Iralaud 3
Nanmwarki Pensamin ketin usehla sapwellime sakarada—Kauno Wasa Lapalahpie pahn ketin wia sapwellime doadoahk rehn aramas akan ni paliwar en sampah—Nta pahn keredihsang ni pwoahr en kili pwon ni Eh pahn tomwki dipen aramas koaros—Mwareo iei ihte mwahr me komourla pahn kak pweikihda—Aramas akan kak pwilikihdi ahneperail oh wiahla Souleng kei sang ni Tomwo—Lokolok en me suwed kan pahn rasehngete lehn kisiniei oh suwepel. Ele Sounpar 124 Mwohn Krais.
1 Oh pil ehu, kilang rie ko, I peki rehmwail kumwail en rong mwahu, pwe miehte mehkot me I men patohwanohng kumwail; pwe kilang, mie soahngkei me I men patohwanohng kumwail duwen dahme pahn kohdo.
2 Oh duwen mehkan me I pahn patohwanohng kumwail, tohnleng men sang rehn Koht me kasalehiong ie. Oh e mahsanihong ie: Pirida; oh I ahpw pwourda, oh kilangada e kesikesihnen mwohi.
3 Oh e mahsanihong ie: Pirida, oh rong mahsen kan me I pahn padahkihong komwi; pwe kilang, I pwarodo pwe I en pakairkihong komwi rohng kaperen mehlel pwoat.
4 Pwe Kauno ketin karongehier omwi kapakap akan, oh ketin tenekiher omwi wiewia mwahu, oh ketin poaroneiehdo pwe I en kairehkin komwi en perenda; oh komw kak pakairkihong sapwellimomwi aramas akan, pwe irail en pil kak iang direkihla peren.
5 Pwe kilang, ahnsou me pahn nektehn leledo, me sang ni manaman, Kauno Wasa Lapalahpie me ketin kakaun oh ketiketier sang mwohn tepin kawa oh pil kohkohlahte, pahn ketidihdohng rehn aramas akan sang nanleng, oh pahn ketin kousoan nan paliwar en sampah, oh pahn ketiketseli rehn aramas akan, oh ketin wiewia manaman kapwuriamwei kan, duwehte kakehlahda me soumwahu kan, kamaurada me mehlahr akan, kamwahwihala me nehtuk kan pwe re en alu, me masukun re en kilangada wasa, oh me salengepon kan en rongada wasa, oh kamwahwihala soangen soumwahu tohto.
6 Oh e pahn ketin kausasang tepil kan, de ngehn suwed kan me kin mie nan mohngiong en aramas akan.
7 Oh kilang, e ahpw pahn lokolongki kasongosong, oh medek en paliwar, duhpek, men nimpil, oh e pahn pwangada, iei lokolok laudsang dahme aramas kak lokolongki, pwe e pahn mehkihla; pwe kilang, nta keresang nan pwoar en kilio pwon, e pahn ketin ihrmwell kowahlappwehki wiewia suwed oh tiahk suwed en sapwellime aramas akan.
8 Oh e pahn mwareniki Sises Krais, Sapwellimen Kohto, Sahm en nanleng oh sampah, Sounkepikipik mehkoaros sangete nin tapio; oh ine pahn mwareniki Mery.
9 Oh kilang, e pahn ketidohng rehn sapwellime kan, pwe komour en kak lelohng aramas akan sang ni ar pwoson mwareo; oh mwurin soahng pwukat koaros irail pahn wiahkihte me ih aramas emen, oh nda me tepil tiada powe, oh re pahn kaloke, oh pahn kalohpwuwehla.
10 Oh e pahn ketin iasada sang mehla ni kesiluh en rahn; oh kilang, e pahn ketin kadeikada sampah; oh kilang, soahng pwukat koaros wiawi pwe kadeik pwung en kak wiawihong aramas akan.
11 Pwe kilang, oh sapwellime nta pahn wia meirong en tomwki dipen irail akan me pwupwukihdi dipen Adamo, me mehla ahpw sohte wehwehki kupwur en Koht ong irail, de me sawehwe oh wiahda sapwung kan.
12 Ahpw meid suwed, meid suwediong aramaso me wehwehki me e kahngohdiong Koht! Ihte ma e pahn koluhla oh pwoson Kauno Sises Krais, me e pahn komourkihla.
13 Oh Kauno Koht ketin poaronehdo sapwellime soukohp sarawi kan rehn aramas akan koaros, pwe re en kairehki soahng pwukat rehn keinek koaros, wehi koaros, oh lokaia koaros, pwe irail akan me pahn kamehlele me Krais pahn ketido, re pahn alehdi mahkpen diparail akan, oh pereperenikiperen kowahlap, duwehte me e ketidohr rehrail.
