Koasoandi Lapo
Kitail me wehwehkiher sapwelimen Koht pilahn oh me wiadahr inou en patehng wehwehkilahr pwukoah en padahki mehlel pwukat.
Tetehn nan eilepen kasongsong oh kahpwal akan, kitail ahnikiher kapai mehlel! Kapokon lap wet kihongehr kitail kapai kan oh popohl en Kopwurpwurdohn rongamwahu en Sises Krais. Kitail pereperenkiher kaudiahl en Sahmo oh Ieroso me tapiadahr Kopwurpwurdohu. Kitail pil kin kataman kodahn manaman en Pwuken Mormon, me kahrepe keieu kesempwal iei en kadehdehki duwen Sises Krais oh Sapwellime padahk. Kitail pil kakehlailkidahr popohl mehlel en kaudiahl—ong soukohp kan oh ong pein kitail. Kitail rongehr kadehde kesempwal kan duwen Tomw en Sises Krais oh duwen mwomwen Sapwellime Iasada. Oh kitail kasukuhlkier duwen mehlel teikan en Sapwellime rongamwahu unsek me sansalehng Joseph Smith mwurin Koht Sahm ketin mahsanihong soukohp kapw menet: “Iet Ei tungoal Pwutak Kesempwal. Rong Ih!” (Joseph Smith—History 1:17).
Kitail pil alehier kamehlelepen kopwurpwurdohn prihsduhd oh kih kan. Kitail kalipwelipwaier atail koasoandi en ekerki atail Mwomwohdisoht uhdan ede, Mwomwohdiso en Sises Krais en Souleng en Imwin Rahn-akan. Oh kitail pil lukehngehr en iang kaisihsolki oh kapakapki pwehn katikala keper en soumwahu me kipehdier sampa rahnwet oh pil rahn me kohkohdo kan. Ni menseng et kitail pil kamarainkida padahk ehu sang Sapwellimen Kauno soukohp ieias duwen padahk en poadoapoad en kalohk en Kopwurpwurdohu. Kitail pwungkilahr dahme sansal me me “irail kan me kin onopki ni kapakap padahk en Kopwurpwurdohu oh mwekid ki pwoson pahn kapaikihda pein arail kadehdeki duwen sarawi oh kahrepen kopwurpwurdohu pwehn kaunopada sampa ong Ketdo Keriau en atail Kaun oh Sounkomour Sises Krais me inoupe wiawiher.”1
Pilahno
Mepwukat koaros wia kisehn koasoandi sarawio me kahrehiong seri en Koht kan en kak lapalapla oh duwehla Ih. Kilang nan iren pwuhk sarawi kan ni “pilahn en peren soutuk,” “pilahn en komourala,” oh “pilahn en kmour” (Alma 42:8, 11, 5), pilahno—me sansalehr nan Kopwurpwrudohu—tepda sang ni Mihting ehu Nanleng. Ni atail wia ngehn kei, kitail anahne alehdi mour soutuk me atail pahpa/nohnon nanleng sapwellimaniki. Ni ansou o kitail keirdahr ni uwen atail kak ni atail saikinte pehm mour ni paliweren aramas. Pwehn kihda pepehmo, Koht Sahm koasonehdi en ketin kapikada sampa wet. Nan koasoandi en mour wet, kitail pahn saminkihla dihp ni atail kin sohpai kasongsong kan me kin kakariada palingenitail. Kitail pil pahn kak mehla. Pwehn kapitkitailsang mehla oh dihp, koasoandien Samatail Nanlengo pahn ketkihda emen Sounkomour. Sapwellime Iasadao pahn komour kitailsang mehla, oh Sapwellime tohnmetei en tomwo pahn kapwungala pweinen dihp pwe koaros en mwakelekelda nin duwen koasoandi kan me miehier. Tomw en Sises Krais me wia poahson en koasoandi en Sahmo.
