1 Eri ahnsou me nanmwarkio karongehda mahsen pwukat, e ahpw mahsanihong sapwellime samworo ko: Mehmenen en pekeusweisang met oh kamakamala; pwe dahme kitail pahn wiahiong ih, pwe e iahkalahr.

2 Oh irail kesihnenda oh song en koledi ih; ahpw e kauiraildi, oh patohwan ong irail:

3 Dehr doahke ie, pwe Koht pahn ketin kaweikumwailla ma kumwail pahn doahke ie, pwe I saikinte ndaiong kumwail dahme Kauno kupwurki ien padahkiong kumwail; oh I pil saikinte sapengala kalelapak me kumwail peki rehi I en padahkihong kumwail; eri, Koht sohte pahn mweidohng ie en kamakamala ahnsou wet.

4 Ahpw I pahn kapwaiada mahs dahme Koht kupwurki I en wia; oh pwehki ei padahkihong kumwail me mehlelo kumwail lingeringerda pahi. Oh pil, pwehki ei patohwan duwen mahsen en Koht, kumwail nda me I iahkalahr.

5 Met kedekedeo, mwurin Apinadai patohwanda mahsen pwukat, karehiong sapwellimen nanmwarki Noha aramas ako masak koledi ih, pwe Ngehn en Kauno ketin tiadahr powe; oh pohn meseo lingaling kowahlap, iei duwehte Moses e patopato pohn nahna Sainai, ni ahnsou me e patopatohieng Kauno.

6 Oh e pato sang ni manaman oh mweimwei en Koht; oh e ahpw usehla patohwan:

7 Kumwail kilangehr me kumwail sohte ahneki manaman en kemeiehla, eri I pahn kanekehla ei padahk. Ei, oh I pehm me e kamedekehla mohngiongamwail kan pwehki ei kasalehiong kumwail duwen mehlel en amwail wiewia suwed akan.

8 Ei, oh ei koasoi kat audehkin kumwail pwuriamwei oh wahpwon, oh pil lingernger.

9 Ahpw I pahn kanekehla mahs ei padahk; oh mwuri, I sohte katapaniki wasa me I pahn kohla ie, ma I pahn komourla.

10 Ahpw iet me I pahn kaselehiong kumwail mahs, dahme kumwail pahn wiahiong ie mwurin met, e pahn wia kamwomwada kei en mehkan me pahn wiawi.

11 Oh met I pahn kanekehla ei wadekong kumwail sapwellimen Koht kosonned akan, pwe I kak kasawiada me e sohte ntingdiong nan mohngiongimwail kan; I kasawiadahr me pali laud en amwail mour kumwail kin onohnopkihte oh padapadangki wiewia suwed.

12 Eri, kumwail taman dahme I pahn ndaiong kumwail: Kumwail sohte pahn wiahiong kumwail dikedik en eni, de sansal en mehkot me mi pahnlahng, de nin sampah, de pahn pihl nan madau.

13 Oh Kumwail pil sohte pahn poaridiong dikedik en enimen, de pwongih; pwe iei ngehi me Kauno amwail Koht, ngehi Koht luwakahk emen. Aramas akan me kin kailongkin ie, I kin kaloke nair seri kan lel dih kesiluh oh kapahieu;

14 Oh I kin kasalehda ei kalahngan rehn kidalap en aramas me kin poakohng ie oh kapwaiada ei kosonned akan.

15 Kumwail sohte pahn kasaminehla mwaren Kauno amwail Koht; pwe mehmen me kasaminehla mware, e sohte pahn mwakelekel mwohn silangin Kauno.

