Miehier Pilawa
Ni atail pahn rapahki en kak onopada ni paliwar, kitail kak powehdi kahpwal nan en mour wet ki eima laud.
Sang ni kosoned akan me pid duen soilok pwehki soumwahu doau wet, i pwurpwurala nimweio sang ni seilok la liki iei, sang ni karapen kileledi kan, kareiengehr ahi pahn pil komoldi Rahn sarawi. Mie ahi ansou en iang towehda kamadipw sarawi nan pwungen nei awa en seiloak kan, wasa I sawaski ire kesempwal iou. Mwurin tuhpenehu, emen dihken kohdo rei oh peidek rei ma i ese Preseden Nelson oh ma mie pak ehu I itipehieng. I sapengki ih me I ese, I itipehieng ehr oh pil, pwehki I wia towen Pisoprik mie ahi ansou en tuheng Presiden Nelson oh nah sounsawas kan pak kei nan ehu ehu wihk.
Eri dihken pwulopwulo eri mwohdedi pohn sehro, kihdahla pehko nan wehwe, oh kosoia, “Rahn wet wia rahn kesempwal ehu nan ahi mour!” Riei ko, I sohte pahn kak kihda pehika nan woawoa oh weriki, apw i udahn kalahnganki soukohp oh kaweid kan me kitail kin alesang rehn soukohp kan, ohl sarawi oh sounkihda kaweid, mehlel nan rahn apwal pwukat.
Sang ni tepin ansou, Koht ketin kaunopada ahl pwe en sewese Sapwelime aramas akan kaunopada ni pali ngehn oh pil ni paliwar, pwe ren kak uong kahpwal kan me e ketin eseier me pahn kohdo nan mour wet. Kahpwal kat kak en ong emente de koruhsie, ahpw Kaweid kan sang rehn Koht pahn doarehla oh sewese katelapehla dahngehkan me kitail kin ese, oh kapwaiada, sapwellime kaweid kan. Iren karasaras mwahu me pil koieng kitail sang nan pwuhk en Senesis, wasa kitail esehla duen Sosep nan Isip oh ah marain en kak kawehwehda an Paro ah ouraman.
“Oh Sosep masanieng Paro, … Koht kasalehieng Paro dahme e pahn ketin wia. …
“Kilang, nan erein sounpar isuh Isip pahn ahniki rahk:
“Oh mwuri kahpwal laud pahn wiawi erein sounpar isuh; oh rahk wet pahn manoknokla nan sapwen Isip.” 1
Paroh rong Sosep oh kapwaiada dahme koht ketin kasalehieng nan ah ouramano oh ni ansouohte tepda kounopada ong dahme pahn wiawi. Iren pwuhk sarawi kan ahpw kilelehdi:
“Oh nan erein sounpar isuh en rahk pweida laud wia nan sahpwo.
“Oh E kaunopada menge nan erein sounpar isuho. …
“Oh Sosep kihpene kohn kan duehte pihk en nan sehd, … lauh sohla kak wadawad; pwehki e sohla kak wadek.” 2
Ni ansou me sounpar isuh en pai nek, kitail pil karonge me pil “sounpar isuh en kahpwal pil leledo, duehte dahme Joseph kosoiahda: oh kapwal wet kapelpene nan sahpwo pwon;apw nan sapwen Isip koros mie pilawa.” 3
Rahnwet, kitail ahniki kapai en ale kaweid sang soukohp me ese dahme kitail kin anahne pwe en kaunop kitailda ong kahpwal kan “me pahn kohdo” 4 koaros nan mour wet oh mour en pali ngehn, oh pil ese idih oh kapwal kan me kitail kak lelong ni atail kin nantieng idawehn sapwelimerail kaweid.
