Rong Ih
Samatailo mwahngi me ni ansou me kitail kin mihla nan sawehwe oh masepwehk, dahme pahn keieu sewesei kitail iei en rong Sapwellime Ieroso.
Riei ohl oh lih akan, ia wen ai kapingki pwehki sang ni wiepen doadoahngki mehn kair kaselel kan me kitail kak tuhpene oh kaudek ni menseng en Rahn Sarawi wet. Ia wen kapai me kitail ahniki atail ese me rongamwahu en Sises Krais kopwurupwurdohr pohn sampah!
Nan wihk kei me samwalahro, pali tohtohn kitail loiengehr kedirepw tohto nan atail mour. Rerer en sahpw kan, luludah kan, lapakeh kan, soumwahu doar kan, oh kauperail kan kawelahr koasoandi kan oh kahredahr kisin mwenge, dipwisou kan oh mwohni solahr itar.
Nan eilepen mepwukat, se kaping kalahngan ong kumwail amwail kak pilada en rong mahsen en Kauno nan ansou apwal wet ni amwail iang kiht nan kapokon lap wet. Rotoroto kin wie rotorotala ieiang kahpwal akan me kin kahrehiong marain en Sises Krais ah kin ehute marainpeseng. Song en medewehte me mwahu kan me emen emen kitail kak wia nan ansou apwal wet nan sampah. Amwail poakohng oh pwoson Sounkomouro kak kamwakid emen tohrohr en diar Kopwurupwurdohn rongamwahu unsek en Sises Krais.
Nan erein sounpar riau samwalahro, ngehi oh Sister Nelson tuhwongedi me tohto kumwail nan sampah. Kitail tuhpenehr nan wasahn mwadong kan likin ihmw oh nan wasahn mihting lap kan oh nan ohtehl kan. Nan ehu ehu wasa pwukat, I kin medmedewe me I ieiang seri pilipilda kan en Kauno oh me I kilekilang kopokonpenehn Israel wihwiawi mwohn mesei kat.
Kitail wie momour nan ansou ehu me “samatail kahlapoko kin awiawih kaskasik ni karuwaru.”1 Kitail mwohdehr mwowe pwehn kadehde mwahu dahme soukohp Nihpai kilahngehr nan sansalohte, me “manaman en Simpwul en Koht” pahn kipehdi “pohn seri en inou kan en Kauno, me mwerpesengehr wasa koaros pohn sampah; oh irail kin doadoahngki me pwung oh manaman en Koht ni popohl laud.”2
Kumwail, riei ohl oh lih akan, wia kisehn ohl, lih, oh seri kan me Nihpai kilangehr. Medewe duwen irehu!
Sohte lipilipil wasa kumwail kouson ie de dahme kumwail mihmi loale, Kauno Sises Krais iei amwail Sounkomour, oh soukohp en Koht, Joseph Smith iei amwail soukohp. E ketin kasarawilahr mwohn kepikipikdahn sampah wet pwehn wia soukohp en dihn mwuhr wet, ansou me “sohte mehkot pahn kolkoldi”3 sang Souleng kan. Kaudiahl wie wihwiawiht sang rehn Kauno nan erein ansou en kopwurupwurdo wet.
Ia wehwehn met ong kumwail me rongamwahu en Sises Krais kopwurupwurdohr pohn sampah?
E wehwehki me kumwail oh amwail peneinei kak katengtengpene kohkohlahte! E wehwehki me pwehki amwail pepdaislahr sang mehmen me kolokol mweimwei sang Sises Krais oh wialahr towe mehlel en Sapwellime Mwomwohdiso, kumwail kak paieki ieiang Ngehn Sarawi ansou koaros. E pahn ketin kahluwa oh sinsilei kumwail. E wehwehki me kumwail sohte pahn kelehpwla de sohla ale manaman en Koht pwehn sewesei kumwail. E wehwehki me manaman en prihsduhd kak kapaiada kumwail ni amwail ale tiahk sarawi kan oh wiahda inou kan rehn Koht oh wie kolokol inou kan. Me mehlel pwukat wia angke ehu ong atail mour, mehlel nan ansou pwukat me kahpwal laud kipedier sampah.
