Alehda Dahme Pahn Kohdo kan ni Pwoson
Ansou me pahn kohdo e pahn inenen lingan ong irail akan me kounopadahr oh pil doudoulahte oh kaukaunop en wia sapwellimen Kauno dipwisou en doadoahk nin lime.
Pwohngpwong wet inenen kaselel mehlel. Riei peinakapw ko koaros, I inenen pereniki ai patehng kumwail. I kin medemedewe kumwail sounpwong kei samwalahr o. Kumwail udahn kehlail sang meh welrar. Kaidehkinte kumwail kehlail sang nempe kei ahpw manaman en ngehno ohng sampah. I kilang kumwailehr sang nan ansou apwal wet.
Ekei kumwail kin diarada me kumwail kin raparapahki sohng tohto me mie anahnepe de pil doadoahk. Tohto me kin kaskuhlih seri kan oh kin tehk mehn impamwail kan. Ekei kin kasamwohdo misineri kan mwadang sang atail kin kasik o, ah ekei kin wiahkihla arail wasahn kousoan kan wasahn kasukuhl ih misineri. Kumwail kin doadoahngki mehn kepehse kan en ehuiong peneinei oh kempoakepah kan, papah irail kan me luwetalahr, oh onopki Come, Follow Me rehn mehteikan. Ke diaradahr ahl ekei en wiahda Rahn en Sapad en kaselel. Oh kumwail wiahda mehn perehla mese kan—meh rar kei.
Sang ni ngoang oh limpoak, I kiheng ahi limpoak ohng lih tohto nan sampah pwehki irail me mehsang irailehr. Se kin iang kumwail oh sengiseng. Se pil kin kapakapkin kumwail. Se kin kapingki oh kapakapki irailko me kin doadoahk laud en sewese roson mwahu en mehtei kan.
Kumwail serepein pwulopwul kan pil inenen kehlail. Mendahte nan mehn kapehse kan ah audaudki uhpene de sohte utuhtpene, pali laud en kumwail kin rapahki ahl akan me kin sewese oh koangoange meteikan oh pil ehukihwei marain en Kauno.
Riei lihoko, kumwail koaros inenen komwad! Ih inenen audaudkihda amwail kehlail oh amwail pwoson. Kumwail kasalehda met nan ansou apwal akan, kumwail kin ahneki komwad oh wenla mwowe. Ih poakehng kumwail, oh ih men kumwail en wehwehki me Kauno pil poakohng kumwail oh e mwahngih doadoahk laud me kumwail wiewia. Kalahngan en kumwail! Pwehn pwurehng, kumwail kasalehda me kumwail me wia koapwoaroapwoar en Isrehl.
Kumwail me wia karasaras en koapwoaroapwoar me President Gordon B. Hinckley wiahda ong kumwail ni ah kawehweda “Peneinei: Kalohk Ehu ong Sampah,” sounpar 25 kei samwalahro nan Septempe nan Tiepene Lap en Pwihn en Lih. 1 E inenen kesempwal ni ah pilada oh kawehwehda kalohk kesempwal wet ong riei lih akan en Mwomwohdiso. Sang ni met, Presiden Hinckley kalipwilipwiedi mwohmw kesempwal ehu me sohte kak welialihda ong lih akan nan sapwelimen Kauno pilahn.
Met, I men ese dahme kumwail koledi nan pahr et. Kumwail karanihla Kauno, de kumwail dohlasang Kauno? Oh ia mwomwen ansou wet ah kak kahrehda kumwail en kak pehm nan ansou kohkohdoh kan?
