Songosong, Kasalepe, oh Mwakelekelda
Kapai keieu laud me pahn kohdo ansou me kitail kin kasalehda atail kolokolete atail inou sarawi kan ansou en atail kasongsong kan iei wekilahn mwomwatail kan.
Kaselehlie riei ohl oh lih akan, I kapingki ahi kak padahk ong kumwail rahnwet. I koapwoaroapwoarki me ahi padahk pahn wia mehn kakehlail mehlel nan ansou apwal oh soh kesikpe wet. Ong ekei kumwail, iei ansouo met. Ma soh, ansouo pahn leledo.
E sohte pahn rotorot. E pahn mehlel—pil kaperen—pwehki ih kahrepen Koht Ah ketin Kapikada sampah. Kahrepen kepikipiko pwe en ketkiong Sapwellime serihkan arail ansou mwahu en kasalehda ihs irail oh irail en kak pilada me pwung nan ansou apwal akan. Wia mepwukat, pahn karehda mwomwarail eh kak wekila oh kak duwehla Ih. E mwahngihier me wekidekla wet anahne pwoson Ih ni mehlel.
Soahng laud me I esehla kohsang nan ahi peneinei. Ni ansou me I sounpar waluh, ahi nohno loalokongo ndahng riei pwutako oh ngehi sen kohla iangih mwet nan aht kisin mwetuwelo nan tinsewen imwato. Pwukoah wet mengeite, ahpw se kin mihmi nan New Jersey. E kin kalapw kotou Pwehlo kin pwelmatak. Dihpw kan kin osada mwadang sang wahntuhke kan nan mwetuwelo.
I tamatamante mwomwei ansou me I kin usada dihpw kan, kalewehkan kin kapwelmatakiala nan pehiet. Ahi nohnohu oh riei pwutako kin dohlahsangie. I kin wia wen ahi kak, ahpw ehute ahi pwandala.
“Met udahn apwal!” I kin sengiseng.
Ahi nohnohu kin kilengdohngie, sohte mwomwen poakeiehla oh nda, “Oh Hal, mehlel, e udahn apwal. Udahn e pahn. Mourwet ansou en songosong.”
Nan soangen ansouo, I ese me ah koasoai kan pwung oh pahn pwung kohkohlahte nan ahi mour.
Kahrepen Nohno ah kin wie sinsirei sansalehngie sounpar ekei mwuri ansou me I wadekehr me pid Sahm Nanleng oh Sapwellime Iehroso ara mahmahsanih kahrepen Ara ketin kapikada sampah oh ketkiong seri ngehn kan en alehda mour:
“Oh kitail pahn kasalehiong irail mepwukat, irail en kilang ma irail kak wiahda soahng koaros me Kauno arail Koht masanihong irail;
“Oh irail kan me pahn kolokol tepin arail sohso me kohieng irail e pahn laudla; oh irail kan me sohte pahn kolokol tepin arail sohso re sohte pahn iang linganla nan wehio me kohieng irail me kolokol tepin arail sohso; oh irail kan me kolokol arail sohso keriau arail lingan pahn laudla pohrail kohkohlahte.”1
Kita alehda luhk en songosng wet oh pil kasalehdahr me kita pahn pilada kolokol Sapwellimen Koht kosonned akan ansou me kita sohla mih mwohn sihlangin Sahm Nanleng.
Mendahte soangen luhk mwahu wet me sang rehn Sahm Nanleng, Lucifer kaweid suwediala silikis ehu en seri ngehn akan en idawehnla ih oh soikala Sapwellimen Sahmo plahn ong atail keirda oh peren poatoapoat. Ahn Sehdan sapeik, me karehda ih oh iengehkan arail lekdeksang nanleng. Met, e wihwia wen ah kak koaros pwe me tohto en sohpeisang Koht nan mour wet.
Kitail kan me pwungki koasoandio e sang ni atail pwoson Sises Krais, me pilada pwe en wia atail Soundor oh Sounkomour. Kitail udahn anahne ese me soahng kan me wia luwet en atail mour me kitail ahniki, oh soahng kan me tepelo kin uhkiong kitail, wiwia mwahu kan pahn powehdi.
