Manaman en Dadaurete
Pwoson kelehpw oh mahsen en Koht me kin audehda palingenitail kan itar en sewesei kitail—oh mweidehng kitail en kak alehda Sapwellime manamano.
Ni ei wadwadek padahk sang atail soukohp, Presiden Russell M. Nelson, i diarada lepin lokaia ehu me e kin kalapw doadoahngki nan ah padahk kan. Lepin lokaia wet iei manaman.
Ni tepin kapokon lap me e wiahla Wahnpoaron o, Presiden Nelson padahngki duwen manaman.1 Ih eri pil doulahte padahngki duwen manaman pahr kei mwurihdohsang. Ni atail utungadahr Presiden Nelson en wia atail soukohp, e kin padahngki duwen manaman—mehlel manaman en Koht—oh ia mwomwen atail pahn kak doadoahngki. E padahkihiong kitail ia mwomwen atail pahn doadoahngki manaman en Koht sang atail pahn papah mehteikan,2 ia mwomwen manaman en Sises Krais oh Tomwo ah kak doadoahk rehtail sang koluhla,3 oh ia mwomwen prihduhd—manaman oh mweimwei en Koht—ah kak kapaiada koaros me pahn kolokol arail inou ohng Ih.4 Presiden Nelson kadehdehki me manaman en Koht kin kohieng irail akan me wiadahr arail inou nan tehnpas sarawi ni arail pahn momourki arail inou sarawi kan.5
I inenen kaselelki iren kaweid me Presiden Nelson kihiong kitail nan kapokon lap en Epreil 2020. E padahkihiong kitail en “onopiki oh kapakapki pwehn esehla duwen manaman oh marain me kumwail alehier nan amwail endaumen—de me kumwail pahn ale nan ansou en endaumeno.”6
Eri dahme I wia, I onopiki oh kapakapki pwe ien esehla duwen manaman oh marain me I alehier nan ahi inou sarawi kan—de nan inou sarawi kan me i pahn wiahda.
Ni atail wehwehki dahme kitail anahne wia pwe kitail en kak doadoahngki manaman en Koht nan atail mour sohte mengei, ahpw i diarada me kitail kak wia sang ni atail pahn medemedewe oh kapakap ki pwe Ngehn Sawari en kak kaweid kitail.7 Elder Richard G. Scott kihda kaweid sansal mwahu ehu en dahkot manaman en Koht: me iei “manaman en kak wia me laud sang me kitail kak pein wia.”8
Audehkihda mohngiongitail oh palingenitail kan mahsen en Koht oh poasoanehkihda atail pwoson Sises Krais inenen kesempwal ohng kitail pwehn kak ale manaman en Koht pwehn sewesei kitail nan ansoun apwal akan. Ma sohte mahsen en Koht oh pwoson Sises Krais nan atail mongiong kan, atail kadehde oh pwoson pahn kakete pwupidi, oh kitail pahn kak luhs sang manaman en Koht me E ketin kupwurki kitail en ale. Pwoson tikitik sohte itar. Pwoson kelehpw oh mahsen en Koht me kin audehda palingenitail kan itar en sewesei kitail—oh mweidehng kitail en kak alehda Sapwellime manamano.
Nin duwen Sister Johnson oh ngehi aht kin apwahpwalih nait seri kan, se kin koangoangoahki emen emen irail en esehla keseng. Ahpw se kin mweidehng irail en ale kasukuhl ihte ma re pahn kin nantihieng kaiahnehng neirail mehn keseng kan ehu ehu rahn. Ehu Rahnkaunopo, nait kesilimen en serepeino udahn perenkihda ah pahn iangih iengehko keseng, ahpw e saikte kaiahn. Pwehki ah esehier me e pahn kaiahnki minit 30, e kilelehdi minit depe e pahn kesengki pwe e sohte men en dauliala.
Ni ah aluhla limwahn microwave o pwehn kohla ni pianohu, e uhdi oh padik kisin pwatin kei. E sohte kaunopda minit en ah pahn nek kaiahno, ahpw e kihieng microwave o en kungkihla minit 30. Mwurin minit 20 ni ah keskesengo, e pwurala nan wahsahn mwongehu pwehn kilang ia uhwen ansou me luhwe ih diarada me microwave o lulidahr.
Ih tangala likin ihmwo wasa I wie doadoahk iehu, werwerki me ihmwo lulidahr. I mwadangete tangala nan ihmwo, ngehi diarada me microwave o wie lul-lul.
Pwe ien doarehsang imwato en dehr lulida, I doahkala mwurin microwave o, ngehi usasang sahlo, ngehi eri doadoahngki sahlo pwe ien pwokadahsang microwave o wasa e mih iehu. Ngehi eri kin kapir seli microwave o pwe en dehr lel ie, ngehi wahieila likio, ngehi eri kesehla. Kiht eri kakunkihla kisiniei o ohso.
Dahme sapwungala? Microwave anahne mehkot me pahn kihsang angi, oh pwehki eh sohte mehkot pwehn kihsang angi, e lulida oh pehsla.9 Nait microwave o lulida pwehki sohte mehkot loale.