Pwuken Mormon soaiada mwahu duwen kehlaildahn oh sohralahn mwehi riau. Poadopara kasalehda uwen mengei en pali moron en aramasko arail kin manokehla Koht, kasohwe soukohp en Kauno kan, oh rapahki lapalap, ndand, oh ineng en pali uduk.4 Soukohp en mahs akan kin kalapw kapwurehieng mahsani “soahng me lapalap oh kesempwal kan pahn kohieng aramas akan, me irail sohte kin kamehlele.”5
E sohte weksang dahme wiewiawi rahn pwukat. Nan irair en sounpar kei, kitail rongehr me soahng kan me keieu laud oh kesempwal sang mwoahl kei pohn sampah. Ahpw pali moron en aramas sohte kin kamehlele me mehlel pwukat—pwehki irail sehse wasa irail kak rapahki ie6 de pwehki irail kin rongorong irail kan me sohte wehwehki me mehlel kan, de pwehki irail kesempwaliki peren en sampah sang me mehlelo.
Tepelo me inenen loalekong. Erein sounpar kidkei, e kin wekidala me mwahu ong me suwed oh me suwed ong me mwahu.7 Ngileh kan kin en ngilauda, kehlail, oh pohnmwahso.
Ahpw, kepitien Samatail Nanleng me inenen weksang mehlel. Sapwellime poahngok me mengei, loiloi tikitik, oh inenen sansal me kitail sohte kak sawehwehki Ih.8
Karasepe, ni E kin ketin kapehse Sapwellime Ieroso ong kitail pohn sampah, E kin ketin wiahki poahngok mwotomwot. Koht ketin mahsanihong Piter, Seims oh Sohn pohn Dohl en Kieweko, “Iei met nei pwutak kempoake: rong ih.“9 Sapwellime poahngok ong mehn Nihpai kan nan Bountiful iei “Kilang nei Pwutak Kempoake, me I kin pereniki, me kalinganedahr edei--rong ih.“10 Oh ong Joseph Smith, nan poahngok lingano me langadahr mwehi wet, Koht ketin mahsani, “Iei met Nei Pwutak Kempoake. Rong Ih!”11
Met, riei ohl oh lih akan, na medewe pwe nan irair silu pwukat me apwtehn sansalda, mwohnte Sahmo ah kapehse Ieroso, aramasoko patpato nan irair en masepwehk oh, pil nan iraihr en men esehla.
Wahnparonko masepwehkada ansou me irail kilangada Sises Krais nan pwungen depwek ehu pohn Dohl en Kieweko.
Mehn Nihpaiko masepwehk pwehki irail ahnekiher kahpwal oh rotorot kiher rahn kei.
Joseph Smith mih nan eilepen rotorot mwohnte en nanleng kan langada.
Samatailo mwahngi me ni ansou me kitail kin wahpwonkihla sawehwe oh masepwehk, dahme pahn keiei sewesei kitail iei en rohg Sapwellime Ieroso.
Pwehki ni atail kin rapahki pwehn rong--mehlel rong--Sapwellime Ieroso, kitail pahn ale kaweid en ese dahme kitail kak wia nan irair koaros.
Keieu en mahsen nan Doctrine and Covenants iei karonge.12 E wehwehki “en karonge ki ni ineng en kapwaiada.”13 Karonge wehwehki en “Rong Ih”—pwehn rong dahme Sounkomouro mahsani oh uhd peikiong Sapwellime kaweid. Nan lepin lokaia riauko—“Rong Ih“—Koht ketkihong kitail mwomwen atail pahn pweida, peren, oh popohl nan mour wet. Kitail en kin rong mahsen kan en Kauno, karonge irail, oh peikiong dahme E mahsanihongehr kitail!
Ni atail kin rapahki en wia tohnpadahk en Sises Krais kei, atail nantiheng en rong Ih udahn anahne en poasonki ineng sang loaletail. Kitail anahne inengieng oh kaukaule audehki atail mour kan Sapwellime mahsen kan, Sapwellime padahk kan, Sapwellime me mehlel kan.
Kitail sohte kak doadoahngkihte irehkan me kitail kin ale pohn sohsal mihdia. Lepin lokaia biliohn kei me pato nan wehwe oh sampah ehu me direkilahr pakair pen dipwisou oh sahpis kan patehng mwarong oh mwekid likamw kan en tepelo, ia wasa me kitail kak kohla pwehn rong Ih?
