1 Kedekedeo mwurin sounpar riau, Apinadai eri wekidala mwomwe oh pwurodo rehn aramas akan, ni ar sohte ese me ih, oh e tepida kokohpong irail, ketihtihki: Iei met me Kauno ketin mahsanih ong ie, ketihtihki—Apinadai, kohwei oh kokohp ong nei aramas akan, pwemohngiongirail kan kekeluwakalahr oh uhwong ei mahsen akan; irail sohte koluhkihla arail wiewia suwed kan; eri I pahn sohpeiong irail nan ei engieng, iei, nan ei engieng kowahlap I pahn kalokehkinirail arail wiewia suwed oh tiahk suwed kan.

2 Mehlel, meid suwediong dih wet! Oh Kauno ketin mahsanihongie: Kapahwei pehmwen oh kokohp ong irail, nda: Kauno ketin mahsanih, ahnsouo pahn leledo me dih wet, pwehki arail wiewia suwed kan, re pahn kaliduhla, oh popohrdi ni mesarail kan; ei, oh aramas pahnkasareirailpeseng, oh irail pahn kamakamala; oh mahn pihr puldur kan, oh kidi kan, ei, oh mahn lawalo kan, pahn kangasang uduk en paliwararail kan.

3 Oh ahnsouo pahn kohdo me mour en nanmwarki Noha pahn rasehngete likou nan kisiniei mwehl; pwe e pahn esehla me ngehi iei Kauno.

4 Oh ahnsouo pahn leledo me I pahn kalokehki nei aramas pwukat kalokolok mwuledek, iei, sang ni lehk oh soumwahu lusulus; oh I pahn kahrehda arail pahn wie mwahmwahieiki rahno pwon.

5 Ei, oh I pahn kihong irail wisik toutou pohn pwopwerail kan; oh irail pahn pakahrweiduwehte ahs lohteng men.

6 Oh ni ahnsouo I pahn kadaridi keteu aihs takai pohrail, oh e pahn kaloke irail; oh I pil pahn kalokehkin irail kisinieng en palimese; oh pil menin kau kan pahn kawehla sapwarail, oh kangala arail weren tuhke kan.

7 Oh irail pahn lokolongki soumwahu lusulus laud ehu—oh I pahn wia mepwukat koaros pwehki arail wiewia suwed kan oh tiahk suwed kan.

8 Oh ahnsouo pahn kohdo ma irail sohte pahn koluhla I pahn kamwomwasang irail pohn sampah; ahpw irail pahn kihdi poadoparail, oh I pahn nekidala ong ekei wehi me pahn sapwankihla sahpw wet; mehlel, met I pahn wia pwe I en kak kasalehiong ekei wehi kan duwen wiewia suwed en aramas pwukat. Oh soahng tohto me Apinadai kohpada ong aramas pwukat.

9 Kedekedeo irail ahpw lingeringerda pah; oh irail koledi oh salihedi oh wahlahng rehn nanmwarkio, oh patowanohng nanmwarkio: Kilang, se patowahn wahdohng komwi ohl emen me kin kokohpada duwen sapwellimomwi aramas akan, oh patohwan me Koht pahn ketin kamwomwirailla.

10 Oh e pil patohwan kohpadahr mehkot suwed duwen omwi mour, oh patohwan me omwi mour pahn duwehte likou ehu me mih nan kisiniei mwehl.

11 Oh e pil patohwan me komwi pahn rasehng ahlek pwoat, iei duwehte ahlek meng en nan mohs, me mahn lapala kan pahn tiakedi oh kamwutepene.

12 Oh pil, e patohwan me komw pahn rasehng masal en dihpw tekatek kan, me, ni ahnsou e kin mengila, ma kisinieng kin ipirete, e kin pihpirseli pohn sampah. Oh e kin kinehda me Kauno me mahmahsen. Oh e patohwan me soahng pwukat koaros pahn wiawi ma komwi sohte koluhla, oh met pwehki sapwellimomwi wiewia suwed kan.

13 Oh met, Maing nanmwarki, soangen suwed laud dah me komwi wiadahr, de soangen dihp laud dah me sapwellimomwi aramas akan wiadahr, me kitail pahn pakadeingkihda rehn Koht de ale kadeik rehn ohl menet?

14 Oh met, Maing nanmwarki, kilang, sohte dipatail, oh komwi, Maing nanmwarki, sohte wiahda dihp; eri, ohl menet karaunlikamwohng komwi, oh e wiadahr kokohp likamw.

15 Oh kilang, kitail kehlail, kitail sohte pahn kaliduhla, de lohdiong pahn atail imwintihti kan; ei, oh komwi pweidahr nan sahpw wet, oh komwi pahn pil pweida.

16 Kilang, iet ih ohlo, se patohwandohng ih nin limwomwi kan; komwi kak wiahiong ih dahme komw kupwurki.

17 Kedekedeo nanmwarki Noha ahpw ketin kupwurehda Apinadai en lekdekiong nan imweteng; oh e ketin pahngok samworo kan en pokondohng reh pwe re en kak wie kupwuriong dahme e pahn ketin wiahiong ih.

