Koapwoaroapwoariki Kauno
Pwoson wehwehki koapworopworki Koht ansou mwahu oh apwal, mendahte ma kitail aliale lokolok lao kitail kilang Lime kan mwohtail.
Riei ohl oh lih akan, kitail koaros kaskasik--ahpw mehlel ngehi--kitail en rong mahsen en ritingedi sang atail soukohp kempoake President Russell M. Nelson. Tiepene wet me kamarain mehlel, ahpw e wia pak keriau me soumwahu en COVID-19 wekidahla mwomwen atail kin wia soangen doadoahk wet. Kitail nohn pwangahki soumwahu wet, kehrehda kitail kereniong men usasang piten moangatail kan. Likamwete, ekei Riei Ohl pwukat wiahier soango. Kumwail en menlau ese me se kin poaden kapakapki irail kan me ahniki katoutou pwehki met, mehlel peneinei en irail kan me mehlahr. Koaros pwungkipene me irairwet me udahn, nohn wereilahr.
Ia uwen werein atail kin awi kamwahu ong kahpwal me kin kipekitaildi? De pil dadaurete pein atail kahpwal ni atail kin awiawi oh awiawi sawas me kin pwand en lelodo? Dahme sawas pwandki nan atail solahr kak dapwin atail kahpwalo?
Ni atail wiewia peidek pwukat, kitail kak, ma kitail song, rong ngilen en emen tohrohr ah wie weriwer nan wasa loal, rotorot nan kalipwuhs nan ehu ansoun keieu kepeu nan wasao.
“O maing Koht, komw ketiket ia?” se rong ngihlo peido sang nan kalipwuhs en Liberty Jail. “Oh ia perehre me kin pwaindi ahi wasahn ruko? Ia uwen reirei en omwi pahn mweidohng ie ien lokolok?”1 Ia uwen reirei, Maing ahi Kaun, ia uwen reirei?
Eri, kaidehn kitail me tepin wia oh kaidehn kitail me pahn lahs en wia songen peidek pwukat ansou me kahwal kin kipeikitaildi de ahneki mohngion weirek me sohte kin uhdi. I sohte koskosoia soumwahu lusulus de kalipwuhs ahpw kumwail, amwail peneinei, oh mehn mpomwail kan me kin loieng songsongen kahpwal kan. I koskosoia me tohto me mehkihla arail men pwopwoudida ahpw soh de irail kan me pwopwoudehr oh kin anahne irail en nan pwung mwahu. I koskosoia irail kan me kin alehdi soumwau doar kan--me ele sohte kak mwahula--de irail kan me ahneki soumwahu en peneinei doar me sohte wini kak kamwahuiala. I koskosoia uwen kahpwal me irail kan me ahneki soumwahu en mwahliel de kisingai me kadaulahr oh kalewedier aramas tohto, oh kawelahr mohngiong kan en aramas me kin poakohng irail. I koskosoia aramas semwehmwe kan, me Sounkomouro mahsanihong kitail en dehr manokehla, oh I koskosoia kumwail me awiawi pwuredohn seri men, sohte lipilipil sounpar depe, me wetsangehr ahl me kumwail kapakapki eh keid loale.
Palilahsang met, I pil ese me mendahte dir songen kahpwal me kitail kin awiawi ahpw kahpwal laud kan me rasehng pai en wehi, kopwerment, oh ehupenehn nan pwungen aramas pil kin doke emenemen kitail. Samatail Nanleng ketin kasik kitail en apwalih kahpwal lap pwukat patehng pein atail kahpwal kan, ahpw e kin miehte ansou nan atail mour kan me mendahte kitail kin nantihong ni mehlel, ngidingidki atail kapakap sohte kamwahu kin pweida, ong kahpwal lap akan de pein atail kahpwal kan. Eri ni atail kin doadoahk oh patpene awi pasapeng kan ong atail kapakap kan, I wia inou en wahnparon wet me amwail kapakap kan alahldi oh pasapengla, ahpw ele kaidehn ni ansou oh ni mwohmw me kitail kin kasik. Ahpw kapakap kan kin pasapenglaansou koaros ni ansou oh ni mwohmw me pahpa/nohno limpoak poatopoto kin koasonehdi. Riei ohl oh lih kempoake kan, menlau wehwehki me Ih me sohte kin ketin seimwok oh kommol2kin ketin nsenohkihte Sapwellime serihkan an ahneki peren oh popohl unsek mwohn mehkoaros me aramas sarawi men kin wia. Iei Ih me limpoak unsek, keieu lingan, oh Mware iei Sahm Kalahngan.
“Ma iei met,” kumwail ele kak nda, “Sapwellime limpoak oh kalahngan sou pwalangpeseng pein ahi Sehd Weitahtao pwe I en kak kotehla ahi kahpwal kan pohn wasa madekeng? E sou konehng en kadaredo paret en nan madau kan sang wasah kis pwehn kangadahsang atail kahpwal kan en nan mwehi kapw wet?”
