Kenikenla Mehlel Rehn Kauno
Ansou en kahpwal kan oh saweweh sohte kin wekidala limen Kauno ni Ah kin ketin pereniki mahsanih kitail oh kapaikitailda.
Ehu rahn pahr samwalahrko, duen misineri pwulopwul kan me kin papah nan kisin branch tikitik pohn deke Amami Oshima, Japan, ngehi oh iengei misineri perenkihda ni aht esehda me Presiden Spencer W. Kimball pahn pwarek Ehsia oh koaros misineri oh toweh kan nan Sapan luhk ohng Tokyo pwehn karonge soukohp nan wasahn kapokon lap. Toweh kan en prans iangahki ngehi oh ahi kompahnien, wen aht peren se tepda wia pilahn ong kapokon lapo, awa [eisek-riau] 12 ong dake pwoht pwehn kotehla Palimese en Pilen Sehd en China kolahng Sapahn, patehng awa [eisek-limau] 15 iang tireihn kohla Tokyo. Se ahpw diarada mwuri, me se sohte pahn iang. Se alehdi pakair sang aht misin presiden me ngehi oh ahi kompahnien pahn sohte kak iang kapokon lap me pahn wiawi Tokyo pwehki wen doh oh awa me se pahn seiloangki.
Tohn kisin branch me se kin iango tapiada arail seiloak en kohla Tokyo, ah se mihmi. Mwurin rahnoko e mwomwen meleilei oh sohla mehkot. Se kelehpw wia kamadipw sarawi nan kisin ihmw sarawio, ni Souleng en Imwin Rahn-akan oh misineri kan en Sapahn arail iang kapokon lapo.
Ahi madamadau en sawehweh wie lalaudla itarete ahi perepereniki rongorong irail toweh kan me pwurasangehr kapokon lapo oh pakairiki me Presiden Kimball pakairkihda me ehu tehnpas sarawi pahn kokouda nan Tokyo. Irail koasoaikihwei peren laud ni arail ehukihda ouraman me irail kin ahniki ah pahn pweidahr. Irail kawehwehda mwomwe, sang ni arail rong pakair en tehnpas sarawio, irail toweh kan oh misinerih kan wen arail sohla kakehng arail peren, irail lopwolopwkihda pehrail.
Pahr tohtoie douwer powe, ahpw i tamatamante insensuwe mei ahniki ni ei sohte iang towehda mihting o.
Sounpwung kei I kin wie medemedewe kemwekid me I lelehngo, ni ahi kilangehr mesen mehteikan arail toutoukilahr arail sawehweh—me sansal sang ni soumwahu dou en COVID-19 me doupesengehr pohn sampah—met me laudsang mehlel dahme I lelehng ni ansou me I wia misineri pwulopwulo.
Ansou kis keren nan pahret, ni soumwahu dou wet ah laudpesengehr, Presidensi Keieu ahpw wiahda inou me, “Mwomwohdiso oh toweh kan pahn ahniki pwoson oh kasalehda atail inou en wiahda aramas en wehi mwahu oh mwahu ehng mehn impetail kan”1 oh pil “nantiheng doadoahk ni keneinei.”2 Oh, kitail pil esehier duwen komoaldihn kapokon kan en Mwomwohdiso nan sampah pwon, kopwurupwurpeseng en pali tohtohn misineri kan ong wasahn arail kousoan kan, oh ritidi en tehnpas sarawih kan en Mwomwohdisoh. Me ngeder kumwail me kaunopehng en pidolong nan tehnpas sarawi pwehn wia tiahk sarawih kan—patehng katengtengpeneh kan me kin wiawi nan tehnpas sarawi. Ekei kumwail amwail doadoahk en misineri mwadangete nek de kakomoaldihn lepin ahnsou oh pil ehu pilipiliong wasa me pahn papah ie.
Nan ereihn ansou wet, kopwermend oh kaun en skuhl kan kakomoalehdi skuhl—me elehda kesepwil kan sohte pweida rahn me pahn wiawi oh kamwadong kan ah kakomoaldi oh ekei kemwekid kan en skuhl oh kamwadong teikan. Me tohtoh kumwail kaunopehng kamwadong en kasansal kan oh akedei kan me sohte rongepe wiawi de ahnsou en kamwadong kan me kileldier sohte wiawi.
