1 Kedekedeo Limai oh sapwellime aramas akan ahpw pwurala nan kahnihmw en Nihpai, oh pwurehng tepida mihmi nan sahpwo ni popohl.

2 Kedekedeo mwurin rahn kei a Mehn Leimen kan pil pwurehng lingeringerda pahn Mehn Nihpai kan, oh irail ahpw tepida karisdahdo ni irepen sahpwo pwon.

3 Ahpw met irail sohte kak kemeirailla, pwehki kahula me arail nanmwarkio ketin wiahiongehr Limai; ahpw re kin pohr masarail kan, oh doadoahngki arail manaman pohrail; oh kin koadoadoahkih irail ong wisik toutou kan, oh ruweseseli irail duwehte me irail ahs me sehse lokaia—

4 Ei, mepwukat koaros wiawi pwe mahsen en Kauno en kak pweida.

5 Oh met ahn Mehn Nihpai kan lokolok kan me inenen laud mehlel, oh e apwal en pitsang pahrail, pwehki Mehn Leimen kan arail kapilirailpenehr wasa kaoros.

6 Kedekedeo aramas akan tepida kaulimkiong arail nanmwarkio pwehki lokolok apwal me re mihmi loale; oh re tepier men mahweniong irail. Oh kin wie kapwkapwunodehki arail nanmwarkio duwen arail kaulim kan; ih eri ketin mweidohng irail dahme irail inengieng en wia.

7 Oh irail pwurehng kapokonepene pein irail, oh pwuhrieng nan arail tehtehn mahwen kan, oh samwalah mahweniong Mehn Leimen kan pwe irail en kasareirailla sang nan sapwerail.

8 Kedekedeo Mehn Leimen kan ahpw kaloweiraildi, oh pwakihiraillahng arail wasa, oh me tohto me irail kemehla.

9 Oh met sapwellimen Limai aramas akan wie mwahmwahiei oh pahpahtou mehlel, lihodi mwahieiki eh pwoud, pwutak oh serepein mwahieiki arail pahpa, oh ohl akan mwahieiki riarail ohl akan.

10 Eri lihodi tohto mehlel me mih nan sahpwo, oh re kin wie mwahmwahieiki erein rahn kei, pwehki ar inenen masepwehngkihda kowahlap Mehn Leimen kan.

11 Kedekedeo pwehki arail kin wie sengisengkio uhd kamwakidada luhwen sapwellimen Limai aramas akan en lingeringerda pahn Mehn Leimen kan; oh irail pwurehng pwurala mahweniong, irail eri tangdoaui pwepweki pwuredo, ahpw lokolongki arail ohla laud kan.

12 Ei, irail pwurehng pwurala kesilipak, oh lokolongki soahngohte; oh irail akan me sohte kamakamala pwurehng pwurala nan kahnimw en Nihpai.

13 Oh irail ahpw karakarahkdiong nan pwehl oh mweidirailla pahn kalokolok en kalidu, mweidohng pein irail en kamakam, oh wiemwahlla, oh lokolongki wisik toutou kan, nin duwen dahme arail imwintihti kan inengieng.

14 Oh irail akitiktikla mehlel; oh tepda kapakapohng Koht ni ngidingid; iei, pil nan rahn ehu pwon irail kin wie kapakapiong arail Koht en kapitirail sang nan arail lokolok apwal akan.

15 Oh met Kauno pwand en karonge arail kapakap pwehki arail wiewia suwed kan me kahrehda; ahpw Kauno ketin karongehte arail kapakap akan, oh tepida kasohrehsang nan kapehd kekeluwak en Mehn Leimen kan kahrehda irail eri tepda kamarahrahda arail katoutou kan; ahpw Kauno saik mahsanih me e konehngehr en kapitirail sang nan mouren kalidu.

16 Kedekedeo irail eri tepida ekis wie pwepweida nan sahpwo, oh arail werentuhkekan tepda wie rekla mehlel, oh neirail pelin sihpw akan, oh pelin kou kan pil tohtohla, oh irail sohte lokolongki duhpek.

17 Oh met pwehki tohtolahn lih akan, tohtohsang ohl akan; nanmwarki Limai eri kupwurehda meohl akan koaros en sewesehda lihodi kan oh neirail seri kan, pwe irail en dehr mehkihla ar duhpek; oh re wia met pwehki kidalap en irailme kamakamalahr.

18 Eri aramas en Limai kan kin mihpenehte ni minimin en pwihn ehute ahnsou koaros, oh silehdi mwahu arail werentuhke kan oh neirail pelinmen kan;

19 Oh pein nanmwarkio sohte kin koapworopworiki kelehpw alu maslikin kelen kahnihmwo, ihme e kin kahreki sapwellime soun silasilko, pwe e kin perki Mehn Leimen kan de koledi ni soangen wiepe ieu.

