Wia ni Pwung Pahrek, Ahniki Limpoak en Kupwurkalahngan, oh Mweidohng Koht Mehkoaros
En wia ni pwung pahrek wehwehki en wia ni wahu. Kitail kin kasalehda wahu rehn Koht sang ni atail kin mweidehng Ih mehkoaros. Kitail kin kasalehda wahu rehn mehteikan sang ni atail kin ahniki limpoak en kupwurkalahngan.
Ni atail wia souleng en Sises Krais, oh wia Souleng en Imwin Rahn-akan, kitail kin nantieng—oh kin ahniki ngoang en nantieng—en wia me mwahu oh kak en mwahu.1 Mwein ele kumwail medewehier, ni ei pil ahniki, “Dahme I wihwia, e itar?” “Dahme Ipahn pil wiewia?” de “Ia mwomwen ai pahn, ni ai wia aramas sohte unsek men, pahn kak warohng ‘patpato rehn Koht wasa me direkihla peren soutik’?”2
Nan Kadehde Mering soukohp Maika kalelapangki kalelapak wet ni duwe met: “Ni ansou da me I pahn kak patohdo mwohn Kauno, oh kelipwikihdi mwohn Koht lapalapiehu?”3 Maika ahniki madamdau laud ki ma meirong me keieu lapala pahn itarehng en apwaliala dihp, ni ah mahsanih, “Ia duwe, Kauno pahn kupwurpereniki ei meirongkihong kiden sihpw, de lehn olip me pahn kin pwilipwiliwei poatoapoat? Ien meirongkiheng nei mesenih ong … ni tomw en dipei kan?”4
Pasapengpe me iei soh. Poasoanki wiewia mwahu sohte itar. Komouro sohte wia mehkot me kumwail pahn anahne koadoahkehda.5 Pil wen lapalahn tohnmetei me Maika mahsanih sohte pil pahn kak lapwahda kisin dihp tikitik ehu. Ni eh pahn kitailte oh neitail dipisou en wai kan, koapwoaroapwoar en pwurala kousonla rehn Koht pahn sohla katepe.6
Ma sohte kapai kan me sang rehn Samatail Nanleng oh Sises Krais, kitail pahn sohte kak en itariki atail wiewia de itariki peihn kitail. Ahpw rohng kapereno iei pwehki sang Sises Krais kitail pahn kak en itarikihla.7 Aramas koaros pahn komourla sang ni mehlahn paliwar me sang ni kalahngan en Koht, me sansal sang ni mehla oh Iasadahn Sises Krais.8 Oh ma kitail pahn kiheng Koht atail mongiong kan, komourla sang ni mehlahn pali ngehn pahn mie ong koaors “sang ni Tomwpen [Sises] Krais … sang ni peikiong kosonned kan oh tiahk sarawih kan en Rongamwahuwo.”9 Kitail pahn kak maiauda sang nan dihp oh kesihnenkihda atail mwakelekel mwohn Koht. Nin duwen Maika ah kawehwehdier me, “[Koht] ketin padahkihongehr kitail aramas, dahme mwahu; oh dahme Kauno kupwuriki kitail en wia, ahpw kitail en wiahda me pwung, kasalehda limpoak poatoapoat, oh peikiong Koht ni karakarahk?”10
En Maika kaweid ong atail mongiong kan en sohpeilahng Koht oh warohng komouro iei e pidada soahng siluh. En wia ni pwung oh pahrek me wewehki amwail wiewia en mie wahu rehn Koht oh ong aramas teikan. Kitail kin kasalehda wahu rehn Koht sang ni atail kin mweidehng Ih mehkoaros. Kitail kin kasalehda wahu rehn mehteikan sang ni atail kin ahniki limpoak en kupwurkalahngan. En wia ni pwung oh pahrek iei me wia koadoaroapwe keieu oh keriau en kosonned laud me ketihtihki, en “poakoahng Kauno Koht ki mongiong unsek, oh ngenimw unsek, oh madamadau unsek … [oh en] poakoahng mehn impomwail kan duwehte amwail poakoahng peihn kumwail.”11
En wia ni pwung pahrekoh mweidehng Koht mehkoarosiei en inengieng en kesehla me suwed akan, weweid nan Sapwellime koasoandi kan, oh mehlehliong.12 Aramas emen me kin wia ni pwung pahrek kin sohpeisang dihp oh sohpeilahng Koht, wiahda inou sarawi kan Reh, oh mehlehlieng inou sarawi pwukat. Aramas emen me pilada pwung pahrek kin pilada en kapwaiada Sapwellimen Koht kosonned akan, koluhla ni ansou kan me e kin pwupwidi, oh kin wenlahte nantihla mwowe.
