1 Met Kauno ketin kaparki Alma me sapwellimen nanmwarki Noha sounpei ko kohkohdohng irail, oh e ahpw padahkihong nah aramas akan, eri irail kihpene neirail pelin mahn akan, oh wahda arail werentuhke kan, oh mwesellahng nan sapwtehno mwohn sapwellimen nanmwarki Noha sounpei kan ar pahn koanoairaildi.

2 Oh Kauno ahpw kakehlakairailda, pwe sapwellimen nanmwarki Noha aramas akan sohte pahn koliraildi oh kemeirailla.

3 Oh irail sopohla seiseilongki erein rahn waluh nan sapwtehno.

4 Oh irail lel nan sahpw ehu, iei, sahpw lingan oh kansenamwahu ehu, sahpw en pihl mwakelekel.

5 Oh irail kauwada imwerail impwal akan, oh tepida deipwelihada pwehlo, oh tepida kauwada ihmw kan; mehlel, irail me koahiek nan doadoahk, oh kin pwerisek.

6 Oh aramas ako men Alma en wiahla arail nanmwarki, pwe nah aramas ako kinpoakepoake.

7 Ahpw e patohwan ong irail: Kilang, e sohte mwahu ong kitail en ahneki nanmwarki; pwe Kauno ketin mahsanih: Kumwail sohte pahn medewe emen aramas kesempwal sang emen, de aramas men sohte pahn medewe me e mwahusang emen; eri I pahn ndaiong kumwail me e sohte mwahu ong kumwail en mie amwail nanmwarki.

8 Ahpw, ma e kak wiawi ma ohl emen me pahn kin mehlel ahnsou koaros en wia amwail nanmwarki, eri e pahn mwahu en mie amwail nanmwarki.

9 Ahpw tamataman wiewia suwed en nanmwarki Noha oh sapwellime samworo ko; oh pein ngehi iang lohdi nan lidip, oh wia soahng tohto me suwed mwohn silangin Kauno, me kiohng ie kalokepen ei kolukihla dipei kan;

10 Ahpw, mwurin ei lokolok laud, Kauno karonge ei pekipek, oh sapeng ei kapakap kan, oh wiahiong ie I en wia wiliepen nin lime pwe en kak wahdo tohtohn kumwail pwe kumwail en marainkihda sapwellime mehlelo.

11 Ahpw, met I sohte pohliki, pwe ngehi I sohte warohng pohliki pein ngehi.

12 Oh met I ndaiong kumwail, kumwail lokolokehr pahn nanmwarki Noha, oh iangehrkaliduhla pahn ih oh sapwellime samworo kan, oh irail karehieng kumwail nan wiewia suwed; kumwail eri selikihdi sahl en wiewia suwed.

13 Oh met pwehki amwail saledeksangehr sahl pwukat sang ni manaman en Koht; iei, sang nin limen nanmwarki Noha oh sapwellime aramas akan, oh pil sang ni sahl en wiewia suwed kan, iei I pil men kumwail en tengeteng nan amwail saledek me kumwail alehdier, oh kumwail dehr koapworopworiki emen aramas en wiahla amwail nanmwarki.

14 Oh pil dehr likih emen en wia amwail sounpadahk de soun kaweid, ihte ma e wia aramas en Koht emen, weweidki sapwellime koasoandi kan oh kapwaiada sapwellime kosonned akan.

15 Eri iet me Alma padahkihong nah aramas akan, me emen emen aramas pahn poakohng mehn impe kan duwehte pein ih, oh sohte pingiping pahn mie nanpwungarail.

16 Oh met, Alma wia arail samworo lapalap, pwehki ih me wiahda arail mwomwohdiso.

17 Kedekedeo sohte me kin mweimweiong en kalohk de padahk ihte ma e alehdi mweimwei sang rehn Koht. Eri e kasarawiala arail samworo koaros oh arail sounpadahk koaros; oh sohte me kin kasarawihla ihte ma e wia aramas pwung men.

18 Eri irail kin wie sinsile neirail aramas akan, oh apwalihkin irail ni mehkoaros me pwung.

19 Kedekedeo irail eri tepida inenen pweida nan sahpwo; oh irail kihong edensahpwo Ihlem.

20 Kedekedeo irail kaparaparala oh inenen pweida nan sahpw en Ihlem; oh irail kauwada kahnimw ehu, me irail kihong eden kahnihmwo, kahnimw en Ihlem.