Kitail kak kohla nan pwuhk sarawi kan. Re kin padahkihong kitail duwen Sises Krais oh Sapwellime rongamwahuo, Sapwellime Tomw mwuledeko, oh koasondi lap en popohl oh komour en Samatailo. Douloali mahsen en Koht rahn koaros inenen kesempwal ong mour en palingenatail mehlel nan rahn pwukat me direkilahr liseliping. Ni atail kin douloali mahsen en Krais rahn koaros, mahsen en Krais ko pahn ndahiong kitail mwomwen atail pahn powehdi kahpwal kan me kitail sohte kin medewe me kitail pahn sohpai.
Kitail pil kak rong Ih nan tehnpas sarawi. Tehnpas en Kauno wia tehnpas en kasukuhl ehu. Iei wasa me Kauno kin wia kasukuhl nin duwen Kupwure. Iei wasa me ehu ehu tiahk sarawi kin padahngki duwen Sounkomouro. Iei wasa me kitail kin esehla duwen atail kak karanih oh ehuieng nanleng ni sansal mwahu. Iei wasa me kitail kin esehla mwomwen atail kak powehdi tepelo oh ale manaman en prihsduhd en Kauno pwehn kakehlakai kitail oh irail me kitail poakehng kan. Emen emen kitail anahne rapahki pwehn rukla wasao.
Ansou me keinepwdi en lepin ansou kan me pid COVID-19 pahn lopila, menlau koasonehdi amwail ansou en kaudek oh papah nan tehnpas sarawi. Minit koaros en ansou pwuko pahn kapaiada kumwail oh amwail peneinei ni mwohmw kei me sohte me kak wia. Kin douloali dahme kumwail rong oh pehm ansou me kumwail mihmi mwo. Peki Kauno en padahkihong kumwail mwomwen langahda nanleng kan pwehn kapaiada amwail mour kan oh mour kan en irail me kumwail kin poakong oh papah.
Pwehki kaudek nan tehnpas sarawi sohte kak wiawi ansou pwukat, I luke kumwail en kalaudehla amwail kin iang wia poadopoad en peneinei, iangahki ropada oh kilelehdi poadopoad en peneinei. I inouki me ni amwail kalaudehla amwail ansou nan tehnpas sarawi oh doadoahk en poadopoad en peneinei, kumwail pahn kalaudehla oh kadaiala amwail kak en rong Ih.
Kitail pil kin Rohng Ih mwahu ni atail kin kakairada atail kak en kasawiada mwenginingin kan en Ngehn Sarawi. Ihme keiei kesempwal kitail en esehla met mwomwen en Ngehno kin mahsen ong kitail. Ni Sihlengin Koht, Ngehn Sarawi me kin wia menin keder. E pahn ketin ketkihong madamadau kan nan amwail mwahliel kan me Sahmo oh Ieroso kin ketin kupwurki kumwail en ale. Ih me wia Sounsawaso. E pahn ketin kameleileidi mohngiongumwail kan. E kin ketin kadehdehki me mehlelo oh pahn ketin kamehlelehiong kumwail me mehlelo ni amwail kin rong oh wadek mahsen en Kauno.
I kalipwelipwa ahi pekipek ong kumwail en wia dahnge me kak kadaiala palingenimwail kan en kak ale pein amwail kaudial.
Wia met pahn sewese kumwail esehla mwomwen amwail pahn doula nan amwail mour, dahme kumwail pahn wia nan ansou apwal, mwomwen kasawiada oh powehdi kasongosong kan oh widing kan en tepelo.
Oh, keimwsekla, kitail kin rong Ih ni atail kin peikiong mahsen kan en soukohp kan, ohl sarawi kan, oh sounkihla kaudial kan. Wahnparon keidi kan en Sises Krais kin kalap kadehdehki Ih. Irail kin kasalehda ahlo ni atail kin weikengkihla atail wie ropirop seli nan mour liseliping wet.
Dahme pahn wiawi ni amwail pahn kin inengieng en rong, karonge, oh peikiong dahme Sounkomouro mahsaniher oh dahme E ketin mamahsanihong Sapwellime soukohp akan met? I inouki me kumwail pahn kapaikihda manaman laud pwehn powehdi kasongosong, kahpwal, oh luwet. I inouki manaman kan nan pwungen pwopwoud kan, ehupenehn peneinei kan oh doadoahk en rahn akan, Oh I inouki me amwail kak en wie pereperen pahn laudla tetehn kahpwal kan pahn laudla nan amwail mour.
