1 Kedekedeo se ahpw pwurehng tepida koasoanehdi wehio oh pwurehng kousoanla nan sahpwo ni popohl. Oh I koasoanehdi me soangsoangen dipwisoun mahwen kan en wiawihda, pwe en kak mie nein nei aramas akan dipwisoun mahwen mehn onopada ong Mehn Leimen kan ahnsou me irail pahn pwuredo oh mahweniong nei aramas akan.

2 Oh I koasoanehdi sounsilasil kan en kapilpene sahpwo, pwe Mehn Leimen kan en dehr pwuredohng kiht ni aht pahn sasairiki oh kaweikitala; oh ih kahrepen ei silehdi nei aramas akan oh nei pelinmen kan, oh kasilehsang irail re en dehr lohdiong pahn aht imwintihti kan.

3 Kedekedeo se ahpw sohsohkihla sahpw en aht pahpa kahlap ako erein sounpar tohto, ei, erein sounpar rieisek riau.

4 Oh ngehi patohwanohng ohl akan re en deipwelihada sahpwo, oh padokedi soangsoangen werentuhke oh soangsoangen wahn tuhke kan.

5 Oh I pil koasoanehieng lih akan irail en deidei, oh re en kin pwersekieng arail doadoahk, oh wiahda soangsoangen likou linen kaselel kan, ei, oh pil soangsoangen likou kei, pwe se en kak likawih oh dehr kilisou; oh se ahpw pweida nan sahpwo—se ahpw ahneki popohl nan sahpwo erein sounpar rieisek riau.

6 Kedekedeo nanmwarki Leimen ahpw pwoula, oh sapwellime pwutak me uhd weliandi wiahla nanmwarki. E ahpw tepida kamwoarongehda sapwellime aramas akan en uhwong nei aramas akan; irail eri tepida kaunopadahng mahwen, oh pwe irail en kohdahdo oh peiong nei aramas akan.

7 Ahpw I kadaralahr nei lipoahrok kei nan sahpw en Semlon, pwe I en kak diarada arail koasoandi kan oh pwe I en kak onopadahng irail, pwe irail en dehr kohdohng nei aramas akan oh kamwomwirailla.

8 Kedekedeo irail ahpw kohdo ni paliepeng en sahpw en Sailom, iangahki neirail karis en sounpei kan, ohl wisik kesik ketieu iangahki arep kan, kedlahs kan, oh naipokos kan, oh takai kan, oh pahi kan; oh irail sihpihsang piten moangerail kan kahrehda irail moang koikoi; oh irail katengehdiong nin lukeperail kan kisin likoutei me wiawihkihda kilin mahn.

9 Kedekedeo I ahpw patohwanohng lih akan oh seri kan irail en rukula nan sapwtehno; oh I pil patohwanohng ohl me mah kan koaros me kak wisik dipwisoun mahwen oh pil pwutak pwulopwul kan koaros me kak pil wisik dipwisoun mahwen kan, irail en ehupene oh mahweniong Mehn Leimen kan; oh I koasoaneiraildi nan pwihn kei, emen emen irail nin duwen arail sounpar.

10 Kedekedeo se ahpw kohdahla oh mahweniong Mehn Leimen kan; oh ngehiet, nan ei malahret, I pil iang kohla oh mahweniong Mehn Leimen kan. Kedekedeo se ahpw mahwenki roson en Kauno.

11 Ahpw kilang, Mehn Leimen kan sohte kin ese duwen Kauno, de pil sapwellimen Kauno roson, eri irail kin kehlkihte pein arail kehlail. A irail aramas kehlail kei, nin duwen kehlail en aramas.

12 Irail wia aramas me mour kamasepwehk oh keper, oh kin pereniki kam aramas, re kin kamehlele tiahk en arail pahpa kahlap ako, nin duwe met—Re kamehlelehte me arail peukeussang nan sahpw en Serusalemo pwehki wiewia sapwung en arail pahpa kahlap ako, oh me riarail ohl ako wiahiong irail sapwung nan sahpwtehno, oh sapwung pil wiawihong irail ni ahnsou me irail kotehla sehdo;

13 Oh irail pil sapwung ni ahnsou me irail mihmi nan tepin sahpw me irail sohsohkio, mwurin arail kotehdo sehdo, oh soahng pwukat koaros pwehki Nihpai kin loaloapwoationg kapwaiada kosonned akan en Kauno—kahrehda e kenikenla rehn Kauno, pwe Kauno karongehr eh kapakap akan oh sapengala ih, oh e kaunda arail seiloako nan sapwtehno.

14 Oh rie ko lingeringerda pah pwehki arail sohte wehwehki sapwellimen Kauno wiewia kan; irail pil lingeringerda pah nan sehdo pwehki arail nohn keptakai ong Kauno.

15 Oh irail pil lingeringerida pah ni ahnsou me irail lelledo nan sahpw en inouo, pwehki irail nda me e kihsang arail manaman en kaunda aramas akan; oh re pil song en kemehla.

16 Oh irail pil lingeringerda pah pwehki e kohkohla nan sapwtehno nin duwen Kauno e ketin mahsanihong en wia, oh dene me e wahsang poadopoad kan me ntingdi pohn pileit prahs kan, oh me dene me e pirapahsang irail.

17 Eri ihme irail kin padahkihong neirail seri kan me irail pahn kin kailongkin irail, oh me irail pahn kemeirailla, oh me irail pahn kulihasang ar dipwisou kan oh pirapahla, oh wia uwen arail kak koaros en kaweirailla; iei me irail kin ahneki kailok poatoapoat wet ong kadaudok en Nihpai kan.

18 Ih kahrepe wet me nanmwarki Leimen, sang ni widing oh mwersuwed likamw, oh sapwellime inou likamw, pitihiehdi, eri I kahluwahdo nei aramas akat sahpwet pwe re en kak kaweirailla; oh se lokolongkier nan sahpwet erein sounpar tohto.

19 Oh met ngehi, Sihnep, mwurinei koasoia mepwukat koaros ong nei aramas akan duwen Mehn Leimen kan, I koangngoangehkin irail en kohla mahwenkihong irail uwen arail kehlail koaros, ni ar koapworopworki Kauno; eri, se salpene oh pelianirailda.

20 Kedekedeo se ahpw pwurehng kasareirailla sang nan sapwato; oh se kemehla me ngederrehrail, iei uwen tohto me se sohte kak wadekiraildi.

21 Kedekedeo se ahpw pwurodo nan pein sapwat, oh nei aramas akan pwurala apwali neirail pelin mahn akan, oh koadoahki sapwarail kan.

22 Oh met pwehki ei mahlahr, I kihong manaman en kaunda wehi ong emen nei pwutak ko; eri, erehr ei koasoi. Oh Kauno en ketin kupwuramwahwih nei aramas akan. Ahmen.