E Kin Ketiket Mwohtail
Kauno ketin kawkaweid Kopwuropwurdohn Sapwellime Rongamwahu oh Mwomwohdiso. E ketin mwahngi mwohtail. E ketin luke kumwail ong doadoahk wet.
Riei ohl oh lih akan, I kaping kalahnganki ei pil iang patehng kumwail nan kapokon lap wet en Mwomwohdiso en Sises Krais en Souleng en Imwin Rahn akan. Presiden Russell M. Nelson inoukidahr me kitail sohte pahn kak manokehla kapokon wet ma kitail pahn kawaidada ah luhk en medewehla duwen ia mwomwen Kopwurpwurdohn Sapwellimen Kauno Mwomwohdiso kapai kitaildahr oh pil kapaiadahr kempoakepatail kan.
E sansalongie me I pahn kin tamataman kapokon lap wet, duwehte kumwail. Emenemen kitail me pahn pein pilada en tamataman de manokehla. I inenen kesempwalki met pwehki uwen laud en wekdekla me I ahneki ni ahi wia kaukaunopehng kapokon lap wet. Mweidehng ien kawehwe.
Ni ahi wia ahi kaunop I diarada ire ehu me pid Kopwurpwurdohu. Pak tohto ehr me I wadek ire wet, a ansou koaros I kin wiahki me ihte e wia repwoht en mihting kesempwal ehu me pid Joseph Smith, soukohp en Kopwurpwurdohu. Ahpw ansou wet, I kilangada nan ire wet ia mwomwen Kauno eh kin kaweid kitail, iei Sapwellime tohnpadahk kan, nan Sapwellime Mwomwohdiso wet. I kilangada ia kesempwal pen atail pahn kin ahneki kaweid sang rehn Sounkomour en Sampah, iei Sounkapikipiko—me ketin mwahngi mehkoaros, mahs, met, oh mwuhr. E kin ketin padahkihong kitail ekis ekis oh kaweid kitail, sohte kin limeidihd.
Mihting me I kaukawehwe wia ansou kesempwal ehu nan Kopwurpwurdohu. E wia mihting en rahn en Sapad ehu ni Epreil 3, 1836, [kid welipwiki silihsek weneu] nan Tehnpas Sarawi en Kirtland nan Ohio, rahn isuh mwurin eh kasarawihla. Joseph Smith kawehwe duwen ansou kesempwalo nan poadopoad en sampa ni wiepe mengei ehu. Pali laud en ah kawehweo ntingdi nan Doctrine and Covenants irelaud 110:
“Mwurin souwaso, I sewese Presiden teikan kihseli Kamadipw Sarawi ong tohn Mwomwohdiso, ni eh alahldi sang meh Ehk-riemenko, me kolokol pwukoa en kasarawi sahko ni rahno. Mwurin ahi sewesedahr riei ohloko, I pwurala ni mwoahlo, kahdengo ritidi, oh ngehi, iangahki Oliver Cowdery, eri poaridi nan kapakap. Mwurin aht sarada sang kapakap, kasansal wet pwarohng kiht koaros.“1
“Kahdengo salongasang nan aht madmadau, oh masat kan kilangada wasa.
“Se kilangada Kauno keskesihnen pohn mwoahlo, mwoht; oh pahn aluweluwe ko siment medendelki kohl, poh oangoahng.
“Sihlangih kan duwehte umwpwul en kisiniei; piten tapwi kan pwetepwet duwehte sino; sihlangih marain sang marain en ketipin; oh kepitie duwehte lapake, iei kepitien Siohwa, mahmahsani:
“Ngehi me tapi oh imwi; ngehi me ieias, ngehi me kamakamalahr; ngehi me wia weliapamwail rehn Sahmo.
“Kilang, dipamwail kan lapwadahr; kumwail mwakelekeladahr rehi; kahrehda, kumwail en sarada oh pereperen.
“Mohngiong en riamwail kan en perenda, oh mohngiong en sapwellimei aramas koaros en perenda, me, sang ni arail kehl koaros, kauwadahr tehnpas wet ni mwarei.
“Pwe kilang, I kupwurelahr tehnpas wet, oh mwarei pahn ketiket loale; oh I pahn ketkihiong pein ngehi rehn aramas kan ni kalahngan nan tehnpas wet.
“Ei, I pahn pwarehng sapwellimei ladu kan, oh mahsaniong irail ki kepitiei, ma sapwellimei aramas akan pahn kolokol ahi kosonned akan, oh sohte kasaminehla tehnpas sarawi wet.
“Ei mohngiong kan en meh kid kei pahn perenda mehlel pwehki kapai kan me pahn mweredi, oh endaumen me sapwellimei ladu kan pahn tungoalenkihdi nan tehnpas wet.
“Oh rohng en tehnpas wet pahn lella nan wein liki kan; oh met iei tepdahn kapai kan me pahn kohieng pohn sapwellimei aramas akan. Iei met. Amen.
“Mwurin kasansal wet eh sohrala, nanleng kan pwurehng ritidahng kiht; oh Moses pwarada mwoht, oh kihong kiht kih kan en kapwurepenehn Israel sang keimw pahieu kan en sampah, oh kahluwahdo keinek eiseko sang sahpw me mih paliepeng.
