Kohwei Mwowe nan Pwoson
I kapaikumwailda en ahniki popohl oh kalaudehla amwail pwoson Kauno.
Riei kempoakepahi ohl oh lih akan, ni atail miher ni keimwiseklahn kapokon lap wet, kitail kasalehda atail kaping kalahngan ong Kauno. Ngilen keseng kan me inenen kaselel oh iren padahk kan me inenen kaselel.
Kitail alehier ire kaselel tohto nan kapokon wet. Nan rahn en ketemen wet, kitail kapehsehier kalohk ehu ong sampah kasaledahr mehlel en Kopwurupwurdohn rongamwahu en Sises Krais ni unsek.
Kitail kawauwialahr Kopwurupwurohu ki atail Werkihda Osahna.
Kitail kawadahr ehu sansal kapw me kasalehda atail pwoson Kauno Sises Krais oh ire manaman oh dipwisou kan en Mwomwohdisoht.
Kitail pil pakairkidahr ehu rahn en kaisihsol oh kapakap en sampah pwon, pwehn kawuhdi soumwahu keper wet, silehdi irail kan me kin sawasawas, kakehlaka pai en wehi, oh mour en aramas en duhuwehte. Kaisihsol wet pahn wiawi Alem Sarawi, Epreil 10. Ia uwen kaselel me Nialem wo pahn wia!
Rahn Sarawi kohkohdo wia Rahn Sarawi en Ihster, ansou me kitail pahn pil kawauwih Tomw oh Iasadahn atail Kaun Sises Krais. Pwehki Sapwellime Tomwo, Sapwellime kisakis en iasadah pahn kohieng koaros me ipwidi sampah. Oh Sapwellime kisakis en mour soutuk pahn kohieng aramas koaros me warohng pwehki arail wauneki tiahk sarawi kan oh inou kan me wiawihda nan Sapwellime tehnpas sarawi kan.
Iren kamarain tohto kan me audehda kapokon lap en Epreil 2020—oh wihk sarawi me kitail tapiadahr met—kak mih ni oaralap en lepin lokaia sarawi riau iei: “Rong Ih.” 1 Se kapakapki me amwail madamadau ong Sahm Nanleng, me mahsani mahsen pwuko, oh ong Sapwellime Ieros Kesempwal, Sises Krais, pahn wia mehkot keieu laud me kumwail pahn tamataman nan mehkoaros me wiawiher. Se kapakapki me kumwail pahn tapiada kapw ni mehlel rong, karonge oh peikiong mahsen kan en Sounkomouro. 2 I inouki me amwail masak pahn tikitikla oh amwail pwoson pahn laudla.
Kalahngan en amwail ahniki ineng en wiahda amwail wasahn kousoan kan en wia wasa mehlel en kakairada pwoson, wasa me Ngehn en Kauno pahn ketin kousoan ie. Atail mehn kasukuhl en rongamwahuo, Come, Follow Me, pahn kapaiada amwail mour. Amwail poadedi en nanantiheng esehla mepwukat—pil ni ansou kau me kumwail pehm me amwail kasukuhl kan sohte kin kalapw pweida—pahn wekidala amwail mour, mour en amwail peneinei, oh sampaht. Kitail pahn kehlailla ni atail kin wiahla tohnpadahk pwerisek kei en Kauno, keskesihnen oh koaskoasoaieng Ih, wasa koaros.
Met, kitail kosoia duwen tehnpas sarawi kan. Tehnpas sarawi 168 me kasarawialahr nan sampah. Ekei wie mihmihte nan koasondi en pilahn oh wie kokouda. Ni ansou me pakairpen kokoudahn ehu tehnpas sarawi kapw kin wiawi, e wiahla kisehn atail poadoapoad sarawi.
E ekis sohte nohn sonamwahu en pakairki tehnpas sarawi kapw akan ni ansou me atail tehnpas sarawi kan koaros ritidi nan ereihn ansou kis wet.
Sounpar epwiki douwer powe, Presiden Wilford Woodruff kilangehr soahng kei me wiawi me duwehte rahnwet, me sansal nan ah kapakap en kasarawi ohng Tehnpas Sarawi en Salt Lake, me wiawi nan 1893. Ekei kumwail mwein kilangehr kisehn kapakap kaselel wet pohn sohsel mihdia.
Rong pekipek pwukat me sang rehn soukohp lapalap en Koht: “Ni ansou me Sapwellime aramas akan pahn sohte ahniki ansou mwahu en pidelong nan tehnpas sarawi wet … oh irail wie lokolok oh mihmi nan kahpwal, apwal kan kapel irailpene … oh pahn sohpeidohng Sapwellimahr tehnpas sarawi wet oh peki Reh komour, sawas, Sapwellimahr manaman en tih pohrail, se peki ni karakarahk Ren ketin mahsendihdo sang nan Mwoale ni kalahngan … oh ketin karonge arail pekipek kan. De ni ansou me serihkan en Sapwellimahr aramas akan, nan sounpar kohkohdo kan, pahn tohrohrla, pwehki kahrepe kan, sang wasa kiset, … oh irail pahn sengisengieng Ih sang nan arail kahpwal katoutou kan oh pahtou pwehn kakoamoale oh komour iraila, se peki ni karakarahk Reh en ketin … karonge arail pekipek kan, oh ketkihong irail kapai kan me irail pekpeki.” 3
Riei ohl oh lih akan, ereihn ansou kan en atail kahpwal me tehnpas sarawi kan wie ritidi, kumwail kakakete doadoahngki manaman en amwail inou sarawi kan en tehnpas sarawi oh endaumen ni amwail pahn kin wauneki amwail inou sarawih kan. Menlau doadoahngki ansou wet ong ni tehnpas sarawi kan ah ritidi oh pousehlahte kolokol momour en warohngete kapai kan en tehnpas sarawi.
