoahng kitail mehlel2 oh me kitail wia peneinei ehu rehn Koht mwohn atail ipwidieng pohn sampah. Rongamwahuo pil padahkiong kitail me kitail kepikipikda ni mwomwen Koht.3 Ni mehlel, kitail soahngetehieu mwohn sihlangin Koht,4 E “ketin wiakihda sampa ki nta ehute ong ohl [oh lih].”5 Ni mehlel kitail koaros kepikipikda sang rehn Koht, oh kin kasalehda me mie “Koht emen me wia Semen kitail koaros, me lapalapasang koaros, wasa koaros, oh pil [kitail] koaros.”6
Ni atail wia tohnpadahk en Krais, kitail luhk ong en kalaudehla atail pwoson, oh limpoak ong, riatail souleng kan sang ni atail pahn kin ehupene oh limpoak pene, mendahte ma kitail wekpeseng, pwe kitail en kak kalaudehla atail wauneki Sapwelimen Koht serihkan koaros.7
Kaidehn ihte soahngko me wiawieng mehn Nephi ko kereniong sounpar riau mwurin Krais ah pwarek irailo?
“Oh mehlel sohte ehu soangen peren me kak wiawi nan pwungen aramas koaros me kepikpikda sang nin limen Koht. …
“Kaidehn mehn Laman kan, de soangen aramas -ko; ahpw irail wia ehute, serien Krais oh irail pahn sohsohki wehin Koht.
“Oh ia wen arail kapaida!”8
Presiden Nelson pil doulahte oh kasalehda wen kesempwal en kalaudehla oh wauneki riatail souleng kan ni ah kosoia: “Ihr me ketin kapik kitaildau malipehier emen emen kitail en kihsang peirin ong sohte lipilipil en Serien Koht. Emen emen kitail me peirin ong mehteikan anahne en koluhla! … Atail pwukoah en wia wen atail kak en kaweid pwe en kamwahuiala oh kalaudehla atail wauneki sapellimen Koht pwutak oh serepein kan me konehng en wiawi ong irail.”9 Ni mehlel, momour en aramas kitail anahne en mie wahu mendahte ma kitail wekpeseng.10
Medemedewe tiahk sarawi me kapatahieng kitail rehn Koht en wiahla Sapwelime seri kan, kokohp en kaweid wet me sang Preseden Nelson e wia kahk ehu ong koukoudahn piris en wewehkihla kaidehn en kawada dihd en peirin oh kamwereikitail peseng.11 Apw, me Paul kekehling kieng mehn Ephesians ko, kitail anahne esehla pwe kitail en kak alehdi kahrepe wet, e pahn anahne emen emen en karakarahkala, ahniki meleilei, oh kak-kanengamah ong mehteikan.12
Mie soai pen sounpadahk en Suhs men me iangih kempoakepah riemen arail wie perepereniki dakadahn ketipino. Eh peidek rehra, “Ia mwomwen amwa pahn ese me nipwongo nekier oh rahn kapwo pwaredohr?”
Emen ira sapengki, “Ansou me ke pahn kilang lahng palimese oh kak ese mehnia me sihpw rehn kout kan.”
Mehteio pil uhd sapengki, “Ansou me ke kilenglahng pali mese oh kilang mehnia me tuhke olihp de tuhke pihk.”
Ira eri sohpeilahng sounpadahko oh peidengki soangen peidekohte. Mwurin ah medemedewe ansou reirei, eh sapengki, “Ni ansou me ke pahn kilang lahng palimese oh kilangada mesen lih emen de mesen ohl emen oh inda, ‘Riei serepein mwo; riei pwutak mwo.’”13
Kompokepahiko, I kak indahieng kumwail me marain en rahn kin kamarainehda nan atail mour ni ansou me kitail kin kilang oh sewese riatail kan ni wahu oh warohng en wia perien mehlel kei en Krais.