Nan Mihting en Nanlengo, Koht ketin kasalehiong seri ngehn koaros duwen koasoandi en Sahmo, iangahki kadeik pen wiewia kan en nan mour wet, sawas kan sang nanleng, oh ni imwi kapereno. Kitail kilangehr ni imwio sang ni tapio. Kid en irail aramas me ipwidi sampa pilada koasoandi en Sahmo oh iang peiki nan mahwen me wiawi nanleng mwuri. Me tohto kitail inoukihong Sahmo dahme kitail pahn kohdo oh wia nan mour wet. Ni mwohmw kei me saikinte sansal, dahme kitail wia nan sapwen ngehn iei me wiahda mwomwen atail mour nan mour wet.
Mour wet oh Sapwen Ngehn
I pahn oaralapiada ekei ire kesempwal kan nan en Sahmo koasoandio, me kin lipwan ong kitail nan atail seiloak kan nan mour wet oh nan sapwen ngehn me kohdo mwuri.
Kahrepen mour wet oh kekeirdahn mour me kin wiawi mwurin mour wet iei ong kadaudoken Koht kan en kak duwehla Ih. Met iei kupwuren Sahm Nanleng oh Sapwellime seri koaros. Pwehn kak lel ni imwi kaperen wet, kosonned soutuk kan anahne kitail en wiahla aramas mwakelekel kei sang ni Tomw en Sises Krais pwe kitail en kak mih pahn sihlangin Sahmo oh Naho oh pereperenki kapai kan en mour soutuk. Pwuken Mormon padahngki, E ketin luke ”koaros en kohdo reh oh alehda sapwellime kupwur mwahu; oh e sohte kin ketin soikala mehmen me kohdo reh, me toantoal oh pwetepwet, me sensel oh saledek, ohl oh lih; oh e kin ketin tamataman aramas rotorot akan; oh koaros duwepene rehn Koht” (2 Nephi 26:33; pil tehk Alma 5:49).
Koasoandi sarawio ong kitail en wiahla dahme kitail dokedoke anahne kitail en uhwong wiewia suwed me kin kasongsongi aramas en kasohwe kosonned en Koht kan oh Sapwellime koasoandio. E pil anahne kitail en idawehn koasoandi teikan en mour wet, sohte pwunodiki dihp en mehteikan de arail sohitar kan. Ekei ansou kitail kin keirkihda atail kin ale lokolok oh kasongsong ahpw kaidehn atail nsenamwahu oh meleilei. Oh kanengamah en nan mour wet sohte kak katehda mehkoat ma sohte sawas sang powe me kin kapitkitailsang nan kehnaudek en mour wet.
Koasoandio kasalehda mour soutuk me kitail pahn alehdi, kahrepe oh mwomwen atail seiloko nan mour wet, oh sawas kan en nanleng me kitail pahn ale. Kosonned akan en Koht kaparkin kitail en dehr doula nan mwekid keper kan. Padahk kan sang sounkaweid ngenin kan kin kahluwa kitail oh kihong kitail irehkan me kamangaiala atail seilok poatopoato.
Koasoandi en Kohto kihong kitail irehn kaweid kaselel pahieu pwehn sewesei kitail nan seilok en mour wet. Mepwukat koaros kohiengehr kitail nan Tomw en Sises Krais me wia poahson en koasoandio. Me keieuo kamehlelehiong kitail me pwehki Sapwellime lokolok ong dihp akan me kitail koluhkilahr, kitail kak mwakelekeldahsang dihp pwuko. Eri sounkopwung kalahngano pahn “manokehla dihp koaros” (Doctrine and Covenants 58:42).
