Mese mehn Kilang
Sang ni manaman en Ngehn Sarawi, Krais pahn kahrehiong kitail en tehk pein kitail oh tehk mehteikan duwehte Eh kin tehk.
Kilikilang Sapwelimen Kauno Doadoahk
I pereniki soai nan Kadehde Mering duwen pwutak pwulopwul men me kin papah soukohp Elisha. Ehu nimensengo pwutak pwulopwulo pirida, pidohila likio, tehkada me kanihmwo kapilkipene dirin sounpei kei me songosong en kaloweiraildi. E tangala rehn Elisha oh inda: “Maing! Dahme kitail kak wia?”
Elisha sapengki, “Ke dehr masak: pwe iangatail tohtohsang irail.”
Elisha mwahngih me pwutak pwulopwulo sohte anahne koapwoaroapwoarte, ahpw e pil anahne ouraman. Oh eri “Elisha kapakap mahsani, … Maing Kauno, … komw ketin kapehdpeseng meseht pwehn kilangada wasa. Oh Kauno ahpw kapehdpeseng mesen pwutak pwulopwulo; oh e kilangadahr wasa: oh, kilang, me nahnahu direkihla oahs oh uhmwpwul en kisiniei kapilpene Elisha.” 1
Mwein pahn mie ansou kei me kowe, duwehte laduo, ahniki kapwal en esehda ia mwomwen Kauno eh kin doadoahk nan omw mour—ansou kei me ke kehn ke lohdi—ni ansou me kasongosong en sampah kahrehiong ohmw kelepwikihdi. Awih oh koapwoaroapwoarki Koht oh Sapwellime ansou, pwe ke kak koapwoaroapoarki Sapwellime Mohngiong sang loalomw unsek. Ahpw mie keriau en kaweid wasaht. Riei lih oh ohl akan, kumwail pil kak kapakap ohng Kauno pwehn kapehdpeseng mesemwail kan pwehn kilang soahng kan me ke sohte kak pein kilang.
Kilkilang Pein Kitail ni Mwomwen Koht eh Kin Ketin Kilang Kitail
Ele mehkot me keieun kesempwal ohng kitail en kilang mwahu iei ihs Koht oh ihs kitail ni mehlel—kitail wia seri en nanleng kei me “sarawi oh sohsohki mour soutuk.” 2 Peki rehn Koht en kasalehwei rehmw mehlel pwukat, patehng Sapwellime pepehm ohng uhk. Ni omw pahn esehla laud ihs kowe oh kahrepomw, loalomw unsek, e pahn kalaudehla soahng koaros nan omw mour.
Kilkilang Mehteikan
Wewehkihla mwomwen Koht eh kin kilang kitail kin kaunopada ahl me kak sewesei kitail en wehwehki ia mwomwen Eh kin ketin kilang mehteikan. Soun inting David Brooks nda: “Tohtohn atail kapwal en wehi kan kohsang aramas me sohte kehn me aramas teikan kilkilang irail de wehwehkin irail. … [Mie wiewia] kesempwal … me kitail koaros anahne kairada … me iei en pohnese loalen mehteikan oh mweidehng irail en kilang ihs kitail.” 3
Sises Krais ese loalen aramas. E kin kilang emen emen, arail anahn akan, oh ihs me irail kak wiahla. Ekei kin kilang soused kan, me dipan kan, de aramas sohte lipilipil, Sises kilang soun papah kei; Wasa me ekei kilangada ohl emen me ahniki soumwahu suwed kan, Sises kilang arail kapwunod kan oh pohnese ih, oh kamwahuiala. 4
Mendahte atail kin kediropw, kitail kak idawehn Sises oh wehwehki loalen emen emen—arail anahn, arail pwoson, arail kahpwal, oh ihs me re kak wiahla. 5
Sang ni ahi kapakapkiheng Kauno en kapehdpeseng meseiet pwe ien kilang soahng kan me I sohte kalapw tehk, I kin kalapw pein idek rehi peidek riau oh tehk mwahu kapehm kan me pahn kohdo: “Dahme I kin wia me I anahne uhdihsang?” oh “Dahme I sohte kin wia me I anahne tepdahr wia?” 6
Sounpwung kei samwalahro, ni ansoun kamadipw sarawi, I pein idek rehi kalelapak pwukat oh pwuriamweikihla pepehm me pwarada. “Kedehr kilikilang noumw delepwohn ni ahmw kin awiawih nan lain kan.” I kin kalapw kilang nan nei delepwohno ansoun awiawih nan lain en alehda mwenge kan; E wia ansou mwahu ien kapatepene doadoahk tohto, tehkada nei ihmeil kan, kilang rohng kan, de kilkilang dahme kin wiawi nan wehwe.
Menseng en mwurin rahno, I tehkada me I ieiang lahin ehu me reirei ni sdowahu. I kihiei nei delepwohno oh tamanda pepehm me I ahnikio. I pwilikihdi nei delepwohno oh tepda kilengseli. I kilangada ohl kadek men nan laino mwohi. Ihte me wa iei kenen kaht mwenge. I ekis suwedkihda ahpw I medewehda ien inda, “I kak kilang me mie noumw kaht.” Eh nda me mie kisinieng laud kohkohdo, oh e sohte men lohdi ma sohte kenen kaht mwonge. Se koasoaipene ansoukiste, oh ih eri sohpeidohngie oh nda, “Ke ese, I saikinte ndahng emen aramas, ahpw rahnet ei rahn en ipwidi.” I poakpoakehda. I kiheng ahi peren en ipwidiheng oh wia ei kapakap en kaping kalahngan sang nan loalei pwehki ei sohte doadoahngki nei delepwohn oh ahniki ansou mwahu en kilang oh ehuieng emen aramas me anahne.