Ni Sises ah ketket sampa, E ketin kasalehda karasras mwahu sang ni Ah kin “ketla oh wihwia soahng mwahu kan”14 ong aramas koaros, oh luklukeirail en kohdo Reh oh iang ale me mwahu kan mendahte ihs irail, dahme re wihwia, de tiahk kan me re wihwia. E kin sawas, kamwahuila, oh kin kalapw sewese koaros me mie arail anahn, ahpw mehlel irail kan me kin medewe me re weksang mehteikan, me sekenken kan, me katorohrlah kan. E sohte kin kamahmkihla emen ahpw e kin apwalih irail ni pahrek oh limpoak, pwehki E kilang irail nin duwen arail wia rie, oh arail Pahpa emente.15
Ehu ansou me inenen kesempwal ansou me Sounkomour o seiloak la Kaleli, keid nan ahl me kolahn Sameriao ki kahrepe.16 Sises eri lemehda en mwohndi ni pwarer en Seikop pwe en komoal. Ansou me e mihmi mwo, lihen Sameria men kohdo pwe en idipil. Ni ah wewehki mehkoaros, Sises eker eden liho, masanih, “Kihdo nimei ekis pihl en nimpil.”17
Lih menet pwuriamweikihla mehn Suhs menet ah peki sawas rehn lihen Sameria menet oh pwuriamweila, kosoia, “Ia mwomwen komwi, mehn Suhs emen, peki pihl en nimpil rehi, ngehi lihen Sameria emen? pwehki mehn Suhs akan sohte kin ehuong mehn Sameria kan.”18
Apw Sises, sohte men tehk tiahk kodoudoudo-en saminimin nan pwungen mehn Sameria oh mehn Suhs akan, ahpw sewese lihet ni limpoak, sewesehki en wewekihla udahn ihs Ih—me iei, Masaiao, me kak kasalehda soahng koaros mepahn kohdo me liho pil iang awiawi.19 Audepen sawas wet karehda liho ah tangala nan kanihmwo oh pakairkiong aramas akan dahme wiawier, ni ah kosoia, “Kaidehn iei ih Krais met?”20
Ih kin poakehla irail akan me sohte epwel mwahu, me sekeniken, oh me kin ale lokolok rehn irail akan me sohte ahniki limpoak oh sohte arail alamalam, pwehki, nan kisehn ahi mour, ih iangehr kilang medeklahn aramas mwahu men sang irail kan me kin kadeik de sohte men tehk irail pwehki arail kosoai, mwomwerail, de arail mour wekisang arail. Nan ahi mohngiong pil nsensuwedki irail akan me arail lamalam mimihte nan rotorot, arail mehn madamadau kan pwok, oh me ahneki mongiong keptakai kan sang ni arail kamelele me mehteikan weksang irail. Pwehki sang ni arail souitar ong mehteikan re sohte kak kilangada me irail wia seri en Koht.
Ni ah kokopadahier sang rehn soukohp akan, kitail mihmier nan ansou keper kan me kokolahngehr Ketido Keriau en Sounkomour o.21 Sampah wet nehnediong ni soangen palih kehlail kei, me wiawikihda keinek, pwuhng tohto, oh dakehn irail akan me paiamwahu. Songen pali pwukat kin kak kamwakidada madamadau en aramas akan oh arail mwekid kan ong irail kan me re kin patpatehng. Pwehki kahrepe wet, e sohte wia mehkot mwahl ehu en kilang aramas ah kin wiahda mwomwen arail madamadau, mwekid, oh kosokosoia tiahk teikan, mwomwerail kan, wasa re kohsang ie, oh kadaudokerail kan, kin pilehu kapwungala, sapwung, oh madamadau sohte mwahu kan, wiahda mwekid sohte mwahu kan, sohte wahu, oh pil kadeik emen emen irail. Songen mwekid pwukat poahsondasang pohnmwahso, oh pil luwak, oh mwomwen aramas soulepeu men, kin kasalehda duwen wasa sohte mwahu, 22 me pil kin uhwong mwekid en duwehla Krais. Mwekid wet sohte mwahu ong irail akan me songosong en wiahla Sapwelime tohnpadahk mehlel kei.23 Ni Mehlel, Rieko, sohte wasahn madamadau de mwekid en peirin kin wiawi nan pwungen Souleng kan.
