Pwuhk en Mosaia

1 Oh met solahr pingiping wiawi nanpwungen Sapwellimen Pensamin aramas akan nan sahpw en Saraemla pwon, eri iei me mie popohl pahn nanmwarki Pensamin erein eh wie ieias.

2 Kedekedeo e sapwellimaniki pwutak silimen; oh e kahdanikin irail Mosaia, oh Ilorum, oh Ilemen. Oh e ahpw kupwurehda pwe irail en kin esehla lokaiahn arail pahpa kahlap ako, pwe irail en kak wiahla aramas kupwurokong kei; oh pwe irail en kak esehla duwen kokohp akan me arail pahpa kahlap ako kohpadahr, me kohieng irailehr sang nin limen Kauno.

3 Oh e pil ketin padahkiong irail duwen poadopoad akan me ntingdier pohn pileit prahs kan, ni eh mahsanih: Samwa ko, I men kumwail en tamataman pwe ma sohte pileit pwukat, me audaudkihda poadopoad pwukat oh kosonned pwukat, kitail pahn mihmihte nan rotorot, iei lel nan ahnsou wet, kitail pahn sohte wewehki sapwellimen Koht rir kan.

4 Pwe e pahn apwal ohng atail pahpa Lihai, en kak tamatamante mepwukat koaros, pwehn kak padahkihong nah seri kan, ma sohte sawas en pileit pwukat; pwehki eh kaskuhlkihdahier lokaiahn Isip ihme e kak wadengki nting pwukat, oh padahkihong nah seri kan, pwe irail en kak padahkihong neirail seri kan, oh kapwaiada sapwellimen Koht kosonned akan, iei me doudoulahte lel ahnsou wet.

5 Samwa ko, I ndaiong kumwail, me ma sohte mepwukat, me kin wie nekinek kohdo sang nin limen Koht, pwe kitail en kak wadek oh wehwehki sapwellime, me rir kan, oh sapwellime kosonned akan me kin sansal mwohn mesetail ahnsou koaros, iei atail pahpa kahlap ako kakete pil pwupwukihdi nan soupwoson, oh kitail pahn kakete duwehte riatail kan, Mehn Leimen kan, me sohte ese duwen soahng pwukat, de pil sohte kamehlele ma e pahn padahk ong irail, pwehki tiahk en arail pahpah kahlap ako, me sohte pwung.

6 Samwa ko, I men kumwail en tamataman me mahsen pwukat me mehlel, oh pil nting pwukat mehlel. Oh kilang, pil pileit en Nihpai kan, me audaudkihda poadopoad kan oh mahsen kan en atail pahpa kahlap ako sangete ahnsou me re mweselsang Serusalem lao lel rahnwet, oh audepe kan mehlel; oh kitail ese me audepe kan mehlel pwehki e mihte mwohn masatail kan.

7 Oh met, samwa ko, I men kumwail en tamataman en kin wadek ni loalopwoat, pwe kumwail en kak paieki; oh I men kumwail en kapwaiada sapwellimen Koht kosonned akan, pwe kumwail en kak pweida nan sahpwo nin duwen inou kan me Kauno ketin inoukihongehr atail pahpa kahlap ako.

8 Oh soahng tohto me nanmwarki Pensamin padahkihong sapwellime pwutak ko me sohte ntingdi nan pwuhk wet.

9 Kedekedeo mwurin nanmwarki Pensamin kaeralahr padahk ong sapwellime pwutak ko, nan e likeilapalahr, oh e esehier me eh ahnsou kerendohr ni eh pahn wiapwella; iei me, e medewe me e konehngehr en kasapwilada emen sapwellime pwutak ko en wiahla kaunen wehio.

10 Eri, e ahpw ketin malipehdo Mosaia mwowe; oh iet mahsen kan me e ketin mahsanihong ih, ketihtihki: Samwa, I men ke en wiahda pakair pwoat me pahn lelpeseng nan sahpwet pwon rehn aramas akan koaros, de nein Saraemla aramas akan, oh nein Mosaia aramas akan me kin koukousoan nan sahpw wet, pwe irail en pokonpene; pwe lakapw I en pakairkihong nei aramas akan sang pein ewei, me ke wialahr nanmwarki oh kaun en aramas pwukat, me Kauno atail Koht ketikihong kitailehr.

11 Oh I pil pahn kiong ahd pwoat ehu ong aramas pwukat, pwe irail en kak wekisang aramas koaros me Kauno Koht kahluwaieisang nan sahpw en Serusalem; oh I wia met pwehki arail wia aramas loalopwoat nan arail kin kapwaiada kosonned kan en Kauno.

12 Oh I kihong irail ahd ehu me sohte pahn manoknokla, ihte ma re pahn wiahda dihp.

13 Ei, oh I pahn pil ndaiong uhk, ma aramas pwukat me keniken mehlel rehn Kauno pahn pwupwidi nan dihp, oh wiahla aramas suwed oh aramas en kamwal, Kauno pahn likidmelieirailla, oh re pahn luwetala duwehte rierail akan; oh e sohla pahn ketin doarehkinirail sapwellime manaman me sohte pelie oh kapwuriamwei, nin duwen eh kin ketin doarehla atail pahpah kahlap ako.

14 Iei me I ndahkiong uhk, ma e sohte ketikihwei lime kan pwe en doarehla atail pahpa kahlap ako, irail uhdahn pahn lohdiong pahn manaman en Mehn Leimen kan, oh mihla pahn lokolok en arail kailok.

15 Kedekedeo mwurin nanmwarki Pensamin eh kaimwsekalahr eh mahsen ong sapwellime pwutako, e ahpw ketikihong pwukoa koaros en apwalih doadoahk kan en wehio.

16 Oh e pil ketikihong pwukoah en apwalih poadoapoad akan me ntingdi pohn pileit prahs kan; oh pil pileit en Nihpai kan; oh pil, nein Leipen kedlahso, oh mpweio de mehn kaweido, me kin kakahluwa atail pahpa kahlap ako nan sapwtehno, me wiawihda sang nin limen Kauno pwe en kahluwa irail koaros, nin duwen arail pahn kin peikiong oh loalopwoatohng ih.

17 Eri, pwehki arail saloalopwoat irail sohte pweida de doula nan arail seiloak, ahpw rekin wie pwurupwurla mwuri, oh kahrehiong Koht eh ketin engiengda pahrail; oh iei me irail lokolongki ar duhpek oh apwal laud, pwehn kamwekidihkinirail en tamanda dahme arail pwukoah.

18 Kedekedeo Mosaia ahpw patohla oh wia dahme ah pahpa poahngokiong, oh lohkihong aramas koaros me kin kousoan nan sahpw en Saraemla pwe irail en pokonpene, oh kohdahla ni tehnpas sarawio pwe irail en rong mahsen kan me seme pahn ketin mahsanih ong irail.