Mweidohng Kupwuren Koht en Pweida
A kumwail inengiengehr en mweidohng kupwuren Koht en pweida nan amwail mour? A kumwail inengiengehr en mweidong Koht en wia soun kaweid keieu kesempwal nan amwail mour?
Kempoakepahi ohl oh lih akan, I inenen kapingki padahk kaselel kan en kapokon wet oh ansou mwahu kiset me ih ahniki pwe ien kak koasoiheng kumwail.
Sipele sounpar [silihsek-wenou] 36 me I patohwan wiahkiher Wahnpoaren men, me mahsenpen kapokonpenehn Isrehl ahpw mihla nan ai madamadau.1 Soahng koaros me e pidada inenen saihr ie, patehng padahk kan oh ahd akan2 eden Abrahm, Aisek, oh Seikop; arail mour oh arail pwoud kan; inou me Koht ketin inoukiheng irail oh me pil uhsehlahte ohng arail keineik;3 keinek eisek riau me kousonpeseng pohn sampah; oh kaudiahl tohtoh kan me pid duwen kopwurpwurpenehn atail wehi wet.
I onopkiher duwen kopwurupwurpene wet, kapakapkiher, wadekehr iren pwuhk sarawi kan koaros, oh pekiher rehn Kauno en ketin kalaudehla ai wehwehki.
Eri medewe wen ei peren ansou me I patohwanda iren kaweweh kapw me sansalohng ie. Sang ni sawas en mehn Ipru loaloakong riemen, I esehda me ehu kawewehpen lepin mahsen Isrehl nan Ipru iei “mweidohng kupwuren Koht en pweida.”4 Ahd wet Isrehl e wia aramas emen me inengieng en mweidohng kupwuren Koht en pweida. Madamadau wet inenen kamwakidada ai mour.
Lepin mahsen inengieng udahn kesempwal ong ni kawewehpen Isrehl.5 Kitail koaros ahniki saledek en pilipil. Kitail kak pilada en wia Isrehl, de soh. Kitail kak pilada en mweidohng kupwuren Koht en wia atail mehn pilipil kesempwal, de soh. Kitail kak pilada en mweidohng Koht en wia menen atail mour, de soh.
Ni kisin ansou kis, kitail song tamanda ehu ansou kesempwal nan en Seikop mour, me wia neihn neihn Abraham. Ni wasa me Seikop kadaniki Peniel (me wewehki “ni limen Koht”),6 Seikop ahpw pelpelian kahpwal laud ehu. Sapwellime saledek en pilipil mihla nan kasongosong. Nan ereihn kahpwal wet, Seikop kasalehda dahme keieu kesempwal ohng ih. E kasalehda me e inengieng en mweidohng kupwuren Koht en pweida. Ni pasapeng, Koht ahpw ketin wekidala eden Seikop ong Isrehl,7 me wewehki “mweidohng kupwuren Koht en pweida.” Koht eri ketin inoukiheng Isrehl me koaros kapai kan me malipilipiengehr Abraham pil pahn kohieng ih.8
Insensuedkihla pwehki kadaudok en Isrehk kan kawehla arail inou sarawih kan rehn Koht. Irail kin katehki takai soukohp kan oh irail sohte inengieng en mweidohng kupwuren Koht en pweida. Mwurin dahme wiawiher, Koht ahpw ketin kamarak irail peseng ni keihmw pahiou koaros en sampah.9 Sang ni kupwurkalahngan, E ahpw ketin inoukihda me E pahn kapwureirailpene, nin duwen me Aiseia mahsanih me: “Ni ereihn ansou mwotomwot me I pohnsehseikumwaila [Isrehl]; ahpw pwehki sang ni kupwurkalahngan lap me i pahn kapwurei kumwail pene.”10
Sang ni kawewehn Ipru Isrehl ni madamadau, pil miehte iren kapatapat ong kawewehpen kapokonpenehn Isrehl. Kauno kin ketin kapokonepene irail kan me inengieng en mweidohng kupwuren Koht en pweida. Kauno kin ketin kapokonepene irail kan me pilada en mweidohng Koht en wia arail soun kaweid keieu kesempwal.
Sounpar ngeder, soukohp akan kohpadahr kapokonpene wet,11 oh e wihwiawiher ansou wet! E wia tepin kemwekid keieu kesempwal ong ni Ketido Keriau en Kauno, iei me wia keieu doadoahk kesemwpal pohn sampah!
