Peki, Rapahki, oh Letelet
Ire kesempwal ieu duwen koasoandi kan en Samatail Nanleng, iei ahnsou mwahu en kak patoieng ih ahnsou koaros me kitail mwahuki.
Sounpwung pahieu samwalahro, ni ahi kin onopki duwen rongamwaho, I wadwadek ahnsou me Alma wia ah misin nan Ammonihah ngehi eri wadekada ire wet nan Kohdo, Idawehn ie: “Ni ahnsou me ke wadek kapai laud kan me Kauno ketkieng nein Nephi aramas akan (kilang Alma 9:19–23), medewe ni keneinei duwen kapai laud me e ketkieng komwi.”1 I medewehda ien intingihdi duwen kapai kan me Kauno ketkieng ie oh kilelehdi nan nei pwuhk me mihmi nan internet. Ni kisin ahnsou kis, I intingihdi kapai eisek weneu (16).
Me keieun laud rehrail iei kapai kan duwen mahkpen atail Sounkomour oh ah kamatala pwehki ngehi. I pil intingihdi kapai kan duwen ahi wia weliepeh men ni ahi wia misineri pwulopwul men nan Portugal oh, pil mwuri, rehn ahi pwoud kempoake soutuk, Patricia, nan Brazil Porto Alegre South Misin, Wasa me se iangih meh limepwiki riehk riemen (522) misineri kehlail oh mwahu mehlel. Ni ahi koskosoia Patricia, kapai tohto me I kilelehdi ahnsouwo iei kapai kan me se ahniki pene ni aht wie pwoupwoudki sounpar paisek—me patehng aht katengteng pene nan Tehnpas Sarawi en São Paulo Brazil, nait seri mwahu silimen, arail pwoud kan, oh nein nait seriko seri ehk silimen.
I pil ahnsouwohte medewehda ahi pahpa oh nohno loaloapwoat ko, me epwelih iehda nan ire kesemwpwal kan duwen mwomwohdiso wet. E pil katamandohngie, mehkot, ni ahnsou me ahi nohno limpoako kelepwidi rehi pwe sen kapakap ni keilen ahi pehto ni ahnsou me I sounpar 10. Mwein e medewe me ma ahi kapakap pahn lel rehn Semei Nanleng, e pahn anahne ekis kamwahula. Eri e inda, “Ngehi me pahn kapakap mahs, ah mwurin ahi kapakap, kowe uhd kapakap.” E wiewia soahng wet erein pwohng tohto, lau e ahniki koapwoaropwoar me I eselahr sang ire kesempwal kan oh sang ni onop duwen ahi pahn patoieng Semei Nanleng. I pahn ahnsou koaros kalahngankieng pwehki ah padahkieng ie kapakap, pwe I ese me Semei Nanleng kin rong oh sapeng ahi kapakap.
Pwe ni mehlel, e pil wia ehu kapai me I kapataieng ahi kapai kan—iei kisakis en kin kak rong oh esehla duwen ahn Kauno koasoandi kan. Ire kesempwal ieu duwen koasoandi kan en Samatail Nanleng, iei ahnsou mwahu en kak patoieng ih ahnsou koaros me kitail mwahuki.
Luhk ehu sang Kauno
Ni ahnsou me Sounkomouro ketla nan Amerika mwurin ah iasada, e mahsanih luhk ehu me e ketkieng nah werek kan nan Kalili. E mahsanih:
“Kumwail peki, kumwail ahpw pahn ale; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.
“Pwe koaros me kin peki, re pahn ale; me kin rapahki, re pahn diar; oh me kin letelet, e pahn ritidahng.” (3 Nephi 14:7–8; pil kilang Matthew 7:7–8).
