1 Oh met nanmwarki Mosaia ahpw ketin kupwurehda me sapwellime aramas akan koaros en pokonpene.

2 Met, seri en Nihpai kan sohte nohn tohto, de irail akan me wia kadaudok en Nihpai sohte dir, duwehte aramas en Saraemla kan, me wia kadaudok en Miulek, oh irail akan me iang ih kohdo nan sapwtehno.

3 Oh aramas en Nihpai oh aramas en Saraemla kan sohte tohto duwehte aramas en Mehn Leimen kan; ei, re malaulausang elep en Mehn Leimen kan.

4 Oh met aramas en Nihpai kan kohpene, oh pil aramas en Saraemla koaros, irail pokonpene wiahda pwihn riau.

5 Kedekedeo Mosaia ahpw wadek, oh kupwurehda en wadawadada poapopoad en Sihnep kan ong sapwellime aramas akan; ei, e wadek poadopoad en aramas en Sihnep, sangete ahnsou me re mweselsang nan sahpw en Saraemla lao lel ahnsou me re pwurodo.

6 Oh e pil wadekada soiepen Alma oh rie kan, oh arail lokolok kan koaros, sang ni ahnsou me irail mweselsang nan sahpw en Saraemla lao lel ahnsou me re pwurodo.

7 Oh met, ni ahnsou me Mosaia kaimwseklahr wadwadek poadopoad kan, sapwellime aramas akan me mihmi nan sahpwo pwuriamweikihla oh wahpwonla.

8 Pwe irail sohte ese dahme re pahn medewehki; pwe ni ahnsou me re kilang irail kan me pitsangehr nan mouren lidu, irail direkihla peren kouwahlap.

9 Oh pil, ni ahnsou me irail medewehda rierail kan me kamakamala rehn Mehn Leimen kan, irail pil direkihla pahtou, oh pil sengisengki pwehki ar pahtou.

10 Oh pil, ni ahnsou me irail medewehdo kupwur kalahngan en Koht e kin mwadangete lel irail, oh sapwellime manaman en kapitala Alma oh rie kan sang pahn manaman en Mehn Leimen kan oh sang nan mouren lidu, irail pil ngihl laudida wia arail kapingkalahngan ong Koht.

11 Oh pil, ni ahnsou me irail medewehda Mehn Leimen kan, me wia kisehrail, nan arail momouriki mour dipan oh mour samin, re pil direkihla medek oh pwunod pwehkipalingenerail.

12 Kedekedeo irail seri kan me nein Amulon oh rie ko, me pwoudkihda nein Mehn Leimen kan serepein kan, sohte pwungki en arail pahpa kan wiewia kan, oh irail sohla mehn adaneki eden arail pahpa kan, eri irail adanekilahr eden Nihpai, pwe irail en kak kahdaniki seri en Nihpai oh wadawadohng irail akan me kin kahdaniki Mehn Nihpai kan.

13 Oh met aramas en Saraemla koaros iang wadawadohng Mehn Nihpai kan, oh met pwehki manaman en kaunda wehio kin kohiengete kadaudok en Nihpai kan.

14 Oh met kedekedeo ni ahnsou me Mosaia kaimwisekalahr sapwellime mahsen oh wadawad ong aramas akan, e luke Alma en uhd koasoi ong aramas akan.

15 Oh Alma ahpw koasoi ong irail, ahnsou me irail pokonpene wiahda pwihn kei, oh e kohsang ni ehu pwihn kolahng ehu, kalokalohkihong aramas akan duwen koluhla oh pwoson Kauno.

16 Oh e koangoangehki aramas en Limai oh rie kan, irail koaros me kapitsang nan mouren lidu, me irail en tamataman me Kauno me ketin kapitirailla.

17 Kedekedeo mwurin Alma e padahkihong aramas akan soahng tohto, oh kaimwiseklahr koasoakoasoiong irail, nanmwarki Limai inangihada en papidaisla; oh sapwellime aramas koaros pil inangih re en iang papidaisla.

18 Eri, Alma kohla nan pihlo oh papidaisirailla; ei, e papidaisihla irail ni wiepe me e wiahieng rie kan ni pihl en Mormon; ei, oh koaros me papidaisla wiahla tohn mwomwohdiso en Koht; oh met pwehki irail kamehlele en Alma padahk kan.

19 Kedekedeo nanmwarki Mosaia kamanahiong Alma en wiahda mwomwodiso kan nan sahpw en Saraemla koaros; oh kihong manaman en kasarawihla samworo kan oh sounpadahk kan nan mwomwohdiso koaros.

20 Met e wiawi pwehki aramas tohtohlahr oh irail sohte kak ahneki sounpadahk metehmen; de irail koaros sohte kak rong mahsen en Koht nan ehute kapokon;

21 Eri irail kin pokonpene nan pwihn kei, ni ar kahdaniki mwomwodiso kei; ehu ehu mwomwohdiso mie pein neirail samworo oh sounpadahk kan, oh emen emen samworo kalokalohki mahseno nin duwen eh rong sang ni ewen Alma.

22 Oh met, mendahte mwomwohdiso tohto ahpw irail koaros wiamwomwohdiso teieu, iei, mwomwohdiso en Koht; pwe sohte ehusongen mehkot kin kalohkda nan mwomwodiso ko koaros ihte duwen koluhla oh pwoson Koht.

23 Oh met mie mwomwohdiso isuhnan sahpw en Saraemla. Kedekedeo mehmen me kin inangih en alehda mwaren Krais, de Koht, irail kin iangala mwomwodiso en Koht;

24 Oh irail wiahla aramas en Koht. Oh Kauno ketin kamwerediong pohrail sapwellime Ngehno, oh irail kapaidahr, oh pweidahr nan sahpwo.