1 Kedekedeo mwurin Apinadai kaimwseklahr pato pwukat, nanmwarkio ahpw ketin poaronehla sapwellime samworo ko en koledi ih eri pakahrlahng kamakamala.

2 Ahpw mie emen nanpwungarail me adaniki Alma, e pil wia emen kadaudok en Nihpai. Oh e wia ohl pwulopwul men, oh e kamehlele mahsen akan me Apinadai mahsaniher, pwe e ese duwen wiewia suwed kan me Apinadai kadehdehdahr duwen irail; eri e tepida patohwan peki rehn nanmwarkio en dehr engiengda pahn Apinadai, ahpw en ketin mweidala en patopatohwei ni popohl.

3 Ahpw nanmwarkio engiengda kouwahlap, oh kupwurehda Alma en lekdekiei sang rehrail, oh ketin kadarala sapwellime ladu kan mwuri pwe irail en kemehla.

4 Ahpw e tangasang mwohrail oh rukila wasa me irail sohte kak diar. Oh ni eh rukurungki rahn tohto, e ahpw ntingihedi mahsen kan koaros me Apinadai mahsaniher.

5 Kedekedeo nanmwarkio ahpw kupwurehda sapwellime soun silasil kan irail en kapilpene Apinadai oh koledi; oh irail pirehdi oh kesehlong nan imweteng.

6 Oh mwurin rahn siluh, mwurin eh wiekupwurehngehr sapwellime samworo ko, e ahpw kupwurehda me e pahn pwurehng wisikdo mwowe.

7 Oh e mahsanihiong ih: Apinadai, se diaradahr sapwung me ke wiadahr, oh ke warohng kamakamala.

8 Pwe ke nda me pein Koht pahn ketidihdo rehn aramas akan; oh met, iei kahrepen ahmw pahn kamakamala ihte ma ke pahn kapwure koasoai kan koaros me ke koasoaiaki me suwed duwen ngehi oh nei aramas akan.

9 Apinadai ahpw patohwanohng ih: I patohwanohng komwi, I sohte pahn kapwurehieng pato kat me I patohwaner duwen aramas pwukat, pwe pato mehlel; oh pwe komwi en kak ese me pato pwukat mehlel I mweidehng pein ngehi en lohdi nin limomwi kan.

10 Ei, oh I pahn lokolok lao lel mehla, oh I sohte pahn kapwurehiong ei pato kat, oh re pahn wia mehn kadeikpomw. Oh ma komw pahn kemeiehla, komwi kemelahr aramas pwung, oh met pahn pil wia mehn kadehdehpen dipomw ni imwin rahno.

11 Oh met nanmwarki Noha pahn kadaralahier, pwehki e masak eh koasoi kan; pwe e masak e de lohdiong pahn kadeik en Koht.

12 Samworo ko ahpw ngihl laudida werikihda, oh tepida kedipa ih, ndinda: E kauwe nanmwarki. Eri nanmwarkio pwurehng engiengda pah, oh e ahpw ketkihong irail en kemehla.

13 Kedekedeo irail ahpw koledi oh saliedi ih, oh wowokihki kilio tuhkehn isihs, ei, lao eh mehla.

14 Oh met ni ahnsou me e tepda mwasingkihla kisinieio, e ahpw werikilahng irail, ndinda:

15 Kilang, nin duwen amwail wiahiong ie, e pahn leledo ahnsou me kadaudokemwail kan pahn kalokehki aramas tohto soangen lokolok me I lokolongki, iei lokolok en mehkihla kisiniei; oh met pwehki arail kamehlele komour en Kauno arail Koht.

16 Oh ahnsouo pahn leledo me kumwail pahn lokolongki soangsoangen soumwahu pwehki amwail wiewia suwed kan.

17 Ei, oh kumwail pahn kamakam wasa koaros, oh pahn pakasarpeseng oh ikiparala wasa koaros, iei duwehte mahn lawalo oh kommwad eh kin pwakihpeseng pelinmen lawalo kan.

18 Oh ni ahnsouo amwail imwintihtih kan pahn pwakih kumwail oh kolkumwaildi, oh kumwail pahn lokolok, duwehte ei lokolongki medek en mehkihla kisiniei.

19 Iei met me Koht pahn ketin dupukong irail akan me pahn kemehla sapwellime aramas. Maing Koht, komw ketin ale ngeniet.

20 Oh met, ni ahnsou me Apinadai patohwanehr mepwukat, e pwupwudi, ni eh mehkihlahrkisiniei; ei, kamakamala pwehki e sohte men kahmahmkihla sapwellimen Koht kosonned akan, e ahpw katengehkihdi mehlel en eh mahsen kan sang ni eh kamakamala.