Rapahki Krais nan Mehkoaros
Pepeiong kasongosong kin anahne pwerisek oh pwoson erein mour. Ahpw menlau ese me Kauno kin ansou koaros onopehng en sewesei kitail.
Nan ah koul en kaping, Sounkoulo kalohkihda:
“Maing Kaun, komw ketin rapahkiniehier, oh diar ie.
“Komw ketin mwahngi ahi wie mwomwohd oh ahi keskesihker, komw ketin mwangi ahi tungoal lamalam sang wasa doh.
“Komw ketin kakainene elei oh ahi wendi, oh ketin mwahngi ahi tungoal mehkoaros.”1
Nan soai en karasaras wet, Sounkoulo kapinga manaman kan en Sises Krais pwehki Ah ketin mwahngi mehkoaros nan atail mour kan.2 Nin duwen Ah ketin mwahngi mehkoaros me kitail anahne nan atail mour kan Sounkomouro luke kitail en rapahki Ih nan atail lamalam koaros oh idawehn Ih ki atail mohngiong unsek.3 Met kihong kitail inouo me kitail kak alu nan Sapwellime marain me Sapwellime kaweid kin perehsang manaman en rotorot nan atail mour.4
Raprapahki Krais nan lamalam koaros oh ideidawehn Ih ki atail mohngiong unsek anahne kitail en kauwalahng Ih atail madmadau oh ineng kan.5 Pwuhk sarawi kosoia me wekdekla wet iei en “kesihnenda teng rehn Kauno.”6 Met wehwehki me kitail pahn ansou koaros momourki rongamwahu en Sises Krais oh nsenohki wia me mwahu rahn koaros.7 Ihte ansou me kitail kak ale “meleilei en Koht, me kin powehdi mehkoaros” oh pil pahn “kadire [atail] mohngiong oh madmadau kan ki” Sises Krais.”8 Pein Sounkomouro mahsanihong Mwomwohdisou nan Pepuweri en 1831 [kid welipwiki silihsek ehu], “Nekidala mepwukat nan amwail mohngiong kan, oh nekidala ire kesempwal poatopot kan nan amwail madmadau kan.”9
Mendahte atail kin poden raprapahki Kauno, lamalam suwed kan kak lellohng nan atial madmadau. Ansou me lamalam pwukat kin mweimweiong de pil lukehng en mihmi rehtail, irail kak wekidala ineng kan en atail mohngiong oh kahluwai kitail ong dahme kitail pahn wiahla nan mour wet oh kedekede ong dahme kitail pahn sohsohki kohkohlahte.10 Elder Neal A. Maxwell ehu ansouo kangoange padahk wet nda, “Ineng kan … pil kin kihda wah kan, iangahki kahrepen ‘dir me likiwerda, ahpw ekei te me pilipilda.’”11
Atail soukohp en mahs oh met kan kin poden katakatamankin kitail en kin pelian kasongosong pwe palingenitail en dehr luwetala oh pingida, salongala, oh mwarosala.
Ni songen mwohmwohte, lohdi pahn kasongosong duwehte ahmw weuwa ehu lepin mete kolahng ehu makined. Manaman rir en makinedo kin waikodo oh koledi teng meteo. Manamano kin sohrala ansou me meteo kin pwildi wasa dohsang makinedo. Ihmekahrehda, nin duwen en makinedo eh sohte kak koledi lepin mete ehu me doh, ni atail kin powehdi kasongsong kan, irail kin sohrala oh sohla arail manaman ong atail madmadau oh mohngiong oh, ni imwio, atail wiewia kan.
Karasaras wet katamanehng ie ehu irair me emen tohn Mwomwohdiso ehukihong ie ansou kis samwalahr. Liho ndahieng ie me ni eh pirida ehu ni mensengo, lamalam kelingeringer ehu me e sohte pak ehu medewe mahs pa pwarada nan ah madmadau. Tetehn lamalamo kalusada ih, liho mwadangete pelianda lamalamo oh ndahiong pein ih oh lamalamo “Soh!” oh kaweliankihda ki mehkoat mwahu pwehn wekid ah madmadau sang lamalam likamwo. Liho ndahiongie me ni eh doadoahngki ah saledek en pilipil nan mour pwung, lamalam sapwungo mwadangete sohrala.
