1 Kedekedeo Amulon ahpw masamasala mwohn silangin nanmwarki en Mehn Leimen kan; eri, nanmwarki en Mehn Leimen kan kamanahieng ih oh rieh kan me irail pahn wiahla sounpadahk ong sapwellime aramas akan, iei, aramas akan me mih nan sahpw en Semlon, oh nan sahpw en Sailom, oh nan sahpw en Amulon.

2 Pwe Mehn Leimen kan sapwanikilahr sahpw pwukat koaros; eri, nanmwarki en Mehn Leimen kan ketin idihadahr nanmwarki kei nan sahpw pwukat koaros.

3 Oh met mwaren nanmwarki en Mehn Leimen kan iei Leimen, me mwareniki mwaren semeo; eri e kin mwarenkihla nanmwarki Leimen. Oh e wia nanmwarki en aramas ngeder.

4 Oh e ketin pilada iengen Amulon ko en wia sounpadahk nan sahpw koaros me sapwellime aramas akan koukousoan ie; eri ahnsouo me lokaiahn Mehn Nihpai kan kasukuhliong Mehn Leimen kan koaros.

5 Oh irail wia aramas kadekpene nanpwungarail; ahpw irail sohte ese Koht; oh pil rien Amulon ko sohte padahkihong irail duwen Kauno arail Koht, de pil kosonned en Moses; de pil padahkihong irail mahsen en Apinadai kan;

6 Ahpw irail padahkihong irail me re anahne ntingihedi ar poadopoad, oh me irail en kak ntingpene nanpwungarail.

7 Oh met Mehn Leimen kan tepdahr kepwepwehla, oh tepida netinetpene nanpwungarail oh kehkehlailla, oh tepida wia aramas widing oh loalokong, nin duwen erpit en sampah, mehlel, aramas loalokong mwersuwed, me kin pereniki soangsoahngen wiewia suwed oh kulih aramas, ihte me soh, nanpwungarail.

8 Oh met Amulon tepida song eh manaman en kaunda Alma oh rie kan, oh tepida kaloke, oh wiahiong nah seri kan re en kaloke neirail seri kan.

9 Pwe Amulon kin ese Alma, me e wia emen sapwellimen nanmwarkio samworo, oh me iei ih me kamehlele mahsen en Apinadai ko oh pekeuss ang mwohn nanmwarkio, eri e kin lingeringer pah; pwe e mih pahn manaman en nanmwarki Leimen, ahpw e kin doadoahngki eh manaman kaun irail, oh itonehng irail nan doadoahk apwal, oh koasoanediong arail kaunen doadoahk kan.

10 Kedekedeo arail lokolok kan doarala, kahrehda arail tepida kapakap kehlail ong Koht.

11 Oh Amulon kihong irail kosonned me irail pahn uhdihsang arail kapakap kan; oh e koasoanehdi soun silasil me pahn sile irail, pwe mehmen me pahn dierek wie kapakapohng Koht e pahn kamakamala.

12 Oh Alma oh nah aramas sohte kapakap ni ngihl laud ong Kauno arail Koht, ahpw irail kasalehiong ih sang nan mohngiongarail unsek; oh e ketin mwahngih audepen mohngiongarail kan.

13 Kedekedeo kepitien Kauno ahpw peidohng irail nan arail kahpwal akan, ketihtihki: Kumwail sarada oh ahneki popohl, pwe I tamatante inou me kumwail wiahiong ie; oh I pahn wiahda inou ehu ong nei aramas akan oh kapitirailsang nan mouren lidu.

14 Oh I pahn pil kamarahrahda wisik toutou kan me kin katoutouwih pohn pwopwomwail kan, pwe kumwail sohte pahn kehn pohn tihnsewemwail kan, ni ahnsou me kumwail kin wia lidu; oh met I pahn wia pwe kumwail en kak wia soun kadehdeh kei ong ie mwurin met, oh kumwail en kak ese ni mehlel me ngehi, Kauno Koht, kin pwarek nei aramas akan nan arail lokolok kan.

15 Oh kedekedeo wisik toutou kan me kohiengehr Alma oh rie kan ahpw marahrahda; mehlel, Kauno ketin kakehlakahla irail kahrehda irail kak wahda arail wisik toutou kan ni ar marahrahda, oh irail ahpw mweidohng kupwur en Kauno sang ni arail peren oh kanengamah.

16 Kedekedeo arail pwoson oh arail kanengamah kehlailla mehlel kahrehda kepitien Kauno ahpw pwurehng peidohng irail, ketihtihki: Kumwail ahneki popohl, pwe lakapw I pahn kapitkumwailsang nan kalidu.

17 Oh e ahpw mahsanihong Alma: Ke pahn kahluwa aramas pwukat, oh I pahn ieianguhk oh kapitasang aramas pwukat nan mouren kalidu.

18 Eri, kedekedeo Alma oh nah aramas akan ahpw kihpene neirail mahn akan nihpwongo, oh pil kenerail weren tuhke kan; iei, pwohngo pwon re kihkihpene neirail mahn akan.

19 Oh ni mensengo Kauno ahpw ketin wiahda Mehn Leimen kan re en meirkelikla, ei, oh arail kaunen doadoahk kan koaros uhdahn memeirkelik.

20 Oh Alma oh nah aramas akan mwesella nan sapwtehno; oh mwurin arail seiloangki rahn ehu pwon, irail ahpw kauwada arail impwal akan nan wahu ehu, oh irail kahdaniki wahuo Alma, pwehki eh kahluwa irail nan sapwtehno.

21 Ei, oh nan wahu en Alma irail kapingkalahngankihong arail Koht pwehki sapwellime kupwur kalahngan ong irail, oh kamarahrahla arail wisik toutou kan, oh kapitirailsang nan mouren lidu; pwe irail mih nan mouren lidu, oh sohte me kak kapitirailla ihte Kauno arail Koht.

22 Oh irail wia arail kapingkalahngan ong Koht, ei, neirail ohl koaros oh neirail lih koaros oh neirail seri kan koaros me ese lokaia ahpw ngihl laudida kapkapinga arail Koht.

23 Oh met Kauno mahsanihong Alma: Nna, kowe oh aramas pwukat en mwadangete kohkohsang nan sahpwet, pwe Mehn Leimen kan piridahr oh pwakpwakih kumwail; eri kumwail kohkohla sang nan sahpwet, oh I pahn kauhdi Mehn Leimen kan nan wahu wet pwe irail sohte pahn daulih wasaht nan ar pwakih aramas pwukat.

24 Kedekedeo irail ahpw mweselsang nan wahuo, oh seiloakla nan sapwtehno.

25 Oh mwurin rahn eisek riau me irail kakahnseli nan sapwtehno irail ahpw lella nan sahpw en Saraemla; oh nanmwarki Mosaia pil kasamwo irail ni peren.