Perien en Lihkei nan Saion
Kumwail pahn keneineila nan kapokonpenehn Israel oh kepikpikdahn aramas en Saion o.
Riei lih kempoake kan, I kapaikihda ahi iang kapahrek nan ansou mwahu wet nan poadoapoad en sampa. Rahn koaros, kitail wie kerekerenlahng ansou lingano me Sounkomour Sises Krais, pahn ketin sapahldo sampa. Kitail ese mehkot me pid kahpwal laud kei me pahn wiawi mwohn Sapwellime ketdou, ahpw atail mohngiong kan kin umpwospesengki popohl oh koapworopwor ni atail pil ese inou lingan kan me pahn pweida mwohn Eh sapahldo.
Nin duwen amwail wia nahi serepein kempoake kei en Sahm Nanleng, oh pil nahi serepein kei en Kauno Sises Krais nan Sapwellime wehi, 1 kumwail pahn wia ehu pwukoa kesempwal nan ansou lap me kohkohdou. Kitail ese me Sounkomouro pahn ketdo rehn aramas me pokonpenehr oh onopadahr en momourki mour me duwehte mour en aramas akan nan kahnihmw en Enoch. Aramas pwuko kin miniminpene ki arail pwoson Sises Krais oh inenen mwakelekel douluhl kahrehda irail peukdahla nanleng.
Met iei dahme sansal sang Kauno me pid mehkan me wiawiong nein Enoch aramas akan oh dahme pahn wiawi ni keimwseklahn mwehiwet ni imwin rahn akan:
“Oh rahno pahn leledo me sampa pahn meleilei, ahpw mwohn rahno nanleng kan pahn rotala, oh ehu koduhpwal rotorot pahn pwaindi sampa; oh nanleng kan pahn rerrer, ohpil sampa; oh kahpwal laud kan pahn kipehdi aramas en sampa, ahpw I pahn nekidala nei aramas;
“Oh I pahn kadaredihdo me pwung sang nanleng; oh I pahn ketin kadaredo me mehlelo sang pohn sampah pwehn kadehdehki nei Iehroso; Sapwellime Iasada sang mehla; oh pil iasadahn aramas akan koaros; oh I pahn ketin doadoahngki me pwung oh me mehlelo pwehn kamwakelehda sampah duwehte lapake ehu pwehn kapokonepene nei aramas pilipilda kan sang nan keihmw pahiou en sampah ong ni wasa ehu me I pahn ketin kaunopada, Kahnihmw Sarawi ehu, me nei aramas en katengtengpene ie oh awiawi ahnsou me I pahn ketido pwe wasa me I pahn mih ie oh e pahn kadaniki Saion, Serusalem kapw.
Oh Kauno eri mahsanihong Enoch; kowe oh ahmw kanihmwo pwon pahn tuhong irail wasao, oh kitail pahn kasamwo irail, oh irail pahn kilang kitail; oh kitail pahn pwoleiraildi, oh irail pahn pwolekitaildi, oh kitail pahn mpek pene.
Ohwasao pahn wia ahi wasahn kouson, oh e pahn adaneki Saion, me wia kisehn dahme I kapikadahr; oh nan erein sounpar kid sampa pahn ahneki meleilei. 2
Kumwail lih akan, noumwail serepein kan, nein noumwail serepein kan, oh lih kan me kumwail kakairadahr pahn pahsonehda kepikpikdahn pwihn en aramas me pahn iang Sounkomouro nan pokon lingano. Kumwail pahn kihda sawas mwuledek nan kapokonpenehn Israel oh kepikpikdahn aramas en Saion me pahn kouson ni meleilei nan Serusalem kapw.
Kauno ketin doadoahngki Sapwellime soukohp, wiahieng kumwail ehu inou. Ansou me Pwihn en Sawas en Lih tepin kokouda, Soukohp Joseph Smith ndahiong lih akan me, “Ma kumwail apwali mwahu amwail pwukoah kan, tohnleng kan sohte kak sohte wiahkin kumwail iengarail.” 3
Ire kaselel wet patpato rehmail oh kumwail kaukaunopehng ire wet.
Presiden Gordon B. Hinckley kosoia:
“Kumwail lih akan … sohte mih nan dake keriau nan en Samatailo pilahn en popohl oh mour-mwahu en Sapwellime serihkan. Kumwail ahneki pwukoa me inenen kesempwal nan pilahno.
