Warohng Pwurala Rehn Kauno
Tapiada doadoahk o met pwehn “warohng pwurala rehn Kauno” pwe kumwail en direkihla Sapwellime Ngehno.
Menseng mwahu, riei ohl oh lih akan. Ni ahi wia tohnpadahk en Sounkomour Sises Krais, I pil pahn iang sawas ong ni kopwurpwurpene me pahn wiawi sang nan keimw paiehu en sampah nan kapokon wet.
Pahrwet weksang pahr koaros. Ong ie tepda sang ni ahi alehdi kepwukoahieu sang Presedensi Keieu ien kohla oh kasarawiala tehnpas sarawi ehu nan Durban South Africa. I sohte kak manokehla soangen kaselel en ihmwo. Ahpw me laudsang kaselel en ihmwo, Ansou koaros I pahn tamataman mour en irail aramas akan me warohng oh kaunopada en iang patehng kemwekid sarawio. Irail kohdo pwe irail en iang ale ehu kisehn kapai en Kopwurupwurdohu: me iei kasarawi en tehnpas sarawi en Kauno. Irail kohkihdo arail mohngiong kan me audaudki limpoak ong Ih oh Sapwellime Tomwo. Re kokihdo arail kaping kalahngan ong Sahm Nanleng me ketkihdo tiahk sarawihkan me pahn kahlwairail lahng mour soutuk. Re kohkihdo arail warohng.
Tehpas Sarawihkan, sohte lipilipil wasa me re mih ie, irail ileile sang wasa koaros nan sampa. Tehnpas Sarawi koaros en Souleng en Imwin-rahnakan nan sampa—koaros meh 168—kasalepen atail pwoson me mie mour soutuk oh popohl me kitail pahn wia nan atail peneinei kan oh rehn Samatail Nanleng. Kohla nan tehnpas sarawi kin kalaudehla atail esehla Koht Sahm, Koht Nah, oh Koht Ngehn Sarawio, oh rongamwahu poatoapoato, atail inou en momourki oh padahki me mehlelo, oh atail men idawehn atail Kaun oh Sounkomour, Sises Krais.
Ni dihd en likin tehnpas sarawi koaros mie nting kei mihie, “Sarawihla ong Kauno.” Tehnpas sarawi iei Tehnpas en Koht oh e sarawihsang sampa Sapwellime Ngehno kin pwoalepene irail kan me kin pwongih nan wasa sarawihkan. E ketin koasoanedier dewen emen emen ma kitail pahn wia sapwellime lukedo.
Ahn ahi-pwoudo-pahpa, Blaine Twitchell, emen ohl me keieu mwahu me I ese, padahkiongie padahk mwahu ehu. Ngehi oh Sister Rasband ahpw pwarekehr mwohn ah pahn kereniengehr lel imwin ah seiloak en mour. Ni aht lel nan ah perehu, ah pisopo pahn mweselier. Ni ansou me se rahnmwahuih ah pisopo, I medewe, “Soangen mwahu en pisopo. E kohdo pwe en wia ah sawas ong tohn ah ward poadidi menet.
I ahpw ndalahng Blaine, “E sou mwahu pisop ah kohdohn pwarek uhk.”
Blaine kilengdohngie oh sapengie, “Mie mehot me mwahusang men. I peki en kohdo pwe I anahne sen koasoia pene duwen nei dorepwehn mweimwei en pedelong nan tehnas sarawi. I men mweselda ni eiwarohng pwurala rehn Kauno.” E ahpw kapwaiada.
Mesen nting pwukat, “warohng pwurala rehn Kauno,” tengala rehi. Met wia mehn kaweid mwahu ehu en kin interview ansou koaros rehn atail sounkaweid en Mwomwohdisoh kan. Eri kisin likou mweimwei en pidelong nan tehnpas sarawi nan Mwomwohdisoh mahso, lel nan 1891 kamanamanlahr oh sain sang Preseden en Mwomwohdisoh. 1
Mendahte ma me pwulopwul de mah, interview kisin likou mweimwei en tenpas sarawi kaidehn wia de sohte wia. Kisin likoun mweimwei kaidehn mehn ketemen ehu, ahpw kisin likoun mweimwei ehu, de tikit ehu ong wasa kesempwal. Kahrepe me inenen ileile oh sarawi. Pwe ke en kak warohng ale kisinlikoun mweimwei en tehnpas sarawi, ke udahn pahn momourki padahk kan en Mwomwohdiso en Sises Krais en Souleng en Imwin rahn-akan.
Nan ahmw interview palingenimwen ahniki ansou mwahu en tehk iamwomwen ahmw pwoson Sises Krais oh Sapwellime Tomwo. Ke ahniki kapai en ehukiong mehteikan ahmw kadehdeh duwen kopwurupwurdohn rongamwahuwet; ahmw kin men utung irail me Kauno kin ketin pilada pwe ren wia sounkaweid en Sapwellime Mwomwohdiso, ahmw pwoson padahk kan en rongamwahu wet; ahmw kapwaiada ahmw pwukoahn peneinei kan; ahmw mehlel, mwakelekel, kapwaiada pwukoah, peik, kapwaiada mahsen en erepit, kosonned en eisek kis ehu, oh wauneki Rahn en Sapad. Me pwukat me wia poahsoan en padahk kan en mour en Sises Krais oh Sapwellime doadoahk.
