Kitail Koasoaia Krais
Ni sampah ah katikitikla koasoaipen Sises Krais, kitail en kalaudehla atail koasoaia Ih.
I kihwei ahi limpoak ong kumwail, kempoakepahi kan oh souleng kan koaros. I inennen linganiki amwail pwoson oh kehlail nan sounpwong kei me samwalahro, ni ahnsou me sampah pwon alehdi soumwahu dou ehu ong atail mour oh pil wahsanger kisehn peneinei oh kempoakepatail kei.
Nan ahnsoun peikasal wet, I pehm kalahngan kapwuriamwei ong ahi ese mehlel me Sises iei Ih me Krais. Ke kin iang ahniki soangen pepehmo? Mi soangen kahpwal kei me kin inennen katoutouwih kitail, ahpw mie me kin ahnsou koaros ieiang kitail, ih me ni karakarahk kin masanih, ”Ngehi me ahl, mehlel, oh mour.”1 Ni atail kin wie dohdohki wehn dohpeseng iou sang mehteikan, kitail sohte anahne kitail en dohsang ih me kin ansou koros, kapahwei limeh kan, kesempwalki kitail, “kohdo rei.”2
Ahpw duwehte usu marain, nan lahng rotorot, Sises Krais kin kamarainehda atail ahlo. E ketido pohn sampah nan imwen mahn. E ieiaski mour unsek. E ketin kamwahuwihala me soumwahu oh kamourada me melahr akan. E wia kempoakepahn me manokonoklah kan. E ketin padahkieng kitail en wia me mwahu, pil peik, oh poakpene nan pwungatail. E ketin pwoula ni lohpwuo, oh iasada rahn siluh mwuri, me mweidehng kitail oh kempoakepatail kan en mour mwurin mehla. Sang ni sapwellime mahk me sohte mehkot kak pahrekiong oh sapellime lingan, E alehieng Ih dipatail kan oh atail lokolok kan, pwe en kak kieng kitail mahk sang ni atail pahn koluhla oh sewese kitail ahniki meleilei nan mour wet. Kitail poakohng Ih. Kitail kaudokieng Ih. Kitail idahwen Ih. Iei Ih me poahsoanpen ngenitail.
Me pil kapwuriamwei, ahnsou me madamadau en wekidekla wie lalaudla rehtail, mie aramas tohto pohn sampah me sehse udahn ihs Sises Krais, oh, ekei wasa nan sampah me wehwehki mwahu Mware, pwoson Sises Krais wie tikitikla. Irail souleng kan me poadidi nan Europe kilangehr mwomwen pwoson ah kin luwetala nan arail wehi kan sang mahs lelodo met.3 Ni pahtou, wasaht nan Amerika, pwoson pil wie tikitikla. Onop kapw ieu kasalehda me sang sounpar eisek samwalahro lel met aramas sili rar (30 milion) nan Amerika sohla kamehlele sarawihpen Sises Krais.4 Kilikilanglahng nan sampah pwonopwon, pilehu onop kasikasik me erein sounpar eisek kohkohdo aramas me pahn samwalahsang ahr kamehlele Krais pahn inennen tohtohsang me pahn iangala.5
Kitail, ni mehlel, ahneki pwung en mehn pilipil, ahpw Samatail Nanleng me mahsanih mehlel, ”Iet nei pwutak kempoake: rong ih.”6 I kadehde me rahno pahn kohdo me aramas koaros pahn kelepwidi oh koaros pahn kadehde me Sises iei Ih me Krais.7
Ia mwomwen atail en mwekidki wekideklahn sampah? Ekei arail pwoson wie tikitikla, a ekei wie raparapahki me pwungo. Se aleieng kihtehr mwaren atail Sounkomouro. Dahkan me kitail pil anahne wia?