Nan iraihr en kopwurupwurpene wet wia en emen emen soi me katehlapala pwoson oh ngoang en pali ngehn ong milien en aramas. Oh nin duwen towe kan en Mwomwohdiso en Sises Krais en Souleng en Imwin Rahn Akan, de “inou en Isrehl en imwin rahn akan,”12 kitail alehier pwukoah en sewese Kauno ki doadoahk kesempwal wet.13
Ni atail kin koasoia duwen kopwurpwurpenehn Isrehl ni pali koaros en kahdengo, kitail koaskoasia, ni mehlel, misinerih kan, tehnpas sarawi, oh doadoahk en poadoapoad en peneinei. Kitail pil koasoakoasoia kakaihradahn pwoson oh kadehde nan mongiong en irail kan me kitail kin patpato rehrail, doadoahkehng oh papah. Ansou sohte lipilipil kan kitail kin sowese mehtei kan—ni pali koaros en kahdingo—pwehn wiahda oh kolokol arail inou sarawih kan rehn Koht, kitail kin wie sawasawas pene kapwurepene Isrehl.
Ansou kis samwalahro, emen neihn naiht pwutak ah pwoud kin wie nananti nan palingene. I pahn kiheng ede “Jill.” Itarete kaisihsol, kapakap, oh kapai en prihsduhd, ahpw en Jill pahpa luhluhwetala E ahnikihda masepwehk ede luhsang en ah pahpa oh ah kadehde.
Ehu ni soutuko, ai pwoud, Sister Wendy Nelson ahpw patohwanehng ie en Jill ah kahpwal. Mandahsang rahno Wendy ahniki pepehm mwahu en ehukiheng Jill duwen ai pasapeng ong kahpwal en palingehn me e sohsohpai ki lepin koasoi ehute! Lepin koasoio iei sohte itar en madamadau.
Ansou kis mwuri, Jill ahpw koasoiahieng Wendy me e udahn pwuriamweikihla ai pasapengo. E patohwan, “I wie koapwkoapwoaroapwoariki me Pahpakahlap pahn inoukiheng ie ehu manamanen ong ai pahpa. I wie medemedewe dahme kahrehda lepin mahsenwo sohte itar en madamadau me e pehm en pilada koasoiahki.”
Mwurin en Jill pahpa mehla, lepin mahseno sohte itar madamadau peipeidohngete nan ah madamadau. E ahpw ritingada ah mongiong pwehn kak wewehki mwahu me sohte itar en madamadau wewehki “sohte kak nohn kilang wasa.” Oh eh madamadau ahpw tepda wekidek. Jill eri ahpw inda, “Sohte itar en madamadau kahrehiengie ei uhdi, medemedewe, oh kehlailda. Lepin mahseno ansou wet audehkiniehla popohl. E katamankiheng ie ien katehlapahla ei madamadau oh rapahki mour soutik. E katamankiheng ie me mie pilahn kaselel ehu oh me ai pahpa wie momourte oh poakoahngie oh wie sinsilei ie.. Sohte itar enmadamadau me kapwureiehdo rehn Koht.”
I uhdahn kapaia naiht serepein kesempwal menet me pwopwoudo reht. Nan iraihr en kapahtou wet me eh ahniki nan ah mour, Jill maraihnkihla en kak alehda Sapwellimen Koht koasondi ohng ah pahpa, ong ni kilel poatoapoat ehu nan ah mour. Sang ni pilipil en mweidohng kupwuren Koht en wia ah pilipil keieu kesepwal nan ah mour, eh apw kakehr diar popohl.
Ma kitail pahn mweidohg, mie soangen ahl tohtoh me iren kawewehn Ipru wet en Isrehl pahn kak sowesei kitail. Na medewe mwomwen atail kin kapakapki sapwellimatail misineri kan—oh ong peihn atail keirda en kak kapwurepene Isrehl—met pahn kak en wekidala iren madamadau wet. Se kin kalapw kapakapki me kiht oh misineri kan en kak diar irail kan me onopadahngehr ale me mehlel en rongamwahu en Sises Krais kopwurupwurdoh. I men ese, ihs me kitail pahn kohla tuhwong ni ansou me kitail pahn kapakap ni ngidingid en diar irail kan me inengiengehr en mweidohng kupwuren Koht en wia arail pilipil keieu kesempwal nan arail mour?