Ansou me Moroni eker irail kan me sohte kamehlele Krais en koluhla, e kaparkin irail en kohdo rehn Sounkomouro ki arail mohngiong kan unsek, oh lakidasang rehrail me samin koaros. Palilahsang met, Moroni pil kaweidkin irail en peki Koht, ki koasondi kehlail, me irail en dehr lohdi pahn kasongsong.12 Doadoahngki padahk pwukat nan atail mour anahne mehkot laud sang kamehlelehte, anahne kitail en kin kapwurehdo atail madamadau kan oh mohngiong kan ong padahk pwukat, kaidehn kitail en esehte. Wekdekla wet anahne kitail en wihwia rahn koaros, patehng atail kin liki Sounkomouro, pwehki atail anahn kan en mour wet sohte kin pein sohrala. Pepeiong kasongosong kin anahne pwerisek oh pwoson erein mour. Ahpw menlau ese me Kauno ketin onopadahr en sewesei kitail nan atail doadoahk kan oh inoukidier kapai mwuladek kan ma kitail tengetengedi lel ni imwi.
Nan irair en ehu ansou apwal ni en Joseph Smith oh ienge me sensel kan nan Kalipwuhs en Liberty sohte ahneki saledek nan mehkoaros ihte arail lamalam kan, Kauno ketin sewesehkin irail kaweid oh inou ehu ong irail me pil doke kitail koaros:
Kapehdomwail kan en direki kadek ong ohl koaros [oh lih], oh tohn ihmw pwoson kan, oh dehr uhdi sang lamalam mwahu; pwe amwail liki Koht en kehlailla nan silangi; …
Ngehn Sarawi pahn kin ieiang kumwail ansou koaros, oh kumwail en momourki mour pwung oh mehlel.13
Ni atail wia met, lamalam mwahu kan pahn kadire atail madmadau ansou koaros oh ineng mwakelekel kan pahn kaweid kitail ong wiewia mwahu kan.
Moroni pil katamanki nah aramas akan en dehr dukiong arail ineng suwed kan. 14 Lepin lokaia lust wehwehki nahroke oh ineng suwedi mehkoat ni ngidingid.15 E kolokol songen lamalam rotorot de ineng suwed me kin kahrehiong aramas emen en medmedewe wiewia suwed de kepwehpweki dipwisoun sampa ahpw sohte kin wia me mwahu, kadek oh kolokol kosonned akan en Koht, kokohlahte. E kin kalap pwarada nan pepehm keieu samin kan en aramas. Wahnparon Paul kasalehda ekei soangen pepehm kan me raseng, “samin, medmedewe nenek, … kailok, … akatat, akamai,, … luwak,, … oh soangen ire pwuko.”16 Me patehng song suwed koaros me pid ineng suwed, kitail sohte kak manokehla me tepelo kin wiahki ah dipwisoun mahwin rir ong kitail ni eh kin song kitail en wiahda me sapwung.
Riei ohl oh lih akan, I kadehde me ni atail kin koapworopworiki takai en komouro, Sounkomouro patail kan, oh idawehn en Moroni kaweid, atail kak en apwali atail lamalam kan pahn kehlailla mehlel. I kak kamehlelehiong kumwail me pali ngenitail pahn mwadang keirda kehlail, wekid atail mohngiong kan, kahrehiong kitail en duwehla Sises Krais. Pil patehng, manaman en Ngehn Sarawi pahn pil kehlailla oh wie poatopot nan atail mour. En tepelo kasongosong kan, ekis ni ekis, pahn luwetala, kitail eri ahnekihla mour peren oh pwung ehu,
Ong kumwail kan, ni soangen kahrepe da, me pwupwidi pahn kasongosong oh wiewia tiahk suwed kan, I kamehlelehiong kumwail me kumwail kak pwuredo, me mie koapworopwor rehn Krais. Sounpar kei samwalahr, I ahneki ansou mwahu pwehn pwarek emen tohn Mwomwohdiso en Sises Krais me ahndekihdi ansou apwal ehu nan ah mour mwurin eh wiadahr dihp toutou ehu. Ni ahi tepin kilang ohlo, I kak kilang ah mesen nsensuwed, patehng ehu marain en koapworopwor pohn mese kan. Mwomwen ohlo kasalehda ehu mohngiong karakarahk oh koluhla. Ohlo wia Souleng kehlail men oh alehier kapai laud sang Kauno. Ahpw, e mweidehngehr lamalam suwed ehu en powehdi ah madmadau, me uhd kahrehdo pil ekei. Ni ah mweidehng lamalam pwukat en lalaudla reh, sohte pwand re tengalahr nan ah madmadau oh tepda keirda nan ah mohngiong. Ohlo kedekede wiahda ineng suwed kan, me kahrehiong eh wiahda koasondi kei me uhwong mehkoaros me e keieu kesempwaliki nan ah mour. Ohlo ndahiongie me ma e sohte medmedwe lamalam likamwko ni tapio, e sohte pahn dukiong oh pwupwidi pahn kasongosong kan en tepelo—kasongosong kan me kahrehdo kansensuwed laud nan ah mour, erein ansou reirei.