Sang nan ei mwohngiong unsek I sohte men duwehte ohl sarawio de mehn Levite pohn ahl en Jericho—me kin kilang oh douluhlla. 7 Ahpw ekei pak I kin nda me I kin wia.
Tetehk Sapwellimen Koht Doadoahk Me ien Wia
I esehla mehkot kesempwal sang ni ei tetehk mwahu sang emen peinakapw adaniki Rozlyn.
Soai wet kohsang rehn emen iengei me ahniki pwunod laud ni ansou me eh pwoudo tohrohrkihla erein pahr 20. Nah seri kan kin sohte soandi nan pwungen arail papah oh nohno, eri songosong en iang towehda sarawi kin mwomwen apwal. E kin tamanda:
“Nan ihmw sarawi iei wasa me mie peneinei wia mehkot kesempwal, mwomwohd kelekelehpw kak pil kaweikek. Keieun rahn sarawi I alu kohlong ahpw wie kapakapki me sohte me pahn lokaiahng ie. I udahn nantihong ien kanengamah, oh pilen mesei kereniong en keredi. I mwohndi wasa me I kin kalapw mwomwohdiehu, kaskasik me sohte me pahn tehk me sohte kanengen wasa me I mwomwohdiehu.
“Serepein pwulopwul men nan aht wardo sohpeido oh kilang ie. Ih mwomwedahte sirei. Eh sireido. Ih kak kilang pohn mese me mie mehkot. I kahng douluhl en kohdo lokaiahng ie—sohte mehkot mwahu I kak nda oh I ese me I pahn sengiseng. I pwurehng itiekidi oh song en deh kilang.
“Erein awa ehu, Ih tehkada me e kin kalapw kilikilengdo. Ni ansou me se nek tuhpenehu, serepeino inendo rehi. I inda, ‘kaselel Rozlyn.’ Eh pwoaleiepene oh nda, ‘Sister Smith, I kak kilang me rahnwet wia ehu rahn apwal ohnguhk. I mwoaroski. Ih poakpoakei uhk.’ Pilen mesei kerda ni eh pwurehng pwoaleiehdi. Ahpw ni ansou me I aluhla, I pein medewehiong ie, ‘Mwein I pahn kakehng sang met kohla.’
“Serepein pwulopwul sounpar 16, sounpar titkitik sangie pak riau, kalapw rapahkinie rahn sarawi koaros oh kin pwoaleiehdi oh idek, ‘Iairomw?’ Met wekidala douluhl mwomwen ahi pepehm duwen kohkohla sarawi. Ni mehlelo I tapiada kasik pwoaloapwoal pwukat. Mie me tehk ie. Mie me tehk me I mihmi wasahu. Mie me insenohki.”
Nin duwen kisakis koaros me Sahmo kin ketkiong kitail, tetehk loalen mehteikan kin anahne kitail en peki Reh—oh eri mwekidkihda. Pekiken kak wehwehki mehteikan ni mwomwen Eh kin ketin wiahng—Sapwellime seri kan me kak duwehla Ih. Eri doadoahk nin duen limpoak, papah, oh kasalehda arail warohng oh me re kin men wia. Pwehki met wialahr kisehn atail mour, kitail pahn kak kasawih atail “wialahr soun papah en … Sises Krais kei.” 8 Mehteikan pahn kak kamehlele atail mwohngiong ohng irail. Oh nan mour wet kitail pahn diarada pein ihs kitail oh atail pwukoah.
Emen iengei tamanda ehu ansou me e lelehng ni ah mwomwohd, kelehpw, ih medemedewe ma sounpar 20 eh wie momouriki duwen rongamwahuo sou wia mehkot mwahl. Eh sohte itar en ahniki koapwoaroapwoar te; eh anahne ouraman. Eh kehn mie peidek me sair nan eh mwohngiong: “Dahme ke wiahki mepwukat? Ke wia mepwukat pwehn alehda kisakis, ekei en kapingaiuk, de dahme kak pwarada mwuhr?” Eh peikasal ansou kis, koasoanehdi eh mohngiong, eri ahpw kak sapeng ni koapwoaroapwoar, “I wia mepwukat pwe I poakohng Sounkomouro. Oh I poakehng Sapwellime rongamwahuo.” Kauno kapehdpeseng mesehko pwehn kilangada wasa. Wekidek tikitik wet wiahda manaman laud en sewese Ih en nantihla nan pwoson Krais, mendahte dahme e mih loalehu.
Ih kadehdeki me Sises Krais poakpoake kitail oh kak kihong kitail mesatail mehn kilang—mendahte ni ansou en apwal, mendahte ansou me kitail pwanganda, mendahte ni ansou me kitail kelekelehpw, oh mendahte ansou me kitail kasik mehkot me sohte kin pweida. Sang ni kalahngan en Kauno, E pahn kapaiada kitail oh kalaudehla uwen atail kak. Sang ni manaman en Ngehn Sarawi, Krais pahn kahrehiong kitail en tehk pein kitail oh tehk mehteikan duwehte Ah kin tehk. Sang ni Sapwellime sawas, kitail kak esehla dahme keieu kesempwal mahs. Kitail kak tepida kilang Sapwellimen Koht doadoahk sangete loale oh lella atail mour—kitail pahn kak kilang mwahu.
Oh uhd, ni rahno lapalapo “ni ansoun ah pahn pwaradohu kitail pahn duwe Ih, pwe kitail pahn kilang Ih oh wehwehki Ih; pwe kitail en ahniki koapwoaropwoar” 9 me iei ahi kapakap ni mwaren Sises Krais, ahmen.