Sakarada Keieu
Kitail en rapahki, in mehkoaros, kapitiheng Sises Krais, me ketin mahseniheng kitail sang ni manaman oh kaweid en Ngehn Sarawi.
Riei ohl oh lih kesempwal kan, ni aht kasamwoh kumwail ong nan kapokon lap wadawad en Mwomwohdiso en Sises Krais en Souleng en Imwin-rahn Akan nan Epreil en pahr [riekid rieisek] 2020 wet, sang ni kahrepe me kumwail esehier, I wie keskesihnen nan ihmw me sohte towe!
Ni ei ndaiong kumwail ni kapokon lap en Oakotohpe [riekid eisek duwau] 2019 duwen kapokon en Epreil wet ah pahn “wadawad” oh “sohte pahn kak manoknokla,” I sohte wehwehki me I pahn kapahrek ohngete aramas ehk oh ihme eh pahn nohn wadawad oh sohte kak manokonoklahki rehi Ahpw pwehki I ese me kumwail iang rongorong sang ni proahdkahs, oh pil pwehki uwen lingan kaselel en pwihn en koul ahr koulki “It Is Well with My Soul,” E pil kansenamwahuwih ahi mohniong.
Nin duwen amwail esehier, pwihn me towehda kapokon lap wet me malaulau pwehki aht iang insenohki tohn sampah lelepek kei oh pwehn wia uwen aht kak pwehn kauhdi doupeseng pen soumwahu en COVID-19. Soumwahu wet inenen kamwakidada wasa koaros pohn sampah. E pil kawekala koasoandi en atail mihting kan nan Mwomwohdiso, doadoahk en misineri, oh pil doadoahk en nan tehnpas sarawi.
Mendahte inapw en rahn pwukat tepsang ni kohseli en soumwahu ehu, kahpwal kan me emen emen kitail kin lelehng pahn pil kin pwarada. Kitail pahn kak lelehng kahpwal pwehki sang ni sapwung, de melimel lap, de pein atail insensuwed kan.
Ia mwomwen atail pahn kak powehdi soangen kahpwal pwukat? Kauno ketin mahsaniheng kitail “ma kumwail kaunopada kumwail sohte pahn masak.”1 Ni mehlel, kitail kak nekidala mwenge, pihl, oh mwohni kan. Ahpw e pil kesempwal kitail en kaunopada ni palingenitail kan en ahniki pwoson, mehlel, oh kadehde kehlail.
Kahrepatail me keieu kesempwal iei kitail en kaunopada pwe kitail en tuhwong Ih me ketin kapik kitaildahu. Kitail kin wia met sang ni atail kin nantiheng duwehla atail Soukomour, Sises Krais, rahn koaros.2 Oh kitail pil wia met ni atail kin koluhla rahn koaros oh alehda Sapwellime manaman en kamwakel, kamwahuiala oh kakehlaka. Eri kitail ahpw pahn kak kehn popohl oh meleilei me sohte imwi, mehnda ma kitail mih nan kahpwal. Met ihme karehda Kauno ketin kuwpure kitail en uh ni wasa sarawi kan oh “dehr mwekid.”3
Pahret, kitail kataman ke [riepwiki] 200 en ehu kemwekid me inenen kesemwpal nan pwungen irair koaros nan poadopoad en sampah—iei, ketdohn Koht Sahm oh Sapwellime Iehros, Sises Krais, rehn Joseph Smith. Nan kasansal kesempwalo, Koht Sahm ketin idilahng Sises Krais oh masanih: “Iet nei pwutak kempoake. Rong Ih!”4
Kaweid me kohieng Joseph pil kesempwal rehn emen emen kitail. Kitail en rapahki, in mehkoaros, kapitiheng Sises Krais, me ketin mahseniheng kitail sang ni manaman oh kaweid en Ngehn Sarawi.
Kahrepen kapokon lap wet oh pil kapokon lap koaros iei pwehn sewesei kitail en rong Ih. Se kapakapkiher, oh pil pekidahr rehmwail kuwmail en kapakapki, pwe Ngehn en Kauno en kak ket rehtail ni mwuledek pwe kumwail en kak rong kaweid me Sounkomouro kaunopdahr ong emen emen kumwail—iei kaweid me pahn kansenamwahuih ngenimwail kan. Kaweid me pahn koaloalamwahuih amwail mohngiong ohlahr kan. Kaweid me pahn kamarainih amwail mwahliel kan. Kaweid me pahn sewesei kumwail pwehn ese dahme kumwail anahne wia pwehn wonowei mwowe nan ansou apwal wet, oh pil nan rahn kohkohdo kan.
Se kapakapki me kapokon wet en kak sair kumwail oh wia mehkot me sohte kak manokonokla, pwehki sang ni kapahrek kan me kumwail pahn rong, pakair kapw kei me pahn kohda, oh kemwekid kan me kumwail pahn lukehng en towehda.
Ni karasepe, ni keimwseklahn tiepene en menseng en Rahn Sarawi, kitail koaros nan sampah pahn wia ehu tiepenehn wahu ni ei pahn kaweid oh koaros pahn iang ni Ngis sarawi en Ohsahna. Se koapwoaroapwoarki me e pahn wia ansou dehde oh sarawi ong emen emen kumwail, ni atail wiahki ehu ni wasa koaros pohn sampah oh kasalehda atail kaping laud ong Koht Sahm oh Sapwellime Iehros ni atail pahn kepinga Ira ni mwohmw wadawad wet.
Ni kemwekid sarawi wet, kitail kin doahdoahki angkasi pwetepwet oh mwakelekel. Ama sohte, eri kumwail kak oaloahlkkihte pehmwail kan. Mwurin Ngis sarawi en Ohsahna, koaros pahn iang pwihn en koul oh koulki “The Spirit of God.”5
Riei kesempwal kan, kapokon lap wet pahn inenen mwahu. Pahret pahn pil inenen mwahu ni atail pahn nantiheng pahsoankihda atail mour rehn Sises Krais oh Sapwellime rongamwahu kopwurupwurdohu. Lipw mwahu me keieu kesempwal en kapokon wadawad wet pahn kohsang ni atail pahn weliakapwala oh tapiada mour kapw me poahsoanki atail pahn nantiheng rong Ih.
I kasamwoh kumwail ohng kapokon lap en Epreil [riekid rieisek] 2020. I ese me Samatail Koht Nanleng oh Sapwellime Iehros, Sises Krais, kin ketin kupwurkin kitail. Ira pahn ketin ieiang kitail erein kemwekid en rahn riau sarawi pwukat sang ni atail pahn nantiheng sohpeilahng Ira oh kawawih Ira. Ni lengleng sarawi en Sises Krais, amen.