1 Eri ahnsou me Mosaia ketin koasoanehdier koasandi wet, e ahpw ketin kadarpeseng [pakair ehu] wasa koaros nan sahpwo, ong aramas koaros, pwe en ketin mwahngihada duwen arail pepehm ong ihs me pahn wia arail nanmwarki.

2 Kedekedeo aramas akan ahpw ehupene, patpatohwan: Se men sapwellimomwipwutak Aron en wiahla aht nanmwarki oh aht kaun.

3 Ahpw Aron samwadalahr nan sahpw en Nihpai, eri nanmwarkio sohte kak ketikihong manaman en kaunda wehio; oh pil Aron sohte men ale pwukoahn kaunda wehi; oh pil emen emen sapwellimen Mosaia pwutak ko sohte inangih ale pwukoahn kaunda wehi.

4 Eri nanmwarki Mosaia pwurehng ketin kadarpeseng kalohk ehu rehn aramas akan; iei, e kadarewei kisin likou ehu rehn aramas akan. Oh iet mahsen akan me ntingdi, ketihtihki:

5 Kilang, kumwail nei aramas akan, de kempoakepahi kan, pwe I wiahkin kumwail riei, I inangih kumwail en medemedewe koasoandi wet me I men peki rehmwail—pwe kumwail men ahneki nanmwarki.

6 Met I men pakairkihong kumwail me aramas meno me uhdahn ahneki pwung en kaunda wehiet soikalahr, oh e sohte men alehda pwukoahn wehio.

7 Oh met ma mie emen tohrohr me pahn idihdida pwe en wiliandi, kilang, I periki pingiping de pwarada nanpwungamwail. Ele mwein nei pwutako, me ahneki pwuhng en kaunda wehiet, pahn nsensuwedkihla oh kahluwahsang apali aramas pwukat, me pahn uhd kahrehda mahwen oh pingiping nanpwungamwail, me pahn kahrehda kamaramas oh kasapwungehla koasoandi en Kauno, ei, oh kamwomwala palingenen aramas tohto.

8 Met I ndaiong kumwail kitail en doadoahngki madamadau loalokong oh medemedewe mepwukat, pwe kitail sohte ahneki pwuhng en kauwehla nei pwutako, de pil ahneki pwuhng en kauwehla emen ma e pahn weliandi ih.

9 Oh ma nei pwutako pahnpwuralahng eh mour pohnmwahso oh aklapalap e pahn kapwure dahme e ndahier, oh alehda eh repenpwung en kaunda wehiet, me pahn kahrehda ih oh pil nah aramas akan en wiahda dihp laud.

10 Oh met kitail kiheng kitail en doadoahngki madamadau loalokong oh kasikasik mepwukat, oh wiahda koasoandi mwahume pahn kahrehiong aramas pwukat en soanamwahu.

11 Eri I pahn wia amwail nanmwarki lao imwin ei mour; ahpw, kitail pilada sounkopwung kei, pwe re en kapwung aramas pwukat nin duwen atail kosonned; oh kitail pahn wiahda ehu koasoandi kapw ong aramas akan, pwe kitail pahn idihada ohl loalokong kan re en wia sounkopwung, me pahn kapwung aramas pwukat nin duwen sapwellimen Koht kosonned akan.

12 Met, e kin mwahu ma aramas men pahn kin pakadeikda rehn Koht sang pakadeikda rehn aramas, pwe sapwellimen Koht kadeik kan me kin pwung ahnsou koaros, ahpw en aramas kadeik kan sohte kin pwung ahnsou koaros.

13 Eri, ma ohl pwung kan kak wia amwail nanmwarki kan, me pahn kin padokada kosonned kan en Koht, oh kadeik aramas pwukat nin duwen sapwellime kosonned akan, ei, ma ohl me pahn wia amwail nanmwarki kak wia duwen me semei, Pensamin ketin wiahiong aramas pwukat—I pahn ndaiong kumwail, ma met kak wiawi ahnsou koaros, eri e pahn mwahu ong kumwail en mie amwail nanmwarki ahnsou koaros me pahn kakaun kumwail.

14 Oh ngehi pil doadoahk sang ni pein ei manaman oh kehlail koaros, pwe I en padahkihong kumwail sapwellimen Koht kosonned akan, oh koasoanehdi popohl nan sahpwet pwon, pwe en dehr mie mahwen de pingiping, sohte pirap, de adihasang en aramas ar dipwisou, de kamaramas, de pil soangen wiewia suwed teikan;

15 Oh mehmen me pahn wiahda dihp, ih me I kalokehki eh wiewia suwedo me e wiahdahr, nin duwen kosonned me kohieng kitail sang atail pahpa kahlap ako.