Kounopoda en Presiden Russell M. Nelson
Ekis en atail pasapeng kan kak kohdo ni ahnsou me kitail pahn kin tehk mwomwen Kauno ah kin kaweid Presiden Russell M. Nelson nan sounpwong samwalahr kei ni ahnsou me e alehdi pwukoah en wiahla Presiden en Mwomwohdiso. Koasoakoasoaiong me pwulopwul kan sounpar ehu mwohn ah pahn alehdi pwukoah wet, Presiden Nelson luke kitail en kaloalehla atail wehwehki ahnsou riekid riepwiki (2,200) me mwaren Sises Krais pwarada nan neitail mehn sawas Topical Guide.8
Sounpwong siluh mwuri, nan kapokon lap en Epreil, e koasoaia ia mwomwen, mendahte ah wie werek poadidi men, onop laud en Sises Krais kin inennen doadoahk reh. Sister Wendy Nelson idek reh mwomwen ah kin sair ih. E sapengki, ”Ngehi ohl wekila men!” E wia ohl wekila men? Ni sounpar 92, e wia ohl wekila men? Presiden Nelson kawehwehda:
”Ni atail pwilikihdi atail ahnsou pwehn kasukuhlki duwen Sounkomour oh Sapwellime Tomw, kitail kin karakaranih … [Ih]. …
”… Atail poadidi [pahn] katengetengdiong pohn Sounkomouro oh Sapwellime rongamwahu.”9
Sounkomouro mahsanih,”Sohpeidohngie nan madamadau koaros.”10
Nan sampah me dir en doadoahk kan, pwunod kan, oh ineng en pweida kan, kitail kolokol nan mohngiongitail kan, nan mwahlielitail kan, oh nan atail madamadau kan Ih me wia atail koapwoaroapwoar oh komourpatail.
Ma kapwurehiong onopiki Sounkomouro sewese kaunopada Presiden Nelson, e soh kak pil kaunop kitailda?
Nan ah kesempwaliki eden Mwomwohdiso, Presiden Nelson koasoaia: “Ma kitail … pahn ahneki ahl ehu ong manaman en Tomwpen Sises Krais—pwe en kamwakelehda oh kamwahuwikitailla, en kakehlailih oh kalaudehla kitail, oh ni imwilahu kitail pahn kenkenla—kitail anahne kin pohnese me Ih me poahsonpen manamano.”11 E padahkiong kitail me poaden doadoahngki eden Mwomwohdiso ni pwung, mehkot me mwomwen tikitik, e sohte douluhl tikitik oh e pahn wekidahla mehlel ahnsou kan me kohkohdo.
Inou ong omw pahn kounopada
I inoukiong kumwail me ni atail kin kaunop kitailda, nin duwen me Presiden Nelson wiaiehr, kitail pil pahn iang wekila, medemedewe laud Sounkomouro, oh pahn kalapw koasoaia Ih ni sohpeikasal. Ni atail kaloalehla atail ese oh poakohng Ih, atail koasoai kan pahn kin kohwei kansenamwahu, duwehte ni atail kin koasoaia emen neitail seri de emen kempoakepatail. Irail me rongorong komwi pahn sohte men akamai de kauhs komwi oh udahn men esehla sang komwi.
Kitail koaros koasoakoasoaia duen Sises Krais, ahpw mwein kitail kak ekis mwahusang met. Ma sampah pahn sohte kosoia ih, ah ihs me pahn kak kosoia ih? Iei kitail! Pil iangahki Souleng poadidi teikan!
Koskosoia duen Krais nan imwatail akan
Mie kilel en Sounkomouro nan imwatail kan? Kitail kin kalapw koasoaia ong neitail seri kan karasaras kan en Sises? ”Soaikan duwen Sises [iei] duwehte kisinieng wuk ehu me kohdo ni umwpwil en pwoson ong nan mohngiong en neitail seri kan.”12 Ni ahnsou me noumw seri kan pahn kin peidek rehmw, pil medewe dahme Sounkomouro padahngki. Ni karasepe, ma noumw serio peidengki, ”Pahpa, dahme kahrehda kitail kin kapakap?” Mwein ke kak sapengki, ”Peidek mwahu ieu men. Ke tamataman ahnsou me Sises kapakap? Kita en koasoaia dahme E kapakapki oh ia mwomwen ah kapakap.”