Keriau, me wia kisehn Tomw en Sounkomouro, E ketkihda pohn Kahlepe atail sapwungkan koaros. Met mweidohng kitail en eker Ih pwehn kakehlailih kitail en powehdi katoutou kan en mour wet, pein atail oh mehteikan, duwehte mahwen oh meninkau kan. Pwuken Mormon kasalehda kawehweh keieu sansal me pid manaman en Tomwo. Sounkomouro ketkihda pohn Kahlepe “weirek kan oh kapelsalehd kan [oh sapwungkan] en sapwellime aramas akan. … E pahn ketikihda powe arail luwet kan, pwe nan kapehde en ketin audaudiki kupwur kalahngan, nin duwen paliwar, pwe en mwahngi nin duwen paliwar mwomwen eh pahn ketin sowese sapwellime aramas akan nin duwen arail luwet kan” (Alma 7:11-12).
Kesilu, Sounkomouro, pwehki Sapwellime Tomw soutuko, powedier mehla oh ketkihong kitail kehkehlik kapereno me kitail koaros pahn iasada. Pwuken Mormon padahngki me “Kopwurpwurdo wet pahn kohieng koaros, me mah oh pwulepwul, koaros me sensel oh saledek, lih oh ohl koaros, koaros me suwed oh me mwahu; oh pil sohte piten moang ehu pahn salongala; ahpw mehkoaros pahn pwuralahng duwen unsek en paliwaro”(Alma 11:44).
Kitail kawauwih Iasadao nan ansoun Ihster wet. Met kihong kitail wehwe oh kehlail en powehdi kahpwal kan en mour wet me emenemen kitail kin sohpai oh irail me kitail poakepoake, me duwehte sohitar en paliwar, mwahliel, de madmadau me kitail ale ni atail ipwidi de alehier nan ataill mour kan. Pwehki Iasadao, kitail ese me sohitar pwukat wia kahpwal en lepin ansou!
Rongamwahu kopwurpwurdohu kamehlelehiong kitail me Iasadao kak iangahki ansou mwahu en pwurehng patehng atail peneinei kan--atail pwoud kan, serihkan oh pahpa/nohno kan. Met wia kangoangoang manaman ehu ong kitail pwehn kapwaiada atail pwukoahn peneinei kan nan mour wet. E kin sewesei kitail en momourpene ni limpoak nan mour wet oh kaskasik atail pahn pwurehng patpene ni popohl nan mour kohkohdo.
Kapahieu oh kaimwsekla, kaudial en mwehi wet padahkihong kitail me atail keirda sohte anahne uhdi ni imwin mour wet. E sohte laud ire me sansalehr ong kehkehlik kesempwal wet. Kitail alehier kaweid me nan mour wet iei ansoun kaunopada en tuhong Koht oh kitail en dehr kapwandehla atail koluhla (tehk Alma 34:32-33). Ansouohte, kitail pil kasukuhlkiher me nan sapwen ngehno rongamwahuo pil kin kalohk ong “me dipan oh sapeik kan me uhwongdahr me mehlelo” (Doctrine and Covenants 138:29) oh me irail kak koluhla mwohn Kadeik Lapo (tehk iretikitik 31-34, 57-59).
Iet ekei ire kesempwal teikan en Samatail Nanleng pilahn.
Rongamwahu en Sises Krais kopwurpwurdohu kiheng kitail kaweid tohrohr ehu ong irehkan me pid mwakelekel, pwopwoud, oh naineki serihkan. E padahkihong kitail me pwopwoud inenen kesempwal ong pweidahn kahrepen koasoandien Kohto, pwehn koasoanehdi pwukoa sarawi en ipwidien sampah oh kaunopada tohn peneinei kan ong mour soutuk. “Kapwopwoud kasarawialahr sang Koht ong aramas,” Kauno mahsani, “… pwe sampa en kak kapwaiada kahrepen eh kepikpikda” (Doctrine and Covenants 49:15–16). Sapwellime koasoandio, mehlel, sohte pahrek ong ekei kosonned oh tiahk kehlail kan en sampa.
