I Kamehlele me mie Tohnleng Kei
Kauno mwahngih kahpwal kan me ke kin lelohng. E eseiuk, Poakehnguhk, oh i inoukihwei me E pahn kadaredo tohnleng pwehn seweseiuk.
Riei ohl oh lih akan, I ese me mie tohnleng, oh imen ehukihong kumwail mwomwen ahi mour ong irail. Ni ei pahn doula, i kasik oh kapakapki me kitail kak kehnda kesempwal en tohnleng kan nan atail mour.
Iet an Elder Jeffrey R. Holland’s kosoi sang nan Tiepene Lap me nekiero: “Ni ansou me kitail kin kosoia irail akan me kin wia Sapwelimen Kauno tohn doadoak, E kin ketin kataman kiheng kitail me kaidehn tohnleng koros kohdo sang elep peilo. Kitail kin iang ekei irail alu oh koasoaieng irail—sampah, met, rahn koaros. Ekei irail kin koukousoan limwahtail. Ni mehlelo pak tohto kitail sohte kin ahneki pepehm en karanih nanleng duwehte ansou me kitail kin kilang Sapwelimen Kauno kadek oh loaloapwoat en aramas mwahu oh mwakelekel duehte tohnleng me iei ihte lepin koasoai me kohdo nan atail mwahliel kan” (“The Ministry of Angels,” Liahona, Nov. 2008, 30).
Ih irail tohnleng kan en sampah mei men kosoia. Irail tohnleng kan me kin iaiang kitail rahn koaros nan atail mour wia soun ketemen mwahu ong kitail ki limpoak en Koht.
Tepin tohnleng mei men kosoia iei sister riemen me padahkihongie rongamwahu wet ansou me I wia mwahnakapw: iei Sister Vilma Molina oh Sister Ivonete Rivitti. Ngehi oh riei serepein tikitik iang patehng kemwekid en Mwomwohdiso ieu wasa me se tuheng tohnleng riemen wet. Isto leme me uwen kisin kemwekido pahn kak wekidala ahi mour.
Ahi pahpah nohno oh riei teikan sohte men esehla duwen mwomwohdisoht ansouo. Irail pil sohte kak mweidohng misineri kan nan imwato, eri i ale padahk sang misineri kan nan Imwsarawio, Kisin perehu nan imwsarawio wiahla ahi “wasa sarawi.”
Sounpwong ehu mwurin tohnleng pwukat ara padahkihongie rongamwahuet, i pepdaisla. Ansouo i sounpar 16. Paisuwed, pwe sohte kilelen rahn kesempwalo rehi, ahpw mie kilelen ngehi riei serepeino rahn en kemwekid en mwomwohdisohu. Mwein i anahne kawehwehda isinge me mih nan kilele. Ngehi me keieu reirei me mih pali koahiek.
Ni ahmw pahn medewe, udahn awpal en kak kehkehlail nan rongamwahu wet pwehki ahi pwulopwul oh ahi mour ahpwte wekila patehng ahi peneinei sohte iang kekeid nan ahl mei keid loalehu.
Ni ahi kin songosong kaiahn ong ahi mour kapw, koasoandi kapw, kempoakepahi kapw kan, i pehm mei kelkelehpw. I kin kehn mei kelkelehpw oh kin kalapw kehn kaluet ansou tohto. I ese me mwomwohdisoht mehlel, ahpw i ahneki ansou apwal en kehn mei wia kiseh. Nan erein ansou kansensuwed oh apwal ko ni ahi kin songosong en ahnla ahi pelien lamalamo, i ahneki pepehm kehlail en iang towehda kapokon en me pwulopwul ehu me wereiki rahn siluh pwe i medewe mei pahn kak esehla oh kempoakepahn tohtohla. Ansouo mei tuhong emen tohnleng, me adaniki Mônica Brandão.
Serepeino kapw nan wasahu, pwe e ahpwte kohsang ekis wasa nan Brazil. I mwadangete tehkada oh, i paiamwahu, pwe e wiahla kempoakepahi. I nda me e kilangie sang masloaleie ahpw kaidehn masliki.