Paiamwahu, me duwehte pwutak me alehier ah sohsou nan rongamwahu en Luk, ohlo kasawiada pein ih oh pwourda sang ah ouraman suwedo.17 Ohlo kalipwelipwa ah liki Kauno oh koluhla mehlel oh inangiada en pwurala rehn Kauno, Ni rahno kiht koaros kehn en Sounkomouro limpoak en komour ong kiht. Ni imwin at tepin tuhpeneo, kiht koaros direkihla peren , oh lel rahn wet, I tamatamante uwen peren me sansal pohn mesen ohlo ni ansou me e mwesel sang nan ahi ohpiso.
Kempoakepai kan, ni atail kin powehdi kasongosong tikitik kan, me kin lel nan atail mour ni soh kasikpe, kitail pahn kakehr powehdi kasongosong laud kan. Ihme Presiden Spencer W. Kimball mahsani: “Aramas sohte kin kalap pwupwidi pahn kasongsong laud kan ma irail sohte kin tepin pwupwidi pahn kasongsong tikitik kan, me kin elehda me laud kan. … ‘Mohs mwakelekel ehu [sohte kin] wiahkintehiou dipwidipwla.’”18
Ni ah ketin kaukaunop en kapwaiada Sapwellime doadoahk sarawi pohn sampa, Sounkomour Sises Krais kangoange kesempwal en poden pelian mehkoaros me pahn kauhkitaildi sang alehdi atail pwukoa poatopoto. Mwurin kasongosong kei me sohte pweida sang tepelo, ni eh songosong en kawet sang Sapwellime pwukoahu, Sounkomouro ketin mahsaniong ih: “Kohkohwei sang me, Sehdan. … Tepelo eri kohkohlasang ih, oh kilang, tonleng kan kohdo oh pwongi ih.19
Kumwail kak medewe, riei pwutangko oh serepeinko, dahme pahn wiawi ma kitail kak ale kehl oh eimah sang Sounkomouro oh nda, “Soh” oh “Kohkohla sang me” ong lamalam likamw kan me kin ekei ansou lelong nan atail madmadau kan? Dahme pahn wiawihong ineng kan en atail mohngiong kan? Ia mwomwen atail mwekid kan eh pahn kakerenih kitail lahng Sounkomouro oh mweidehng manaman en Ngehn Sarawi en doudoula nan atail mour kan? I ese me ni atail wia mwo, kitail pahn kasorehla kahpwal tohto oh wiewia dipan akan me kak kahrehda kahpwal nan peneinei oh sawehwe, pepehm suwed kan oh liaktohrohr, pwung sapahrek oh kamwahl, tengala nan wiewia suwed kan, oh sohte lipilipil ire me uhwong kosonned akan en Kauno.
Nan poadoapoad en ah kapahreko oh kapahrek kaselel en Epreil en pahr wet, Presiden Russell M. Nelson, wiahdahr inou ehu me koaros me men “rong Ih”—rong Sises Krais—oh peikiong Sapwellime kosonned akan “pahn kapaikihda manaman en apwalih kasongosong, kahpwal kan, oh luwet kan” oh atail kak en pehm peren pahn laudla, mehlel nan ansou me kahpwal wie lalaudla.20
I kadehde iong kumwail me inou kan me kohda sang atail soukohpo iei inou kante me wiawi sang Pein Sounkomouro. I luke kitail koaros en “rong Ih” nan lamalam koaros oh idawehn Ih ki atail mohngiong unsek pwehn kak ale kehl oh eimahn nda “Soh” oh “Kohkohwei sang me” ong mehkoaros me pahn kahrehiong kapahtou nan atail mour kan. Ma kitail wia met, I inoukihong kumwail me Kauno pahn kadaredo Sapwellime Ngehn Sarawi en kakehlaka oh kamwait kitail, oh kitail kak wiahla sapwellimen Kauno aramas kei.21
I wia ahi kadehde me Sises Krais ieias oh pwehki Ih, kitail kak powehdi manaman en tepelo oh warehng momourki mour poatopot rehn Kauno oh pil rehn Samatail kempoakeo Nanlahng. I kadehde ki me mehlel pwukat ki ahi limpoak ong kumwail oh pil ong Sounkomour lingano, ni mware me I kihong kaping lingan, oh wahu soutuk. I koskosoia mepwukat ni mwaren Sises Krais me sarawi, amen.