Ia Mwomwen Prihsduhd eh kin Kapaiada me Pwulupwul kan
E kohieng kitailehr ahnsou mwahu wet kitail en papah duwehte tohnleng kan, en padahngki rongamwahu ong kehimw koaros en sampah, oh en sewese aramas en kohdo rehn krais.
Riei ohl oh lih akan, I kapingki mehlel ei pahn koasoaiong kumwahil nisoutik kesempwal wet duwen kisakis en prihsduhd eh sarawi oh manaman kaselel me e ahniki pwehn kapaiada me pwulupwul kan nan mwehi wet. I kapakapki me likin ei sapwungala kan, Ngehn Sarawio pahn sewese ie padahki me mehlelo.
Presidensi Keiou katamanongehr koaros me kolokol Prihsduhd en Aaron me “kumwail mihmi nan ahnsou ehu me diren kamengei oh pil kahpwal kan—nan ansou ehu me prihsduhd kopwurupwurdohr. Ke ahniki manaman en apwalih tiahk sarawi kan en Prihsduhd en Aaron. Ni ohmw kapakapi oh nantiohng warohng mweimwei wet, ke pahn inenen kapaiada mehn mpomw kan limwahmw.”1 Ni atail wia pwutak pwulopwul kei nan Mwomwohdiso wet, kitail deh pil manokehla me kitail wia “Sapwellimen Koht [seri] kesempwal kei, oh mie Sapwellime doadoahk me [kitail] en wia,”2 oh kitail sewese Sapwellime doadoahk “en sewese aramas en mour kokohlahte oh iang sosohki mour soutuk” (Moses 1:39).
Prihsduhd iei mweimwei en doadoahngki sapwellimen Soun Komouro tiahk sarawi kan oh inou sarawi kan en rongamwahu ong koaros me warohng en alehda. Sang ni tiahk sarawi kan oh inou sarawi kan en prihsduhd kitail kak alehdi kapai kan en Sapwelimen sounkomouro Tomwo, me seweseikitail en lel dahme udahn konehng kitail.
Sohsep Smith wia pwutak pwulopwul men ni ahnsou me Koht malipe en kapwurehdo rongamwahu en Sises Krais oh, pwehki kahrepe wet, pil alehdi prihsduhd me e doadoahngkiehr pwehn kapaiada aramas koaros. Nan Doctrine and Covenants 135 oaritikihdi tohto en kapai kan me Sohsep kihong me pwulopwul akan en mwehi wet. Me koasoaia: “Likin Sises, sohte emen torohr me wia doadoahk laudsang Sohsep Smith ong aramas en sampah en ahniki mour soutik. … E kapwurehdo Pwuhk en Mormon … ; kadarpeseng rongamwahu me unsek poatoapwoat … nan keihmw koaros en sampah; e kihdo kaudiahl kan oh kosenned kan me wiahda Doctrine and Covenants … ; kihpene tohto ngeder en Souleng en Imwin-Rahn Akan, … oh dahme e wia oh ede sohte pahn tokedi mwurin e mehla” (Doctrine and Covenants 135:3).
Pwe kitail en doadoahk en kak pweida duwehte Sohsep Smith, kitail anahne en kak warohng doadoahki Sapwellimen Kauno manaman en prihsduhd. Ahnsou me Ni ansou me Sohsep oh Oliver Cowdery wie kawawehwe Pwuhk en Mormon ira men papdaisla, ahpw ira sohte ahniki mweimwei. Nan May 15, 1829, ira kelepwikihdi oh kapapak, Sohn soun Papdais ahpw pwarehng ira, oh kiohng ira mweimwei en Prihsduhd en Aaron, indinda , “Kisehi papah kan, ni mwaren Mesaia I kasarawihongkumwail Prihsduhd en Aaron, me kolokol kih kan en sawas en souleng kan, oh rongamwahu en koluhla, oh pepdais ni kaduhdi ong kamwakelpen dihp kan” (Doctrine and Covenants 13:1).
E kohieng kitailehr ahnsou mwahu wet kitail en papah duwehte tohnleng kan, en padahngki rongamwahu ong kehimw koaros en sampah, oh en sewese aramas en kohdo rehn krais. Pwukoahn papah wet kiong kitail en iang towehda Sohn soun papdais, Moroni, Sohsep Smith, Presiden Nelson, oh ekei sapwellimen koht tohn papah indand kan.