E inene wehwe me kahpwal pen COVID-19, pil duehte ohla laud me kin wiawi nan sampah, me sohte kin wauneki aramas, aramas sohte lipilipil, kousapw oh ehu ehu mwomwohdiso nan sampah. Doadoahk sohla oh pweinen aramas pil katiktikla iangahki kakomoaldien doadoahk pil wiawi oh wiepen doadoahk pil apwalla pwehki soumwahu keper en corona-kahpwal pen soumwahu kan.
Ong koaros me iang lelong kahpwal, se ese oh kesempwaliki ire me kumwail mihmi loale, pwe ien kadehde ieng kumwail me kamwahupe kohkohdo. Kumwail paiki Pisop kan oh presiden en prans kan me kin rapahki oh sewese tohn mwomwohdiso kan nan arail wasa kan ni anahn oh me ahneki mweimwei ong dipwisou en doadoahk kan me pahn kak sawas oh kapwurehionguhk pohn ahl en utohrla ni amw pahn doadoahngki koasoandi kan koaros en kounopada.
Nan momour en rahnpwukat, nan soumwahu dou me kipehdier sampah pwon oh nan an emen emen ah mour, e sohte mwahu ong atail Sounkomouro en sohpeisang koaros arail me milahr nan kahpwal, oh peki rehrail and mwadangete oh nekidala mwenge oh mwohni. Ahpw, met e sohte wewehki me kitail anahne pohnsehse la mehlel en kounopada—ihte me mehlel kat pahn doadoahk ong “nan erepit oh soandi mwahu” 5 pwe kitail en kosoia, duwen Sosep nan Isip, “mie ier pilawa.” 6
Kauno sohte kasik kitail en wia laud sang uwen me kitail kak, Apw E ketin kasik kitail en wia uwen atail kak … ni ansou me kitail kak wia. Preseden Nelson kataman ong kitail nan tiepene lap en pahr teio, “Kauno kin ketin poakoang wiewia kan.” 7
Kaun en mwomwodiso kin kalapw kangongehki Souleng en Imwin Rahn akan “en kaunopada ong kapwal kan nan mour wet sang ni ah pahn mie menge oh pihl oh ekis money nan neirail seiping.” 8 Ni ansou ohte, kitail pil kaskuhlki kitail en “loaloakoang” oh sohte nohn daulihala” 9 nan atail doadoak en wiahda wasahn nekinek en menge oh wasahn kanai mohni. Mehn kaweid ehu kahdaniki Personal Finances for Self-Reliance, me wiawihda nan 2017 oh met mie nan website en Mwomwohdisoht ni soangen lokaia 36, me tepkihda kaweid ehu sang Presidensi Keieu, me mahsanih;
“Kauno kaweidkihier, ‘e wia Ahi pwukoah en apwalih nei souleng kan’ [Doctrine and Covenants 104:15]. Kaudiahl wet iei inou iou sang rehn Kauno me e pahn ketin ketkihdo kapai en nan mour wet oh ritingada wenihm en uh-tohr. …
“… Alehda oh momourki ire kesempwal kat pahn kieng uhk mour mwahu en kak alehdi kapai kan en mour wet me Kauno inou kiheng kitail.
Se lukehieng komwi en onopiki oh doadoahngki ire kesempwal kat oh padahkieng amw peneinei kan. Ni amw pahn wia met, amw mour pahn kapaida … [pwehki] … kowe serien Samatail Nanleng. E ketin poakoang komwi oh sohte pahn manokei komwihla. E ketin esei komwi oh onopadahr pwe en ketkieng komwi kapai en ” 10
Wiepe wet iangahki ire laud me ohngete wiepen wiahda koasoandi en mour mwahu, perehsang amw peneinei nan kahpwal, apwalih wen mwohni iou, oh nekidala ong mwuhr, oh e mweimweieng koaros nan nein Mwomwohdiso wepsaid de sang amwail kaun akan.