Ni atail wia seri en inou o, kitail kak sewese oh kasohrela songen mwekid wet sang ni atail pahn kilang wekipeseng kan me kin pwarada nanpwungatail mwohn silahngin Sounkomour o24 oh sang ni dahme kitail ahneki—iei ihs kitail oh atail peneinei, Ni kapatapat, kitail kak doulahte oh kilang kitail me pahn kin pwaredo nan ouraman kan, kopworopwor kan, pahtou kan, oh medek kan en mehn impatail kan. Kitail koaros wia soun seiloak kei ni atail wia sapwelimen Koht seri kei, pahrek nan atail souitar akan oh atail pwukoah en keirida. Kitail luhk ong ehr en ehupene, ni meleilei, atail mongiong kan en audaudiki limpoak ong Koht oh aramas koaros—de, me Abraham Lincon, intingidier, “dehr kailongki emen oh ahniki limpoak mwakelekel en Koht ong koaros.”25
Komw kin iang medewe me padahk en wauneki aramas akan e duwehte mwomwen atail kin likouda nan tehnpas en kauno? Kitail koaros kin kohdo nan tehnpas sarawi ni songen mwohmw ehute oh audaudkihda ineng en mwakelekel oh sarawi ni mwohn Silang en Kauno. Likauwiada likou pwetepwet, kitail koaros alehsang rehn Kauno nin duwen atail wia Sapwellime seri, ohl oh lih en Kohtketin aleikitailda koaros pwe en wia Sapwelime seri, ohl oh lih en Koht, seri en Krais.26 Kitail pai pwe kitail kak wia songen tiahk sarawiohte, wia songen inou sarawiohte, nantieng momourik mour sarawi, oh alehdi songen inou poatoapoatohte. Eupene ni kahrepe ehute, kilang emen emen ni mahs kapw ehu, oh ni atail wia ehute, kitail kin ehukipene atail wiawia kan ni atail wia serien Koht mehlel kei.
Ih apwte sewese kaweid lapalap en tiahk kan oh kaun en koperment ni kalangadahn Tehnpas Sarawi nan Brasilia Brazil. Ih udier nan wasahn weliali likou iangahki Vice President en Brazil, oh se kosoia likou pwetepwet me koaros kin likauwih nan Tehnpas Sarawi. I kawehwehieng me likou pwetepwet me sampah kin likawih kasalehda me kitail koaros duwepenehte rehn Koht oh me, nan tehnpas sarawi, kaidehn kitail preseden en wehi de kaun en mwomwohdiso ahpw e kin kasalehda me kitail wia sapwellimen Samatail Nanleng seri.
Pillap Iguaçú kin kerala palikapi en Brazil oh kohla nan wahu ehu me kin wiahda tehnihr me dedeh nan sampah me kahdaneki tehnihr en Iguaçú—ehu kapikipik en Koht me inenen kasalel oh kapwuriamwei pohn sampah, e wia ehu mehkot liangan sang nan soahng isuh me keieu kaselel nan sampa. Wen laud en ngilen pihl me kin kerala wiahla pilap ehu oh kin kohpeseng, wihada tehnihr epwiki samwa. Pwe iehn kamangaihla, mwekid lap wet en tehn ihr kan wia mehn kasansal en sapwelimen Koht peneinei pohn sampah, pwe kitail ehukipene ngehn ehute oh tehte, me kitail kihsang atail keinek oh peneinei. Ahpw, emen emen kitail kin kerewei nan pali tohto en tiahk kei, ni mwohmw kan, oh wehi kan, ki duwen pwung tohto kan, koahiok kan oh mehn pepehm kan. Mendahte met, kitail kin mwokidwei mwowe ni sapwelimen Koht sei kei oh ni atail wia souleng en Krais kei, ni atail sohte kin kesehla dahme kitail udahn uhsang, me wiadahte atail wia aramas kesempwal ekei oh pwihn limpok ehu.27
Kaselehlie rie souleng ko, kitail kainenehla atail mongiong kan oh madamadau kan ki eripit oh kadehde me kitail koaros sohngete ehu mwohn Koht, me kitail koaros endowe ehr ki songen manaman soutuk oh sohso ehu te. Kitail en kak perepereniki laud duen ehupene me mie nan pwungatail oh kesempwaliki song kan me kileledi ong kitail oh songen kisakis kan me kitail ahniki. Ma kitail wia mepwukat, Ih inoukieng kumwail me kitail pahn kekeirda nan pein atail ahl, me duehte pihl en Iguaçú Falls, me sohte kak mweisang ehupene me kasalehda duen kitail, “seri en Krais, oh weliepen Kaun en nan kahnimw en Koht.”28
Ih kadehde ieng kumwail me ni atail pahn doulahte idahwehn mepwukat nan mour wet, rahn kapw ehu pahn pwarada iangahki marain kapw ehu me pahn kamarainehda atail mour oh kieng kitail songen mehkot kesempwal kan pwe kitail en ahniki, oh kapaida sang, ehupene me Koht ketin kawada ong Sapwelime seri kan.29 Kitail udahn pahn wiahla dipwisou en doadoahk rehn Kauno pwe en iang sewese kawada wahu oh wahulap rehn Sapwelime seri kan koaros. Koht ketin ieias. Sises me wia Sounkomour en sampah. President Nelson me wia Sokohp en Koht nan atail mweiet. Ih wia ahi kadehde ohng mehlel pwukat ni mwahr sarawi en Sises Krais, amen.