Wasahn Kousoan akan me Keieu Kaselel
Sounkomouro me sounwiepe, sounkou, oh sounaude unsek. Sapwellime doadoahk iei me unsek oh popohl en palingeitail kan. .
Mie pahk ahsnou keren me I kilangada saihn ehu nan Salt Lake City. Saihno pakairki duwen ehu pisnis me kin wiahda masloalen ihmw kan. E indahte, ”Se kin Papah Wasahn Kousoan akan me Keieu Kaselel nan Salt Lake City.”
Ah koasoaio me ngilamwahu—pwe dahkot “wasahn kousoan me keieu kaselel?“ I diarehr me I kin medewe kalelepako, mehlel pwehki ah dokedoke serihko me ngehi oh ahi pwoud Kathy kairada, oh pil neirail seri kan me irail kakairada rahnet. Duwehte pahpa kan oh nohno kan wasa koaros, se kin pwunodki oh kapakapki aht peneinei. Lel met ih me se wiewia. Se inangih mehlel dahme pahn keieu mwahu ohng irail. Ia mwomwen irail oh neirail seri kan kak mihmi nan wasahn kousoan akan me keieu kaselel? I kin doandoaropwe wasahn kousoan en tohn Mwomwohdiso kan me ngehi oh Kathy sopla ie. Se luhkohngehr ihmw kan nan Korea oh nan Kenya, nan Philippines oh nan Peru, nan Laos oh nan Latvia. Mweidohngie I en ehukihda ahi madamadau pahieu ohng wasahn kousoan kaselel akan.
Keieu, nin Sihlangin Kauno, wiepen wasahn kousoan me keieu kaselel patepatehng mehlel mwomwen mour en irail kan me kin mihmi loale. Kaidehn uwen kapwehpwe de uwen lapalap en aramas ako me ihmw pwukat kaselelki. Mwohmw kan me keieu kaselel nan ihmw ehu iei mwomwen Krais me sansalehr rehn irail kan me kin mihmi loale. Dahme keieu kesempwal iei masloalen palingehn en towehkan, kaidehn ihmwohte kelepw.
Irehn mwomwen Krais pwukat kin alahldi sang ni “wiepen ahnsou“1sang ni pein atail ineng en kekeidla ni ahl en inouwo. Irehn Mwomwen Krais kan kin patehng mour en irail kan me kin nantihong en mour mwahu. Re kin audehkihla ihmw kan marain en rongamwahu, mehnda ma taht en ihmwo wiawikihda pwehl matak de takai kaselel. Mehnda ma kowehte nan imwomw me kin idawehn kaweid en “rapahkihla mepwukat,“2 ke kak wia doahk mwahu ohng kamwahupen masloalen imwen ahmw peneinei ni palingehn.
Kitail kin idawehn peneu en Kauno en “kaunop[kitail]; kaunopada soahng koaros me anahnepe mie; oh kauwada tehnpas ehu“ sang ni atail koasoanehdi, kaunopada, oh kauwada mour en palingenitail, kaidehn udahn imwatail. Ni atail kekeid ni Sapwellimen Sounkomouro ahl en inou ni kanegamah, atail wasahn kousoan wiahla “tehnpas en lingan, tehnpas me soandi, [oh] tehnpesen Koht.“3
Keriau, tohn wasahn kousoan akan me keieu kaselel kin pwilikihdi ahnsou pwehn onopkihda pwuhk sarawi kan oh mahsen en soukohp ieias akan rahn koaros. Presiden Russell M. Nelson lukeiohng kitail en “wikidsapahl“ oh “onehdasapahl“ atail wasahn kousoan akan sang ni onop en rongamwahu.4 Sapwellime luhk kasalehda me wasahn kousoan kaselel kan kin audaudki doadoahk me kanai oh me kesempwal, iei pein atail keirada oh onehdasapahl atail luwet kan. Koluhla en rahn koaros wia mehn doadoahk en wikila pwe kitail en kak ekis ekis kadek, diren limpoak, oh wehweh mwahu. Onopki pwuhk sarawi kan kin kahrehda atail karanihla Sounkomouro, oh Sapwellime limpoak oh kalahngan lap kin peusehla atail keirada.
Pwuhk Sarawi oh Pwuhk en Mormon kin koasoaiada soai en peneinei kei, eri e sohte kapwuriamwei me poadoapoad sarawi ko wia pwuhk en kaweid mwahu ohng wiepen wasahn kousoan akan me keieu kaselel. Ira wia poadepen pwunod en pahpa nohno kan, uwen keper en kasongosong kan, kana en me pwung kan, kahpwal en duhpek oh ahnsou en rahk, oh kasuwedpen mahwen oh katepen meleilei. Pahk tohtohie pwuhk sarawi kan kasalehiong kitail mwomwen peneinei kan kin pweida sang ni mour pwuhng oh mwomwen arail kin sohte pweida pwehki arail keid ni ahl tohrohr kei.