Ni mehlel, Kauno mahsaniher nan atail mwehiet ohng nan ansou apwal wet. E keper kin kitail nan atail ansou wet “mongiong en aramas kan [pahn luwetala]” 2 oh pil irail akan me pilipilda pahn pil mih nan irair keper en lohdi. 3 E padahkihongehr Soukohp Joseph Smith me “meleilei [pahn] kohsang sampah” 4 oh mwekid sakanakan kan pahn kohdiong pohn aramas. 5
Ahpw met Kauno kihong kitail kokohp ehu ong ia mwomwen kaselel en nan mwehi wet. E padahkihong Soukohp Joseph Smith me “doadoahk … en imwin rahn akan, pahn inenen laud mehlel. … Sohte lingan kak pahrekiong ah lingan, oh wahu me pohnangin mehkoaros.” 6
Met, lapalappahn kaidehn mahsen me ke pahn kak kosoia pwe en kak kawehwe sounpwong kei me samwalahro! Ia mwomwen atail pahn kak doadoahk ong kokohp kapahtou kan oh lingan en kalohk me pidada nan rahn wet? Kauno padahkiong kitail ia mwomwe ni mengei, ahpw lingan, oh pepehm mwahu: “Ma kumwail kaunopadahier kumwail sohte pahn masak.” 7
Ia wen kaselel en inou wet! E wia ehu mehkot me kak mwadangete wekidala mwomwen atail pahn kilang dahme kitail kokolahng. I rong lih emen me apwtehn wia ah kadehde laud me pidada duwen soumwahu dou wet, kapatahiong rerrer en sahpw nan Salt Lake Valley, ah sewese ien diarada me e saikinte kounopada ni mwomwen me e medewe me e kaunopadahier. Ansou me ih idek reh ma e sou kosokosoia ah wasahn nahk mwenge de ah kadehde, e sirei oh kosoia, “Ei!”
Ma kaunopada me pahn wia atail kih en alehda mwehi et oh dahme pahn kohdo mwowe kan ni pwoson, ia mwomwen atail pahn kak kaunopada mwahu?
Nan ansou tohto, Sapwelimen Kauno soukohp akan kin padahkiong kitail en nahk pene mwenge, pihl, oh palien sens pwe en kak doadoahk ong kitail nan ansou me kitail pahn anahne. Soumwahu dou wet wia kakehlepen marain en kaweidet. Ih kangoangehkin kumwail en ale ehu kahk en kaunopada. Ahpw ih pil kin inenen medemedewe duwen kaunopdahn pali ngehn oh paliwar akan.
Nan irair wet, kitail kak kasukuhl sang Captain Moroni. Ni ah kaunda sounpei en Nihpahi kan, e sohpai imwintihti kan me inenen kehlail, me inenen tohto, oh pil lemei. Eri, Moroni kounopada nah aramas kan nan pali kesempwal siluh.
Keieu, e sewese irail en kawada wasa kan me pahn kak doareiraila—“wasa kan me pahn mie silepe” ih eden wasa ko. 8 Keriau, e kounopada“ nan madamadau en aramas akan en pwoson Kauno.” 9 Oh kesiluh, e sohte tokedihsang kaukaunopada nah aramas akan—ni paliwar de palingehn. 10 Kitail koaros medewe iren madamadau siluh wet.
Keieun Ire Mehlel: Wiahda Wasahn Kousoan me pahn mie Silepe de Perehre.
Moroni perehkihda kahnihmw koaros en mehn Nihpahi kanki kehl takai kan, wasahn iroir kan, oh dihd kehlail kei. 11 Ansou me meh Leimen kan kodohr pwe en mahwin ong irail, irail “inenen pwuriamweila kohwalap, pwehki sang ni koahiek en mehn Nihpahi ko ong kounopadahn arail wasa kan ong perehsang mahwin.” 12
Pil duwehte, ansou me sawehwe laud kapel kitailpene,kitail anahne wiahda wasahn perehre mwahu ohng kitail ni paliwar oh palingehn. Ni ansou me amw wasahn kousoan pahn wiahla wasahn nahk pwoson—wasa me Ngehno kin ketiket ie—amw wasahn kousoan wiahla keieu en ire ong perehre.
Duwehte, sdeik en Zion wia “mehn perehre sang melimel” 13 pwehki irail ko me kin katanga iei ihr ko me kin kolokol kih en prihsduhd oh kin doadoahngki arail manaman oh mweimwei. Ni amwail pahn nantihongete oh idahwen kaweid kan en irail akan me Kauno mweidohnger en kaweid kumwail, kumwail pahn ahneki pepehm en komourla.