20 Oh e kupwurehda sapwellime aramas akan en tetehk nan sahpwo pwon, pwe ma mie soangen wiepe ieu me irail en kak koledi samworo ko me tangala nan sapwtehno, me kawaisang nein Mehn Leimen kan serepein ko, oh me kahrehiong irail nan lokolok apwal.

21 Pwe re men koliraildi oh kaloke irail; pwe irail kin waido nihpwong nan sahpw en Nihpai kan, oh kawai werentuhke kan oh arail dipwisou kesempwal tohto; eri re kin wie rukrukih irail.

22 Kedekedeo sohla pingiping wiawi nanpwungen Mehn Leimen kan oh sapwellimen Limai aramas akan, lao lel ni ahnsou me Amon oh ienge ko leledo nan sahpwo.

23 Oh ni ahnsou me nanmarikio iang sapwellime soun silasil kan ketiketseli likin kahnihmwo, e ahpw diarada Amon oh riehkan; oh e ketin medewehiong me irail samworohn Noha ko, ih eri ketin pahngok me re en kolkoldi, oh pirapirdi, oh lekideklong nan imweteng. Oh ma irail iei samworohn Noha ko e pahn ruwese me irail pahn kamakamala.

24 Ahpw ni e diarada me kaidehkin irail mwo, ahpw diarada mwuhr me kiseh ko, me patohdahdohr sang nan sahpw en Saraemla, e ahpw direkihla peren kowahlap.

25 Ahpw mwohn Amon e leledo, nanmwarki Limai kadarala ohl ekei re en rapahkihla sahpw en Saraemla; ahpw re salongala nan sapwtehno oh sohte diaredi.

26 Ahpw, irail diarada sahpw ehu me aramas kousoan loale mahs; ei, sahpw ehu me direkihla tihn aramas; ei, sahpw ehu me mie aramas oh irail ahpw kamwomwomwlahr; oh irail, lemehkiong me sahpw en Saraemla mwo, irail eri pwurodo nan sahpw en Nihpai, irail leledo nan sahpwo rahn kei mwohnte Amon eh leledo.

27 Oh irail wahdo ntingen poadopoad kei, iei poadopoad en tohn wasao me tihrail dierek ie; oh nting kan nting pohn pleit mete kei.

28 Oh Limai pwurehng direkilahr peren ni ahnsou me e esehda sang Amon me nanmwarki Mosaia sapwellimaniki kisakis sang rehn Koht, en kak kawehwe soangen nting kan; ei, oh Amon pil iang perenda.

29 Ahpw Amon oh ienge ko pil pahtoula mehlel pwehki tohtohn rierail akan me kamakamala.

30 Oh pil pahtoukihla duwen nanmwarki Noha oh sapwellime samworo kan kahrehiong aramas akan en wiahda dihp tohto oh wiewia suwed kan ong Koht; oh irail pil mwahieiki mehlahn Apinadai; oh pil Alma oh aramas ako me iangih sopohla sang wasao, me wiahda mwomwohdiso en Koht sang ni arail kehlail oh manaman en Koht, oh pwoson mahsen akan me Apinadai mahsaniher.

31 Ei, irail mwahieiki arail kohkohlao, pwehki arail sehse wasa irail sopohla ie. Pwe met irail mentehnoh patehng irail, pwe irail pein aledahr inou ong Koht en papah ih oh kapwaiada sapwellime kosonned akan.

32 Oh met sang ni ahnsou me Amon leledo, nanmwarki Limai pil iangehr alehda inou ong Koht, oh pil iangahki sapwellime aramas tohto, re en papah ih oh kapwaiada sapwellime kosonned akan.

33 Kedekedeo nanmwarki Limai oh sapwellime aramas tohto inengieng papidaisla; ahpw sohte emen nan sahpwo me kolokol mweimwei sang Koht. Oh Amon soikala wia doadoahk wet, pwehki e medewe me e wia ladu sohte warohng.

34 Eri, ahnsouo irail sohte wiahda ehu mwomwohdiso, ihte awiawihte Ngehn en Kauno. Oh met irail inangih duwehla Alma oh rie ko, me sopohla nan sapwtehno.

35 Irail inengieng papidaisla pwe en wia ehu kadehde me irail inangih papah Koht sang nan mohngiongarail unsek; ahpw irail kanekanengamahiong; oh soipen arail papidaislao pahn kasansalda mwuhr.

36 Oh met onop koaros me Amon oh ienge aramas akan, oh nanmwarki Limai oh sapwellime aramas kaukaunopohng, iei wiepen arail pahn kapitirail sang pahn manaman en Mehn Leimen kan oh sang nan kalidu.