Atail soukohp, President Russell M. Nelson, pil ketkieng kitail soangen luhkohte nan atail ahnsou. E mahsanih: “Kapakapki ni mwaren Sises Krais amwail kahpwal kan, amwail masepwehk, amwail luwet kan—ei, sang nan ahmw mohngiong unsek. Komw eri, rong mwahu! Intingihdi madamadau kan me kohdo nan ahmw mwahliel. Kilelehdi ahmw pepehm kan oh idawehn ki ahmw wiewia kan me ke kin kapehmki ken kin wia. Ni ahmw pahn kin kapwkapwurehieng soahng pwukat nan ehu ehu rahn, oh nan ehu ehu sounpong, oh ehu ehu pahr, ke pahn ‘keirda nan esehla duwen ire kesempwal kan duwen kaudiahl.’”2
President Nelson padahngkiehr, “Nan rahn akan me wie kokohdo, palingenitail sohte kak pweida ma sohte mehn kaweid, oh mehn kahluwa, oh kaloalamwahu, oh ieiang en Ngehn Sarawi ahnsou koaros.”3
Dahme kaudiahl wiahki mehkot kesempwal pwe palingenitail en pweida? Pwehki sampah kak kapingiping oh katairong, e direhkihla sapwung oh lider. Mahmahson ong Samatail Nanleng kin kahreieng atail kin kak diarada dahme pwung oh dahme sapwung, pil dahme pahrekieng sapwellimen Kauno koasoandi ong kitail oh dahme sohte pahrekieng. Sampah pil kin kak sakanakan oh kamedek ong atail mohngiong. Ahpw ni atail kin ritingada atail mohngiong ni kapakap, kitail kin kehn kansenamwahu me kin kohsang rehn Samatail Nanleng oh kadehdepen uwen ah poakehng kitail oh kesempwalkin kitail.
Peki
Kauno mahsanih me “koaros me kin peki, re pahn ale.“ Peidek kin mwomwen mengei, ahpw e kehlail pwe e kin kasalehda atail ineng kan oh atail pwoson. Ahpw ni mehlel, e kin anahne ahnsou oh kanengamah pwe kitail en kin kak wehwehki kepitien Kauno. Kitail kin karonge madamadau oh pepehm me kin kohdo nan atail mwahliel oh mohngiong, oh kitail kin intingihdi, duwehte atail soukohp ah kin padahkieng kitail. Esehla duwen atail madamadau wia kisehn mehkot kesempwal ni atail kin alehda. E kin sewesehkin kitail katamando, pil ehu kilang, oh pil ehu kehnda dahme Kauno kin padahkieng kitail.
Ahnsou keren emen kempoakepahi indahieng ie, “I kamehlele me ahn emen emen ah kaudial e mehlel. I kamehlele me Ngehn Sarawi pahn padahkieng ie soahng koaros me I anahne wia. E kin mengei ien kamehlele ni ahnsou me I kin kehn pahn adiet eh kin karakarki madamadau pwung kan. Ahpw ia mwomwen ahi pahn kak alehdi Ngehn Sarawi pwe en kak Masonehngie nan ire wet?”
Ong kempoakepahio oh pil ong kumwail koaros, I kak inda me pil ngehi men iang ahnsou koros kehn madamadau kehlail sang Ngehn Sarawi oh pil ahnsou koaros kilang ni sansal ahl me I pahn idawehn. Ahpw I sohte kin. Ahpw ni mehlel, dahme kitail pahn kin kehn ahnsou koaros iei ngihl meleilei, ngihl tikitik sang rehn Kauno me kin peipeidohng nan atail mwahliel oh mohngiong, “Iet Ngehi. I poakehng komwi. Ketwei; wia uwen ahmw kak. I pahn utung komwi.“ Kitail sohte kin anahne ese mehkoaros de kilang mehkoaros.
Ngihl me meleilei oh ngihl tikitiko e kin katkataman, kongengehki, oh —oh pak tohto ihte me kitail kin anahne nan rahn oh. Ngehn Sarawi me mehlel, oh ah kapehm kan me mehlel—me laudko oh me tikitingko.
Rapahki
Kauno doulahte oh inoukihdi, “Me kin rapahki, re pahn diar.“ Raparapahki rasehng duwen doadoahk en mwahliel oh madamadau—medemedewe, sikeng, songosong, oh onopki. Kitail kin rapahki pwe kitail koapwoaroapwoarki sapwellimen Kauno inou kan. “Pwe mehmem me men kowohng rehn Koht udahn pahn kamehlele me Koht ketin mie, oh me Koht kin ketin katingih irail kan me kin raparapahki“ (Hebrews 11:6). Ni ahnsou me kitail kin rapahki, kitail kin pil kadehde me kitail kin anahne esehla, oh Kauno pahn kin kamarainih kitailda, kaukaunop ong kitail en kak alehdi me tohto. “Pwe kilang, Kauno Koht ketin mahsaniher: I pahn kihong aramas akan ehu ehu ire, ehu ehu padahk, ekis wasaht oh ekis wasahu; … pwe mehmen me pahn alehda I pahn kapatahieng ekei” (2 Nephi 28:30).