“Mwurin met, Elias pwarada, oh patohwenda rongamwahu en Abraham, nda me kitail oh kadaudokatail kan koaros mwuritail pahn kapaida.
“Mwurin kasansal wet eh sohralahr, pil ehu sansal lingan pil pwarada poht; pwe Elijah, soukohp me peukdahla nanleng ni eh sohte mehla, kesihnenda mwoht, oh nda:
“Kilang, ansouo lellehr, me soukohp Malakai kohpadahr—kadkadehde me [Elijah] pahn pekederdo, mwohn rahn lapalap oh kamasepwehko en Kauno eh pahn leledo—
“Pwehn wekid mohngiong kan en pahpa kan ong serihkan, oh serihkan ong pahpa kan, pwe sampa pwon en dehr riahla—
“Ihme kahrehda, kih kan en mwehi wet pwildiher nan pehmwen; oh pwehki met, kumwail en ese me rahn lap oh kamasepwehk en Kauno kerendohr, mihier ni wenihmwko.“2
Met, I wadekehr ire pwukat pak tohto. Ngehn Sarawi kamehlelehiongiehier me mepwukat mehlel. Ahpw ni ahi onopiki oh kapakapki pwehn kaunopehng kapokon wet, I kalaudehla uwen ahi wehwehki duwen manaman en Kauno eh kin kaweid ni pisetik Sapwellime tohnpadak kan nan Sapwellime doadoahk.
Sounpar isuh mwohn Moses ah patohwenohng Joseph kih kan en kapwurepenehn Israel nan Tehnpas Sarawi en Kirtland, “Joseph esehier sang tehn daidel en Pwuken Mormon me kahrepen pwuhko iei en ‘kasalehiong tohn wehin Israel … me irail en ese inou kan en Kauno, pwe irail en dehr lekidekla kohkohlahte.’ Nan pahr 1831, [kid welipwiki silihsek ehu] Kauno mahsanihong Joseph me kapwurpwurpenehn Israel pahn tepida nan Kirtland, ‘Oh sang wasao [Kirtland], mehmen me I pilada pahn kohla nan wehi koaros … pwe Israel pahn pitila, oh ngehi me pahn kahluwa irail.’”3
Mendahte doadoahk en misineri e anahne wiawi pwe kapwurepenehn Israel en pweida, Kauno padahkihong meh Ehk-riemeno, me wia tepin misineri kei, “Tamataman, kumwail en sohte kohla nan wehi teikan, lao lel kumwail alehier amwail endaumen.“4
Likamwete Tehnpas Sarawi en Kirtland wia wasa kesempwal ehu nan Sapwellimen Kauno koasondi pwehki kahrepe riau: Keieu, Moses awih lao tehnpas sarawio wiawihdahr ih uhd kapwurehdo kih kan en kapwurpwurepenehn Israel. Oh keriau, Presiden Joseph Fielding Smith padahngki me ”Kauno ruwesehki Souleng kan en kauwada ehu tehnpas [Tehnpas Sarawi en Kirtland] wasa me e kak kihda kih kan en manaman oh wasa me wahnpoaron kan kak alehdi endaumen oh kaunopada en wia doadoahk nan sapwellime mwetuel en waino.”5 Mendahte wiepen endaumen en tehnpas sarawi me kin wiawi ansou wet sohte wiawi nan Tehnpas Sarawi en Kirtland, pwehn kapwaiada kokohpo, tiahk sarawi kan tepida kasosohngda wasao, pateng pepehm en ngehn sarawi laud me kakehlailiada irail kan me malipilipieng nan pwukoa en misineri iangahki endaumen en inou en ”manaman sang powe” me kahrehda kapwurpwurpene laud pweida nan doadoahk en misineri.6
Mwurin kih kan en kapwurepenehn Israel kohieng Joseph, Kauno kamarainih Soukohpo en kadarpeseng tohn Ehk-riemeno nan misin kan. Ni ahi onohnop, e sansalehng ie me Kauno ketin kaunopadahr ni pisetik mwomwen en meh Ehk-riemeno ar pahn kohla nan misin kan wasa me aramas akan onopadahr pwehn kamehlele oh utung irailda. Mwurin ansou kis, pwehki irail, meh kid kei towehla Mwomwohdiso en Kauno.
Nin duwen atail poadopoad, ele uwen totohn aramas mih nan pwungen 7,500 [isikid limepwiki] oh 8,000 [welikid] me pepdaisla erein misin riau me meh Ehk-riemeno wia nan dekehn Britian kan. Met wiahda poahsoan en doadoahk en misineri nan Europe. Met me poahsoanehdi doadoak en misineri nan wehin Europe, oh ni imwin dih kehisek duwau meh 90,000 sumwa samwedohr Amerika pali laud en irail patohsang dekehn Bitian kan oh Scandinavia.7 Kauno ketin kamaraini Joseph iangahki misineri loaloapwoat ko me kohla doadoahk pwe ren kak kapwaiada pwukoa ehu me mwomwen inenen apwal. Ahpw Kauno, pwehki Sapwellime kupwurekeng oh kaunopada mwahu, mweidehng en kak pweida.
