Ahneki Koapwoaroapwoar
Atail pwoson tengeteng duen padahk en rongamwahu kopwurpwurdo en Sises Kraius kin kaweid kitail oh kieng kital peren.
Ni kaimwseklahn rahn akan nan Sapwellime ieias pohn sampa, Sises Krais mahsanihong Sapwellime Wahnparonko duwen kalokolok oh kahpwal kan me irail pahn ale. 1 E ketin kaimwsengkihla mahsen en kakehlail wet: “Sampah pahn kalokei kumwail, ahpw kumwail koapwoaroapwoar, pwehki I kalowehdier sampah” (Sohn 16:33). Iei kalohk me Sounkomouro ketin wiahiong seri koaros en Samatail Nanleng. Iei inondehn rohng mahu ong emen emen kitail nan mour wet.
“Ahneki popohl” iei me pil wia kakehlepen sampah me Krais iasadao ketkieng Sapweliime Wahnparonko. “Soangen apwal koaros kin lel kiht,” Wahnparon Paul ndahiong mehn Korint kan, “ahpw se sohte kin ohkihla; se kin mihla nan peikasal, ekei ahnsou; ahpw e sohte kin kauwehla aht koapwoaroapwoar, mie at imwintihti tohto; ahpw se sohte mwahn kin kelehpwla, oh ekei ahnsou paliwarat lellel; se ahpw sohte ohla douluhl” (2 Korint 4:8–9).
Sounpar riekid mwuri kitail pil ahneki “kahpwal pali koaros,” oh kitail pil anahne soangen mahsen ohte pwe kitail en dehr peikasal ahpw en ahneki koapwoaroapwoar. Kauno kin ketin ahniki limpoak lauhd oh medemedewe sapwellime serepein keneinei kan. E ketin mwahngi me kumwail mwahuki kan, ahmwail anahn kan, oh me kumwail periki kan. Kauno me keieu manaman. Likih Ih.
Soukohp Joseph Smith esehda me doadoahk kan, oh wiepe kan, oh kahrepe kan en Koht sohte kak sohrala, de pil sohla katepe.Doctrine and Covenants 3:1 Ong Sapwellime serihkan me wie nannanti, Kauno ketkihong irail iren kakehlail pwukat:
“Kilang, ih met me Kauno inoukihong kumwail, O nei ladu kan.
Kahrehda, ahneki koapwoaroapwoar, oh dehr masak, pwe Ngehi Kauno pahn ieiang kumwail, oh pahn ket rehmwail; oh kumwail pahn kadehdehkin ie, iei Sises Krais, me Ngehi me Iehros en Koht ieias (Doctrine and Covenants 68:5–6).
Kauno kin ketiket limwahtail, oh E mahsaniher:
Dahme I mahsanihong emen I mahsanihong koaros, ahneki koapwoaroapwoar; pwe I ieiang kumwail, oh I sohte kin likidmeliei kumwaillaDoctrine and Covenants 61:36.
Pwe mwurin kahpwal kan kapai kan kin kohdoDoctrine and Covenants 58:4
Riei Serepein ko, I kadehde me inou pwukat, me kohda nan eilepen kalokolok oh kahpwal kan, kin kohda ong emen emen kumail nan amwail kahpwal kan rahn wet. Mepwukat inenen kesempwal oh kin katkataman ohng kitail en kin ahneki popohl oh pereniki rongamwahuo ni atail mwekmwekid kohwei nan kahpwal kan en nan mour wet.
Kahpwal oh kasongsong iei me kin kalapw wiawi nan mour wet. Uhpene wia ehu pali kesempwal nan koasoandi sarawio pwehn sewese atail keirda, 2 oh nan werengen mwekido, kitail ahniki sapwelimen Koht koapoaroapoar me, mwekmwekid kolahng mour soutuk, uhpene sohte pahn mweimweiong en kaleweikitaildi. Pwehki Sapwellime sawas oh atail pwoson oh ngiangi, ktail pahn powehdi. Pweki arail kin wia kisehn mour wet, kahpwal koaros kin mihmikihte lepin ansou. Nan pingiping kan me kin elehda mahwin laud kan, presiden en United States Abraham Lincoln katamanehng aramas ko ehu lepin kahs marain en kawao, “mwekid wet, pil pahn sohrala.” 3
Ni amwail esehier, kahpwal kan en mour wet me I koskosia--me kahpwaliala kitail en ahneki koapwoaroapwoar--ekei ansou kin lel kitail ohpil mehteikan, duwehte milion en aramas kei me wie lokolongki soumwahu lusulus en COVID-19. Pil duwehte, nan Amerika milion en aramas kei wie lokolongki kailok oh uhpene me kin kalapw pwaradi ni ansoun usuhs en presiden kan ahpw ansou wet e inenen doar sang mehlel dahme kin wiawi mahso me kitail me mahkan kak tamataman.