Ni atail kin medemedewe ire kesempwal en kaunopda, kitail kak kilang Sosep nan Isip pwe en kak kaweid kitail. Ese dahme pahn wiawi pahn sohte itar en kadoke irail ong nan pahr “apwal” ko ma sohte meirong nan ansouen pahr en nahko. Pwe ren kak kanaiehng dahme re wiahda, irairidi kan mie, oh pil utuht, pwe en kak itar ong arail anahn karuaru kan, oh pil arail anahn en mwuhr kan. E sohte itar en ese me mie rahn apwal kei pahn kohdo. Re anahne wia, oh pwehki sang arail doadoak, “mie pilawa.” 11
Met e kareieng peidek kesempwal iou: “Oh pil Dah?” Wasa keioun mwahu en tepida iei en wehwehki me song koros e wia mehkot kesempwal ong Kauno, “oh sohte pak ehu” me e ketkieng kitail kosoned ehu me sohte kesempwal.” 12 Soang koaros, ahpw, uhd ulahng Sises Krais, me wia pwoson en wasa kitail pahn koukouhda ie me pil sang kaunop pen mour wet.
Koahiek en kak kaunopda nan mour wet oh apwalih pein kitail wehwehki “kamehlele me sang lingan en Kauno, de kehl mehlel, en Sises Krais oh pein atail kak, kitail kak en ale anahn koaros en pali ngehn oh nan mour wet ong mour me kitail anahne ong pein kitail oh atail peneinei.” 13
Soahng teikan ong kekeirdahn pali ngehn ong kounopdahn mour wet iangahki: wiewia “ni marain oh keirekdi,” 14 me iangahki wiawihdahn wasahn nahk menge oh nekinekid, nan ansou kan, ong atail anahn kan oh seken kawawih “mehkot tikitik oh mengei” wiepeh kan, 15 iei kasalepen pwoson me Kauno pahn kalaudehla atail kin nantiheng wiewia mwahu.
Sang ni koasoandi mwahu, kitail kak en doadoangki songen ire kesempwal riau nan konop pen mour wet— apwa apwalih mohni kan oh nekinek en menge ni nihmw.
Kih en ire mehlel en kak apwalih mwohni kan iangahki pweinen meiroag en eisek kis ehu oh meiroag, kihsang oh keperki pweipwand, ni ansou koaros, kaukaunop oh momouriki wen me kileledi, oh nekinekid ong mwuhr.
Kih en nihmwen nekinek kan kin iangahki nekinek pen mwenge; nekinek pen pihl, me kak; pil iangahki anahn teikan, me pahn rasohng en emen emen oh peneinei anahn kan koaros pwehki “wasahn nekinek keioun mwahu” 16 iei nan imwatail, me wiahla wasa “keioun kak en kounopda nan ansoun anahn kan.” 17
Ni atail alehda padahk kapehm kan oh rapahki kamarain sang Kauno, kitail pahn esehda kupwuren Kauno ohng kitail, nin duwen emenemen oh peneinei kan, oh ia mwomwen atail pahn doadoahngki padahk kesempwal kan pwehn kaukaunop. Me keioun kesempwal iei tepda.
Elder David A. Bednar padahngki kawehid wet ni ah masanih: “Wiwia kin kalaudehla pwoson. … Pwoson mehlel iei e poahsoandahsang rehn Kauno oh ansou koaros e kin kaweid kin kitail en wia me pwung.” 18
Rieiko, nan sampah apwal wet kitail anahne kounopieng dahme pahn kin kohdo kan. Mendahte atail ese me mwahu me kohkohdo, kitail ese me wahu oh kahpwal pahn doudoulahte. Ni atail rapahki pwe kitail en kak kaunopada, kitail kak udiahl mekid kan nan atail mour ni koapwoaroapwoar laud, pil meleilei nan atail mohngiong, oh,pil duehte Sosep nan Isip, kitail pahn kak kosoia, “Miehier Pilawa.” 19 Ni mwaren Sises Krais, ahmen.