Raprapahki Peren rehn Krais
Ahl keieu mwahu en diar popohl rehn Krais iei en patehng Ih sewese mehteikan.
Kauno sohte kin ketin peki neitail Prihsdudh en Aron kan en wia mehkoaros, ahpw dahme E kin ketin peki me inenen kapwuriamwei.
Sounpar kei samwalahro, aht peneinei lelohng soahng kei me peneinei kan kin lelohng nan sampah suwed wet. Nait pwutak keieu tikitik, Tanner Christian Lund, alehdi cancer. E wia aramas mwahu men, duwen mwomwen irail sounpar duwau kan. Pwutako kin wia me kaperen, oh ni ansou ohte, pil inenen poadidi ni palingehn. Sehdan oh tohnleng, ketihwo oh kadek. Ansou me e tikitik e kin kalahpw kapwuriamwei ih kin kiht ah koahiek en ketihwo, se kin medewe ma e pahn keirda wiahla emen soukohp de soun pirap nan bank. Nan pali koaros, likamwete e pahn mie lipwen pwutako pohn sampah.
Oh mwuri e inenen soumwahudi. Erein sounpar siluh mwuri, sounwini kan wia uwen arail kak pwon, pil pahtehng welialidahn kepwen tih riau, oh ni ansouohte e pil iangada soumwau en wai, me karehda e anahne doadoahngki misihn en esingek erein wihk 10 [eisek] ni eh sohte kehn wasa. Sang ni kapwuriamwen, E kehlailkihda ansou mwotomwot ehu; oh ah kansero pil pwuredo.
Ekiste mwohn ah mehla, en Tanner ah soumwahu mihla nan tih kan, oh mehndahte kene wini kehlail, e medmedekte. E sohte kak kohsang nan dewehu. Ahpw ehu menseng en rahn Sarawi, ah nohno, Kalleen, kohdo nan ah pehre pwe en tehk ih mwohn peneineio arail mwesella sarawi. E inenen pwuriamweikihla ah kilangada ah pwourdahr oh likoudahr oh wie mwomwohd pohn ah pehto, nannantiong en pwatinihpene ah sehto. Kalleen ahpw mwohndi limwah. “Tanner,” e ahpw inda, “ke mehlel ke kehlail ke kak iang kohla sarawi? Mweihn ke anahne mihmi nihmwe oh komoal rahnet.”
E kilekilengdi nan tahto. E wia dihken men. Mie ah pwukoah nan pwihno. Oh mie kepwukoah kohieng.
“I pahn wa kamadipw sarawi rahnet.”
“Mwahu, I kamehlehle mie me kak welian uhk.“
Tanner ahpw inda, “Ehng, ahpw … I kin kilang mwomwen aramas arail kin kilangie ansou me I kin wa kamadipw sarawi. Ih kin medewe me e kin sewese irail.”
Kalleen eri sewese pwatinihpene ah sehto oh pirehdi ah nekdaio, oh irail ahpw kohla sarawi. E sansal me, mehkot kesempwal wihwiawi.
Ih pwurodohng sarawio sang ni ai mihting en nimensengo oh pwuriamweikihla ai kilangada Tanner ah iang mwomwohd rehn irail dihken kau. Kalleen mwenginingin kihdo dahme karehda e mihko mwo oh dahme e inda: “E sewese aramas.”
I eri kilikilang ni dihken ko arail alulahng ni tehpel en kamadipw sarawi. E ahpw penglahng emen dihken ni ansou me prihs kan pahsehng irail dahl en pilawa kan. Oh eri Tanner wasaslahng wasa me e pahn mih iehu oh koledi imwin wasao pwe en sewese paliwerehu ni ansou me e kihla kamadipw sarawio.
E mwomwen me koaros me mih nan ihmw sarawio kilkilang oh kekehn ah medeko ni ah wihwia ah tungoal pwukoah. Tanner wiahda kapahrek nennen ni ah wasas, alialu ni wahu ong ehu ehu wasahn mwohndi—ah moangmad pwudoudouda—ni ah weliandi Sounkomouro nin duwen me dihken kan kin wia. Mehnda ah paliweren dihken kin kehlail mahs met e ahniki lipwen medek, ohla, oh sakanakan, oh kakete lokolok pwehn papah wa kilelpen Tomwpen Sounkomouro ong nan atail mour.