Noumwail kisin likou mweimwei en tenpas sarawi kiong palingenitail mehn madamadau loal en nantiong momourki kosonned akan en Kauno oh poakong dahme E ketin poakong: aktikitik, ohpampap, tengeteng, limpoak, kehlail, soun kamwahu, mahk, oh peik peik. Oh ke inoukiong pein kowe me ke pahn kapwaiada kosonned pwukat ansou me ke sain edemwen pohn kisin doaropwe sarawio.
Noumwail kisin likou mweimwei en tehnpas sarawio ritingadahnguhk wenihmw en nanleng oh mehteikan iangahki pwung oh tiahk sarawi poatoapoat kan me iangahki pepdais, endaumend, kopwopwoud, oh katengtengpeneh kan.
Pwe en “warohng mihmi rehn Kauno” mehn kataman ehu en tetehk ma kitail kolokolete atail inou kan nin duwen Souleng en Imwin-rahn ekei. Ahn ahi-pwoud-pahpahu, Blaine, kilangehr kesempwalpen kaunopada ong rahn me e pahn aktikitikla oh uh mwohn Kauno.
Medewe mwahu ansou me Moses kohla pohn Nahna Horeb oh Kaun Siohwa pwarehng nan umwpulen kisinieio. Koht masanihong, “kihsang ahmw suht kan, pwe wasa me ke keskesinen ieh me sarawi.” 2
Kihsang atail suht kan ni wenihmw en tehnpas sarawi duwehte atail pwilikihdi ineng en sampa oh soahng kan me kin kawehla keirdahn palingenitail, pwilikihdi soahng kan me kin kihsang kitail mour mwahu, kisang kitail men wia me suwed, oh rapahki ansou en sarawihla.
Mwomen atail wiawihda, palinwaratail kepikipikda sang rehn Koht, e wia tehnpas en palingehnitail, oh kitail pahn wauneki. Me mehlel mahsen en koul en Praimerio: “Palinwereiet tehpas ehu [me] anahne epwel keneinei.” 3 Ansou me Kauno pwarehng mehn Nipahi kan, E mahsanih, “Kumwail sarawihla sang rehn Ngehn Sarawio, pwe kumwail en mwakelekelada ni amwail pahn uh mwohi.” 4 “Soangen aramas dah me ke men wia?” Kauno ketin kalelapak oh pil sapeng, “Me duweiehte.” 5 Pwe kitail “en warohng pwurala rehn Kauno,” kitail nantiong en duwehla Ih.
I tamatamante dahme President Howard W. Hunter tepin padahki ni ah wia ke 14 en Preseden en Mwomwohdiso. E masanih: “Sang nan ahi mohngiong I men tohn Mwomwohdisoh koaros en kak warohng pidelong nan tehnpas sarawi. E pahn kaperen ong Kauno ma aramas laud koaros pahn warohng—oh kolokol—neirail kisinlikou mweimwei en tehnpas sarawi.” 6 I pil men kapatahieng me limited-use pahn kaunopada ahl mwahu ong neitail me pwulopwul kan.
Preseden Russell M. Nelson pil pwurehng kapwurehieng ahn Preseden Hunter padahko: “Ni rahno, Suhn 6, 1994, kisin likou mweimwei en tehnpas sarawi me kitail kin weuwa weksang soangkan me mihmi nan nei waledo. Mwowe, e pahn sewesei kitail. E wia mehn sawas ongie pwe ien kak pidolong nan tehnpas sarawi en Kauno; ahpw mwurin eh kalohkda, wialahr mehn pilipil. E wialahr nei badge en peikiong soukohp en Koht.” 7
Ma ke alehier noumw kisin likou en mweimwei de noumw kisin lilokun mweimwei solahr doadoahk, irekla ni ahn bishop wenihmwo duwehte souleng en mahs ako me ireklahng ni wenihmw en Tehnpas Sarawi en Nauvoo o nan 1846. 8 Ahi keinek iang pwihn en aramas pwosono. Irail kohkohlahsang sapwarail kaselel kan kohkohla pali kapi, ahpw re ese me mie mehkot sarawi kei me re pahn esehla mihmi mwohrail nan tehnpas sarawio. Sarah Rich sang rugged trail Iowa ntingiada met, “Ma kaidehn pwoson oh marain me kaunopadahngkitehr nan tehnpasa sarawio … , atail seiloak pahn duwehte … lusulus nan rotorot.” 9 Ih me pahn sohte rehtail ma kitail pahn kohkohwei nan mour wet kelehpw ahpw sohte kaweid en ngehno oh meleilei nan tehnpas sarawi.