Letelet
Eri, Kauno ketin mahsanih, ”Me kin letelet, e pahn ritidahng.” Letelet iei doadoahk en Pwoson. Ni ahnsou me kitail kin idawehn ih ni ngoang, Kauno kin ritingada ahlo ong kitail. Mie koul sarawi kaselel ieu me padahkieng kitail ”pirida oh wia mehkot laud sang ouramanki imwatail kaselel nanleng. Wiewia mwahu e kansenamwahu, peren me sohte imwi, kapai en pwukoah oh limpoak.”6 Elder Gerrit W. Gong sang Kuorum en me Ehk Riemen ahpwtehnte kasalehda me kaudiahl kin koieng kitail ni atail kin wiewia mehkot mwahu. E mahsanih: ”Ni ahnsou me kitail kin song sewese irail kan limwahtail, I kin medewe me Kauno kin kapehmkin kitail sapwellime limpoak ong irail oh ong kitail. I medewe me kitail kin rong ngile—oh kitail kin kehn ih—ni ehu soangen mwohmw, ni atail kin kapakapki irail kan me mihmi limwahtail pwe ih ehu kapakap me E kin ketin men sapeng.”7
Ahn Alma Karasaras
Peidek mengeio nan Kohdo, Idawehn Ie pwe ien kin medewe ahi kapai kan kin kieng ie pepehm mwahu oh soangen madamadau sarawi kei. Ni ahnsou me I doulahte oh wadwadek ahn Alma doadoahk nan Ammonihah, I diarada me Alma kasalehda karasaras mwahu ong kawehwepen peki, rapahki, oh letelet. Kitail wadek me ”Alma doadoahngki ngehn sarawi laud, poadpoadoarkieng Kauno ni kapakap kehlail, pwe Sapwellime Ngehn en ket pohn aramas ako.” Kapakapo, ni mehlel, pasapengpe sohte duwen dahme e kasik, oh Alma lekdekiei sang nan kahnihmwo. ”Toutoukihla insensuwed,” Alma kereniengehr en pwur, a tohnleng men mahsanih: ”Meid pai komwi, Alma; eri sarada kowe pereperen, pwe kahrepe laud mie ong ahmw pahn peren.” Tohnlengo mahsaniheng en pwurala Ammonihah oh pil ehu song, oh Alma ”ni ahnsouwohte pwurala.”8
Dahme kitail esehla sang Alma duwen pekipeki, raparapahki, oh letelet? Kitail kin esehla me kapakap kin anahne doadoahk en ngehn, oh e sohte kin ahnsou koaros kahrehda dahme kitail koapwoaroapwoarki. Ahpw ni ahnsou me kitail kin sohla ahniki koapwoaroapwoar de toutoukihla insensuwed, Kauno kin ketkieng kitail kehlail oh kansenamwahu ni soangen mwohmw tohto. Mwein e sohte pahn sapeng atail peidek kan de kapwungala atail kahpwal kan ni ahnsouwohte; pwe E kin kangoangehkin kitail en kin nantiengete. Ma kitail nantieng oh kainenehieng atail koasoandih kan duwehte Sapwellime kan, E pahn ritingada ahlo ong kitail, duwehte ah wiaieng Alma.
Iei ahi kadehde me met wia ahnsou en unseklahn rongamwahu. Kitail kak pereniki kapai kan en Tomwpen Sises Krais nan atail mour. Pwuhk sarawi kan mie rehtail. Kitail kahluhwei sang irail soukohp kan me padahkieng kitail duwen kupwuren Kauno nan momour apwal me kitail mihmi loale. Pil ehu, kitail ahniki ahnsou mwahu ong pein atail kaudiahl pwe Kauno en kak kansenamwahwi kitail oh pein kahluwai kitail. Duwehte dahme me tohnlengo mahsaniheng Alma, ”kahrepe laud mie ong [atail] pahn peren.” (Alma 8:15). Ni mwaren Sises Krais, ahmen.