18 Kedekedeo irail ahpw patohwanohng nanmwarkio: Komw kupwure pwe en pakahrdo mwohtail pwe kitail en kalelapak reh; oh nanmwarkio ahpw mahsanih en pakahrdo mwohrail.

19 Oh irail tepda kalelapak reh, pwe re en song en lidipihedi, pwe en kak mie kahrepen ar pahn kedipahki; ahpw e sapeng irail ni eimah, oh sapengala arail kalelapak koaros, mehlel, irail pwuriamweikihla; pwe e sapengala arail kalelapak kan koaros, oh kapingirailda nan arail koasoi kan koaros.

20 Kedekedeo emen irail ahpw kalelapak reh: Ia wehwehn mahsen kan me ntingdi, oh me atail pahpa kahlap ako kin padapadahng ki, me ketihtihki:

21 Meid lingan oh kaselel patenehn meninkedero pohn nahna kan me weuwa rongamwahu; me kin pakairki popohl; me kin wahdo rohng mwahu; me kin pakairki duwen komourla; oh ndaiong Saion, Omwi Koht me ketin kakaun;

22 Sapwellimomwi silepen kahnimwo kan pahn werda; re pahn wiahkinteieu ngihl laudidakoul; pwe irail pahn kilangki masarail kan ahnsou me Kauno pahn kasapahldo Saion;

23 Ngisingiski amwail peren; wasa ohla kan en Serusalem kumwail ehupene kokoul; pwe Kauno ketin kaloalamwahwihalahr sapwellime aramas akan, e ketin doarehlahr Serusalem.

24 Kauno pahn ketin kasalehiong wehi koaros wiepen nin lime sarawi kan, oh sampah pokon pahn dehdehkihla sapwellimen Koht manaman en komour?

25 Apinadai ahpw patohwan ong irail: Kumwail samworo kei, a kumwail kin mwomwehda padahki aramas pwukat, oh kinehda me kumwail wehwehki ngehn en kokohp, oh met kumwail inengieng esehla sang rehi wehwehn mepwukat?

26 I ndaiong kumwail, meid suwediong kumwail pwehki amwail kin kasapwungehla koasoandi kan en Kauno! Pwe ma kumwail wehwehkier mepwukat ahpw kumwail sohte mwahn kin padahngki; eri, kumwail kasapwungelahr koasoandi kan en Kauno.

27 Kumwail sohte koasoanehdi nan kapehdomwail kan pwe kumwail en kak wehwehki; eri, kumwail sohte kin marain. Eri, dahme kumwail kin padahkihong aramas pwukat?

28 Oh irail sapeng patohwan: Se kin padahngki kosonned en Moses.

29 Oh e ahpw kalelapak rehrail: Ma kumwail padahngki kosonned en Moses dahme kumwail sohte kin peikikihong? Dahme kahrehda kumwail kin kesempwaliki kepwe kan? Dahme kumwail kin wiewiahki tiahk en nenek kan oh perenki ieiang lihen netiki paliwere kan, ei, oh kahrehda aramas pwukat arail kin wiahda dihp, ih kahrepe wet me Kauno ketin kadariehdo pwe I en wia kokohp me uhwong aramas pwukat, iei, kohpada duwen suwed laud me pahn uhwong aramas pwukat?

30 Kumwail sohte ese me I kin koasoi mehlel? Ei, kumwail ese me I koasoi mehlel; oh kumwail anahne rerrer mwohn silangin Koht.

31 Oh ahnsouo pahn kohdo me kumwail pahn lokolongki amwail wiewia suwed kan, pwe kumwail nda me kumwail padahngki kosonned en Moseso. Oh dahme kumwail ese duwen kosonned en Moseso? Dah, komour kin pwilisang ni kosonned en Moseso? Dahme kumwail pahn nda?

32 Oh irail patohwan sapeng me komour kin pwilisang ni kosonned en Moseso.

33 Ahpw met Apinadai ndaiong irail: I ese ma kumwail pahn kapwaiada sapwellimen Koht kosonned akan kumwail pahn komourla; ei, ma kumwail pahn kapwaiada kosonned akan me Kauno ketikihong Moses pohn nahna en Sainai, me ketihtihki:

34 Ngehi me Kauno amwail Koht, me kahluwaikumwailsang nan sahpw en Isip, wasa me kumwail kaliduhla ie.

35 Kumwail sohte pahn ahneki emen Koht tohrohr mwohi.

36 Kumwail sohte pahn wiahiong kumwail dikedik en eni, de sansal en mehkot me mi pahnlahng, de nin sampah, de nan pihl kan pahn sampah.

37 Apinadai ahpw kalelapak rehrail, Kumwail kapwaiadahr soahng pwukat koaros? I ndaiong kumwail, Soh, kumwail sohte kapwaiada. Oh kumwail padahkiongehr aramas pwukat me irail pahn kapwaiada mepwukat? I ndaiong kumwail, Soh, kumwail sohte padahkiong irail.