Ni ansou me Krais iasada oh pwarek mehn Nihpai kau, E kawewehieng irail me kosonned en Moses welialidahr ong kosonned kei me keieu ileilei. E mahsanieng irail en dehr …“wia meirong kan oh meirong en isihs kan” sang met kohla, ahpw irail en meirongki “mohngiong karakarahk oh ngehn en peik.” Oh E pil inoukihda me, “Oh mehmen me patohkihdo ni mohngiong karakarak ehu oh ngehn en peik ehu, e pahn ale pepdais en kisiniei oh Ngehn Sarawi.”13 Ni atail kin alehda oh doadoahngki kisakis en Ngehn Sarawi mwurin pepdais, kitail kin kak perepereniki ehupenehn Ngehn Sarawi oh kin kak kaskuhlki soahng koaros me kitail anahne wia,14 patehng mwomwen atail pahn kak mweidong Koht mehkoaros.
Sises Krais tohnmeteiki dihp oh komourla sang ni mehlahn palingehn me mie ong irail kan koaros me ahniki mongiong karakarahk oh ngehn peihk.15 Mohngiong karakarahk oh ngehn peik kin kieng kitail pepehm en koluhla oh kin nantieng duwehla Samatail Nanleng oh Sises Krais. Oh ni atail kin wia met, Sounkomouro kin kamwekele kitailda, kamwahuih kitaila oh kakehlaka kitaila. Kitail sohte kin wiahte ni pwung oh pahrek oh mweidong Koht mehkoaros, kitail pil esehla duwen limpoak en kupwurkalahngan duwehte me Samatail Nanleng oh Sises Krais wia.
Koht ketin kupwurki mahk oh sohte kin kasohwe kamwahupe. Nan sapwellimen Maika mahsen koasoaia, “Ihs me pahn duwehte komwi Koht, me kin mahkehng me suwed, pahn ahniki limpoak ong kiht,” oh “pahn ketin tiakidi dipat akan oh kakihrala nan kapin madauo.”16 En kak ahniki limpoak en kupwurkalahngan me duwehte Koht iei e pahn sohte kak en sohte mie wihwia pwung oh pahrek ong mehteikan oh sohte epwel sapahrek pahn mie.
Kesempwal en atail pahn sohte wiakawe mehteikan sansal nan soi ehu me pid duwen Hillel, Elder men, me wia mehn Suhs ohl loaloakong men me kousonkiher pahr epwiki mwohn Krais. Emen sapwellimen Hillel tohn skuhl ahpw pwunodiki wen apwal en Torah—pwuhk en Moses limau me audaudkihda kosonned [wenepwiki eisek siluh] 613 oh mesen inting kan inting en rapa. Tohn skuhlo ahpw lemehda song Hillel en kawehweh Torah ihte ma Hillel pahn kak kesihnenkihdahte elep neh. Hilell mweihn sohte pahn kak kesihnenkihda mwahu ahpw eh alehda taleng me kohiengo. E ahpw koasoiahda mahsen en Lipai me mahsanih, “Dehr dupungki me suwed ong emen me wia suwed ong uhk, de kadakadaur omw kailongki, ahpw ken poakohng mehn mpomw duwehte omw kin poakohng pein uhk.”17 Hilell ahpw pitipite kaimwsengkihla: “Me wia mehkot me kumwail sohte mwauki, ieremen wiahng mehn mpomw. Iei met me wia koasoiepen Torah; luwe koaros iei madamadau kan sang aramas. Kowei oh onopki.”18
Ansou koaros me kin mie wahu rehn mehteikan e kin wia kisehn limpoak en mahkpene. Pwe ien kasalehda koasoakoasoipene ehu me i rongada pahr kei samwalahro nan emersensi en Imwen Wini en Johns Hopkins nan Baltimore, Maryland, nan Weihn Amerika. Soumwau men, Mr. Jackson, me wia ohl wahu oh kadek men me dehdehieng tohn doadoahk kan en imwen winio. Pak tohtoh e kin kalapw kapidolong nimwen wini pwehn ale wini en ah soumwahu kan me ahnkihdi sang ni sakau en wai. Nan irair en ansou kiset, Mr. Jackson pwurala nimwen wini pwehki sain kan me kasalehdahr soumwau en nan kapehd me sansal sang kemem en sakau en wai.