Pwehki ah wiahla kempaokepahi, i pil esehla kempoakepah kan, oh irail pil wiahla kempaokepahi sang ni aht kin patehng kemwekid tohtoh me wiawi ansou kei mwurin rahno. Kemwekid pwukoah udahn sawas laud ong ahi kin nanantihong en ahnla ahi mour kapwo.
Kempoakepahi pwukat udahn wekidala soahng tohto nan ahi mour, ahpw pwehki sohte utuht en rongamwahuo sang rehn ahi peneinei kahrehda ahi mour en weliakapw pil apwal. Ahi kin patehng kemwekid kan nan Mwomwohdiso udahn seweseie nan ahi kekeirda. Eri pil mie tohnleng riemen me pil pekederdo sang rehn Kauno pwe en sawas.
Emen ira iei Leda Vettori, me wia ahi sounpadahk-en Seminary nimenseng kan. Pwehki ah limpoak oh kasukuhl mwahu, e kihongie mehn kakehlail en “mahsen mwahu en Koht” (Moroni 6:4), me udahn i anahne nan rahn ehu pwon. Met seweseie pwe ien kak ahneki kehl ni pali ngehn oh nantihla mwowe.
Emen tohnleng me pil pekederdo pwehn seweseie iei Presiden en Pwutak pwulopwul kan, Marco Antônio Fusco. E pil poahngokiong en wia ahi kompanion en kin pwarek souleng kan. Mendahte ahi soakoahiek oh mwomwei ehusoahng, e kin kihongie ien padahk nan aht pwihn en Priest oh ansou me se kin pwarek ekei. E kihongie en mwekid oh esehla ahpw kaidehn en kin mwomwohd oh wia sohn kilkilang. I koapwoaroapwoarkinie laudsang ahi koapwoaroapwoarki pein ngehi.
Kalahngan ong koaros tohnleng pwukat pil iangahki mehteikan mei pil esehsang nan ansou apwal ko, ihme kahrehda ahi alehdi kehl en pali ngehn oh kak wenla nan ahl en inou lau ngehi alehdi pein ahi kedehdehpen me mehlelo.
Oh i men kataman, serepein pwulopwulo, Mônica? Mwurin aht wia aht misin, e wiahla ahi pwoud.
I kak inda me kempaokepahi ko, pwukoahn, oh kasukuhl mwahu en mahsen mwahu en Koht kan wia kisehn kemwekido ahpw kaidehn sapwungala ieu. Presiden Gordon B. Hinckley padahngki: “E sto mengei en mwekid mwadang nan irair en towehla Mwomwohdisoht. E wehwehki en kesehla dahme mering. E wehwehki kohkohsang kempoakepahmw kan. E pil kak wehwehki en pwilikihdi ahmw kamehlele kesempwal kan. E pil kak wehwehki wekideklahn mwekid oh oh pil dahme ke kin alehda ong paliweromw. Pak tohto e kak wehwehki sangat oh pil lemwiki dahme sohte sansal de wehwehpe. Udahn mie anahnepen kaiahn oh kakehlail ong ansou apwal pwukat ong mour en weliakapw” (“There Must Be Messengers,” Ensign, Oaktohpe 1987, 5).
E doula mwuri oh mahsanih, “Koaros irail anahne soahng siluh: kempoakepah, pwukoah, oh kaiahn en esehla ‘mahsen en Koht’” (“Converts and Young Men,” Ensign, Mei 1997, 47).
Dahme kahrehda ahi ehukihong kumwail ire pwukat?
Keieu, e wia kaweid ehu ong irail akan me mihmi nan soangen irair wet ansouet. Mwein ke wia towe kapw men, de pil ahpwte pwurodo mwurin ahmw kohkohseli erein ansou kis, de ke pil ahneki kahpwal en duwehte mehteikan. Menlau menlau, dehr uhdihsang ahmw nantihong en wia kiisehn peneinei laud wet. Met iei Mwomwohdiso mehlel en Sises Krais.