Kitail mweihn pil kak tuhwongedi irail kan me udahn sohte kamehlele Koht de Sises Krais ahpw ansou wet irail udahn men esehlahr duwen Ira oh Sapwellimara pilahn en peren soutik. Ekei irail mweihn “ipwidieng nan inou”14 ahpw salongasangehr nan ahl en inouo. Irail ansou wet mweihn onopadahr en koluhla, pwurodo, oh mweidohng kupwuren Koht en wia arail pilipi keieu kesempwal. Kitail kak sawas ni atail pahn kasamwo iraildo nin duwen kempoakepahtail oh kasalehiong irail atail limpoak. Oh ekei irail kan me kitail pil kak mweihn tuhwongedi kin kalapw medewe me mie mehkot me sohte nan arail mour. Pil irail wie kaskasik unseko oh popohl me mie rehn irail kan me inengiengehr en mweidohng kupwuren Koht en wia arail pilipil keieu kesempwal nan arail mour.
Uhk en rongawahu en kapwurepene Isrehl tehtehlapesengehr. Mie pere ohng emen emen aramas me ahniki ineng unsek en utungada rongamwahu en Sises Krais. Emen me iangalahr e wialahr emen Sapwellimen Koht serihn inou,15 ipwieng de pwokpwokda. Emen emen wiahlahr weliepe unsek ong mehkoaros me Koht ketin inioukihengehr seri pwoson kan en Isrehl!16
Emen emen kitail ahniki koahiek oh maraihn, pwehki kitail wia seri en Koht. E kin ketin mahsanih emen emen kitail ni pahrek. Dahme sansalehr kan me pid duwen mehlel wet udahn kaselel. Riei ohl oh lih akan, menlau rong mwahu ong dahme i pahn koasoaia met. Koht sohte kin poakoahng ehu keinek laud sang ehu. Sapwellime mahsen me pid ire wet me inenen sansal. E lukehieng koaros en kohdo Reh, “me tontoal oh pwetepwet, me sensel oh saledek, ohl oh lih.”17
I kamehlelehieng kumwail me ni amwail kesihnen mwohn Koht e sohte sang ni pohn kilimwail. Pwungki de sohte pwungki rehn Koht pahn sansal sang ni amwail mehlelieng Koht oh Sapwellime kosonned akan, oh kaidehn pwehki sang ni pohn kilimwail kan.
I ahniki kapahtou ki riatail ohl oh lih tontol kan nan sampah me powehdier medek en kasohwahu oh poupoar me irail kin ahniki. Rahnwet I peki rehn toweh kan koaros wasa koaros en kahluhkihwei ni sohte utungada mwohmw kan oh wiewiah kan en poupoar. I peki ni ngidingid rehmwail en koangoangoahki wahu en mie ong Sapwellimen Koht seri kan koaros.
Iren kalalapak ong emen emen kitail, sohte lipilip keinek en iawasa, e duwepenehte. A kumwail inengieng en mweidohng kupwuren Koht en wia pilipil keieu kesempwal nan amwail mour? A kumwail inengiengehr en mweidong Koht en wia soun kaweid keieu kesempwal nan amwail mour? A kumwail pahn kak mweidohng Sapwellime mahsen kan, Sapwellime kosonned akan, oh Sapwellime inou sarawih kan en wia poahson en dahme kumwail kin wia nan ehu ehu rahn akan? Kumwail pahn kak mweidohng Sapwellime ngihl en wia ngihl me pahn keieu kesempwal sang koaros? A kumwail inengiengehr en mweidohng sohte lipilip mehkot me E anahne kumwail en wia pwehn alehda dahme keieu kesempwal sang soahng teikan me koadoahkpe anahne wiawi pwehn kak pweida? A kumwail inengieng en ale amwail sohsoh kan en kihdihla pahn Sapwellimeh kan?18
Song medewe ia mwomwen soangen inengieng ah pahn kapai kumwailda. Ma kumwail sohte pwopwoud oh raparapahki amwail pwoud soutik, amwail kupwuriso en wia emen mehn “Isrehl” pahn sowesei kumwail en pilada ihs me kumwail pahn mwemweihtih oh ia pahn mwomwe.
Ma kumwail pwoudki emen me kawelahr ah inou sarawih kan, amwail ineng en mweidohng kupwuren Koht en wia amwail pilipil keieu kesempwal nan amwail mour pahn mweidada amwail inou sarawih kan rehn Koht pahn tengedi. Sounkomouro pahn koaloalamwahuihala amwail mohngiong ohla kan. Nanleng pahn ritida ni amwail pahn rapahki en ese mwomwen amwail pahn kokohla mwowe. Kumwail sohte anahne en mihmih seli de wie madamadau.