Ni ah pahn nekeh doadoahk, Dr. Cohen, me wia toahkteh wad men oh kin pereniki doadoahk laud ahpw tehkada Mr. Jackson oh kasawiada me e konehng en kapidolong. Toahkte Cohen ahpw kapwukoahki Toahkte Jones me pahn tep doadoahk ansouo en kapidolong Mr. Jackson oh apwahpwahli ah soumwauo.
Dr. Jones kanekelahr sukuhl en toahkte oh pil tepdahr ekei sukuhl. Kasukuhl wet karehiong Dr. Jones ah kin memehn meir. Pwehki sang ni kelimau en ah kapidolong aramas pwohngo, Toahkte Jones ahpw lokaia laudkiheng Dr. Cohen. E ahniki pepehm me sohte ah pwung en apwahpwahlih Mr. Jackson ki awah kei pwehki ansou apwal me e ahniki me e peihn kiheng ih loale.
En Dr. Cohen ah pasapeng me kasalehda wehweh mwahu me mih ni kerenieng mwenginingin ehu. E ahpw nda, “Dr. Jones, ke wiahla toahkte men pwe ken apwalih aramas akan oh kamwaui iraila. Ke sohte wiahla toahkte pwe ken kadeihk irail. Ma ke sohte wewehki ia wekpesengih, eri sohte ahmw pwuhng en kohdo kasukuhl wasaht.” Sang ni pwung wet, Dr. Jones ahpw idawehn oh apwalih mwahu Mr. Jackson nan ereihn ansou me e kapidolongo.
Mr. Jackson ahpw kepilsalehdala. Dr. Jones oh Dr. Cohen koaros ara pwukoah doadoahk inenen wad mehlel. Ahpw nan ansou apwal akan me e wie kaskuhlki, Toahkte Jones kin anahne en katamaniki en wia ah pwukoah doadoahk ni pwung oh pahrek, en ahniki limpoak en kupwurkalahngan, oh apwalih mwahu Mr. Jackson ni ah pahn sohte ahniki peikasal.19
Pahr ngederehr, I ahnikiher kapai sang ni iren katameno. Limpoak en kupwurkalahngan wet wehwehki me kitail sohte pahn limpoakehngete kupwurkalahngano me Koht ketkihong kitail; kitail en perenkihda pwe Koht pil ketkihong kupwurkalahngano rehn mehteikan. Oh kitail idawehn Sapwellime kahlmeng. “Koaros duwepenehte rehn Koht,”20 oh kitail koaros anahne sawas en ngehn sarawi pwehn sewesei kitail oh kamwauih kitaila. Kauno ketin mahsaniher, “Kumwail sohte pahn medewe emen aramas kesempwal sang emen, de aramas men sohte pahn medewe me e mwahusang emen.”21
Sises Krais ketin kasaledahr karasaras en dahkot wia ni pwung oh pahrek oh limpoak en kupwurkalahngano. E kin ketin patehng seli irail me dipan akan, kasalehieng irail wahu oh wahunikin irail. E ketin padahngki popohl en kapwaiada Sapwellimen Koht kosonned akan oh rapahki en kin kakehlaka irail ahpw kaidehn en kin kihdi irail kan me kin nananti. E kin ketin kasalehda irail akan me kin lipahnede Ih me kin padahk ong aramas akan me medewe irail sohte warohng.22 Soangen momour wet inenen uhwong Kupwure.23
Pwehn kak duwehte Krais, aramas emen anahne en kin wia me pwung oh pahrek, wiewia en mie wahu rehn Koht oh ong aramas teikan. Aramas emen me kin wiewia ni pwung oh pahrek kin mehlel ni koasoi oh wiewia oh kak kilang me wekpeseng en mwohmw de lamalam sohte kak kawuhdi wen kadek oh ehupenehn aramas. Emen emen aramas me kin wia pwung oh pahrek “pahn sohte ahniki madamadau en kawehla emen aramas, ahpw en momourki popohl”24 ong mehteikan.
