1 Eri, mwurin nanmwarki Pensamin eh kaimwisekalahr sapwellime mahsen ong sapwellime aramas akan, e ahpw kupwurehda me e konehng en alehdi mwaren aramas koaros me wiadahr inou ong Koht me re pahn kapwaiada sapwellime kosonned akan.

2 Kedekedeo irail koaros wiahda inou oh alehda mwaren Krais, ihte kisin seri tikitik kan me soh.

3 Oh kedekedeo ahnsou me nanmwarki Pensamin kaimwisekala mepwukat koaros, oh kasarawialahr sapwellime pwutak Mosaia en wiahla kaun oh nanmwarki en aramas akan, oh ketikihong pwukoa en apwalih wehio, oh pil idihada samworo kei pwe re en kin padahki aramas akan, pwe irail en kak rong oh esehla sapwellimen Koht kosonned akan, oh kin katakatamankin irail kahula me re wiadahr, e ahpw ketin kadarpeseng pokono, oh irail koaruhsie, wad peneinei, pwuralang ni imwarail kan.

4 Oh Mosaia ahpw wiliandi seme oh uhd wiahla nanmwarki. Oh e sounpar silihsek ni ahnsou me e wiahla nanmwarki, ele sounpar pahpwiki isihsek weneu sang ni ahnsou me Lihai mweselsang Serusalem.

5 Oh nanmwarki Pensamin momourki sounpar siluh oh e ahpw pwoula.

6 Kedekedeo nanmwarki Mosaia ahpw kin weweidki sapwellimen Kauno ahl akan, oh kin peikiong sapwellime kosonned akan oh koasoandi kan, oh kin kapwaiada sapwellime mahsen kan koaros me e kin ketin mahsanihong.

7 Oh nanmwarki Mosaia kupwurehda sapwellime aramas akan en koadoahke pwehl en sampah. Oh e pil pein koadoahke pwehl en sahpw, pwe e dehr katoutouwih sapwellime aramas akan, pwe en kak kalemengih karasepe mwahu koaros en seme. Oh sapwellime aramas akan sohte nanpwungsuwedpene erein soupar siluh.