Pil mehlel me keieu kapahtou iei madamadau en peneinei kan me arail peneinei kan mehsang irail nan iraihr en ansou wet; palilaud sohte kak apwaliala mehla kan de ekei kapokon en kaloalamwahu kan me irail kin kasik.
Ni mwotomwot, me tohtohie kumwail me lelehngehr songen saweweh laud, insensued laud, oh kapahtou laud. Eri ia mwomwen atail pahn kak maiaudahsang, dadourete, oh wenlahte mwowe ansou me soahng pwukat pahn pwarada?
Soukohp Nephi tapiada nting nan kisin sleit tikitingko ni ah wialahr ohl mehlel men. E kin kilengla nan ah mour oh ah mour en papah, e ahpw ketkihda madamadau kesempwal ehu, me sansal nan keieu en ire tikitik nan Pwuhk en Mormon. Ire wet wia iren kaweid kesempwal ehu ohng kitail en medemedewe mwahu nan rahn pwukat. Sapwellime mahsen me dehdehiong kitail, “Ngehi, Nihpai, ipwidisangehr nohno oh pahpa mwahu … ,” e ahpw intingihdi, “oh I kilangehr kahpwal tohto nan ahi mour, ahpw, pwehki ahi kenikenla mehlel rehn Kauno rahn koaros.”3
Ni atail wia tohn skuhl kan en Pwuhk en Mormon, kitail wehwehki songen tohtohn kahpwal akan me Nihpai kin kosoia. Ahpw ni ansouohte me e kin kilang kahpwal akan me e ahniki nan ereihn ahnsou kau, Nihpai kin kasalehda ah madamadau en rongamwahu sang ni ah wia ohl keniken men rehn Kauno rahn koaros. Ansou en kahpwal kan oh saweweh sohte kin wekidala limen Kauno ni Ah kin ketin pereniki mahsanih kitail oh kapaikitailda.
Me keren i ahniki ansou mwahu en tuhwong misineri meh 600(wenepwiki) nan Australia, me pali tohtohn irail momourki kosonned laud en soumwahu COVID-19, oh me tohto kin wia arail doadoahk sang nan imwarail kan. Se patpene oh kosoiapene momour en irail akan nan Kadehde Kapw, Pwuhk en Mormon, oh Doctrine and Covenants me Kauno seweseirail en kak wia doadoahk lap irair en kahpwal laud kan. Kawewehpe koaros sansal sang ni dahme irail kak en wiahki Sapwellimen Kauno sawas sang ni dahme irail sohte kak wia nan iraihr en ahnsou me arail saledek kin iraihrdihsang oh mehkan me kin kauwuhdi arail saledek.
Kitail wadekehr duwen Paul oh Sailas, ni ansou ira mih nan imweteng, wie kapakap, kokoul, padapadahk, wie kadehdehki—oh pil pepdaisiala irail kalapwuhs kan.4
Oh pil duwen Paul, nan Rohm, ni ah selikihdi nan ihmw sounpar riau, nan iraihr ehu me e “kawekawehwehiong irail oh padapadahkihong irail duwen Wehin Koht,”5padapadahngki duwen mehkan me pid duwen Kaun Sises Krais.”6
Kitail pil wadekehr duwen Nihpai oh Lehi, neihn Helaman pwutangkan, me mwurin arail wiakaulahr oh selidiher Kauno ketin sileirailkihdiher ki Sapwellime kisin “ngihl tikitik … me unsek me saihr arail mour.”7
Kitail pil wadekehr duwen Alma oh Amulek nan Ammonihah, me diarada me tohto “kamehlele oh tepdahr koluhla, oh rapahki iren pwuhk sarawih kan,”8 itarete aramas akan arail lahlahwe irail oh sohte mwonge, nimpil, de likou kan, kolkoldi oh mihmi nan imweteng.9
Oh keimwsekla duwen Joseph Smith, eh wie lokolok nan Imweteng en Liberty, solahr sawasepe oh me Kauno ketin rukulahr oh me alehier inouo me, “Mepwukat koaros … wiawi ong mehkot me mwahu”10oh “Koht pahn ketin ketket rehmwi kohkohlahte.”11
Irail koaros wehwehki dahme Nephi esehier: me mendahte re kilangehr kahpwal tohto nan irair en arail ansou kan, re kenkenlahr mehlel rehn Kauno.