Pwehn kak duwehte Krais, aramas emen anahne ahniki limpoak en kupwurkalahngan. Aramas akan me kin ahniki limpoak en kupwurkalahngan sohte kin kadeik mehteikan; irail kin kasalehda limpoak ong mehteikan, ahpw mehlel ong irail kan me sohte nohn paiamwahu; irail me diren kalahngan, kadek, oh wahu. Aramas pwukat kin ahniki limpoak oh wehweh ong koaros, ni arail sohte kin medewe ma rail mehn ia, ohl de lih, palien lamalam, ma irail pwopwoud en lih lih de ohl ohl, palien doadoahk, palien tiahk, sou da, de wekpeseng teikan. Mepwukat inenen laudla pwehki sang ni limpoak en Krais.
Pwehn duwehte Krais, aramas anahne pilada Koht,25 mweidohng Ih soahng koaros, rapahki en kin kadeke Ih, oh kapwaiada inou sarawih kan Reh. Aramas akan me kin mweidohng Koht mehkoaros taman dahme Samatail Nanleng oh Sises Krais wiahong kitailehr.
Itar dahme i wiwia? Mie mehkot I anahne pil wia? Dahme kitahil kak wia pwehn sapengala kalalapak pwukat iei pwoason en atail insenamwahu nan mour wet oh mour soutik. Sounkomouro sohte mwahuki kitail en wiahki me komourla wia mehkot mengei. Itarte mwurin atail wia inou sarawi kan, miehte ahlen atail pahn kak lohdi sang tohnmetei oh mweisang rehn samatail Koht ieias.” Eri kitail anahne, “nantiong oh kin kapakap” pwe ken dehr pwupwudi “nan kasongosong.”26
Ni ansouohte, Samatail Nanlen oh Sises Krais sohte kupwurki kitail en pwunodki erein atail momour pohn sampah, medemedewe ma e itar atail wiwia kan pwe kitail en insenamwahu oh koumourla. Re udahn sohte mwahuki kitail en likidekla sang sapwung me kitahil kolukila, medemedewe me e sohte kak mwahula,27 de masopwengki pwe kitail de pwureng lohdieng loale.
Kitail kak tenekih pein atahil wiwia mwahu. Kitahil kak ese me “duen mour [me kitail] momourki, iei duen en Koht kosondi”28Ni atail wia me pwung, kesempwalki mahk, oh wewehid nan aktikitik mohn silangin Koht. Kitail idawehn karasaras me Koht oh Sises Krais wia ohng nan atahil mour oh kitail kin pakohng emen emen.
Ni ohmw wia mepwukat, ke pahn keid nan ahl me pwung oh warohng “iang mih rehn samatail Koht wasa kaperen me sohte imwi.”29 Amwail mour pahn audaudkihda limpoak en Koht oh iangahki marain en mour soutik.30 Kumwail pahn direkihla peren laud me kumwail sohte kak wewehki.31 I kadedehki me Koht ieias oh me Sises iei me Krais, atail Sounkomour oh Soundor, oh sang ni limpoak oh peren e ketkieng kitail koaros Sapwellime kalahngan. Kumwail sohte kamehlele? Ni mwaren Sises Krais, amen.