“Ma sohte kumwail pilahno sohte kak wiawi. Ma sohte kumwail pirokrahmo pwon sohte pahn pweida. …
“Emenemen kumwail wia sapwellimen Koht serepein me kapaikidahr sohso sarawi ehu.” 4
Atail soukohp en ansou wet, Presiden Russell M. Nelson, kawehwedahr duwen pwukoa me kumwail kin pwukoahki ni atail onohnop ong sapahldohn Sounkomouro.
E pahn apwal en sohngedi manaman en lih kan, kaidehn ongete nan peneinei ahpw pil ong nan Sapwelimen Kauno Mwomwodiso, ni arail wia lih pwopwoud, nohno, nohno kahlap; riatail oh me kitail pahn nohnoki; ni arail wia sounpadahk oh kaun kei; ahpw mehlel arail wia mehn karasaras mwahu oh ngong en dorehla irail me pwoson kan.
Met mehlel nan mwehin rongamwahu koaros sangete ansoun Adam oh Ihp. Ahpw lih en nan mwehi wet weksang lih en sohte lipilipil mwehi teiko, pwehki mwehi wet weksang mwehi teiko. Wekdekla wet kiong kitail pwung oh atail pwukoah kan.” 5
Mwehi wet sansalki en Kauno pahn ketin kahluwai kitail en onopada duwehla kahnihmw en Enoch. E ketin kawehwedahr sang Sapwellime wahnparon oh soukohp kan dahme pahn wiawi ong aramas ni arail kiewekiong aramas en Saion.
Elder Bruce R. McConkie padahngki:
“[Nan mwein Enoch] wia ansoun liseliping oh dihp, ansoun rotorot oh moromor, ansoun mahwin oh kahpwal, ansou ehu me kamwowehda kamwakeldahn sampah ki pihl.
“Ahpw, Enoch ahneki pwoson. Ohlo ‘kilang Kauno,’ oh kosoiong Ih ‘kilang pene’ nin duwen en aramas kin kosoiong emen tohrohr.. (Moses 7:4.) Kauno ketin kadaredo en padahngki koluhla ong sampa, oh kamanahiong ih en ‘pepdais ni mwaren Sahm oh Nah, me diren mahk oh mehlel, oh Ngehn Sarawi me kin kadehdeki Sahmo oh Naho.’ (Moses 7:11.) Enoch wiahda inou kan oh kihpene kongkrikeisin en me kamehlele kan, ihr koaros wiahlaaramas pwoson kahrehda ‘Kauno ketdo oh kousonla rehn nah aramas, oh irail momourki me pwuhng,’ oh ale kapai sang wasa ileile. “Oh Kauno ketin kahdaneki sapwellime aramas akan Saion, pwehki irail ahneki mohngiong oh lamalam ehute, oh kin wiewia me pwung; oh sohte me paisuwed nan pwungarail” ’ (Moses 7:18.) …
“Mwurin Kauno ah kahdaneki sapwellime aramas Saion, pwuhk sarawi mahsani me Enoch ‘kauwada ehu kahnihmw me adaneki Kahnihmw Sarawi, iei Saion;’ iei Saion ‘me pwekpwekdahla nanleng’ wasa Koht ketin kasamwohlong nan lime;” oh “sang ansouo iei me lepin kahso wiawihda, Saion samwalahr.’ (Moses 7:19, 21, 69.) …
“Iei Saion ohte me pwekpwekdahla nanleng pahn pwuredo … ansou me Kauno kapwurehdo Saion, oh toweh kan pahn towehda Serusalem kapw, me pahn kokouda ansouo.” 6
Ma mahso kin kopwurpwurehng, ni sapahldohn Sounkomouro, nahi lih akan me kin oke ni mehlel arail inou kan ong Koht pahn daulih elep irail kan me kaunopadahr ren kasamwo Ih ni ansoun Ah ketdo. Ahpw sohte lipilipil ia uwe, amwail tou ong ni kokoudahn miniminpene nan pwungen aramas me onopadahr ong Saion pahn laudsang mehlel elep.
