1 Oh met, kedekedeo mwekid en kalokolok kan me kin wiawihong mwomwohdiso sang irail akan me sohpwoson tepdahr ukla mehlel me kahrehkihong mwomwohdiso tepida kaulim, oh kaulimakihong arail kaun akan duwen kahpwalo; oh irail kaulimaki Alma. Alma ahpw patohwanla iren kahpwal wet mwohn nanmwarki Mosaia. Mosaia eri tuhkihong sapwellime samworo kan.

2 Kedekedeo nanmwarki Mosaia ahpw ketin kadarpeseng kalohk ehu nan sahpwo pwon duwen me sohpwoson kan en dehr kalokalokei irail akan me tohn mwomwohdiso en Koht.

3 Oh mie kosonned kehlail ehu nan mwomwohdiso kan koaros me keinapwihdi en dehr mie kalokolok nanpwungarail, ahpw aramas koaros en pahrekpene;

4 Irail sohte pahn mweidohng pohnmwahso de aklapalap en kauwehla arail popohl; koaros en kesempwaliki mehn mpe duwehte pein ih, koadoakoadoahke epwelpen pein ar anahn.

5 Ei, oh neirail samworo kan oh sounpadahk kan koaros pahn pein koadoahkehda epwelpen ar anahn, ni mehkoaros ihte ahnsou en soumwahu, de nan anahn laud; oh sang ni ar pahn kapwaiada mepwukat, irail pahn direkihla kalahngan en Koht.

6 Oh popohl laud ahpw pwurehng miehda nan sahpwo; oh aramas akan tepida tohtohla, oh tepida mwarahkpeseng pohn sampah, ei, paliepeng oh palieir, palimese oh palikapi, koukoudahn kahnimw laud kan oh kousapw akan nan sahpwo pwon.

7 Eri Kauno kin ieiang irail oh kin kapaiairailda, oh re wie tohtohla oh kepwehpwehla.

8 Oh met sapwellimen Mosaia pwutak kan kin patehng aramas sohpwoson kan; oh emen nein Alma pwutak pil kin patehng irail, e adaniki Alma, sang eden eh pahpao; ahpw, e wiahla emen aramas me kin pereniki wiewia suwed oh pwongih dikadiken eni. Oh kin kadek koasoi, oh kin wia koasoi en widinge aramas akan; ih eri kahluwa aramas tohto en idawehnla eh wiewia suwed kan.

9 Oh e wia kapwal laud ong kekeirdahn mwomwohdiso en Koht; pitipitihedi mohngiong en aramas akan; kahrehda akupwung nanpwungen aramas akan; met kahrehda imwintihtien Koht en kak doadoahngki eh manaman pohrail.

10 Oh met ni ahnsou me e kohkohseli pwe en kauwehla mwomwohdiso en Koht, pwe e kin kohseli ni rir, ih oh sapwellimen Mosaia pwutangko, kin songosong en kauwehla mwomwohdiso, oh kasalongehla sapwellimen Kauno aramas akan, ni mwohmw ehu me kin uhwong sapwellimen Koht kosonned akan, de pil nanmwarkio—

11 Oh nin duwen ei ndaiong kumwailehr, ni arail wie kohkohseli pwehn kahngohdiong doadoahk en Koht, kilang, tohnleng en Kauno men pwarohng irail; oh e mwomwen ketidihdo sang nan depwek; oh eh mahsen duwehte ngihl en nansapwe, me kahrehiong nan pwehlo, wasa me re keskesihnen ie, rerada;

12 Oh uwen arail pwuriamwei laud, irail pwupwudi nan pwehlo, oh sohte wehwehki mahsen kan me e mahsanih ong irail.

13 Ahpw e pwurehng likwer, mahsanih: Alma, pwourda oh kesihnenda, dahme ke kalokalokehki mwomwohdisohn Koht? Pwe Kauno ketin mahsanih: Ei mwomwohdiso met, oh I pahn kauwada; oh sohte mehkot pahn kesehdi, ihte wiewia suwed en nei aramas akan.