Kitail pil kak duwehte ni atail wia toweh men oh ni Mwomwohdiso ehu me kitail kenikenlahr rehn Kauno ni iraihr en ansou en kahpwal akan me kitail lelohngehr nan sounpwung kei samwalahro. Ni ai koasoaiahda karasaras pwukat, mweidohng irail en kakehlakahla amwail kadehde pwukoah doadoahk sarawi en atail soukohp ieias, me kaunop kitailda ong wekideklah kan mwohn soumwauh doar me sansal, me elehda atail kak powehdi kahpwal akan me pwarada.
Keiu, nantihong tehnpasatail en wia poahsoanpe oh mih ni utuht en Mwomwohdiso.
Pahr riau samwalahro, Presiden Russell M. Nelson koasoiahier me: “Kitail ahnlahr medemedewe me mwomwohdiso iei mehkot me kin wiawi nan imwen kaudek kan, me utuhtpe kin sang ni dahme kin wiawi nimwatail kan. Kitail anahne wekid madmadau wet. Sarawi me kin wiawi nan ihmw, duhete dahme kin wiawi nan … Sarawi kan”12 Kesempwal kaudiahl en wekidekla wet! Kaskuhl en rongamwahu nan tehnpasatail kan wihwiawiher ki ritidihn lepin ahnsou en ihmw sarawih kan. Pil ni ansou me sampah tepida pwuralahng mahso oh kitail pwuralahng ni ihmw sarawih kan, kitail pahn men wie kolokolete atail wiewia en poahson en tehnpasatail kan ni onohnopkihte rongamwahuo oh kaskuhl me wiawihda nan iraihr en ereihn ansou me soumwahu doaro doupeseng pohn sampah.
Keriau en karasaras ong ni kenikenla mehlel rehn Kauno iei en wia pwukoahn papah ni ileile oh sarawi.
Nan pahr [riekd eisek-waluh] 2018, Presiden Nelson kapehse duwen pwukoahn papah eh wia ehu wekidekla “ni ahl ehu me kasalehda atail insonohki mehteikan.”13 Soumwahu doar mwadang en dou wet kapehse soangen ahnsou mwahu kei me kamwahuiala atail koahiek en papah. Sounpapah ohl oh lih akan, serepein pwulopwul oh pwutak pwulopwul kan, oh mehteikan me kihla arail sawas en mwet likin ihmw, wiahda mwonge, kadar padahk kan nan misihn en wai kan, oh tiahk sarawi en kamadipw sarawi en kapaiada me mie arail anahn akan. Mwomwohdisoht pil wia ah pwukoah doadoahk en papah mehteikan nan irair en soumwahu doar mwadang en dou wet ki lapalahn sawas en sawaskihda mwongeh kan, wasahn keiru ong me sohte wasahn arail kousoan, oh ong wasah kan me kin sewese me seiloakdoh kan oh ong ni koasoandi kan mehn sewesewese wasah kan koaros pohn sampah me ahniki kahpwal en duhpek. Riatail lih akan nan Pwihn Sawas en Lih oh arail peneinei iang patehng sawas en wiahda mehn kidmahs rar kei ong irail tohn doadoahk en imwen wini kan.
Keimwseklahn kapai me sansal me wiawi nan ansoun kahpwal laud iei popohl laud me kohsang momourki inou sarawi kan en nan tehnpas sarawi.
Met keieu mwahu ong kawehwehki soai ehu. Ni ansou me Sister Kaitlyn Palmer alehdi ah misin koahl nan Epreil, e udahn perenkihda mehlel ah pahn wia misineri men ahpw e sohte duwehte wen kesempwal en eh pahn kohla nan tehnpas sarawi pwehn ale ah endauwmend oh wiahda tiahk sarawih kan. Mwurinte ah koasonehdi rahn me e pahn wia ah endaumend, pakaihr kohda me tehnpas sarawi koaros pahn ritidihsang weipokon pwehki sang ni soumwau doar me doupesengehr pohn sampah. Mwurin alahldien pakaihr kapahtou wet, e ahpw esehda me e pahn iang patehng MTC tuhpeneh kan me pahn kin wiawi nan indernet sang ni ihmwehu. Itarete wen iren kapahtou pwukat, Kaitlyn nantihengete kolokol palingene en kehlail.