Kesiluh, wasahn kousoan kaselel kan kin poahsoankihda ni koasoandi me Kauno kapikada ohng Sapwellime Tehnpas me keieu kaselel, iei tehnpas sarawi. Wiepen tehnpas sarawi kin tepkihda kehndake mengei—pelehsang tuhke kan oh kapahrekehla sahpw. Tepin doadoahk pwukat ohng kaunopada sahpw kak karasarasehng mourki kosonned mengei kan. Kosonned akan wia poahsoanpen mour en tohnpadahk. Mour en tohnpadahk lelepek kin kahrehiong kitail en tengidi, soandi, oh sohte kak mwekid, 5duwehte tih sidihl en nan tehnpas sarawi. Wiepe teng wet kin mweidehng Kauno en poaronehdo Sapwellime Ngehn pwehn wikidahla mohngiongatail.6 Pepehm en mohngiong me kehlail en wikila ekis duwehte kapatepen dipwisou kaselel kei nan masloalen tehnpas sarawi.
Nan atail nannanti ni pwoson, Kauno kin ekis ekis wikidkitailla. Kitail alehdi Sapwellime Mwohmw oh tepda direkihla limpoak oh Sapwelime lingan.7 Ni atail duweduwehla Ih, kitail pahn ahneki meleilei en nan ihmwatail nan Tehnpese, oh E pahn kak ketiket nan imwatail.
Kitail kak kakehlailih uwen keren en imwatail oh Sapwellime Tehnpas sang ni atail warohng oh kalapw doadoahngki mweimwei en pidelong nan tehnpas sarawi uwen me kitail kak. Ni atail wiewia, sarawi en tehnpas en Kauno pil kin ketiket nan imwatail.
Tehnpas Sarawi en Salt Lake kesikesihnen karanih wasaht. Ni ah wiawikihda sang rehn mehn mwowehko oh sang ni dipwisou en doadoahk sohte mwahu, oh kanengeh kan sang wasa keren, oh poaden doadoahk, tehnpas sarawio wie koukouda sang pahr 1853 lel pahr 1893. Uwen doadoahk en wiepen poahsoanpen ihmw, pilahn en ihmw, oh audepen masloalen ihmw me tohn Mwomwohdiso ko kak kihda wiahda mehkot me sipelehla kaselel oh me aramas million kei kin kasawih.
Kereniong pahr 130 samwalahr sang ahsnou me tehnpas sarawio kasarawihla. Me duwehte Elder Gary E. Stevenson intingihdi aio, dipwisoun dodohk oh ire kesempwal akan me wiahda tehnpas sarawio welialidahr ong ni dipwisou kapw oh mehn poadondor mwahu koai. Ma kitail sohte kamwahuiahla wiepen tehnpas sarawio oh onehda paliwereo, e duwehte me kitail pangala koapwoaroapwoar en mwehn mwowehko, me wia uwen arail kak oh uhd likih kadaudokarail en apwalih tehnpas sarawio.
Mwomwohdiso tapiadahr doadoahk en onohn erein sounpar pahieu pwehn kalaudehla uwen kehlail en paliweren tehnpas sarawio oh uwen teng en poahsoanpe.8 Poahsoan, taht kan, oh dihd kan pahn kehlailla. Loalokong en wiepen ihmw me keieu mwahu pahn doadoahk pwe tehnpas sarawio en kak kehlail duwehte ihmw en rahnpwukat. Kitail pahn sohte kak kilang dahme wikila loale, ahpw wikila pwukat me mehlel oh kesempwal. Nin dokon doadoahk wet, uwen kaselel en masloalen tehnpas sarawio pahn duweduwehte.
Kitail en idawehn karasaraso me kohsang onohnsapahlpen Tehnpas Sarawi en Salt Lake oh pwilikihdi ahnsou pwehn dawihala wiepen pein ngenitail oh tehk me e kapwte. Pein atail kalapw petehk, patapatehng atail kalelepak rehn Kauno “Dahme I en pil wia?“9kak sewese kitail en iang kauwada wasahn kousoan ehu me keieu kaselel.
Kapaieu, wasahn kousoan akan me keieun kaselel iei me wia wasahn rukasang melimel en mour. Kauno inoukihong kitail me irail kan me kin kapwaiada kosonned en Koht kin “pweida nan sahpw.“109 Pweidahn Koht iei manaman en dadaur mehndahte kahpwal en mour akan.