Aht kilang ah medewehla duwen ah wia dihken kahrehiong kiht en pil wekidahla aht madamadau—duwen kamadipw sarawi, duwen Sounkomouro, oh duwen dihken kan oh teacher kan oh prihs kan.
I pwuriamwei ni ahi medewe manaman me kangoangehki ih en kommwad oh mwekidki kisin pepehm kis en papah, oh pil duwen uwen kehlail oh koahiek en me pwulopwul kan ni arail momourki luk en soukohp pwehn iang sounpei en Koht oh iang doadoahk en komour oh mour soutuk.
Ansou koaros me dihken men ah kin koledi dahl en kamadipw sarawi, e kin katamandohng kitail kaimwseklahn mwengehn soutik o, nan Kedsemeni, Kalpweri, oh nan sousou o. Ansou me Sounkomour o mahsaniong Sapwelime Werengko, “Wia met ong ni ketemenpei,” 1 E pil mahmahsaniong sounpar koaros ong emen emen kitail. E wie kosokosoia duwen manaman kapwuriamwei me E pahn wiahiong irail akan me pahn wiahla dihken kei, sounpadahk kan, oh prihs kan pahn kasalehda Sapwellime kilel oh luhke Sapwelime seri kan en alehda Sapwelime kisakis en tomwo.
Kilel koaros en tiahk sarawi en kamadipw sarawi kin kaineneikitail lahng kisakis o. Kitail kin medewe pilawa me E pelingedier o—oh pilawa me prihst kan pil kin pelpelingedi mwohtail ansouwet. Kitail kin medewe wewehn pihlo e kin kasarawihla, ansou o oh met, ni ansou me kapakap en kamadipw sarawi kin kohsang irail prihs pwulopwul kan ong nan atail mongiong kan oh lelohng nanleng, kakapwa inou kan me kahlwaikitail lahng manaman en Sapwellimen Krais komouro. Wasahu kitail mwein kin medewe ia wehwe ni ansou me dihken men kin wa kilel sarawi ong kitail, kesikesihnen wasa me Sises pahn kesihnen ie ma Ih me ket mwo, pekipeki kihsang atail kotoutou kan oh medek kan.
Ahpw, pwutak pwulopwul oh lih akan sohte anahne en soumwahuda pwe irail en kak diarada peren oh kahrepen papah Sounkomour o.
Elder David A. Bednar koasoia me ma kitail pahn wiahla misiniri kan iei, kitail anahne wia dahme misinerih kan kin wia, oh ahpw, “dawehn nin duwen eh keirekidi sang ehu ong ni ehu oh ehu ehu kosonned akan, [kitail] kak wiahla misineri … me Sounkomouro kin kupwurki.” 2
Ma kitail ahniki ineng en “duwehte Sisis,” 3 kitail en wia dahme Sises wia, oh nan ehu wasahn wadawad kaselel, Kauno kawewehda dahmwo me E ketin wia: E mahsanih, “Kilang, met iei ahi doadoak oh ahi lingan—pwe ien kak kapwurehdo mour oh mour soutuk ong aramas.” 4
An Sounkomouro doadoahk kin ansou koaros pahn pil kokolahte papah Seme sang ni sewese Sapwelime seri kan.
Oh ahl me keieu mwahu en diar popohl rehn Krais iei en patehng Ih sewese mehteikan.
Iei me mehlelo met me elehda pirokrahm Serih kan oh Me Pwulopwul kan.
Kemwekid koaros en Seri kan oh me Pwulopwul kan oh arail padahk kan iei en sewese irail me pwulopwul kan en duwehla Sises sang ni arail pahn iangala Ih nan Sapwellime doadoahk en komourla oh lapalapalau.