Tehnpas Sarawi—tehnpas en Kauno— iei wasa ehu me perepe inenen wekisang wasa teikan. Wasao, kumwail riei lihoko kasarawikilahr manaman en prihsduhd sang ni inou sarawi kan en prihsduhd me ke kin wia. 14 Wasao, amwail peneinei kan katengetengedier poatoapoat. Pil nan pahr et, ni ansou en pidelong nan tehnpas sarawi ah pil limeidihdla, amwail tiahk sarawi kan pil kihong kumwail mweimwei ong sapwellimen Kauno manaman ni ansou me kumwail kin wauneki amwail inou kan ong Ih.
Ni pato mengei, wasahn perehre iei sohte lipilipil wasa ke kak kehn sapwellime Ngehn Sarawio oh kin idawehn Ih. 15 Ansou me Ngehn Sarawi ah pahn mih rehmw, ke pahn padahngki mehlel o, itarete ma ke lelohng ire kehlail ehu. Oh ke pahn kin medewe peidek mwahu kan duwen rongamwahu nan ansoun kokohp.
I luke kumwail, riei lih akan koaros, en wiahda amw wasahn kousoan wasahn perehre mwahu. Oh I pahn kapwurehiong ahi luhk ong kumwail en kalaudehla amwail wehwehki duwen manaman en prihsduhd oh kapai kan en tiahk sarawi kan en tehnpas sarawi. Ahneki wasa me perehre mwahu me ke pahn kak rukila ie pahn sewese iuk en alehda dahme pahn kohdo kan ni pwoson
Keriau en Ire Mehlel: Kaunopada Ahmw Madamadau pwehn Loaloapwoatieng Koht.
Se wiadahr ehu proahtek laud ohng mour oh wiepen Tehnpas Sarawi en Salt Lake.
Ekei peidengki duwen anahn en petehkpen sosohng en doadoahk wet. Ahpw, ni ansou me Wahu en Salt Lake lelehng magnitude 5.7 en rerrer ni tepin pahr et, tehnpas wereilahr wet mwekidada kahrehiong sowi en sansal takai en tohnleng Moroni eh pwupwudi! 16
Duwehte poahsoan en Tehnpas Sarawi en Salt Lake o me kehlail pwe en kak koledi soangen kahpwal tohto, ah poahsoan en palingenitail anahne pil kehlail. Eri, ansou me rerrer en sahpw laud pahn kamwakid atail mour kan, kitail pahn kak sohpai “tengetengedi oh sohte kak mwekid” pwehki atail pwoson. 17
Kauno padahkiong kitail mwomwen atail pahn kalaudehla atail pwoson sang ni raparapahki “kaskaskuhlki, pil sangete ni onopiki oh pil sang ni pwoson.” 18 Se kin kakelailih aht pwoson Sises Krais sang ni aht kin dadaur oh kolokol Sapwellime kosonned akan oh “ansou koaros tamataman ih.” 19 Doulahte, atail pwoson kin keirda ansou koaros ma kitail kin doadoahngki atail pwoson Ih. Ih met wewehn kaskaskuhlki sang pwoson.
Ni karasepe, ansou koaros me kitail kin ahneki pwoson pwehn peikiong sapwellimen Koht kosonned akan—lelohng ansou me soangen irair me kin kih kitaildi—de ansou kan me kitail kin soikala songen mwekid kan de mwohmw kan me kin kamadipwki kawehla-inou, kitail pil doadoahngki atail pwoson, me pil kin kalaudehla atail pwoson.
Doulahte, ke kak kalaudehla ahmw pwosonki soahng kei sang audaudkihda dahme mih nan Pwuhk en Mormon. Sohte ehu pwuhk kadehde duwen Sises Krais ni manaman oh sansal mwahu. Soukohp akan, kin alehdi kamarain sang Kauno, kilang atail mwehi oh idiada ire kesempwal oh mehlel kan me pahn sewese kitail palilaud. Pwuhk en Mormon iei atail mehn kaweid ohng ni imwin-rahno.