14 Oh tohnlengo ahpw pwurehng mahsanih: Kilang, Kauno ketin karongehier kapakap en sapwellime aramas akan, oh pil kapakap en sapwellime ladu, Alma, omw pahpa; pwe sang ni eh pwoson laud, e wie kapakapki pwe ke en kak esehda me mehlelo; eri, pwehki kahrepe wet me I kohkihdo pwe I en kasalehionguhk manaman oh mweimwei en Koht, pwe kapakap en sapwellime ladu kanen pweida pwehki arail pwoson.

15 Oh met kilang, kumwail kak pelian manaman en Koht? Pwe kilang, ngileiet soh itikada sampah? Oh pil kumwail soh kak kilang ie mwohmwail? Oh I pekederdo sang rehn Koht.

16 Met I ndaiong uhk: Kohwei, oh tamataman kaliduhlahn ahmw pahpa ko nan sahpw en Ihlem, oh nan sahpw en Nihpai; oh tamataman sapwellime kalahngan lap akan me e ketin wiahiong irailehr; pwe irail wie sensel, oh e ketin kapitirailla. Oh met I ndaiong uhk, Alma, kohkohweisang met, oh dehr rapahki ke en kauwehla mwomwohdiso, pwe arail kapakap akan en pasapengla, oh met iei ma ke sohte men omw mour en lekidekila.

17 Eri, kedekedeo ih kaimwseklahn dahme tohnlengo mahsanihong Alma, ih ahpw ketin mweselda.

18 Oh met Alma oh me ienge ko ahpw pwurehng pwupwudiong nan pwel, pwehki arail pwuriamwei kowahlap; pwehki arail kilangkihda tohnleng en Kauno pein meserail kan; oh kepitie duwehte ngilen nansapwe, me itikada nan pwehl; oh irail ese me sohte ehu mehkot likin manaman en Koht me kak itikada pwehl oh wiahiong en rerrer ni mwomwen me e pahn pwalpeseng.

19 Oh met uwen en Alma eh pwuriamweila e lohtengala kowahlap e aupwonkihla, kahrehda e sohte kak kihpeseng ewe; iei, oh e luwetkihla, kahrehda e sohte kak kamwakid peh kan; eri irail akan me iangih ale ih, oh wahda ni eh sohte kak wia mehkot, lao e lella mwohn eh pahpa.

20 Ienge ko eri koasoaiahiong eh pahpao mehkoaros dahme wiawihong irail; oh eh pahpao perenda, pwehki e ese me iei manaman en Koht met.

21 Oh e ahpw kapokonepene pokon ehu pwe irail en kak kadehde dahme Kauno ketin wiahiongehr nah pwutako, oh ienge ko me mih reh ahnsouo.

22 Oh e kupwurehda samworo kan irail en patohpene; oh eri irail tepida kaisihsol, oh kapakap ong Kauno arail Koht en lapwahda ewen Alma, pwe en kak koasoi, oh pwe peh oh neh kan en kak kehlailda—pwe aramas akan en kak kilang oh ese kalahngan oh lingan en Koht.

23 Kedekedeo mwurin arail kaisihsol oh kapakapki erein rahn riau oh pwohng riapwohng, pehn Alma oh nehkan ahpw kehlailda, oh e kesihnenda oh tepida koasoi ong irail, ndindahiong irail en ahneki popohl:

24 Pwe, e nda, I koluhkilahr dipei kan, oh pitikilahr komour en Kauno; kilang I ipwikiher Ngehno.

25 Oh Kauno ketin mahsanihong ie: Ke dehr pwuriamweiki me aramas koaros, ei, ohl oh lih akan, wehi koaros, keinek koaros, lokaia koaros oh sahpw koaros, pahn anahne pwurehng ipwsapahl; ei, ipwisang rehn Koht, wekideksang arail mour en sampah oh mour pwupwula, kolahng mour pwung, poadoandoarkihla Koht, wiahla sapwellime pwutak oh serepein kei;