21 Ahpw Kauno kin ketin mweidohng sapwellime aramas akan nan lokolok; ei, e kin ketin song arail kanengamah oh arail pwoson.

22 Ahpw—mehmen me pahn likih ih e pahn kasapwilda ni imwin rahno. Ei, ohihme wiawi ong aramas pwukat.

23 Pwe kilang, I kadehdehkiong kumwail me irail lohdiongehr nan kalidu, oh sohte me kak kapitirailla ihte Kauno arail Koht, iei, Koht en Eipraam oh Koht en Aisek oh Koht en Seikop.

24 Kedekedeo e ahpw kapitirailla, oh e ketin kasalehiong irail sapwellime manaman lapalap, oh irail pereperenikihda kowahlap.

25 Pwe kilang, ni ahnsou me irail mihmi nan sahpw en Ihlem, ei, nan kahnihmw en Ihlem, ni ahnsou me irail wie deideipwelih nan sahpwo, kilang sounpei en Mehn Leimen kan lelledohr oh kipehdi sahpwo pwon.

26 Eri kedekedeo nein Alma aramas akan ahpw tangasang nan arail mwaht akan, oh kohpene nan kahnimw en Ihlem; oh irail uhdahn masepwehkada pwehki Mehn Leimen kan ar pwarada.

27 Ahpw Alma kesihnenda nanpwungarail, oh koangoangoahkin irail me irail deh masepwehk, ahpw irail en tamataman Kauno arail Koht oh e pahn ketin doareirailla.

28 Irail eri meleileidi nan arail masepwehk, oh tepida peki rehn Kauno en ketin wekidala mohngiong en Mehn Leimen kan, pwe irail en mahkohng kapitirailla, oh arail pwoud kan, oh neirail seri kan.

29 Kedekedeo Kauno ahpw wekidalahr mohngiong en Mehn Leimen kan. Oh Alma oh sapwellime aramas akan kohla oh mweidohng irail pahn arail manaman; oh Mehn Leimen kan sapwankihla sahpw en Ihlem.

30 Eri met sounpei en Mehn Leimen kan, me raparapahki sapwellimen nanmwarki Limai aramas ako, irail salsalongseli nan sapwtehno erein rahn kei.

31 Oh kilang, irail diaradahr sapwellimen nanmwarki Noha samworo ko, nan sahpw ehu me re kahdaniki Amulon; oh irail tepida sapwasapw nan sahpw en Amulon oh tepida deipwelihada pwehlo.

32 Eri eden kaun en samworo ko iei Amulon.

33 Kedekedeo Amulon pekipeki rehn Mehn Leimen kan oh e pil kadaralahng irail arail pwoud kan, me nein Mehn Leimen serepein kan, re en peki ni ngidingid rehn riarail akan, pwe irail en dehr kemehla arail pwoud kan.

34 Oh Mehn Leimen kan ahpw poakehla Amulon oh ienge kan, oh sohte kemeirailla, pwehki arail pwoud kan.

35 Oh Amulon oh ienge ko iangala Mehn Leimen kan, oh irail seiseiloak nan sapwtehno raparapahki sahpw en Nihpai ni ahnsou me irail diarada sahpw en Ihlem, wasa Alma oh ienge kan wie sapwasapw ie.

36 Kedekedeo Mehn Leimen kan inoukihong Alma oh ienge kan, ma irail pahn padahkihong irail ahl en kohla nan sahpw en Nihpai, irail pahn mweidala arail mour oh arail saledek.

37 Ahpw mwurin Alma eh kasalehiong irail ahl en kohla nan sahpw en Nihpai, Mehn Leimen kan sohte kapwaiada arail inouo; ahpw irail koasoanehdi sounsilasil en kapilpene Alma oh ienge kan nan sahpw en Ihlem.

38 Oh luhwedi ko en irail pwurala nan sahpw en Nihpai; oh ekei irail pwurodo nan sahpw en Ihlem, oh pil iangahki en sounsilasil me mihmi nan sahpwo arail pwoud kan oh neirail seri kan.

39 Oh nanmwarki en Mehn Leimen kan kamanahieng Amulon en wia nanmwarki oh kaun en nah aramas akan, me mih nan sahpw en Ihlem; ahpw e sohte pahn ahneki manaman en wia mehkot me uhwong kupwur en nanmwarki en Mehn Leimen kan.