Nan ereihn sounpwung kau me wihwiawi, en Sister Palmer koapwoaroapwoar sohte uhdihsang ah pahn kohla ni tehnpas sarawio. Ah peneinei kaisihsol oh kapakap pwe tehnpas sarawih kan en kak ritida mwohn ah pahn mwesel. Kaitlyn kin kalapw tapiada ah nimenseng kan sang ni MTC nimwehu kosoia, “Ih rahnet me pahn wia rahn me manaman ehu pahn alahldi oh tehnpas sarawih kan pahn ritida?”
Ni Oahkos 10, Presidensi keieu pakairkihda me en Kaitlyn tehnpas sarawi pahn pwurehng langada ong tiahk sarawih kan ong me momour ni rahn me e pahn mweselahng nan ah misin nin duwen me koasoandi. E sohte pahn kak kohla nan tehnpas sarawi oh pil koanoahdi were sompihro. Sang ni kisin koapwoaroapwoar me kak pweida, ah peneinei ahpw alehdi presiden en tehnpas sarawi Michael Vellinga en kilang ma mie ehu ahl me pahn kak mie sang ni manaman en arail kapakap me irail kin wie kapakapki. Arail kaisihsol oh kapakap pasapengla!
Kuloak [riau] 2:00 nih sohrahn, awah kei mwohn eh pahn mwesel, Sister Palmer oh ah peneinei, me wie sengiseng, ahpw tuhweng presiden en tehnpas sarawi o me wie sinsirei ni eh nda, “Menseng mwahu, peneinei en Palmer. I kasamwoi kumwail ohng nan tehnpas sarawi et!” Ni ansou me ah endaumend nekier, irail ahpw mwekid karuaruhie pwehki mie peneinei ehu me pil awiawi ni wenihmwo. Irail mweselahng wasahn sohnpihr oh konoahdi were sohnpihr me e pahn iang kohla ni ah misino.
Tiahk sarawi kan en tehnpas sarawi me kitail sohte wia nan sounpwung kei samwalahrko mwomwen mwahu sang madamadau kan en tehnpas sarawi kan nan sampah me pahn tepdahr ritida ni wiepe kei.
Ni ai pahn kaimwsekala, menlau rong lepin mahsen akan en koangoang, ineng en pereniki, mahsen en kakehlail kan en Soukohp Joseph Smith. Emen sohte kak medewe me e intingihdi mahsen kat ni kahpwal oh kelekelehpw, irairdi oh sohte ahniki mweimwei nan Nauvoo, rukuruksang irail kan me raparapahki pwehn irehdi ni eh sohte mih ni pwungih.
“Met, dahme kitail rong sang ni rongamwahu me kitail alehier? Ngilen peren! Ngihl en kupwurperen sang nanleng; oh ngihl en me mehlel sang pohn sampah; rohng kaperen ong me melahr akan; ngihl en kaperen ong me momour oh me melahr akan; rohng kaperen en popohl soutik.
“… Kitail sou wenlahte mwowe ong ni kahrepe laud wet? Wenla mwowe oh kaidehn pwurala mwuri. Ahniki eimah … oh kohkohlahte, wonowei pwehn powehdi! Mweidehng amwail mohngiong kan en ahniki kaping oh peren laud. Mweidehng sampah en kokoul kohwei.”14
Riei souleng kau, I kamehlele me ehu rahn, emen emen kumwail pahn kilengla mwuri ohng ni kemwekid kan me sohla pweida oh insensued, kapahtou, oh sangatada me sang ni soumwahu doar ni amwail pahn kilang me e mihla pahn kapai kan oh kalaudehla pwoson oh kadehdeh kan. I kamehlel me nan mour wet, oh nan mour me pahn kohdo, amwail kahpwal akan, amwail Ammonihah, amwail Imweteng en Liberty, pahn kasarawihla ong ni kamwahupemw.15 I kapakapki me, kitail pahn duwehte Nephi me kak kilang kahpwal kan en nan atail mour oh pil ni ansou ohte ese me kitail kenkenlahr mehlel rehn Kauno.
I kaimwsengkihla ahi kadehde pen Sises Krais, me pil iangehr leleohng kahpwal kan, me kapatahieng aktikitik Tomw me E ketin wia.16 E ketin mwahngi atail insensuwed, medek, oh pahtau kan. Ih me atail Soundoar, oh Sounkomour, oh atail koapwoaroapwoar. I met me I kadehdehki ni mwaren sarawi en Sises Krais, ahmen.