Mehlel, atail imwilahn perehre kohdo sang ni atail ehukipene paliwaratail kan ong Samatail Nanleng oh Sises Krais! Mour likin Koht kin audaudkihda masepwehk. Mour rehn Koht kin audaukihda meleilei. Met pwehki kapai kan en ngehno kin kohdo rehn koaros me kin pwoson. Alehdi pein amw kaudiahl iei ehu kisehn kapai laud ko.
Kauno inouki ma kitail pahn kin peki, kitail kak alehdi “kalapwa alehdi kaudiahl.” 20 Ih inoukihwei ma kumwail pahn kalaudehla amwail wasahn alehdi kaudiahl, Kauno pahn kapai kumwailda sang ni ah pahn kalaudehla kaweid en amwail mour oh iangahki kisakis kan en Ngehno.
Kesiluh en Ire Mehlel: Ieremen Uhdihsang Kaukaunop.
Itarete ma soahng koaros mwahu, Captain Moroni doulahte oh kaukaunop nah aramas akan. E sohte uhdi. E sohte soukautihla.
Kahpwal akan sohte pahn udihsang. Eri, kitail pahn sohte uhdisang kaukaunop! Uwen atail kin utohrala—ni ansou kis, nan loaletail, oh palingenitail—ih uwen atail pahn kakehng en sohpai songsongen Sehdan kan.
Riei lih akan koaros, kumwail ahneki koahiek en wiahda wasahn perehre ong kumwail oh irail akan me kumwail kin poakohng. Nantihlate mwowe, kumwail alehdier tiahk sarawi kan me pahn sewese kumwail en kawada pwoson rehn ekei aramas ni ngoang. 21 Ohkowesohte pahn uhdi. Kumwail pwurehng kasalehda nan pahr wet.
Menlau, wonoweite mwowe! Amwail komwad en perehda amwail wasahn kousoan akan oh kihdiong pwoson nan mohngiong en amwail peneinei kan pahn dolung pweine nan dih me pahn kohdo kan.
Riei lih akan, kitail ahneki soahng tohto en kilengwei mwowe oh kasikasik! Kauno kihdo komwi wasaht met pwehki E ese me ke ahneki kehlail en sohpai sawehwe kan en nan ansou en imwin rahn akan. E ese me kumwail pahn koledi Sapwellime doadoahk kesempwal wet oh nantihong pwe en kak pweida.
Ih sohte kosokosoia me rahn akan me pahn kohdo kan pahn mengei, ahpw ih inoukiong uhk me ansou me pahn kohdo e pahn inenen lingan ong irail akan me kounopadahr oh pil doudoulahte oh kaukaunop en wia sapwellimen Kauno dipwisou en doadoahk nan lime.
Riei lih akan koaros, kaidehn kitail en dadaurete nan ansou wet. Kitail en alehda dahme pahn kohdo kan ni pwoson! Ansou kapwunod pwukat kihong kitail en kehlail ni palingehn. Iei ih ansou me atail mwekid kak wia mehkot laud ehu sang nan ansou kan me kin meleilei.
Ih inoukiong kumwail me ansou me kitail kin wiahda wasahn perehre, kounopada atail madamadau kan en pwosonte Koht, oh sohte uhdihsang kaukaunop, Koht pahn kapai kitailda. E pahn “kapitkitaillla; ei, ni mwohmw ehu me e [pahn] koasoai ni meleilei ong ngenitail kan, oh [pahn] kihong emen emen kitail pwoson laud, oh …kahrehiong kitail en [kak] koapwoaroapwoarki atail saledekla pwehki ih.” 22
Ni amwail pahn kaunopada en alehda dahme pahn kohdo kan ni pwoson, inou pwukat pahn wiahla ahmw! Ih kadehdeh, sang ni ahi limpoak ong kumwail, oh ahi koapwoaroapwoar kin kumwail, ni mwahr sarawi en Sises Krais, ahmen.