Pil ni soangen mwohmwohte, irail akan me ahniki pwoson oh kolokol mahsen en Koht nan arail mohngiong kan pahn kak powehdi kasongsong kan me kakete kawehla aramas.10 Ma soh, atail pwoson, koapwoaroapwoar, oh lamalam pahn sohte kak powehdi, oh me rasehng microwave o, kitail pahn lelohng apwal.
I esehla me kolokol mahsen en Koht ni palingeniet, pil iangahki pwoson Kaun Sises Krais oh Sapwellime Tomwo, e pahn seweseie ien kak alehda manaman en Koht oh powehdi kasongsong koaros me pahn lelohng ie. Ni atail pahn lelohng kahpwal kan, kitail kin koapwoaroapwoarkihla inou en Kauno me Paul padahngki: “Pwe Koht sohte ketikihiong kitail ngenen masak; ahpw manaman, oh limpoak, oh meleilei en madamdau.”11
Kitail wehwehki me Saunkomouro ni ah wia kisin seri men “e laudla, oh kehlailla ni pali ngehn, oh audaukihda erepit: oh lingan en Koht ketket reh.”12 Kitail wehwehki me ni Eh laudla, “Sises direkihla erepit oh me inenen paliwar laud, oh me kenken rehn Koht oh aramas.”13 Oh kitail wehwehki me ni ansou me e ketket pohn sampah, irail akan me rong Ih “kin pwuriamweikihla ah padahngkan: pwe ah mahsen kan kin manaman.”14
Sang kaunop mwahu, Sounkomouro direkihla manaman oh kak powehdi kasongsong en Sehdan kan.15 Ni atail pahn idawehn karasaras en Sounkomouro oh kaunopada sang onopki mahsen en Koht oh koaloaloahla atail pwoson, kitail pil kak alehda manaman en Koht pwehn powehdi kasongsong kan.
Nan ansou pwukat me sohte mweimwei kapokon pene elehda apwal en kohla nan tehnpas sarawi, I inoukihda mei pahn onopki oh esehla laud duwen manaman en Koht me kitial pahn ale ni atail pahn wiadah oh kolokol inou sarawi kan en nan tehnpas sarawi. Ni inou me sansal nan kapakap en kasarawi en Tehnpas Sarawi en Kirtland, se silehkihdi tehnpas sarawio manaman en Koht.16 Sohte koasoandien iahd me manaman en Koht kak tih pohn irail akan me kin wiahda oh kolokol inou en tehnpas sarawi kan, de sohte me kak perehsang kitail sapwellime manamano. Sapwellime manamano sohte kin mih nan atail mour kan ihte ma kitail sohte kin kolokol atail inou kan oh sohte kin mweidehng Sapwellime manaman en kin pweida rehtail.
Ansou me ngehi oh ei pwoud aht wihwia doadoahk en pahpa nan Thailand, Laos, oh Myanmar, se kadehde duwen manaman en Koht me kohieng irail akan me wiahda oh kolokol inou sarawi kan en nan tehnpas sarawi. Mwohni en Tehnpas Sarawi en Patron kamangaieng souleng kan en kak kohla nan tehnpas sarawio sang ni tohnmetei oh kaunop laud me re kin wia. I tamataman ei tuhweng souleng 20 sang Laos nan wasahn peidihn sompihr en Bangkok, Thailand, pwe ien sewese irail en kohla ni ehu wawsahn peidihn sompihr en Bangkok pwe ren iangihada sompihr me pahn kohla Hong Kong. Souleng pwukat inenen ahniki peren laud pwehki arail pahn kohla nan tehnpas en Kauno.
Ni aht pwurehng kasamwoh souleng pwukat ni ahr pwurodohu, se kak kilang lingan en rongamwahu wet oh manaman en inou sarawi kan en nan tehnpas sarawi me irail wiadahr ohng Koht. Sansal me souleng pwukat kohkihla “manaman en Koht” nan tehnpas sarawi.17 Manaman en kak wia me laud sang me re kak pein wia me kohieng irail kihiong irail kehlail en powehdi kasongsong kan me kin lelohng tohn mwomwodisoht pwe ren kak doula mwowe oh ale “kapai laud ki mehlelo,”18 ni ahr doulahte kawada wein koht nan Laos.
Met pwehki atail sohte kak kohla nan tehnpas sarawi, kitail kin doadoahngki atail inou sarawi kan me kitail wiadahr nan tehnpas sarawi, nan atail mour? Inou pwukat, ma kitail pahn kolokol, e pahn kihiong kitail koapwoaroapwoar en alehdi kapai en inou kan me kauno ketin inoukihiongehr sapwellime souleng kan.
I lukei kumwail en rapahki manaman en Koht me e kupwurki kumwail en ale. I kadehdehki me ni atail pahn rapahki manaman wet, kitail pahn kapaikihda marain laud en limpoak me Samatail Nanleng ahniki ohng kitail.
I kadehdehki me pwehki Samatail Nanleng poakohng kowe oh ngehi, E ketkihdo Sapwellime Iehros, Sises Krais, pwe en wia atail Soundoar oh Sounkomour. I kadehdehki me Sises Krais, me Sapwellimanki manaman koaros,19 oh I wia met ni mwaren Sises Krais, ahmen.