”Kitail koasoaia Krais, … kitail kin kapingki Krais, … pwe neitail serihkan en kak ese ia wasa re kak diar ie lapwapen diparail kan.”13
Koskosoia duen Krais ong mehteikan
Nan ireo te pil patehngete me kitail en ”kalohki Krais.”14 Nan atail wasahn kaudok kan, kitail en kin nantiong medewe Sounkomour Sises Krais oh kisakis en Sapwellime Tomwpen Dihp. Met sohte wewehki me kitail sohte kak koasaoia soahng kan me wiawi nan atail mour de ehukihda ahn emen ah madamadau. Mehnda ma atail koasoai kan pid peneinei de papah de tehnpas sarawi de kalohk, soahng koaros nan atail kaudok en udahn kasale mehlel Kaun Sises Krais.
Sounpar silihsek samwalahro, Presiden Dallin H. Oaks e koasoaia kisin likou ieu me e alehdi ”sang ohl emen me inda e tohwehda kapokon en kamadipw sarawi oh karonge kadehde eisek isuh oh sohte pahk ehu e rongada arail koasoaia Sounkomouro.”15 Presiden Oaks uhd kapatapatki, ”Mwein soai wet pil nohn laudla [ahpw] I kapwurehieng pwe e kin kihda kataman kehlail.”16 E pil doula oh lukei kitail en kin kalapw kosoia Sises Krais nan atail kahrek oh kasikuhl kan. I kin kasawih me atail doadoahk ong Krais kin wie lalaudla nan atail tuhpenehkan. Kitail anahne douhla oh idawehn soangen doadoahk mwahu pwukat.
Koskosoia duen Krais ong mehteikan
Rehn mehn limwatail, kitail en song ritingada mouritail, pil mwadang en men koasoaia Krais. Presiden Nelson koasoaia, ”Soun papah mehlel en Sises Krais kin men ahnsou koaros kesihnenda, koasoida, oh kin wekisang aramas en sampah.”17
Ekei pahk kitail kin medewe me koasoakoasoaiong emen aramas pahn anahne kapwurehdo irail nan mwomwohdiso de tuhwong misineri kan. Mweidohng Kauno en kaweid irail ni arail inangih, ahnsou me kitail kin medewe pein atail pwukoah en wia Ngile, kalapw kin madamadau laud oh mwadang en ehukihda dahme atail pwoson. Elder Dieter F. Uchtdorf padahkiong kitail me ni ahnsou me aramas emen idek ia iren atail imwilahn wihk, kitail en kin men sirei oh koasoaia me kitail kin linganiki rongorong koul en serihn Praimeri kan ”I songosong ien duwehte Sises.”18 Kitail kadehde ni mwahu atail pwoson Krais. Ma emen koasoaia kahpwal ehu nan pein ah mour, kitail kak inda, ”Sohn, Mery, ke ese me i kamehlele Sises Krais. I wie medemedewe mehkot ieu me E koasoaia me pahn kakete seweseiuhk.”
Kumwail kak inangihada koasoaia amwail koapwoaroapwoariki Krais nan social media. Tohto me pahn wahuneki atail pwoson, ahpw ma mie me pahn sohte men rong ahnsou me kumwail koasoaia Sounkomouro, kehlailiki Sapwelime Inou: “Meid pai komwi, ahnsou me aramas pahn kailongkin komwi … pwehki ngehi. … Pwe laud mehlel katingpomwail nanleng.”19 Kitail inennen kesempwaliki atail kin idawehn Ih sang “perenki” mehteikan idawehn kitail. Pihter kaweidki: ”Ahnsou koaros kaunopada en kihwei pasapeng [pwehki] koapwoaroapwoar me mihmi rehmw.”20 Kitail koasoaia Krais.