Atail sawas loale oh Sapwellime prihsduhd kin kihpene irail me kin nantiong idawehn oh momourki Sapwellimen Kauno padahk ni pwung, sang ni ei wewehki e kak sohte mengei ni atail pahn loiong kahpwal en me pwulopwul kan. Sang ni atail pahn ehu ohng soun sawas en Kauno pwehn kapwaiada sapwellime doadoahk en sewese kakelahilih kitailda sang kasongosong kan oh widing kan en tepel o. Ke kak wia mehn kamarain ong koaros me kin peikasalki pein irail. Marain me mihmi loalomw pahn sansalda pwe iengomw kan koaros me ke kin patehng kan pahn kapaida sangete arail kin mih limwahmw. Ekeipak e pahn kin apwal en pohnese ngehn kan me pahn kin ieiang kitail, ahpw I kapingki ni ahi ese me ngehi emen toweh kehlail en pwihn en prihsduhd, ni ahi kak nantiohng pwehn karanih Krais.
Iangahki atail peneinei kan oh iengatail, Ngehn Sarawi wia emen kisehtail tohndoadoahk me keieu lelepek. Ahpw ma kitail men luke Ih en kin ketiket rehtail, kitail anahne mihmi nan irair kan oh wasahkan me E pahn kupwuriki en ketiket ie. Met kak tepida nan imwatail ni atail pahn doadoahkong en wia wasa sarawi ehu sang ni kalapw wadek pwuhk sarawi oh kapakap pene nan peneinei, oh pil kesempwalsang, ni atail kelehpw oh pein onopki pwuhk sawari oh kapakap.
Mwohn pahret, mie mehkot kaperen wiawiong ie me ansou mwahu en karakarahk en sewese riei serepein tikitik, Oceane, sang ni pweidahn ahl en inou en iang papdaisla oh kapwaiada ehu anahn me konehng pwehn pidelong nan wehin koht. E kasaula rahn en eh pepdaisoki sounpwung ehu, I lao kasarawiong pwukoah en prihs, pwe I en ahniki ahnsou mwahu en wia tiahk sarawio, oh riat serepein teiko pil ahniki ahnsou mwahu en doadoahk pahn pwukoah en prihsduhd ehu oh wia soun kadehde. Ni aht kesikesihnen ni pali riau en wasahn pepdaiso, I kilangada uwen ah peren, pwe ih pil duweie. Oh I kehn aht ehupene, pwehki ahi kilang me e wiahda pilipil pwung. Ni ansou mwahu wet ni ei doadoahngki prihsduhd e konehng ie ien kanaiehng oh katikala ei soukautih nan momourki rongamwahuo. Pwe ien onopada, I kin kohla nan tehnpas rahn koaros nan wihko, sawas sang rehn ei nohno, nohno kahlap, oh riei serepein pwe ien wia papdais ong me mehlahr akan.
Dahme I esehla padahkiong ie soahng tohto duwen prihsduhd oh mwomwen ei kak nantiong en kin warohng. I ese me prihsduhd koaros kak kehn soangohte me I kehn ma kitail pahn idawehn karasaras en Nihpai en “kohla oh wia.” (see 1 Nephi 3:7). Kitahil sohte kak mwohd en soukautih oh kasik Kauno en doadoahngkin kitail nan sapwellime doadoahk kesempwal. Kitail sohte kak en awiawihte irail akan me anahne sawas en rapahkin kitaildo; atail pwukoah ni atail kolokol prihsduhd en wia karasaras oh soun kadehde en Koht. Ma kitail wia pilipil kei me sohte mwahu ong atail mour soutik, kitail anahne wekidala met. Sehdan pahn song wia uwen ah kak en kolokol kitail nan irair en samin oh rapahki kainsenamwahu menegi kan. Ahpw I ese me ma kitail pahn nantiong ngoangki, rapahki me kak sewese kitail, oh koluhla rahn koaros, imwilahn kapai kan pahn kapwuriamwei oh atail mour pahn wekla mehlel ni atail pahn nantiongte dadaurete nan ahl en inou.
I ese me iei met Mwomwohdiso mehlel en Sises Krais, me wia atail sounkomour oh me ketikihong sapwelime kih en prihsduhd ong wahnparon kan, me kin doadoahngki pwehn kaweid kitail, mehlel nan ansou apwal pwukat, oh pwehn kaunop kitailda ong Sapwelime ketdo sapahlo.
I ese me Sosep Smid soukohp emen en Kapwurupwurdo, oh Presiden Russell M. Nelson me iei atail soukohp ieias en rahn pwukat. I luke kitail koaros en onopki duwen ohl kan me kolokol prihsduhd kesempwal wet oh nantiong kakelailih kitail ansou koaros pwe kitail en kak onopada tuhwong Soun Kapikipik o. Ni mwaren Sises Krais, ahmen.