Pasapeng ong peidek pwuko iei “Ehi, Koht kak ketkihda manaman ansou koaros, ahpw kitail pahn nektehn wehwehkihda me ansou oh mwehi kan en atail seilok wet iei Sapwellime oh Sapwellime kelehpw pwehn kahlua.” E kin ketin kaweid kalendar en emenemen kitail koaros. Ong aramas koaros me kin kehlailda ni ahr kin doulong nan Pwarer en Bethesda,3 emen aramas pahn awiawihki sounpar 40 nan sahpwtehn pwehn pidelong nan sapwen inouo.4 Ong Nihpai oh Lihai koaros me ale perehre sarawi sang kisiniei en arail pwoson,5mie emen Abinadai pahn rongala ni ah tuhkehn isihslao. 6 Oh kitail pil tamatamn Ilaisa me ekerdihdo kisiniei sang nanleng pwehn wia ah tungoal kadehde ong samworohn Baal kan7iei Ilaisa ohte me powehdi ansou me keteu sohla mwerki sounpar kei, oh erein ansou ieu, e kin momourki kisin tungoal tikitik me paret men kin pihrkidohng.8 Sang ni pein ahi kendo, e sohte wia songen kisin mwenge me “kin itar.”
Ia wehweh? E wehwehki me pwoson iei koapworopworki Koht ansou mwahu oh apwal, mendahte ma kitail alahle lokolok lao kitail kilang Limeh kan mwohtail.9 Met kak wia mehkoat apwal nan mwehi wet ansou me me tohto kin kamehlele me ihme keieu mwahu nan mour wet ma sohte kahpwal, oh sohte me konehng pwunodiki mehkoat.10 Ahpw kamehlel wet sohte kak kahluwai kitail ong “momourki mour en Krais ni unsek.”11
I peki mahk rehn Elder Neal A. Maxwell ni ahi eimahda oh wekid mehkot me e kosoiaier, I pil iang nda me “en aramas emen mour … sohte kak audaudki pwoson oh ahnsouwohte sohte pwunod.” E sohte pahn kak wiawi “en ipihpseli nan mour,” ndinda ni atail kin nim ehu kep en pilen karer: “Kauno, komw ketkihongie me keieu mwahu, ahpw ieremen ketkihdo nsensuwed, de pahtou, de medek, de uhpene. Menlau dehr mweidohng aramas en kailongkinie de pangiehla, oh ihme keieu, dehr mweidehngie I en pehm me Komw likidmalielahr de irail me I pokepoke. Mehlel, Kauno, kanaiehng pwe I en dehr loieng irair kan me kahrehiong Omwi sarawi. Ahpw, ahnsou me kahpwal kan en mehteikan nekier, menlau mweidehng ie I en kousoanla Rehmwi, wasa me I pahn suweiki uwen ata duwepene ni ahi ipihpseli pohn ahi depwek en Mour en Souleng kansenamwahu.“12
Riei ohl oh lih kempoake kan, Mour en Souleng me kin koaloalamwahu, ahpw kin kalap sohte kansenamwahu. Ahl me kolahng mwakelekel oh popohl met oh mwuhr me reirei oh ekei ansou kin pwukiaki. E kin anahne ansou oh dingang pwehn alu loale. Ahpw, ni mehlel, isepe me inenen kouwahlap. Kasukuhlpen me mehlelo inenen sansal oh pwung nan Alma 32 nan Pwuken Mormon. Wasao samworou lapalap men padahngki me mahsen en Koht kin poadidi nan atail mohngiong kan duwete weren tuhke ehu, oh ma kitail kin kalamwur, kamwakele, kakairada oh kangoange, e pahn ansou kohkohdo kihda wah “me keieu kaselel, … iou sang mehkoaros me iou,” tungoale wahko kitail sohla pahn men nimpilda oh men mwengeda.13
Padahkpen tohto mie nan irelaud kaselel wet, ahpw ihme keieu kesempwal kehkehlik en apwalih weren tuhkeo oh kitail anahne awi pwe en mahla; kitail “kilekilengkihla mwowe pwoson lao tuhkeo kihda wah.”14 Atail ansoun dolung, Alma nda, kin “kohkohdo te.”15 Ihme kahrehda ohlo kaimwsekala ah padahk kaselelo ni eh kapwkapwurehiong pak silu likwer en pwerisek oh kanengamah ni kakairdahn mahsen en Koht nan atail mohngiong kan, “awiawi,ki “kanengamah” ni eh nda, “… pwe tuhkeo en kihda wah ong kumwail.”16
COVID oh kanser, peikasal oh pahtou, kahpwal en mwohni oh kasongsong en peneinei. Iahd me kahpwal pwukat pahn sohrala? Pasapengo iei “kohkohdo te.”17 Oh ma ansouo pahn mwadang de pwapwand met kaidehn kitail me pahn nda, ahpw pwehki mahk en Koht, kapai kan pahn kodohng irail kan me kin kolokol rongamwahu en Sises Krais. Ire wet kapwungpwunglahr nan mwetuwel ehu pohn nahna ehu nan Serusalem keilahn aio.
Met ni atail rong atail soukohp kempoake ritingedi kapokon wet, kitail en tamataman, en Russell Nelson ah kasaledahr erein ah mour, me irail kan me kin “{85koapworopworiki Kauno pahn onehda sapahl ar kehl, [oh] Re pahn kin kehlail rasehng ikel kan; ni ar pahn kin tang, re sohte pahn pwangada; … ni ar pahn kin alu, re sohte pahn luwetala.”18 I kapakapki me “ahnsou keren”—mehda ma mwadang de pwand—kapai pwuko pahn kohdo ong kumwail koaros me kin rapahki kommoal sang pahtou oh saledek sang nsensuwed. I kadehdehki limpoak en Koht oh Kopwurpwurdohn Sapwellime rongamwahu lingano, me wia pasapengpen kahpwal koaros me kitail kin sohpeiong nan mourwet. Ni mwaren Kauno Sises Krais, ahmen.