Ma kumwail ahniki iren kalelapak kan duwen rongamwahuo de Mwomwohdiso, ni amwail pahn mweidohng kupwuren Koht en kaun kumwailda, E pahn ketin kahlwai kumwail en diar oh wewehki me keieu pwung, mehlel unsek me pahn kaweid amwail mour oh sowesei kumwail mihmih teng pohn ahl en inouo.
Ni ansou me kumwail pahn kin lelohng kasongosong—iterete ma kasongosongo leledohng kumwail ansou me kumwail ahniki pwunod de wie kelekelehpw, de ahniki sawehwe—na medewe ia wen idamah me kumwail kak ahniki ni amwail pahn pilada en mweidohng kupwuren Koht en kaunda amwail mour oh ni amwail pahn ngidingidki amwail peksawas Reh en kakehlailih kumwail.
Ni ansou me kumwail pahn ahniki kupwuriso laud en mweidohng kupwuren Koht en kaun kumwailda, en wia kisehn Isrehl, eri pilipil tohtoh pahn mengeila. Songen kahpwal tohtoh pahn sohla wia kahpwal kei! Kumwail ese ia wen mwahu kumwail en kapwataikumwailda. Kumwail ese dahme kumwail pahn kilang oh wadek, iawasa kumwail pahn mwemweihtih ie, oh ihs me kumwail pahn patehng. Kumwail ese dahme kumwail mwauki wia pwehn pweida. Kumwail ese songen aramas dah men me kumwail men wiahla.
Eri, riei ohl oh lih akan, anahnepe en mie pwoson oh sohpeikasal pwehn mweidohng kupwuren Koht en wia amwail pilipil keieu kesempwal nan amwail mour. Anahne en kol tengedi, wia ni pwungin doadoahk en pali ngehn en koluhla oh pwilikihdi wiewiahn aramas sang ni Tomw en Sises Krais.19 Anahne en ansou koaros, rahn koaros en nantiheng wia mwekid me pahn poatoapoat en onopki rongamwahuo, esehla laud duwen Samatail Nanleng oh Sises Krais, oh rapahki oh sapeng amwail kaudiahl.
Nan iraihr en ansou en kahpwal pwukat me Wahnpoaren Paul kohpada,20 Sehdan solahr songosong en rungkihla ah mwekid suwed kan me pahn kawehla Sapwellimen Koht pilahn. Me suwedo kehlailpesengehr oh diralahr. Eri ihte ahl en pali ngehn en kak pitikihla iei en kak mweidohng kupwuren Koht en wia atail pilipil keieu kesempwal ong nan atail mour, kitail en kak ese rong Sapwellime ngihl, oh kitail en doadoahngki atail kehlail en sowese kapwurepene Isrehl.
Eri met, ia mwomwen en Kauno pepehm duwen aramas akan me pahn mweidohng kupwuren Koht en wia arail mehn pilipil keieu kesempwal? Nihpai ketin oaroalapehda: “[Kauno] poakoahng irail kan me pahn wiahki ih arail Koht. Kumwail kilang, e poakoahng samatail kau, oh e ketin wiahda inou ong irail, ei, pil Abrahm, Aisek; oh e tamatamante inou sarawi kan me e ketin wiadahr.”21
Oh dahme Kauno pahn ketin wiahng Isrehl? Kauno ketin kaukilahr me E pahn ketin peiki atail kahpwal akan oh pil en neitail serih kan kahpwal akan, oh en neihn neitail serih kan kahpwal akan lella ni dih kesiluh oh kapahiou.22
Ni amwail pahn kin onopki sapwellimwomwail pwuhk sarawih kan nan ereihn sounpwong weneu me pahn kohdo, I koangoangoahkin kumwail en wiahda ehu lis en inou koaros me Kauno ketin inoukihdi E pahn ketin wia ong inoupen Isrehl. I medewe kumwail pahn udahn pwuriamweikihla. Medemedewe laud inou pwukat. Kin koasoia duwen tehnpas sarawi ong amwail peneinei de kempoakepahmwail kan. Eri kumwail ahpw momourki oh kilang inou pwukat arail pahn pweida nan amwail mour.
Kempoakepahi ohl oh lih akan, ni amwail pahn pilada mweidohng kupwuren Koht en wia amwail mehn pilipil kesempwal nan amwail mour, kumwail pahn peihn kehn me sapwellimatail Koht iei “e wia Koht en manaman akan.”23 Ni aramas, kitail wia Sapwellime serihn inou, oh kitail pahn lukwerda sang ni Sapwellime ahd. Oh met me I kadehdehki ni lengileng sarawi en Sises Krais, ahmen.