Tepda wia mepwukat pwe ken kak “warohng pwurala rehn Kauno” pwe Sapwellime Ngehno en kak ketket rehmwail oh Sapwellime kosonnedo en kahlwaikumwailahng “mour meleilei.” 10
Sounkaweid me pwulopwul kan, preseden en elders quorum, preseden en pwihn en lih, oh liho oh ohl me kin wia doadoahk en minister pahn sewese oh kaunopada, ah amwail bishop oh prant preseden kan pahn kaweid kumwail.
Mie mehkot kitail kehn ansou me tehnpas sarawihkan ritdi, de ritda ekeite pak. Preseden Nelson oh irail kan me kin papah, ngehno kaweidkinirail en ritingedi tenpas sarawihkan “medek” oh “kapwunod laud.” Preseden Nelson kin idihdek reh, “Dahme I pahn ndahieng Soukohp Joseph Smith? Dahme I pahn ndahieng Briggam Young, Wilford Woodruff, oh soukohp teikan kohdi lel Preseden Thomas S. Monson?” 11
Met, se pereniki oh kapingki pwehki tehnpas sarawihkan e pahn pwurehngehr ritda ekeite pak ong katengteng oh endowments.
Warohng pidolong nan tehnpas sarawi, mehlel e sohte uhdi. I pahn nda mehkot kesempwal, ma ke kak kohla tehnpas sarawi de soh, ke anahne noumw kisin likou en mweimwei en tehnpas sarawi pwe ken kak weweid weite pohn ahl en inouo.
Pahr nekiero Ngehi oh Sister Rasband alehdier kepwukoahieu sen kohla New Zealand pwe sen koasoiong irail mwahnakapw oh peinakapw akan. Irail sohte mengei en kohla ni tehnpas sarawi; me mihmi Hamiltono kamwkamwahu, irail pil awiawiete tenpas sarawi me pahn wiawihda Auckland o. Ahpw, I ahniki pepehm en ngehn sarawi oh kangoangehkinirail en kakapwahla de wiahda neirail kisin likou en mweimwei en tehnpas sarawi.
Mendahte ma re sohte kak kohla tehnpas sarawio, ahpw irail pahn uh mwohn Kauno ni arail mwakelekel oh kaunopada en papah Ih. Warohng en kolokol kisin likou mweimwei en tehnpas sarawio e pil wia mehn perehre sang me suwedo, pwehki ahmw wiahda inou tengeteng rehn Kauno me pid ahmw mourand inou me Ngehn pahn ieiang uhk.
Kitail kin wia doadoahk en tehnpas sarawi ansou me kitail kin rapahki atail keinek kan oh wahla adarail ken en ale tiahk sarawihkan. Pwehki atail tehnpas sarawihkan ah ritdi, kitail raparapahkihte atail keinek kan Pwehki Ngehn Koht nan atail mohngiong kan, kitail pahn welianiraildi pwe irail en warohng pwurala rehn Koht.
Ni ansou me I wie papah palien Executive Director palien Tehnpas Sarawi, ekei pak I kin rong Preseden Gordon B. Hinckley kin koasoaiairehieu me Kauno ketin masanih me pi Tehnpas Sarawi en Nauvoo: “doadoahk kan me kin wiawi nan tehnpasei, oh doadoahk koaros me I koasoanehdi ong uhk, en doudoulahte mwowe oh sohte uhdi; oh ahmw nananti oh kanengamah, oh ahmw doadoahk en pelialihla oh ke sohte pahn luhs sang ketingpomw, Koht me mahmahsanih.” 12
Atail doadoahk en nan tehnpas sarawi patehngete atail kisakis poatoapoato. Kitail ahpwtehn lel ehu songosong. Kauno masanih kitail en doadoahk nan tehnpas sarawi “ni ineng mehlel, … nananti, oh kanengamah.” 13 Pwehn “warohng pwurala rehn Kauno” kitail anahne wia soahng pwukat koaros. Kitail udahn pahn nantihong momourki kosonned akan, tengetengediong nan atail inou kan me kitail wiahda nan tehnpas sarawi, oh kapingki dahme Kauno padpadahkihte me pid tehnpas sarawi, oh kanengamah oh awiawih arail pahn pwurehng ritida.
Ma Kauno masanihong kitail “kalaudehla” atail koahiek, E mahmahsani kitail en kaulaudehla atail mour pwung. Karasepe, kitail anahne kalaudehla ansou en atail onopiki pwuhk sarawi, atail rapahki atail keinek kan, ah atail kapakap ni pwoson me kitail pahn ehukihong irail me kaukaunop wiahda neirail kisin likou mweimwei en tehnpas sarawi atail limpoak ong tehnpas sarawi, mehlel atail peneinei kan.
I inoukiong kumwail ni ahi wia Wahnpoaron en Kaun Sises Krais me kumwail pahn nantihong oh kalaudehla amwail koahiek kan, kumwail pahn pehm limpoak en Koht Sahm oh Sises Krais, ke pahn pehm Ngehn Sarawi ah pahn kaweid uhk, ke pil pahn kapingki inou sarawihkan me ke wiahda eri ke pahn ahniki pepehm en mehleilei oh ese me ke pahn warohng oh “pwurala rehn Kauno.” Ni mwaren Sises Krais, ahmen.