Pwuhk en Mormon iei kadehde kehlail en Sises Krais. Kereniong doaropwe koaros loale kadehde Sounkomouro oh Sapwellime pwukoah sarawi.21 Wehwehki Sapwellime Tomw oh mahk me aude doaropwe ko. Nin duwen ah iang Kadehde Kapw, Pwuhk en Mormon sewese kitail en wehwehkihla mwahu kahrepen Sounkomouro ah ketido pwe en kapit kitailla oh ia mwomwen atail pahn kak kohdo Reh.
Ekei iengetail Souleng kan kin, ekei pak, peikasalki duwen dahme kitail kamehlele oh atail mwekid kan. Kitail en ahneki kaping rehrail oh ehukihpene atail pwoson Sises Krais oh pil ire kan me kitail kin pereniki nan Kadehde Kapw. Rahn akan me pahn kohdo, koaros me kamehlele Sises Krais pahn anahne minimin oh utuht en emen emen.22
Ni sampah ah katikitikla koasoaipen Sises Krais, kitail en kalaudehla atail koasoaia Ih. Ni ahnsou me mwomwen atail wia Sapwellime souleng kei ah pahn sansalda, tohto me mih limwatail pahn kaunopada pwe en rong. Ni atail pahn kin ehukihda uwen marain me kitail alehsang Ih, sapwllime marain oh manaman kohwalap pahn dakada pohn irail kan me inengieng en ritingada mohngiongarail kan. Sises mahsanih, “I … ketido [rasehng] marain ehu ong sampah.”23
Kalaudehla atail ineng en kosoia duen Krais
Ahi medewe ah pahn pwurehng ketido me kin keieu en kalaudehla ahi men koasoaia Krais. Mehnda me kitail sohte wewehki ahnsou dah me E pahn ketido, kasalepen Sapwellime Ketido pahn inennen kapwuriamwei! E pahn ket pohn depwek kan en nanleng ni mwohmw lapalap oh lingan iangahki Sapwellime tohnleng kan koaros. Kaidehkte ekei tohnleng kan, ahpw koaros Sapwellime tohnleng sarawi kan. Met kan kaidehn cherry-cheeked cherubim mahlen sang Raphael, me mih ni silikoun palentain kan. Met kan iei tohnleng en mahs kei, tohnleng kan me pekederdo pwe en ritingidi ewen laion kan,24 ritingada wenihmw en kalapwuhs kan,25 pakairki Sapwellime ipwidi,26 sewese kamaiauda Ih nan Kedsemeni,27 kansenamwahuwih tohnpadahk ko ahnsou me E ketidahla nanleng,28 oh pil ritingada lingan en kapwurupwurdohn rongamwahu.29
Ke kak medewe ni ansou me ke pahn tuheng ih, itar ma paliet de palio peilo?30 Iei Sapwelime inou ong me pwung kan. Mwekid wet pahn tengeteng nan atail mour kohkohlahte.
Ia uwen atail kapingki ong atail soukohp kempoake, Presiden Russell M. Nelson, me pwekada atail ineng en poakohng Sounkomouro oh kalohki Sapwellime lapalap. I wia emen sounkadehdepen sapwelimen Kauno doadoahk reh oh kisakis en kokohp me kin kaluhwa ih. Presiden Nelson, se awiawi ahmw kaweid.
Koampoakepahi kan nan sampah, kitail kosoia duen Krais, medemedewe Sapwellimen Sounkomouro inou kaselel:“Pwe mehmen … me pahn kadehdeie mwohn emen aramas, I pahn pil kadehde ih … rehn Semei Nanleng.”31 I ese me iei ih me Iehros en Koht. Ni mwaren Sises Krais, amen.