Me pid pein kitail, emen emen kitail kin lokolongki ekei kahpwal kan en nan mour wet, me rasehng paisuwed, kailok, soumwahu doar, sohla doadoahk de nsensuwed, seri sapeik, akamai en pwopwoud de sohte pwopwoud, oh kahpwal en dihp—atail de en ekei.
Ahpw, nan werengen mepwukat koaros, nanleng kaweid kin kitail en ahneki koapwoaroapwoar oh kin diar popohl nan padahk en inou kan en rongamwahuo oh wahn atail doadoahk kan. 4 Kaweid wet ohng, soukohp kan oh kitail koaros. Kitail ese met sang ni irari kan en irail me tihengla mwohtail oh dahme Kauno ketin mahsenihong irail.
Tamataman dahme wiawihongehr Soukohp Joseph Smith Pwehn kadehde mwahu, ah kahpwal ko iangahki paisuwed, kalokolok, nsensuwed, kapahtou nan peneinei, oh mehlahn aramas sohte dipe. Ni eh wie kalkalokolok nan imweteng, ah pwoudo oh nah serihkan oh Souleng teikan ahnekihdi kahpwal laud kei ni arail pakasar sang Missouri.
Ni en Joseph peki sawas, Kauno ketin sapeng:
Nei pwutak, ahneki meleilei loalemw; ahmw kasongosong oh ahmw lokolok pahn sohte werei;
“Oh eri, ma komw kin poden wiewia mwahu, Koht pahn ketin pwok komwihda wasa ile; komw pahn kak powehdi omwi imwin tihtih kan” (Doctrine and Covenants 121:7–8).
Met iei kaweid poatoapoato ong pein ih me sewese Soukohp Joseph en kolokol ah wiewia mwahuo oh limpoak oh wahu en nah aramas akan. Iei soangen weiwia kohte me kakehlaka sounkaweid kan oh tohn mwomwodiso en ansouo kan me kodo mwuri oh pil kak kakehlakai kumwail.
Medewe irail toweh kan en kawaho! Irail kin wie pakapakasarseli sang wasa kei, pang kei. Ni imwio irail eri sohpai kahpwal kan en kauwada arail wasahn kousoan oh Mwomwohdiso nan sahpwtehn ehu. 5 Sounpar riau mwurin en keieun pwihn en paionihr arail lel nan wahu en Great Salt Lake, paionihr ko sohsohpaite kahpwal laud nan wasa kepero. Pali laud en towehko wie nannantihte arail kotkote wasa apwal laudo de nannantihong ale arail mehkan me re anahne pwe irail en kak mweselda. Met sounkaweid kan oh towehkan ahneki koapwoaroapwoar oh popohl.
Tetehn irail saikinte soandi nan arail wasahn kouson kapwo, ni kapokon lap en Oaktohpe (kid welipwiki paihsek duwau)1849 ehu pwihn en misineri kapw pekederla Scandinavia, France, Germany, Italy oh South Pacific. 6 Ni ansou me aramas medewe me irail inenen mwarosala douluhl, paionihr kan ahniki keirda laud. Oh mwurinte sounpar silu, pil meh 98 [duwehk welimen] malipilipdahr pwe irail en tepda kapokonepene Israel. Emen sounkaweid en Mwomwohdiso ko kawehwe me misin pwukat “ni oaralap, sohte pahn nohn reirei; ele mein sang sounpar 3 lel 7 me pahn reireiki en emen ohl eh pahn dohsang ah peneinei.” 7
Riei lih kan, Presidensi Keieu kin medmedewe amwail kahpwal kan. Se poakehng kumwail oh kin kapakap kin kumwail. Ni ansou ohte, se kin kalap kaping kalahnganki me aht kahpwal en paliwar kan--likin rerren en sahpw, kisiniei, lapake, oh melimel kan--kin kalapw tikitiksang dahme iangat mehn mahsko kin sohpai.