26 Oh irail wialahr aramas kapw kei; oh ma re sohte pahn wia met, irail sohte kak sohsohki wehin Koht.

27 Oh I ndaiong uhk, ma met sohte pahn wiawi, irail pahn lekdekila; oh met I ese, pwe kereniong I pahn lekdekila.

28 Ahpw, mwurin lokolok laud me lelohng ie, I koluhla ni ei kereniong mehla, Kauno sang ni sapwellime kalahngan, ketin mahsanihada me konehng en kapitiesang nan kisiniei me kin kamwakamwasik wasa kohkohlahte, oh ngehi ipwisangehr rehn Koht.

29 Palingeniet komourlahr sang nan kalokolok en pahtou mehlel oh selidi en dihp. I mih nan wasa keieu rotorot; ahpw met I kilangehr marain en Koht kapwuriamwei. Palingeniet lokolongki kalokolok soutuk; ahpw I pitila, oh palingeni sohla medek.

30 I kasohwe ei Sounkomouro, oh pohnsese dahme atail pahpa ko koasoiadahr; ahpw met pwe irail en kak kilang me e pahn kohdo, oh me e ketin tamataman soahng koaros me e ketin kapikadahr, e pahn ketin kasalehiong aramas koaros pein ih.

31 Ei, aramas koaros pahn kelepwikihdi, oh loh koaros pahn kadehdehda mwowe. Iei, ni imwin rahno, ahnsou me aramas koaros pahn kesihnen pwe re en pakadeikda reh, irail ahpw pahn kadehdehda me iei ih Koht; eri irail me sohte kin momouriki ieias en Koht nan sampah, ahpw pahn kadehdehda me kopwung en kalokolok soutuko e pwungohng irail; oh irail pahn mwekidada, oh rerrer, oh roingkipene mwohn sihlangihr me kin ireirong-wasa koaros.

32 Oh met sangete ni ahnsouo kohla Alma tapiada kin wie padapadahki aramas akan, oh irail akan me iangih Alma ni ahnsou me tohnlengo pwarohng irail, seiseiloakseli nan sahpwo pwon, kalkalohkihong aramas koaros soahng kan me irail rongehr oh kilangehr, oh kalkalohngki mahsen en Koht nan kahpwal laud, pwehki arail kalokolok laud sang rehn me sohpwoson kan, oh pwehki tohto me sohpwoson kan kin kamedekeirailla.

33 Ahpw mehndahte mepwukat koaros, irail kin koaloalamwahuih mwomwohdiso, kakehlaka arail pwoson, oh koangkoangoangehkin irail kanengamah nan lokolok oh nannanti kapwaiada kosonned en Koht.

34 Oh pahmen irail iei sapwellimen Mosaia pwutak; oh adarail akan iei Amon, oh Aron, oh Omner, oh Imnai; ih eden sapwellimen Mosaia pwutak kan.

35 Oh irail kohseli wasa koaros nan sahpw en Saraemla, oh rehn aramas koaros me mih pahn manaman en nanmwarki Mosaia, kin loalenohng ar nanantihong kamwahuiala sapwung kan koaros me irail wiahdahr ong mwomwohdiso, wehkada diparail akan koaros, oh kapakapahrengki soahng koaros me irail kilangehr, oh kawekawehwehda kokohp akan oh pwuhk sarawi kan ong irail koaros me men rong.

36 Oh met irail wia wiliepen nin limen Koht pwehn wadohng [aramas] tohto nan marain en me mehlelo, ei, marain en arail Soundoaro.

37 Oh meid pai irail! Pwe irail kalohki popohl; irail wahdo rongamwahu; oh irail kalohkihongehr aramas akan me Kauno me iei nanmwarki.