Kapokon Lap en Epreil wet wia ketemen en mwekid ehu me kawikala sampah wet. Ni atail kasikedo ke riepwiki (200) en ketemenpen Keieu en Kaudiahl en Joseph Smith wet, Keieu en Presidensi oh Kaunsel en Woanpoaron Ehk Riemeno ahpw medemedewe dahme kitail pahn kak en wia pwehn kawauwih mwahu kemwekid kesempwal wet.
Mwekid kapwuriamwei wet tapiada Kopwurupwurdohn rongamwahu en Sises Krais ni unsek oh mwehi en ansou wet.
Se medewe ma e pahn konehng sen kawada sansal takai ehu. Ahpw se kehn me pwehki uwen laud en mwekid wet eh kawikala sampah, kitail en kawada ketemenpe, kaidehn ni takai ahpw ni mahsen—mahsen en kalohk en wahu ehu—intingdi nan mohngiongatail.14
Sang tepidahn mwomwodiso wet, mie kalohk meh limau me wiwaihda, me kieiu mwuhr iei “Peneinei: Kalohk Ehu ong Sampah,“ sang Presiden Gordon B. Hinckley nan pahr 1995.
Met ni atail medmedewe duwen irair kesempwal wet nan poadopoad en sampah oh kapokonpenehn Israel pwehn kaunopada ohng Ketido Keriau en Sises Krais, kiht, Keieu en Presidensi oh Kuarem en Wahnpoaron Ehk Riemen, pakairkihda kalohk wet. Daidel en Kalohk wet iei “Kopwurpwurdohn Rongamwahu Unsek en Sises Krais: Ketemen Ke-Riepwiki en Kalohk Ehu ong Sampah.” Kalohk wet kamanaman sang Presidensi Keieu oh Pwihn en Wahnpoaron Ehk-riemen en Mwomwohdiso en Sises Krais en Souleng en Imwin-Rahn Akan E pakairda Epreil en pahr 2020. Ni ahi kakaunopehng rahn wet, I wiahda kasido en kalohk wet nan Tuhke ko, wasa me Joseph Smith kilangada Sahm Nanleng oh Ieroso.
“Ni wahu, se kalohki me Koht ketin poakohng Sapwellime seri kan nan wehi koaros en Sampah. Koht Sahm ketkihong kitailehr kisakis en ipwidi, mour, oh tomw soutuk en Sapwellime Ieros, Sises Krais. Sang ni Sapwellimen Sahm manaman, Sises iasada oh powehdi mehla. Ih me wia atail Soundor, Mehn Kahlmeng, oh atail Sounkomour.
“Pahr riepwiki samwalahro, ni menseng kaselel ehu nan pahr 1820, ni en Joseph Smith eh pwulopwul, raparapahki en ese mehnia mwomwohdiso me e pahn iang, ahpw kohla nan tuhkehko pwehn kapakap wasa me karanih nihmweo nan New York, USA. Mie ah iren kalelapak kan me pid duwen komour en pali ngehn oh e likih me Koht pahn ketin kaweid ih.
“Ni wahu, se kalohki me pasapengpen ah kapakap, Koht Sahm oh Sapwellime Ieroso, Sises Krais, pwarehng Joseph Smith oh kasarawiahla ‘kopwuropwurdohn mehkoaros’ (Wiewia 3:21) nin duwen me Pwuhk Sarawi mahsanih. Nan kairohro, e esehla me mwurin kamakamalahn tepin Wahnpoaron ko, Sapwellimen Krais Mwomwodiso en Kedehde Kapw sohrala sang Sampah. Joseph me pahn wia mehn doadoahk nan kopwurupwurdo wet.
“Se kadehdehki me sang ni pahn kaweidpen Sahmo oh Ieroso, meninkeder kan en nanleng pekederdo pwehn kaweihd Joseph oh pwurehng kawada Mwomwohdiso en Sises Krais. Sohn Sounpepdais me iasadahro kapwuredo mweimwei en pepdais ni kaduhdi ong ni lapwapen dihp. Wahnpoaron silimen—Piter, Seims, oh Sohn—kapwuredo pwukoan wahnpoaron oh kih kan en mweimwei en prihsdud. Mehkei pil pwaredo me iangahki Elijah, me kapwuredo mweimwei en katengehpene peneinei kan kohkohlahte mwurin mehla.