16 Kumwail tamataman rahnen sapad, oh wiahki rahn sarawi.

17 Erein rahn weneu kumwail pahn kin doadoahk, oh wia amwail doadoahk koaros;

18 Ahpw ni keisuhwen rahn, rahn en sapad en Kauno amwail Koht, kumwail sohte pahndoadoahk, kumwail, oh noumwail pwutak kan, oh noumwail serepein kan, oh noumwail lidu ohl oh lih kan, oh noumwail mahn akan, oh mehn keiru kan me koukousoan rehmwail;

19 Pwe erein rahn weneu Kauno wiahda nanleng oh sampah, oh madau kan, oh audepahr koaros; eri Kauno ketin kasarawihala rahnen sapad, oh wiahkihla rahn sarawi.

20 Kumwail wauneki samamwail oh inamwail kan, pwe kumwail en mour werei nan sahpw me Kauno amwail Koht pahn ketikihong kumwail.

21 Kumwail sohte pahn kemehla aramas.

22 Kumwail sohte pahn kamwahl. Kumwail sohte pahn pirap.

23 Kumwail sohte pahn karaunlikamwohng aramas emen.

24 Kumwail sohte pahn noahroke imwen emen, kumwail sohte pahn noahroke en emen eh pwoud, de eh lidu ohl de lidu lih, de nah kou, de nah ahs, de mehkot me uhdahn ah.

25 Kedekedeo mwurin Apinadai e kaimwisekalahr koasoi pwukat e ahpw kalelepak rehrail: Kumwail padahkihongehr aramas pwukat me irail anahne tetehk mepwukat koaros pwe re en kapwaiada kosonned pwukat?

26 I ndaiong kumwail, Soh; pwe ma kumwail wiahier met, Kauno sohte pahn kadariehdo pwe I en kohpada duwen suwed en aramas pwukat.

27 Oh met kumwail nda me komour kin pwilisang ni kosonned en Moseso. I ndaiong kumwail me e konehng kumwail en kin kapwaiada kosonned en Moses ansou wet; ahpw I pahn ndaiong kumwail, me ahnsou pahn kohdo me e sohla pahn konehng kumwail en kapwaiada kosonned en Moseso.

28 Oh pil ehu, I ndaiong kumwail, me komourla sohte kak pwilisang ni kosonnedohte; pwe ma sohte tomwo, me pein Koht pahn ketin tomwkihla ong dihp oh wiewia suwed en sapwellime aramas akan, irail uhdahn pahn mehla, mehndahte ma mie kosonned en Moseso.

29 Oh met I ndaiong kumwail me e mwahu me e pahn mie kosonned kohieng kadaukok en Israel kan, mehlel, kosonned inen; pwehki irail aramas keptakai kei, mwadang en wia me suwed, oh seukautih en taman Kauno arail Koht.

30 Eri mie kosonned me kohieng irail, ei, kosonned en doadoahk sarawi oh tiahk sarawi kan, iei kosonned ehu me irail pahn kin ngoangki kapwaiada rahn koaros, re en medemedewe duwen Koht oh arail pwukoa ong ih.

31 Ahpw kilang, I ndaiong kumwail, me mepwukat koaros e wia kamwomwada kei en uhdahn mehkan me pahn wiawi.

32 Eri, irail kin wehwehki audepen kosonnedo? I ndaiong kumwail, Soh, irail sohte wehwehki kosonnedo; oh met pwehki arail keptakailahr; pwe irail sohte wehwehki me sohte aramas emen kak komourla ihte sang ni poadoandoar en Koht.

33 Pwe kilang, Moses soh kohpada duwen ketidohn Mesaiao, oh me Koht pahn ketin komourala sapwellime aramas akan? Ei, oh iei soukohp kan koaros me wiahier kokohp sangete tepin sampah—irail soh mahsaniher duwen mepwukat?

34 Irail soh mahsaniher me pein Koht pahn ketidihdo rehn aramas akan, oh ketin wia-aramasala, oh ketketseli pohn sampah ni manaman kehlail?

35 Ei, oh irail soh pil mahsanih me pwehki ih, me melahr akan pahn kakehr iasada, oh me pein ih, pahn ketin lokolok oh wiemwahlla pahn aramas?