Ansou me kahn kin medewe ahmw peren oh komourla, udahn e konehng en ansou koaros song ahmw kak. E konehng en koadoahkih oh wekidala ahmw mour oh ahmw wiewia. Kauno mwahngih kahpwal kan me ke kin lelohng. E eseiuk, Poakehnguhk, oh i inoukihwei me E pahn kadaredo tohnleng pwehn seweseiuk.
Ni Sapwelime mahsen sounkomouro mahsanih: “I pahn Kohla Mwohmwail. I pahn ket ni amw palimaun oh ni palimeing, oh Ngehni pahn ket nan [mohngiongimwail], oh nei tohnleng kan pahn kapil kumwailpene, pwehn pwekkumwailda” (Doctrine and Covenants 84:88).
Keriapak en kahrepen ahi kaweid en rahnwet iei en kaweid kitail tohn Mwomwohdiso koaros—kitail koaros. Kitail anahne tamataman me e sohte mengei ong me kapw kan, me pwurodo kan, oh iangahki irail akan me arail mour weksang atail en mwadangete soandi. Kauno mwahngih arail kahpwal kan, oh E ketin raparapahki tohnleng kan me men sawas. Kauno kin ansou koaros raparapahki me men tohnmetei oh wia tohnleng kei ong mehteikan.
Riei ko, kumwail kak wia soun doadoahk kei sang limen Kauno? Kumwail kak iang wia emen tohnleng pwukat? En wia emen weliepe men sang rehn Koht, pohn sampah, ong emen me E ketin kin loaloale? E anahnei kumwail. Irail anahnei kumwail!!
Ei, kitail kak ansou koaros kehlki neitail misineri kan. Irail kin ansou koaros ketket mwo, oh me kin tepin ale pwukoah en duen tohnleng wet. Ahpw irail sohte itar.
Ma kumwail pahn kilengseli mwahu, kumwail pahn diarada me tohto me anahne sawas en tohnleng. Irail pwukat mwein sohte pahn likawih seht pwetepwet, likouli, de kapwatin rahn sarawi. Irail kak mwomwohd kelehpw, ni kapin nan ihmw sarawi kan de nan pere kan, ekei pak kin ahneki pepehm en me irail sohte sansal. Mwein arail wiemoang ehusoahng de arail koasoai ehusoahng, ahpw irail mihmi mwo oh irail nanantihong.
Ekei wie medemedewe, “I anahnehte patpatehng? I anahnehte songosong? Ekei kin medemedewe ma ehu rahn irail pahn kehn me irail alahlda oh mie me poakohng irail. Tohnleng kan mie anahne perail,nan ansouet,tohnleng kan me men mweselsang nan arail wasahn komol mwahu kan pwe en kamwahuih irail;“[aramas me] udahn mwahu oh mwakelekel duehte tohnleng ihte lwpin lokaia me kohdo nan atail mwahliel kan[pwe en kawehwe irail]” (Jeffrey R. Holland, “The Ministry of Angels,” 30).
Riei ko, i kamehlele me mie tohnleng! Kitail koaros mih met rahnwet, wia sounpei en tohnleng kei me pilipildahr imwin rahn pwukat, pwehn apwalih sewese mehteikan nin duwehn kadokepen limen Soun Kepikipiko. I inouki me ma kitail pahn kin men sawas, kauno pahn kihong kitail ahl tohto pwehn wia tohnleng en papah kei. E mwahngih isime anahne sawas en tohnleng, oh E pahn ketikihong irail mwohtail. Kauno kin ketikihong irail akan me kin anahne sawas en tohnleng nan arail momour en ehu ehu rahn.
I kapingki mehlel tohnleng tohto kan me Kauno ketikihong ie nan ahi mour. Mie anahneparail. I kapingki mehlel Sapwelime Rongamwahu me kin sewesei kitail oh kihong kitail ansou mwahu en wiahla aramas mwahu kei.
Met wia rongamwahu en limpoak, oh rongamwahu en papah. I met me I kadehdehki ni mwaren Sises Krais, ahmen.