1 Oh met, kedekedeo ni ahnsou me nanmwarki Pensamin mahseniongehr sapwellime aramas akan, e ahpw ileklahng nan pwungerail pwe e men mwahngih sang sapwellime aramas akan ma irail kamehlele mahsen kan me e mahsanihong irailehr.

2 Oh irail koaros wiahkinteieu werda, ndinda; Ei, se kamehlele mahsen koaros me komwi ketin mahsanihong kiht; oh se pil ese me dahme komw kasaledahr me uhdahn mehlel, pwehki Ngehn en Kauno Wasa Lapalahpie, me ketin kawiliakapwala mehlel loalat, de nan mohngiongat kan, me kahrehda se sohlar inengieng wia me suwed, ahpw pahn wiwiahte me mwahu ahnsou koaros.

3 Oh pein kiht, pil, sang ni kupwuramwahu poatopoat en Koht, oh wiewia kapwuriamwei en sapwellime Ngehno, se wehwehkiehr duwen dahme pahn kohdo; oh ma e konehng, se pahn kak en kohpada duwen soahng koaros.

4 Oh iei sang ni aht pwoson mahsen kan me aht nanmwarki mahsanihong kihtehr me karehieng aht marainkidahr, iei me se inenen pereniki mehlel ni peren mwuledek.

5 Oh se inengieng wiahda inou ong aht Koht me se pahn kapwaiada kupwure, oh peikiong sapwellime kosonned akan ni mehkoaros me e pahn ketin mahsanihong kiht, erein aht mour, pwe se en dehr kihong kiht kalokolok me sohte imwi, nin duwen me tohnlengo mahsaniher, pwe se en dehr nimasang nan kepen sapwellimen Koht engieng.

6 Oh met, iet mahsen akan me namwariki Pensamin ketin kupwurki sang irail; eri e mahsanihong irail: Kumwail ndahier dahme I perenki rong; a inou me kumwail wiadahr iei inou pwung ehu.

7 Oh met, pwehki inou me kumwail wiadahr kumwail pahn kahdaniki sapwellimen Krais seri kei, sapwellime pwutak kei oh sapwellime serepein kei; pwe kilang, rahnwet e sapwellimankin kumwaillahr ni palingehn; pwe kumwail nda me amwail mohngiong kan wiliakapwala sang amwail pwoson mwareo; eri, kumwail ipwisangehr ih oh wialahr sapwellime pwutak kei oh sapwellime serepein kei.

8 Oh sang ni lengileng wet me pahn kasaledengkumwailla, oh sohte ehu lengileng me pahn kak kasaledengkumwailla. Sohte ehu mwar me wiawihda me komour pahn kokihdo; eri, I men kumwail en alehda mwaren Krais, kumwail koaros me wiadahr inou ehu ong Koht pwe kumwail en peikiong lao lel ni imwin amwail mour.

9 Oh ahnsowo pahn leledo me mehmen me kin kapwaiada met e pahn iang mih ni pali maun en Koht, pwehki e esehier mwaro me e kahdanekihlahr; pwe e pahn kahdaneki mwaren Kraiso.

10 Eri ni ahnsowo eh pahn leledo mehmen me sohte pahn alehda mwaren Krais pahn kahdaneki ni ehu soangen mwar tohrohr; eri, e pahn dierek ni palimeing en Koht.

11 Oh I men kumwail en pil tamataman, me iei mwar wet me I ndaiong kumwail me I pahn kihong kumwail me sohte mwahn pahn koakoahsang kumwail, ihte ma kumwail dipada; eri, kumwail rong pwe kumwail dehr dipada, pwe mwaro en dehr koakoahsang nan mohngiongimwail kan.

12 I ndaiong kumwail, I men kumwail en tamataman kolokolte mwareo en kin wie ntintingte nan mohngiongamwail kan ahnsou koaros, pwe kumwail en dehr uhd mihla ni palimeing en Koht, ahpw kumwail en kin kak rongada oh ese kepitieo me pahn ketin malipeikumwail, oh pil, mwaro me e pahn ketin eker kin kumwail.

13 Pwe ia mwomwen aramas emen eh pahn ese soumas emen me e sohte kin papah, oh me soumaso pahn wiahkihla aramas en liki men, oh e dohsang lamalam oh ineng en nan kapehde?

14 Oh pil, mie me kin doadoahngki nein mehn mpe nah ahs, oh nainekihla? I ndaiong kumwail, Soh; e sohte pahn mweidohng en iang nah mahn akan mwonge, ahpw e pahn karawansang, oh pwakihala. I ndaiong kumwail, me iei met me pahn wiawihong kumwail ma kumwail sohte pahn ese mwaro me kumwail mwarasang.

15 Eri, I men kumwail en loalopwoat oh tengeteng, oh kin wia doadoahk mwahu ahnsou koaros, pwe Krais, Kauno Koht Wasa Lapalahpie, en kak sapwellimanikinkumwailla, pwe kumwail en kak kopwurupwurdo nanleng, pwe kumwail en kak sosohki mour poatoapoat oh mour soutuk, sang ni kupwurokong, oh manaman, oh pwuhng, oh kalahngan en ih me ketin kapikada soahng koaros, nanleng oh pohn sampah, me iei Koht me lapalapasang koaros. Ahmen.