Sahm Nanleng oh Sises Krais mwangih ihs kowe oh poakohnguhk. Ira men kitail en pwurala Rehra oh Duweirahala. Ahmw keirda iei Sapwellimara. Ke kak pehm me limpoak kin kohsang rehn Ngehn Sarawio ansou me ke kin wadek de rong mahsen pwukat: “Kilang, iet ahi doadoahk oh ahi lingan—en wahdo oh kiong mour soutuk rehn aramas.”2
Koht sapwelimaniki manaman en kamangaiala atail ahl akan. E ketin katungoalehki seri en Isrehl kan mana ni ansou me irail kohkolahng nan sapwen inouo. Sapwellimen Kauno mour sampah E ketin kamwahuiala me soumwahu, kamourada me melahr akan, oh kamelehdi sehd. Mwurin Ah ketin Iasada, E ritingadahr “wenihmw en kalapwuhs me katengeikitaildier.”3
Iet me Joseph Smith, emen Sapwellime soukohp kaidehn mwamwahl, me lokolok nan kalapwuhs ahpw padahki padahk ehu me kitail koaros kak alasang oh anahne ansou me kitail ale songosong en atail pwoson: “Ma ke pahn lekideklong nan pwoahr, de nan pehn sounkam aramas kan, oh koasoandi ken kamakamala; ma ke lekdekdi wasa loal, ma ilok laud leluhk; ma melimel laud wia ahmw imwintihti; ma nanleng rotorotala oh audepe koaros kohpene oh pereiukala; ahpw pohnangin mepwukat koaros, ma ewen kehl en ehl pahn ritida mwurumw,nei pwutak, ken ese, me soahng pwukat koaros pahn karehionguhk koahiek, oh pahn wia kamwahupomw.”4
Mwein kumwail kin medewe dahme karehda Koht limpoak oh manaman en soahnng koaros ah kak mweidehng atail mour en kak ale songosong apwal pwukat. E mwahngih palingenitail en keirda nan mwakelekel oh ih mwomwen atail pahn kak pwurala nin duwen peneinei ehu mwohn Sihlangih. Pwe en kak mengei, Samatail Nanleng ketkiong kitail Sounkomouro oh manaman en piladahng pein kitail sang ni pwoson en kolokol Sapwellime kosonned akan oh koluhla oh pwurala Reh.
Sapwellimen Sahmo koasoandi en pereno me poahsoanehda iei kitail en duhduwehla Sapwellime Iehros, Sises Krais. Ni soahng koaros, Sapwellimen Sounkomouro karasaras iei mehn kaweid keieu mwahu ong kitail. E sohte ketin saledek sang anahn pwehn kasalehda Pein Ih. E wia met ong Sapwellimen Sahm Nanleng serihkan, E ketin pwainda dipatail kan. E ketin ale lokolok en irail kan me kodohr oh pahn kohdo nan mourwet.
Ansou me ke medewe ia uwen medek me ke pahn ale, tamanda Ih. E lokoloki ahmw lokolok pwe en kak ese ia mwomwen Ah pahn pwokuhkada. E kakete sohte kihsang ahmw katoutou kan, ahpw E pahn ketkionguhk kehlepomw, mehn kansenamwahu, oh koapwoaroapwoar. E mwahngiher ahlo. E ketin nimala kep katiko. E ketin ale lokolok pwehki kitail.
Kumwail mihmi pahn epwel keneinei sang rehn Sounkomour limpoako, me mwangih iamwomwen Ah pahn doarei kumwail ansou en songosong. Alma padahki:
“E pahn wenlahte mwowe, lokoloki medek oh soumwahu oh kasongsong kan en kitail koaros; met me pahn kasalehda me mahseno pweidahr me masanih me e pahn alehda atail medek oh soumwahu kan.
“Oh E aledahng ih mehla, pwehn lapwahda sahl en mehla me piredier sapwellime aramas akan; oh e pahn aledahng ih atail soumwahu kan, wasa loal en ih en direkihla mahk, ni palin war, pwe en kak ese ni palin war ia mwomwen ah pahn kak sewese sapwellime aramas akan nan arail soumwahu.”5
Ehu ahl en sawas E pahn lukeikumwail en tamataman Ih ansou koaros oh kohdo Reh. E ketin kakehlailihkin kitail:
“Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.
“Kumwail ale oh kapaikada ei mehn wisiket, oh kumwail padahngki sang ie; pwe I me opampap oh nan kapehd karakarahk: kumwail ahpw pahn diar kommoalpen ngenomwail kan.”6
Ahl en kohla Reh iei onopki oh momourki Sapwellime mahsen, doadoahki pwoson ong koluhla, pilada papdais oh kasarawihla sang rehn Sapwellime ladu, oh kolokol ahmw inou sarawihkan ong Koht. E ketkihdo Ngehn Sarawio pwe en wia kempoakepahmw, mehn kaloalamwahu, oh mehn kaweid.
Ni ahmw pahn warohng momourki kisakis en Ngehn Sarawio, Kauno kak kaweid uhk doandoareiuk mehndahte ma ke sohte kak kilang ahlo. Ong ie, pak tohto E ketin kasalehiongie kahk ehu de riau me ien ale. Ekei pak E kin ketkiongie pwe ien sohte kak kadehdehda mwahu dahme mihmi mwohi, ahpw soangen edied pwukat mehn kaweid ong dahme I pahn pilada ien wia nan mourwet.
Kauno ketin mahsanih:
“Kumwail kakete sohte kilangki pwoaren masamwail kan, ekei ansou, Sapwellimen Koht kepikipik kan me duwehte soahng kan me pahn kohdo mwuhr, oh lingan me pahn kohdo … kahpwal tohto.