Nan eilepen kahpwal kan, iren kakehlail sarawio iei en “ahneki koapwoaroapwoar, pwe I pahn kahluwai kumwail. Wehio iei amwail oh kapai koaros amwail, oh kapai koaros en mour soutuk iei amwail (Doctrine and Covenants 78:18). Dahme kahrehda soahng wet kak wiawi? Ia mwomwen eh wiawihong paionihr kan? Ia mwomwen eh pahn wiawi ong lih en Koht kan rahn wet? Ni atail ideidawehn kaweid en kokohp,“wenihmw kan en nan ehl sohte pahn powedi [kitail],” Kauno mahsani nan kaudial nan Epreil 1830 (kid welipwiki silihsek). “Ehi,” E mahsani, “… Kaunno Koht pahn ketkihsang manaman en rotorot mwohmwail, oh mweidehng nanleng kan en itikekda ong kamwahu pemwail, oh ni mware sarawi” (Doctrine and Covenants 21:6). “Dehr masak, kisin pelin sihpw; wia me mwahu; mweidehng sampah oh ehl en uhkiong kumwail, pwe ma kumwail poasoanda pohn ahi paipalap, re sohte kak kaleweikumwaildi” (Doctrine and Covenants 6:34).
Pwehki inou kan en Kauno, kitail “pwekada [atail] mohngiong [kan] oh perenda” (Doctrine and Covenants 25:13), oh “pwehki mohngiong peren oh pohn mas mwahu” (Doctrine and Covenants 59:15), kitail wenla mwowe nan ahl en inou o. Pali tohtohn kitail sohte kin sohpai ire kalaimwun kan, rasehng mweselsang atail peneinei kan pwehn wia paionihr men nan wasa me kitail sehse. Atail koasondi kan kin kalapw doke dahme kin wiawi ni rahn akan nan atail mour, ahpw Kauno mahsanihong kitailehr, Dehr periki wia me mwahu, pwe kumwail kin kakau poahsoan en doadoahk mwahu ehu. Mehkot tikitik kin wiahla mehkot lap. (Doctrine and Covenants 64:33).
Mie manaman kouwahlap nan padahk en rongamwahu en Sises Krais kopwurupwurdou. Atail pwoson tengeteng nan padahko kin kahlua atail weweid oh kiheng kitail peren. E kin kamarainda atail madmadau oh kiheng kehl oh koapwoaroapwoar nan atail mwekid kan. Kaweid oh kamarain oh manaman wia kisakis kei me kitail alehier inoupe sang Samatail Nanleng. Ni atail wehwehki oh kakainene atail mour kan ong padahko, iangahki kisakis en koluhla, kitail kak ahneki koapwoaroapwoar ni atail poden kekeid pohn ahlo kolahng atail mour soutuk--pwurehng tuhong oh komourla rehn atail nohno oh pahpahn nanleng kan,
Kumwail mwein sohsohpai kahpwal kalaimwun kei. Elder Richard G. Scott padahngki. Ekei ansou kahpwal ko inenen lap, pil kasapwurupwur, kumwail mwein pepehm me kumwail sohte kak apwali. Dehr kelehpw sohpai sampah. “Likih Kauno ni mohngiongomw unsek; oh dehr koapwoaroapwoarki mehkan me ke pein lemeleme me ke ese’ [Proverbs 3:5]. … E kosondier me mour pahn wia mehkot apwal,Kaidehn pwe kitail pahn sohte kak pweida, apw pwe kitail en kak pweida ni atail pahn powehdi.” 8
Met wia kisehn pilahn en Koht Sahm oh Sapwellime Ieros, Sises Krais, me I kadehde, ni ahi kapakap me kitail pahn nantihong lella nan dewetail, ni mwaren Sises Krais, amen.