Ehu Mwehi Kapw
I lukei kumwail en nantihong wekid amwail mohngiong, madmadau, oh mour ong Samatail Nanleng oh Sapwellime Ieros, Sises Krais.
Riei ohl oh lih kesempwal kan, kapokon lap en rahn riau pwukat me inenen kaselel! I pwungki en Elder Jeffrey R. Holland ah padahko. Ni eh nda me kapahrek kan, kapakap kan, oh koul kan koaros pwilsang rehn Kauno, Ahi kaping laud ohng kumwail koaros me iang patehng ni mwohmw sohte lipilipil.
Erein kapokon lap wet, I medewei kumwail amwail wie rongorong mahsen pwukat. I peki rehn Kauno en seweseie pwe ien wehwehki dahme kumwail kin pehm, pwunodki, de songsongen kapwungala. I medewe laudki dahme I pahn kaimwsengkihla kapokon wet me pahn kiheng kumwail koapwoaroapwoar ohng dahme pahn kohdo mwuhr me I ese me Kauno pahn men kumwail en pehm.
Kitail mih nan mwehi kaselel ehu, iei me sansal sang soukohp en kawa kan. Mwehi wet kasalehda me kapai koaros pahn kohieng me pwung kan.1 Mendahte pingiping en sampah,2 Kauno pahn sewesei kitail en “wenlahte mwowe ni popohl.”3 Kitail dehr kediropwki dahme nekier aio. Nahkpen mehn Isreal kan en wenlahte mwowe. Atail Kaun Sises Krais wie kaukaweid Sapwellime Mwomwohdiso, oh e pahn pweida ni soangen mwohmw kei.
Komwi oh ngehi anahne nantiheng pwe emen emen kitail en wiahla dahme kitail kak wiahla. Rahn wet kitail kalapw rong duwen “mwehi kapw ehu.” Ma udahn kumwail men perenkihda “mwehi kapw wet” I lukei kumwail en kalaudehla amwail kasohpaieng amwail mohngiong, madamadau, oh ngenimwail ohng Sahm Nanleng oh Sapwellime Iehros, Sises Krais. Wiahkihla met amwail mwehi kapw.”
Kesempwalki “mwehi kapw wet” sang ni omwi pahn kin koluhla rahn koaros. Nantiheng kalaudehla madamadau mwakelekel, lokaia, oh wiewia. Papah mehteikan. Kolokol amwail inou soutuko. Kapwaiada amwail pwukoah kan. Rieiko, sohte lipilipil soangen kahpwal akan me kumwail kin lelehng, momourki ehu ehu rahn pwe kumwail en kaunopehng tuhwehng Sounkepikipiko.4
Ihme kahrehda miehki tehnpas sarawi kan. Sapwellimen Kauno tiahk sarawi kan oh inou kan pahn kaunop kitailehng mour soutuk, me wia kapai keieu laud rehn Koht.5 Nin duwen amwail esehier, COVID kahrehda tehnpas sarawi kan ah ritsang weipokon. Kahrehda se mwahuki keneinei en mie, ni eh pahn pilehu ritdahng weipokon. Nan ire 2 wasah kan me tehnpas sarawi tohto mihe, pwopwoud kid kei katengtengpenehr, oh meh kid kei alehdier pein arail endaumend sounpwong kei samwalahro. Se kasikalahr ansou me tohn Mwomwohdiso me warehng kan koaros arail pahn pilehu papah kadaudokarail kan oh kaudek nan tehnpas sarawio.
Met, I kapingki ei pahn pakairkihda koadoahk pen tehnpas sarawi kapw weneu me pahn kokouda nan wasa pwukat: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; Palimese en São Paulo, Brazil; oh Santa Cruz, Bolivia.
Ni atail pahn kawada oh kanaiehng tehnpas sarawi pwukat, se kapakapki me emen emen kumwail pahn kawada oh kanaiehng pein kumwail pwe kumwail en warohng pedelong nan tehnpas sarawi.
Met, riei ohl oh lih kesempwal kan, I kapaikin kumwailda meleilei sang rehn Kaun Sises Krais. Sapwellime meleilei me inenen sansal ohng koaros.6 I kapaikin kumwailda kalaudlahn ineng oh peik ohng kosonned en Koht kan. I inouki me sang ni amwail wiewia, kumwail pahn direkihla kapai kan, me iangahki kakehlail, kalaudlahn pein ahmw kaudiahl, sawasepen nan ihmw kan, oh popohl, mendahte mwehi wet ah apwal.
Kitail ehupene oh wenlahte mwowe pwehn kapwaiada atail doadoahk sarawi—sang atail pahn kaukaunop pein kitail oh sampa ong ni Ketdo Keriau en Kauno. Ih ahi tungoal kapakap, ni limpoak ong emen emen kumwail, ni lengileng sarawi en Sises Krais, amen.