Ni pahr 2002 I esehla padahk kesempwal ehu duwen kahpwal akan. Nan ahi mihmi Asunción, Paraguay, I tuhwong steik presiden kan en kahnimwo. Ahnsouwo, mie kahpwal en mwohni suwed nan Paraguay, oh tohto en tohn Mwomwohdiso ahneki lokolok oh sohte kak pweida mwahu. Ih ehd en ahi kohla South America mwurin ahi misin oh I saik kohla Paraguay. I wia soun papah men nan Area en Presidensi nan erein wihk kei. Ni ahi pwunodki ahi sakoahiek en panawih steik presiden ko, I peki irail en kesehkinie duwen dahme kin pweida mwahu nan arail steik kan. Steik presiden keieuo indahiongie duwen dahme kin pweida mwahu. Me mwuriho kapatapatki soahngkei me kin pweida mwahu oh pil kahpwal kei. Ni atail lel steik presiden me keieu mwuhr, e koasoaiahte duwen dir en kahpwal suwed. Nin dokon steik presiden ko arail kawakawehwe duwen lapalahn arail kahpwalo, I pwunopwunodada, kereniong mwoarosla, duwen dahme I pahn inda.
Mwohn te stake president ah pahn kaimwsekla ah kosoi de padahk, madmadau ieu kohdo nan mongeiet: “Elder Clayton, peidekiong irail peidek wet: ‘Presiden kan, sang rehn irail kan me kin wia arail meirong en eisek-kis ehu, kin kadek nan arail meirong en kaisihsol, kin kalaudehla arail pwukoah kan nan Mwomwohdiso, kin udahn tuhwong arail peneinei kan ni doahk en Home Teaching de Visiting Teaching11sounpwung koaros, kin soutik en peneinei, kin wadek pwuhk sarawi kan, oh kin kapakap pene nan peneinei rahn koaros, irail me depe me sohte kak powehdi arail kahpwal akan ma Mwomwohdiso sohte pahn kohlong oh kapwungala arail kahpwal akan?’”
Mwadang en sapeng kapehm me I alehdio, I peidekiong steik presiden ko peideko.
Irail pwuriamwei oh nennenla ni arail kilangodohngie, indinda “Pues, ninguno,“ wehwehki, “Pwe, sohte emen.“ Irail ahpw indahiongie me sohte emen tohn Mwomwohdiso me kin wia soahng pwukat koaros ahneki kahpwal akan me irail sohte kak pein kapwungala. Pwehda? Pwehki arail kin mihmi nan wasahn kousoan akan me keieu kaselel. Arail mour lelepek kan me kihong irail uwen kehlail, iroir sansal, oh sawas en nanleng me irail anahne pwe irail en dadaur oh momour nan kahpwal en mwohni me mihmi nan arail wehi.
Kaidehn met wehwehki me irail kan me lelepek sohte pahn soumwahuda, loiohng ohla, ahneki wikidek suwed nan doadoahk, de loiohng soangsoangen kahpwal akan nan mour. Mour en sampahwet kin kalapw kahrehda kahpwal akan, ahpw pahk tohtohie I kilang me irail kan me kin nannantihong kapwaiada kosonned akan kin kapaida pwe irail en diar elarail ni meleilei oh koapwoaoapwoar. Kapai kat ong aramas koaros.12
Depit me mahsani, “Ma KAUN-O sohte ketin kauwada ihmwo, doadoahk en sounkou ihmw kan pahn sohte katepe.“13 Mendahte wasa me ke mihmi ie, mwomwen imwomw, oh sohte lipilipil ia mwomwen ahmw peneinei, ke kak kauwada wasahn kousoan me keieu kaselel ohng ahmw peneinei. Rongamwahu en Sises Krais kopwurupwurdohr me kamangaida koasoandipen wasahn kousoano. Sounkomouro me sounwiepe, sounkou, oh sounaude unsek. Sapwellime doadoahk iei unseklahn oh popohl soutukpen ngenitail. Sang ni sapwelime sawas en limpok o, palingenimwen kak wia woahn me e kupwurki kehn wiahla oh ke wiahla aramas mwahu oh kaselel men, me kounopadahr en iang kouson nan wasahn kouson me keieu kaselel.
I kadehdehki ni kapingkalahngan me Ih me Koht oh Sahm en kitail koaros ieiaste. Sapwellime Iehros, Kaun Sises Krais, me Sounkomour oh Soundoarpen aramas koaros. Ira loalloale kitail ni unsek. Mwomwohdiso en Sises Krais en Souleng En Imwin-rahn akan me Sapwellimen Kauno wehi pohn sampah. Soukohp oh Wahnpoaron ieias akan me kawakaweidte. Pwuhk en Mormon me mehlel. Sapwellimen Sises Krais rongamwahu kopwuropwurdohu me wia mehn kaweid unsek en kawada wasahn kousoan me keieun kaselel. Ni mwaren Sises Krais, ahmen.