Prokram ong Seri oh me Pwulopwul akan wia mehn doadoahk pwehn sewese seri koaros nan praimeri re en keirda nan arail weliakapwala oh ahnikihla kairoir en pwoson pen wiepen mour peren. Irail kak ahnla kasikala oh mwahuki mehn sawas kan me patehng ahl en inouwo, wasa me irail pahn iang ie kuorum kan oh class en Peinakapw kan, wasa me irail pahn pehm ie popohl en sewese mehteikan sang ni dir en mwekid me rasehng en Krais ah kin papah. Irail pahn inoukihdi dahme re pahn koadoahke kan, ma laud de tikitik, me pahn kasalehda pahrek nan arail mour ni arail pahn sewese irail en duwehla Sounkomouro. Ong kapokon lap kan en Ong ni Kakehlepen me Pwulopwul kan oh makesihn kan, oh Friend, oh app en Gospel Living pahn sewese irail en diarada peren rehn Krais. Irail pahn kasik kapai kan en kolokol kisin likou en mweimwei en pidelong nan tehnpas sarawi oh kehn ngehn en Elijah sang ni menen Ngehn Sarawi ni arail pahn wia doadoahk en tehnpas sarawi oh poadoapoad en kaudaudok en peneinei. Irail pahn ale kaweid sang kapai kan en peitriark. Kedekedeo, irail pahn pein kilang arail patohla nan tehnpas sarawih kan pwehn kasarawihkihla manaman, irail en kak diar popohl, oh en kak katengtengpene kokohlahte, ni sohte lipilipil dahme pahn pwarada, rehn arail peneinei kan.
Ni atail lel nan soumwau dou oh kahpwal laud, atail wihwiahda kaunsekpen katepen pirokrahm kapw en Serih kan oh Me Pwulopwuk kan iei me koadoahkpe wihwiawihte—oh anahnepe me karuwaru. Neitail me pwulopwul kan sohte kak awiahwi sampah en mwahula mwohn arail pahn esehla Sounkomouro. Ekei irail wihwia arail pilipil kan ansou wet itarete ma irail sohte anahne wia ma irail esehier peihn uhdakerail—oh Sapwellime.
Eri, pehkiek karuwaru sang Sapwellimen Koht pokon en sounpei kan nan kasukuhl kesempwal me mahsanih “koaros kaunopada!”
Nohno oh pahpa kan, noumwail pwutak kan anahne amwail utuht ansou wet sang ni lamalam kehail me kumwail ahniki mahso ni ansou me irail sohte kin nohn anahne mehkot laud me duwehte mete oh pihn. Nohno oh pahpa kan, prihsduhd oh Kaun en Peinakapw kan, ma noumwail me pwulopwul kan mihmi nan kahpwal, Serih kan oh me Pwulopwul kan pahn sewese kapwurei iraildo rehn Sounkomouro, oh Sounkomouro pahn kiheng irail meleilei. 5
Pwihn kan oh preseden en kaskuhl kan, sokowei oh ale pwukoah me ke kak wia nan Sapwelimen Kauno doadoak.
Pisop kan, kihong mweimwei preseden en pwihn kan, oh pil ahmw pwihn kan—oh amwail ward—pahn wekila kohkohlahte.
Ong kumwail me wie kekeihrda ansou wet, I kadehde, nin duen emen eh ese, me kumwail wia sapwelimen Kauno seri kesempwal, oh mie Sapwellime doadoahk ohng emen emen kumwail en wia.
Ansou me ke pahn esehda kesempwal pen amw doadoahk, sang nan amw mongiong unsek, kehl, madamwadau, oh roson, ke pahn poakoang Koht oh kolokol amw inou kan oh koapwoaroapwoarki Sapwellime prihsduhd ni ansou me ke pahn wia ahmw doadoahk pwe ken kak sewese mehteikan, tepisang nan amw wasahn kousoan.
I kapakapki me ke pahn nantieng, ni kehl pak riau me pahn warohng nan ansou et, en papah, kakehlaka amw pwoson, koluhla, oh wie mwahmwahula rahn koaros, pwe ken kak warohng en alehda kapai kan en nan tehnpas sarawi oh peren me kin kohdohsangte rongamwahu en Sises Krais. I kapakapki me ke pahn wiahla emen misineri mwahu, ohl oh lih pwopwoud mehlel, pahpa oh nohno limpoak, me inoupe wiawieng komwi pwe ken kak wiala ma ke wia sapwelimen Sises Krais werek mehlel men.
Oh kumwail kin iang sewese kaunopada sampah ong Ketdo Keriauo, lukluke mehteikan en kohdo rehn Krais oh iang paieki Sapwellime manaman en tomwo. Ni mwaren Sises Krais, amen.