16 Met I ndaiong kumwail, pwehki kaidehn aramas koaros kin pwung e sohte mwahu ong kumwail en ahneki emen nanmwarki de nanmwarki kei en kaunkumwailda.

17 Pwe kilang, ia uwen wiewia suwed me emen nanmwarki suwed kak wiahda, ei, oh ia uwen laud en kamwomwomwla pahn wiawi!

18 Ei, tamataman nanmwarki Noha, eh wiewia suwed oh eh mour suwed, oh pil weiwia suwed oh mour suwed en sapwellime aramas akan. Kilang ia uwen laud en kamwomwomwla me wiawihong irail; oh pil pwehki arail wiewia suwed kan kahrehiong irail en lohdiong nan mouren lidu.

19 Oh ma sohte sawas en arail Sounkepikipik me kupwurokong-unseko, oh met pwehki arail koluhla mehlel, irail uhdahn pahn lohdihte nan mouren lidu lao lel ahnsou wet.

20 Ahpw kilang, e ketin kapitirailla pwehki arail karakarahkala mwowe; oh pwehki arail pekipek kehlail reh en ketin kapitirailsang nan mouren lidu; eri Kauno kin ketin doadoahngki sapwellime manaman nan irair koaros rehn aramas akan, oh e kin ketin kupwurkalahngan ong irail akan me kin koapworopworki ih.

21 Oh kilang, met I ndaiong kumwail, kumwail sohte kak kasapwildi nanmwarki suwed menihte sang ni uhpene laud, oh kakerehdi nta laud.

22 Pwe kilang, e pahn mie kompoakepah me suwed kan, oh silepe kan pahn ieiang ih ahnsou koaros; oh e pahn kauwehla kosonned kan me koasoandier sang irail akan me kaun mwahu mwowe; oh e pahn tiakpeseng sapwellimen Koht kosonned akan;

23 Oh e pahn kin wiahda kosonned kan, oh kadarohng aramas akan, ei, kosonned akan me pahrekiong eh wiewia suwed kan; oh mehmen me sohte pahn kin kapwaiada sapwellime kosonned akanpahn kamakamala; mehmen me pahn kahngohdiong ih e pahn kadarohng sapwellime sounpei kan re en mahweniong, oh ma ekak pweida e pahn kemeirailla; oh met ih duwen nanmwarki suwed kin kasapwungehla koasoandi pwung kan koaros.

24 Oh met kilang I nadaiong kumwail, e sohte konehng soangen mour suwed wet en kohdohng kumwail.

25 Eri, kumwail pilada sang ni pilipil en aramas pwukat, sounkopwung kan, pwe kumwail en kak pakadeikda nin duwen kosonned akan me kohieng kumwailehr sang atail pahpa kahlap ako, me pwung, oh me kohieng irail sang nin limen Kauno.

26 Met e sohte kin kalapw wiawi me pali moron en aramas akan kin pilada mehkot me uhwong dahme mwahu; ahpw e kin kalapw wiawi me ekei aramas kin pilada me sapwung; eri met kumwail en kapwaiada oh wiahiong en wia amwail koasoandi—en koasoanehdi nin duwen pilipil en aramas akan.

27 Oh ma ahnsou pahn leledo me aramas akan pahn pilada me suwed, eri iei ahnsou meKoht pahn ketin kadeingkumwailda; ei, eri iei ih ahnsou me e pahn ketin ahngiahngihkin kumwail kamwomwomwla laud ehu duwehte me eh ketin wiahier nan sahpwet.

28 Oh met ma mie amwail sounkopwung kan, oh irail sohte kadeik kumwail nin duwen kosonned me kohieng kumwailehr, kumwail kak wiahiong re en pakadeikda rehn sounkopwung lapalap.

29 Ma amwail sounkopwung lapalap akan sohte pahn wia kadeik pwung, kumwail pahn wiahda me ekei sounkopwung titikit kan pahn kohpene, oh irail pahn kadeik sounkopwung lapalap akan, nin duwen pilipil en aramas akan.

30 Oh I kehkehlingkihong kumwail en wia mepwukat koaros ni amwail lemwiki Kauno; oh I kehkehlingkihong kumwail en wia mepwukat, oh en dehpa ahneki nanmwarki; pwe ma aramas pwukat pahn wiahda dihp oh wiewia suwed kan irail pahn pein pwukoaki diparail akan.

31 Pwe kilang I ndaiong kumwail, dipen aramas tohto tepisang ni wiewia suwed en arail nanmwarki kan; eri arail nanmwarki kan pahnpwukoahkihdi arail wiewia suwed akan.