“Se pil men kadehdehki me Joseph Smith alehdi kisakis oh manaman en Koht pwehn kawehweh poadopoad en kawahu iei: Pwuhk en Mormon— Pil Ehu Kadehde pen Sises Krais. Tehn pwuhk en poadopoad sarawi wet pil iangahki en Sises Krais mwehi ni ah kin kalohk rehn aramas en palikapi en sampah mwurin Sapwellime Iasadau. Pwuhko padahngki karepen mour oh kawehwe padahk en Krais, me wia poahsoan en karepehu. Ni eh kin utung Pwuhk Sarawi, Pwuhk en Mormon kin kadehde me aramas koaros wia nein Sahm Nanleng me diren limpoak, me mie Sapwellime koasoandi ong atail mour, oh me Sapwellime Ieros, Sises Krais, kin wie mahmahsente rahn wet duwehte keilahn aio.
“Se kalohkih me Mwomwohdiso en Sises Krais en Souleng en Imwin-rahn akan, koasonepe wiawi ni Epreil 6,1830, iei Kadehde Kapw en Sapwellimen Krais Mwomwodiso kopwurupwurdohr. Mwomwohdiso wet poahsoandi pohn mour unsek en Sises Krais, oh Sapwellime Tomw soutuk oh Iasada. Sises Krais pwurehng malipehr Wahnpoaron akan oh ketkihong irailehr mweimwei en Prihsdud. E ketin luke kitail en kohdo Reh oh Sapwellime Mwomwohdiso, pwehn alehda Ngehn Sarawi, oh tiahk sarawi en komour, pwehn alehda popohl soutuk.
“Met pahr riepwikiehr sang ansou me Koht Sahm oh Sapwellime Iehros, Sises Krais, tapiada Kopwurupwurdo wet. Aramas me rar kei nan sampah wet aledahr erepit en mwekid en kaudiahl pwukat.
“Se kalohkih ni peren me inoupen Kopwurupwurdohu doudoulahte mwowe sang ni popouslahn kaudiahl. Sampaht pahn sohte duhduwehte, ansou me Koht pahn ketin ‘kapwurepene mehkoaros rehn Krais’ (Episos 1:10).
“Ni wahu oh kaping, ni aht wia Sapwellime Wahnpoaron kan se luke koaruhsie en ese—duwehte kiht—me nanleng ritdahr. Se kahdehki me Koht ketin kaskasalehda Sapwellime kupwur ong Sapwellime pwutak kan oh serepein kan. Se kadehde me irail akan me pahn onopiki padahk en Kopwuropwurdo wet ni kapakap oh wia ni pwoson pahn kapaikihda pein arail kadehde uwen sarawi oh ah pwukoah en kaunopada sampah ong inou en Ketido Keriau en atail Kaun oh Sounkomour, Sises Krais.”15
Riaht akan, met iei aht Kalohk en Sounpar Riepwiki ong Sampah me pid Kopwurupwurdohn rongamwahu en Sises Krais ni unsek. E kawehwehdier nan mahsen eisek-riau. Oh kereniongeher nan mahsen teikan. E kakehr dierek nan wepsaid en mwomwohdiso, oh kumwail kakehr alehda noumwail kopi. Onopiki kalohk wet iangahki amwail peneinei oh kempoakepahmwail kan. Medemedewe mwahu duwen mehlel kan oh medewe mwomwen mehlel pwukat ah pahn kawikila amwail mour ma kumwail pahn rong, peikiong, oh kapwaida kosonned akan oh inou sarawi kan me kin patehng.
I ese me Joseph Smith iei soukohp me Kauno piladahr en langahda keimwseklahn mwehi wet. Pwehki ih, Mwomwohdisohn Kauno kopwurupwurdohr pohn sampah. Joseph katengehki ah kadehde pein ntah. Ia wen ai poakoahng oh wauneki ih!
Koht ieias! Sises iei Krais! Sapwellime Mwomwohdiso kopwurupwurdohr! Ih oh Seme, Samatail Nanleng, ketin sinsilei kitail. I kadehde mepwukat ni mwaren Sises Krais me sarawi, amen.