1 Eri kedekedeo Amon oh nanmwarki Limai tepida wehwehkihong aramas ako duwen arail pahn kapitirailsang nan mouren kalidu; oh re kapokonepene aramas koaros; oh re wia met pwe irail en tuhkipene oh rongehn aramas pwukat pilipilong duwen koasoandi wet.

2 Kedekedeo irail sohte kak diar wiepe ehu me irail en kak kapitirailsang nan kalidu, pwe irail men wahda arail pwoud kan oh neirail seri kan, oh neirail pelin sihpw kan, oh neirail pelin kou kan, oh imwarail impwal akan kolahng nan sapwtehno; oh Mehn Leimen kan me nohn tohto, oh e pahn inenen apwal ong aramas en Limai kan re en pelian irail nan madamadau en peiki kedlahs pwe irail en kak pitsang nan mour en kalidu.

3 Eri Kidion ahpw patohla oh uh mwohn nanmwarkio, oh patohwanohng: Maing nanmwarki, pak tohto komwi kin ketin karonge ei kaweid ni ahnsou me kitail kin mahweniong riatail kan, Mehn Leimen kan.

4 Oh maing nanmwarki, ma komwi sohte wiakinie ladu sohkatepe men, de ma komw kin ketin karongehte ekis ei iren kaweid, oh ma emwahu ong komwi, iei ahnsou wet me I men peki komwi en ketin karonge ie ahnsou kiset, oh I pahn wia sapwellimwomwi ladu oh I pahn kapitala sapwellimwomwi aramas akan sang nan mour en kalidu.

5 Oh nanmwarkio ahpw mweidohng en kak pato. Oh Kidion ahpw patohwanohng:

6 Kilang ahl en pedolong oh pedoi, me mih ni kehl en mwurio, me mih nan tihsewenkahnimw wet. Mehn Leimen kan, de neirail sounsilasil kan kin sakaula nihpwong; eri kitail pakairkipeseng rehn neitail aramas akan koaros irail en kihpene neirail pelin sihpw kan oh pelin kou kan, pwe irail en kak kahluwairaillahng nan sapwtehno nihpwong.

7 Oh I pahn kohla nin duwen sapwellimahr poahngok oh wahla kaimwiseklahn nohpwei en wain ong Mehn Leimen kan, oh irail pahn sakaukihla; oh kitail ahpw pahn waieila nan ahl rir me mih pali meing en arail kahnimpwal ko ni ahnsou me re pahn sakaula oh memeir.

8 Kitailpahn kahrehdaatail pwoud kan oh neitail seri kan, oh neitail pelin sihpw kan, oh neitail pelin kou kan; kohieila nan sahpwtehno oh kitail pahn keidla pidakih sahpw en Sailom.

9 Kedekedeo nanmwarikio ahpw karongehla kaweid en Kidion.

10 Oh nanmwarki Limai ahpw kupwurehda spawellime aramas akan en kihpene neirail pelnmen akan; oh e ahpw kadarala nohpwei en wain ong Mehn Leimen kan; oh e ahpw pil kadarala ekei wain, nin duwen kisakis ehu ong irail; oh re ioukihda oh sakaukihlawain me nanmwarki Limai kadaralahng irail ko.

11 Kedekedeo sapwellimen nanmwarki Limai aramas akan ahpw mweselda nihpwongo kohla nan sapwtehno iangahki neirail pelinmen kan, oh irail keidla pidakih sahpw en Sailom kohla nan sapwtehno, oh kaineneiraillahng sahpw en Saraemla, pahn kaweid en Amon oh ienge kan.

12 Oh irail wahda neirail kohl koaros, oh silper koaros, oh arail dipwisou kesempwal koaros, me irail kak wahda, oh pil iangahki kenerail mwenge kan, kohlahng nan sapwtehno; oh irail wenlahte nan arail seiloako.

13 Oh mwurin arail seiloakier rahn tohto nan sapwtehno, irail ahpw lella nan sahpw en Saraemla, oh ehuong sapwellimen Mosaia aramas akan, oh mihla pahn sapwellime manaman.

14 Kedekedeo Mosaia ahpw kasamwo irail ni peren; oh e pil alehdi arail poadopoad kan, oh pil poadopoad kan me sapwellimen Limai aramas akan diarada.

15 Oh met ni ahnsou me Mehn Leimen kan diaradahr me sapwellimen Limai aramas akan mweselsang nan sahpwo nihpwongo, irail ahpw kadarala sounpei kei nan sapwtehno pwe re en pwakihiraildi;

16 Oh mwurin arail pwakpwakih irail rahn riau, irail sohla kak kilang lipwarail; irail eri salongala nan sapwtehno.