Manaman en kapikada mour wia manaman keieu laud me Koht ketkihongehr Sapwellime serihkan. Wiepen kapikipikda wet kamanamanla nan keieu en kosonned ong Adam oh Ihp, ahpw pil ehu kosonned kesempwal pil mie pwehn kauhdi wiekau pen ire wet. Likin pwopwoud, doadoahngki manaman en kapikada mour ni ehu songen wiepe de ehusohng wia dihp laud ehu oh kamwamwahli paliwar sarawi en ohl oh lih. Kehkehlik me rongamwahu kopwurpwurdohu pwilikihdi pohn kosonned en mwakelekel pwehki atail manaman kan en kapikipik nan pweidahn koasoandi en Kohto.
Dah Mwuri?
Ni ke 200 [riepwiki] en pahr en Sansal Keieuo me tapiada Kopwurpwurdohu, kitail ese koasoandien Kauno oh kitail kakehlailkidahr kapai kan nan irair en sounpar riepwiki sang Sapwellime Mwomwohdiso kopwurpwurdohu. Nan pahr en 2020 wet, kitail ahniki dahme keieu pwopwuler me kahdaneki 20/20 kairoir en mwekid kan en keilahn aio.
Ni atail kilang wei mwowe, ahpw, masatail kan ekis edied. Kitail ese me pahr riepwiki mwurin Kopwurpwurdohu, sapwehn ngehn kolokol tohto tohn doadoahk koahiek kan en nan mour wet me kak kapwaiada kalohk me kin wiawi wasao. Kitail pil ese me met kitail ahneki tehnpas sarawi tohto pwehn wia tiahk sarawi poatopoat kan ong irail kan me koluhla oh alehier rongamwahu en Kauno nan pali koaros. Mepwukat koaros kin kadaiala koasoandi en Samatail Nanleng. Limpoak en Koht me inenen lapalap me kahrehda ong irail me malaulau kan me kin inengiong en wiahla serihn wasa me suwedo, E ketin kaunopadahr wasa lingan ehu ong Sapwellime seri koaros (kilang Doctrine and Covenants 76:43).
Kitail ese me Sounkomouro pahn sapahldo oh mie ehu irair en sounpar kid me meleilei pahn kipehdi wasa koaros nin duwen koasoandi en Koht. Kitail pil ese me mie iasada kei, en me pwung kan oh me dipan kan, oh kadeik lapo ong emenemen aramas pahn kin wiawi mwurin ah iasada.
Kitail pahn ale kadeikpen atail wiewia kan, ineng en atail mohngiong kan, oh songen aramas da me kitail wialahr. Kadeik wet pahn kahrehda seri en Koht koaros pahn kohla nan wehin kilohri ehu me arail peik kahrehda arail warehng oh wasa irail pahn nsenamwahu ie. Sounkapwung lapo iei atail Sounkomour, Sises Krais (tehk Sohn 5:22; 2 Nephi 9:41). Sapwellime eripit pahn kasalehiong Ih atail wiewia koaros oh ineng kan, en me sohte koluhla de weliakapw oh irail me koluhla de pwung kan koaros. Ihmekahreda, mwurin Sapwellime kadeiko kitail koaros pahn wehkada “me sapwellime kadeiko me pwung” (Mosiah 16:1).
Ni keimwsekala, I ehukihda kehkehlik ehu me lel iehier nan kisinlikou tohto oh sang pekipek kan en kapwuredohng Mwomwohdisoht mwurin mwarerail kan irihrlahr de solahr pwaredo. Tohto toweh kan me sohte wehwehki koasoandien komouro, me sapengala peidek kan me pid padahk oh kosonned kan en Mwomwohdiso kopwurpwurdohu. Kitail me ese koasoandien Kohto oh inoukidahr en iang, ahneki pwukoah sansal en padahki me mehlel pwukat oh wia uwen me kitail kak wia pwehn kadaiala ong mehteikan oh nan pein atail mwekid kan nan mour wet. I kadehdeki Sises Krais, atail Sounkomour oh Soundor, me kamangaiala mehkoaros, ni mwaren Sises Krais, amen.