“Ahpw mwurin kahpwal tohto kan kapai kin kohdo.”7
Kapai keieu laud me pahn kohdo ansou me kitail kin kasalehda atail kolokolete atail inou sarawi kan ansou en atail kasongsong kan iei wekilahn mwomwatail kan. Ni atail pilada kolokol atail inou sarawih kan, manaman en Sises Krais oh kapai en Sapwellime Tomwo kak doadoahk loalatail. Atail mohngiong kak mwuterek en ahniki limpoak, mahk, oh lukehiong mehteikan en kohdo rehn Sounkomouro. Atail poadidiong Kauno pahn kekeirda. Atail masak pahn wie tikitikla.
Met, mendahte ekei kapai kan kin kohdo sang kahpwal, ahpw kitail sohte kin rapahki kahpwal. Nan irair en mour wet, kitail pahn ahniki lepelep en ansou en song pein kitail, oh pwehn pweida nan dehs kan me uwen apwal pwehn elehiong kitail en duwehla Sounkomouro of Samatail Nanleng.
Me patehng met, kitail udahn pahn tehk kahpwal en mehteikan oh song en seweseirail. E kin wia mehkot apwal en sewese pein kitail ansou me songosong laud kin lel kitail. Ahpw kitail pahn diarada ansou me kitail pahn kin sewesehda mehteikan, mendahte ma e tikitik, tihnsewatail kan kin kehlailda oh kitail kin kilangada marain nan rotorot.
Ni met, Kauno me wia atail Sounkaweid. Pohn lohpwu en Golgota, lokolokkier medek laud oh pwoulahr me duwehte kaidehn Ih Sapwellimen Koht Iehros, E mahsenlahng irail kan me kalkaloke oh masanih ong Semehu, “Mahkong irail; pwe irail sehse dahme re wihwia.”8 Ansou me E wie weiweirek pwe koaros en kak mourla, E mahsaniada Sohn oh inehu me nsensuwedlahr oh sewese ih nan ah kahpwalo:
“Ansou me Sises mahsaniada ah nohnohu, oh tohnpadahk me keskesihnen mwo, me e udahn poakohng, e mahsanialahng ah nohnohu, Lih, kilang noumw pwutak en!
“Oh e ahpw mahsanialahng tohnpadahko, Kilang inomwen! Oh nan awahu tohpadahko ahpw kahrehla liho ni imwehu.”9
Soangen mwekid sarawi kan me E kin ketin wihwia nan rahn pwukoa, E ketkiong kitail Sapwellime mour ni soh pweipwei, kiong kitail sawas kaidehnte nan mourwet ahpw pil nan mour kohkohdoh.
I kilangehr aramas ekei me kesihnenda ileila sang ni arail kasalehda pwoson ansou en kasongosng laud kan. Mwomwohdiso wasa koaros rahnwet wia mehn karasaras. Aramas akan luwetalahr pwehki kahpwal akan. Sang ni arail pwoson nannanti oh koahiek, irail duhduwehla Sounkomouro, oh Sahm Nanleng.
I esehla pil ehu kaskuhl sang rehn nohno. Ni ah kisin serepein e kerenieng mekihla soumwahu en diphtheria. Mwurin mwo e uhd spinal meningitis. Ah pahpahu mehla ni ah pwulopwul, oh ahi nohnou oh rie pwutak ko me kin sewese arail nohnohu.
Nan ah mour, e kin kalapw kehn kapwunod en soumwahu oh palien en mwohni. Sounpar eisek mwohn ah mehla, pak tohto e kin koadoahk. Ahpw ni mehkoaros, e kin kasalehda pwoson Kauno, mehndahte e wonohnehr pohn peht. I tamataman me ihte kilel me mih nan ah perehu iei kilel en Sounkomouro. Lasd en ah lokaiehngie ni eh wonohn pohn pehto iei: “Hal, ke ngilen mwur ekis soumwahu. Ke en apwalih mwahu pein kowe.”
Ni ah mehlau, Elder Spencer W. Kimball me lahs en padahk. Mwurin koasoiepen ah kahpwal akan oh ah poadidi, e ahpw masanih met: “Ekei kumwail kak medemedewe dahme karehda Mildred alehki soumwahu laud ansou reirei. I pahn ndahieng kumwail kahrepe. Ahki Kauno men en ekis wie kamwkamwakel.”
I men kiong ahi kaping ong tohn Mwomwohdiso en Sises Krais tohto me weuwa arail katoutou kan oh tengetengediong arail pwoson oh sewesehda mehteikan wahda arail katoutou kan pwe Kauno pahn kamwakeleirailda. I pil men kiong ahi limpoak ohng irail soun apwapwalih oh soun kaweid kan nan sampah me kin papah mehteikan ansou me irail oh arail peneinei kan iang wie kamwkamwakel.
I men kadehdeh me kitail wia seri en Sahm Nanleng, oh e poakong kitail. I kehn Sapwellimen Preseden Russell M Nelson limpoak ong koaros. E wia Sapwellimen Kauno soukohp pohn sampah rahnwet. I kadehdehki met ni mwahr sarawi en Kaun Sises Krais, ahmen.