32 Oh met I kin men koasoandi sapahrek wet en sohrasang nan sahpw wet, ahpw mehlel rehn nei aramas akan; ahpw I pwungki me sahpw wet en wia sahpw en mour saledek ehu, oh aramas koaros en kak perenki ar pwuhng kan oh kapai kan ni soangen pahrekteieu, ma Kauno ketin kupwuriki kitail en momour oh sohsohki sahpwet, iei, erein ahnsou me kadaudoketail kan pahn mihmihte sahpwet.

33 Oh pil soahng tohto me nanmwarki Mosaia ntingihda ong irail, kaskasalehiong irail soangen kasongosong oh kahpwal akan koaros en nanmwarki pwung men, ei, lokolok koaros en palingehne pwehki neirail aramas akan, oh pil en aramas akan kaulim kan ong arail nanmwarki; oh e kawehwehiong irail mehkoaros.

34 Oh e padahkihong irail me mepwukat sohte konehng; ahpw me aramas koaros pahn sawaskipene wisik toutou, pwe emen emen aramas en pwukoaki eh pali.

35 Oh e pil kawehwehiong irail duwen kahpwal kan koaros me re pahn mihla pah mananmwarki suwed men pahn kakaun irail;

36 Ei, eh wiewia suwed kan oh mour suwed kan koaros, oh mahwen kan, oh pingiping kan, oh kamaramas, oh pirap, oh adihasang en aramas ar dipwisou kan, oh mouren nenek, oh wiepen wiewia suwed kan koaros me sohte kak wadawadda—e ketin padapadahkihong irail me mepwukat sohte mwahu, oh me re uhwong douluhl kosonned en Koht.

37 Kedekedeo, mwurin nanmwarki Mosaia e ketin kadarpesengehr mepwukat rehn aramas akan, irail ahpw kamehlele me sapwellime mahsen akan mehlel.

38 Eri irail sohla pwungki en mie arail nanmwarki, oh kasik mehlel me aramas koaros pahn ahneki mour pahrek wasa koaros nan sahpwo; ei, oh aramas koaros kasalehda arail mwahuki en pein pwukoaki pein diparail akan.

39 Eri, kedekedeo irail ahpw kapokonepene wiahda pokon kei nan sahpwo, pwe re en pilada ihs me pahn wia arail sounkopwung kan, me pahn kapwung irail nin duwen kosonned me kohieng irailehr; oh irail perenda kowahlap pwehki saledek me kamanamanlahr ong irail.

40 Oh re poakepoake mehlel Mosaia; ei, irail kin kesempwaliki ih laudsang aramas teikan; pwe irail sohte kin wiahki ih kaun lemei men me songosong en kepwehpwehla, ei, pwe mwohnio me kin kauwehla palingehn; pwe e sohte kin noahroake arail dipwisou kan, de pil perenki kakerehdi nta; ahpw e wiahda popohl nan sahpwo, oh kamanahiong aramas koaros irail pahn maiaudahsang soangen mouren lidu koaros; eri irail kin kesempwaliki kouwahlap, ei, laud mehlel.

41 Kedekedeo irail pilada sounkopwung kei en kaunirailda, de en kin kapwung irail nin duwen kosonnedo; oh met me irail wia nan sahpwo pwon.

42 Kedekedeo Alma ahpw pilipilda en wia tepin sounkopwung lapalap, ni eh pil wia samworo lapalap, pwehki ah pahpao me kasapwiladahng ih nan eh pwukoa, oh kihong ih en kohwahki doadoahk kan koaros nan mwomwohdiso.

43 Oh kedekedeo Alma ahpw kin weweidki sapwellimen Kauno ahl akan, oh e kin kapwaiada sawepwellime kosonned akan, oh e kin kapwung ni kadeik pwung; oh mie popohl nan sahpwo.

44 Oh met tapiadahr mwein sounkopwung kan nan sahpw en Saraemla pwon rehn aramas akan koaros me kahdaniki Mehn Nihpai kan; oh Alma me tepin wia sounkopwung lapalap.

45 Oh kedekedeo ah pahpao ahpw kepinlsalehdala, ni ah lel sounpar welihsek riau, ni eh kapwaiadahr sapwellimen Koht kosonned akan ni e momour.

46 Kedekedeo Mosaia ahpw pil pwoula, ni eh kakaunkier sounpar silihsek siluh, nan sounpar weneisek siluh; oh e lelehr sounpar limepwiki duwau sang ni ahnsou me Lihai mwesel sang Serusalem.

47 Oh met kaimwiseklahr mwein nanmwarki ong aramas en Nihpai kan; oh met kaimwiseklahr mwehin Alma, me tapiada arail mwomwohdiso.