14 Ahpw Kauno Koht ketin mahsaniadahr me sapwellime aramas akan arail keptakai, oh e ketikihong irail kosonned ehu, iei kosonned en Moseso.
15 Oh e ketin kasalehiong irail kilel tohto oh manaman kapwuriamwei kan, oh soahng kei me kin wia karasaras, oh duwen mehkan me kin kasalehda me e pahn ketido; oh pil soukohp sarawi kan arail kin kokohpkiong irail duwen eh pahn ketido; ahpw re kin kakeptaikaialahte nan kapehdarail kan, oh re sohte wehwehki me kosonned en Moseso sohte katepe ihte sang ni tomw en sapwellime ntao.
16 Mendahte ma kisin seri kan kak wiahda dihp irail sohte kak komourla; ahpw I ndaiong kumwail me irail meid pai; pwe kilang, sang Adam, de sang uhdahn ahnepen mour, irail pwupwudier, ahpw ntahn Krais tomwkilahr diparail akan.
17 Oh I pil ndaiong kumwail, me sohte mwar ehu de ehu ahl tohrohr de ehu wiepe me komour pahn kak lelohng aramas akan, ihte sang reh oh ni mwaren Krais, Kauno Wasa Lapalahpie.
18 Pwe kilang e pahn ketin kadeik, oh sapwellime kadeik me pwung; oh kisin seri me mehla ni arail pwelel sohte pahn lekidekla; ahpw aramas akan kin nimala kadeik en lekidekla ong pein irail ma re sohte pahn karakarahkala oh duwehla kisin seri kan, oh kamehlele me sangete mahs, leledo ahnsou wet, oh pil ahnsou kohkohdo komouro kin kohsangete ni meirong en tomw en ntahn Krais, Kauno Wasa Lapalahpie.
19 Pwe ahnepen aramas e wia imwintihti ong Koht, oh ih duwen sangete ni pwupwudi en Adamo, oh e pahn wia met, kohkohlahte, e lao pahn peikiong kaweid en Ngehn Sarawio, oh pwilikihdi ahnepen aramaso oh wiahla souleng men sang ni tomw en Krais Kauno, oh duwehla seri men, me kin mweidala nsene, mpai, karakarahk, kanengamah, direkihla limpoak, inangih idawehn soahng koaros me Kauno mwahngih pahn konehng en ketikihong, duwehte seri men e kin idawehn eh pahpa.
20 Oh I pil ndaiong kumwail, me ahnsouo pahn leledo me marain en Sounkomouro pahn kipehdi wehi koaros, rehn keinek koaros, ni lokaia koaros, oh rehn aramas koaros.
21 Oh kilang, ni ahnsouo e pahn leledo, sohte aramas me pahn dierekda me sohte dipe mwohn silangin Koht, ihte kisin seri kan, oh ihte sang ni koluhla oh pwoson mwaren Kauno Koht Wasa Lapalahpie.
22 Oh mehlel ahnsou wet, ni amwail pahn padahkihong noumwail aramas akan soahng kan me Kauno amwail Koht mahsanih ong kumwail, iei ahnsouo irail pahn dierekda me sohte diparail mwohn silangin Koht, nin duwen mahsen kan me I padahkihongkumwailehr.
23 Oh met I padahkihongkumwailehr mahsen kan me Kauno Koht ketin mahsanih ong ie.
24 Oh Kauno ketin mahsanih: e pahn wia kadehde sansal ong aramas pwukat, ni rahn en kadeiko; eri aramas koaros pahn pakadeikda, nin duwen ar wiewia kan, ma wiewia mwahu desuwed.
25 Oh ma wiewia suwed re pahn dehdehki uwen laud en diparail kan oh arail wiewia suwed kan, me pahn kahrehda arail pahn runkusang mwohn silangin Kauno kohlahng nan mour apwal oh lokolok soutuk, wasa me re sohte pahn kak pwurasang ie; eri irail nimalahr pilen kadeik ong pein irail.
26 Eri, irail nimasangehr nan delen engieng en Koht, me wia kopwung me uhdahn pahn wiawi ong irail duwehte eh wiawi ong Adam ni ahnsou me e pwupwudio pwehki e tungoale wahntuhke sohte mweimweio; eri, mahk sohte kak sewesei irail kohkohlahte.
27 Oh arail lokolok pahn duwehte lehn kisiniei oh suwepel, me kin sekehkun, oh me kin ediedida erein kohkohlahte. Iei me Kauno ketin mahsaniong ie. Ahmen.