Kin kosoia duwen tehnpas sarawi ong amwail peneinei de kempoakepahmwail kan. Pwehki Sises Krais me wia poahsoan en mehkoaros me kitail kin wia nan tehnpas sarawi. ni amwail pahn kin kalapw ahniki madamadau en tehnpas sarawi kumwail pahn pil kalapw medemedewe duwen Ih. Onopiki oh kapakapki pwehn esehla duwen manaman oh marain me kumwail alehier nan amwail endaumen--de me kumwail pahn ale nan ansou en endaumeno.
Rahnwet se ahniki peren en pakairkihda pilahn kan en kawada tehnpas sarawi waluh ni wasah kan me pahn sansal ie: Bahia Blanca, Argentina; Tallahassee, Florida; Lubumbashi, Democratic Republic en Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; oh Shanghai, Peoples Republic en China.
Nan wasa waluh pwukat, irail semen kan en artidek en Mwomwohdiso pahn ehuieng irail ohpiser kan en wehi kan pwe tehnpas en kak kokouda ni meleilei oh en wia mehn kapatapat kaselel ong kousapw akan.
Pilahn en tehnpas sarawi nan Dubai sansal ni pasapeng ong arail luhk me se inenen kapingki oh alehda.
Audepeh kan ong pilahn en Shanghai me inenen kesempwal. Pahn sounpar rieisek douwer powe, irail toweh kan me warohng nan tehnpas sarawi nan Peoples Republic en China kin iangehr patehng Tehnpas Sarawi en Hong Kong China. Ahpw nan Sulai 2019, tehnpas sarawio ritidihki ansou reirei ong pilahn laud oh ong onohndasapahl me anahnepe inenen laud mehlel.
Nan Shanghai, wasahn tuhpene mwahu ehu pahn mie pwehn kaunopehng irail toweh kan en China en pousehla wia tiahk sarawih kan en tehnpas sarawi—nan Peoples Republic en China—ong irail oh kadaudokerail kan. 4
Nan ehu ehu wehi kan, Mwomwohdisoht kin padahngkihong irail toweh kan duwen wahu, peihk, oh uhtuht ong kosonned akan. 5 Kitail kin padahngki duwen kesempwalpen peneinei, duwen pahpa oh nohno mwahu oh wia karasaras mwahu en tohn wehi. Pwehki kitail wahuniki kosonned akan oh lepinial en kosonned akan en People’s Republic en China, Mwomwohdisoht sohte kadar misinerih kan en kohla padahk seli wasahu; oh kitail sohte pahn pil wia ansou wet.
Tuhpenehn sarawi kan en China oh irail kan me seilokodo pahn pousehlahte arail tuhpene ni arail pahn sothe patpene. Duwen Mwomwohdisoht wasahu e duhduwete sohte wekila. Ong ni wiepen wasahn doadoahk, ihte ansou en pidolong iei pahn ongete apwoindmen. Tehnpas sarawi en Kauno me mih Shanghai sohte pahn wia wasahn mwemweit ohng mehn wehi teikan.
Tehnpas sarawi waluh pwukat pahn kapaiada mour kan en aramas tohto nan pali koaros en veil en mehla. Tehnpas sarawi kan wia ehu ire kesempwal nan Kopwurupwurdohn rongamwahu unsek en Sises Krais. Pwehki kalahngan oh sapan en Koht, E ketkidohr kapai kan en tehnpas sarawi pwehn karani Sapwellime serihkan wasa koaros.
Ni Kopwurupwurdo wet eh pahn doudoula, I ese me Koht pahn ketin pousehlahte ketkihda ire tohto laud oh kesempwal kan me pid duwen Sapwellime wehi pohn sampah. 6 Wehio iei Mwomwohdiso en Sises Krais en Souleng en Imwin-rahn akan.
Riei ohl oh lih akan, I poakohng kumwail. Nan irair en ansou apwal oh kasopwurupwur wet, oh pwehki manaman me pato rehi, I men pwilikihdiong pomwaill kapai en wahnpoaron.
I kapaiada kumwail en ahneki popohl oh kalaudehla amwail pwoson Kauno. 7
I kapaiada kumwail en ahniki ineng en koluhla oh kin nantiheng en kin duhduwehla Ih nan ehu ehu rahn akan. 8
I kapaiada kumwail en ese me Soukohp Joseph Smith iei soukohp en Kopwurupwurdohn rongamwahu unsek en Sises Krais.
Ma mie me soumwahu nan pwungamwail de me kumwail kin poakoahng kan, I pwilikihdi kapai en kakehlail, nin duwen kupwuren Kauno.
I kapaikumwailda, ni ai men pil ehu kapatahiong ai limpoak ohng emen emen kumwail, ni lengileng sarawi en Sises Krais, ahmen.