I pahn ndahiong kumwail dahme I kamelelehki me met pahn wiawi. Pwuken Mormon kasalehda ehu soai en aramas en Saion. Kumwail tamataman me mwurin arail alehier padahk, limpoak, oh kapai sang Sounkomour iasadao: “Sohte uhpene wiawi nan sahpwo pwehki limpoak en Koht me kousonlahr nan mohngiong kan en aramas.” 7
Ahi doadoahk padahkihong iehier me sapwellimen Sahm Nanleng lih akan kin kak katikala uhpene oh kakairada me pwung ki arail limpoak ong Koht oh pwehki limpoak en Koht irail kin kakairada limpoak rehn aramas me irail kin papah.
I kilang met ni ahi pwulepwulo ansou me aht prans tikitiko tuhpene ni imwato. Ngehi oh riei pwutako kelehpw me kolokol Prihsduhd en Aron, ahi pahpao kelehpw me kolokol Prihsduhd en Melkisedek. Presiden en Pwihn en Sawas en Lih nan pranso souleng kapw men me ah pwoud ohlo sohte pereniki en liho kin papah nan Mwomwohdiso. Toweh kan iei lih laud kei me sohte me kin kolokol ehu prihsduhd nan arail peneinei kan. I kin kilang en ahi nohnou oh lih oko arail kin poakpene, pwekada, oh nsenohki emenemen irail sohte uhdi. I diarada met me I kilangehr ehu kilel en Saion.
Ahi kasukuhlki duwen manaman en lih pwoson kan wie doudoula nan ehu prans tikitik en Mwomwohdisoht nan Albuquerque, New Mexico. I kin mwasahn duwen en prans presideno ah pwoud, en distrik presideno ah pwoud, oh presiden en Pwihn en Sawas en Lih arail kin kalauwedi mohngiong en aramas oh souleng kapw koaros. Rahn en Santi me I mweselsang Albuquerque, mwurin sounpar riau ahi kilekilang manaman en lih akan wasao, keieun steik kokouda. Met, Kauno ketikidiongehr wasao ehu tehpas sarawi.
I keseula mwuri Boston, wasa me I doadoahk nan distrik presidensi me apwali prans tikitik kei me mi nan state riau. Wasao mie uhpene kei me tohto sang pak ehu me lihoko kapwungala pwehki limpoak oh mahkpene me sewese kalamwuredi mohngiong kan. Rahn en Santi me I mweselsang Boston, emen tohn Presidensi Keieu kauwada keieun steik nan Massachusetts. Miehier ehu tehnpas sarawi wasao met, karanih wasa me distrik presiden kin kouson ie mahs. Ohlo iangada mwekid kan en Mwomwohdiso oh mwuri malipilipda en wia steik presiden oh mwuri misin presiden, pwehki kaweid sang ah pwoud pwoson oh limpoako.
Riei lih akan, kumwail ale kapai pwehki amwail wia sapwellimen Koht lih kei oh kolokol kisakis kesempwal kei. Kumwail wahdo iangahkin kumwail nan mour wet manaman en ngehn ehu pwehn kakairada mehteikan oh pwekirailda ileile ong limpoak oh mwakelekel me pahn kahrehiong arail warohng kousonla nan ehu peneinei en Saion. E sohte wia depweila ehu me Pwihn en Sawas en Lih, keieun pwihn nan Mwomwohdisoht me wiawihda ong sapwellimen Sahm Nanleng lih akan en wiahki arail kilel lepin kahs wet “Kadek Sohte kin Sohrala.”
Kadek iei limpoak mehlel en Sises Krais. Oh iei pwoson Ih oh lipwen Sapwellime Tomwo me pahn kahrehiong amwail warehng, oh irail me kumwail poakpoke oh papah, en ale kisakis unseko pwehn kousonla Saion, wasa me rompe-wiewiawi-ansou reirei oh inoupe wiawiher. E pahn mie lih kei nan Saion, me Kauno kin poakohng oh irail kan me kumwail kapaidahr.
I kadehde me kumwail wia tohn wehin Kauno pohn sampa. Kumwail wia sapwellimen Sahm Nanleng kempoake lih kei, me pekederdohr sampa weuwa kisakis kesempwal kei me kumwail inoukidahr en doadoahngki pwehn kapaiada mehteikan. I inoukiong kumwail me Kauno, pwehki Ngehn Sarawi, pahn ketin kahluwai kumwail ki limeh kan. E pahn ketla mwohmwail ni amwail kin sewese Ih kaunopada Sapwellime aramas pwehn wiahla Sapwellime Saion me inoupe wiawiher. I kadehde mepwukat ni mwaren Sises Krais me sarawi, amen.