Kumwail tamataman mahsen me mwomwen mengei oh kaselel nan irelaud 110 en Doctrine and Covenants:
“Kilang, ansouo lellehr, me soukohp Malakai kohpadahr—kadkadehde me [Elijah] pahn pekederdo, mwohn rahn lapalap oh kamasepwehko en Kauno eh pahn leledo—
“Pwehn wekid mohngiong kan en pahpa kan ong serihkan, oh serihkan ong pahpa kan, pwe sampa pwon en dehr riahla—
“Ihme kahrehda, kih kan en mwehi wet pwildiher nan pehmwen; oh pwehki met, kumwail en ese me rahn lapalap oh kamasepwehk en Kauno kerendohr, mihier ni wenihmwko.“8
I kadehde me Kauno ketin pilahnehla ni pisetik ia mwomwen e pahn kaluwai kitail pwe kitail en kak sewese ih en kapwaiada Sapwellime kupwur nan imwin rahn pwukat.
Ni ansou me I papah nan Pisoprik me Kakaun sounpar kei samwalahro, I pwukoahki apwali pwihn ehu me kauwada dahme kitail kin kahdanki FamilySearch. I kin kanaiehng ni ahi nda me I “apwalih“ kokoudahu, pwe kaidehn ngehi me “kauwada“ doadoahko. Tohtohn aramas loaloakong pwilikihdi arail doadoahk oh kohdo pwehn kauwada dahme Kauno kupwurki.
Presidensi Keieu koasonedier en katikala poalongolongadahn tiahk sarawi kan. Arail irehn kapwunod keieu laud iei ma e sohte sansal ma en emen me mehlahr ah tiahk sarawi kan wiawiehr de saik. Erein sounpar kei—de uwen ansou me duwehte sounpar kei—Presidensi Keieu kin peidek rehi, “Iahd me komw pahn wiahda met?“
Iang kapakap, pwerisek, oh tohnmetei en aramas koahiek kan, doadoahk wet pweidahr. E wiawi ekis ekis. Keieun pwukoaho iei en kamangaiala doadoahngki FamilySearch ong aramas me sohte wehwehki kampiuder kan. Wekdekla tohto kohdo, oh I ese me re pahn kohkohdote, pwe ansou me kitail kin song en kapwungala mehkot, kitail kin langahda wenihmw ong pil doadoahk kapw me pil kesempwal ahpw se sohte kasik. Pil rahnwet, FamilySearch wiwiahla dahme Kauno ketin kupwurki ong Sapwellime Kopwurpwurdohu—kaidehk te en irehdi poalongolongdahn tiahk sarawi kan.
Kauno ketin mweidehng kiht en kapwungala mehkan pwehn sewese aramas en wehwehkihla oh poakehng arail pahpa/nohno kahlap kan oh kanekehla arail tiahk sarawi en peneinei kan en nan tehnpas sarawi. Met, ni Kauno ah ketin mwahngiehr me e pahn wiawi, me pwulepwul kan samanialahr doadoahngki kampiuder oh kin sesewese pahpa/nohno kan oh tohn ward kan. Koaros diarehr popohl laud nan doadoahk wet.
Ngehn en Elijah wie wekwekid mohngiong kan en me pwulepwul oh mah, serihkan oh pahpa/nohno, nein neirail serihkan oh pahpa/nohno kahlap kan. Tehnpas Sarawi kan wiewia pepdais oh tiahk sarawi teikan. Ineng en papah atail pahpa/nohno kahlap kan oh ehupene en pahpa/nohno kan oh serihkan wie kekeirda.
Kauno kilangehr mepwukat koaros. E ketin koasonedier mepwukat, ni pisetik, duwehte wekdeklahn soahng teikan nan Sapwellime Mwomwohdiso. E ketin kakairadahr oh kaunopadahr aramas loaloapwoat kan me kin pilada ren wia oh kapwaiada doadoahk apwal kan. Ansou koaros e kin kanengamah ni limpoak sesewesei kitail en esehla “ehu ehu pwuloi, ehu ehu ire, ekis me oh ekis mwo.“9 Sapwellime koasoandi kan kin pweida nin duwen Sapwllime ansou, ahpw e ketin inoukihda me atail tohnmetei pahn wia kapai laud oh pil kin kihong kitail kapai laud.
I kaimwsekala ni ei wia ahi kaping kalahngan ong Kauno—me ketin kamaraini Presiden Nelson en luke ie pwehn wia ahi tohnmetei ni ahi kaunopehng kapokon wet. Awa koaros oh kapakap koaros wahdo kapai kan ni ahi wie kaukaunop.
I luke koaros me rong padahk wet de wadek lepin mahsen pwukat en pwoson me Kauno ketin kakahluwa Kopwurpwurdohn Sapwellime rongamwahuo oh Sapwellime Mwomwohdiso. E kin ketiket mwohtail. E ketin mwahngi mwohtail. E ketin luke kumwail ong doadoahk wet. E ketin ieiang kumwail nan doadoahk wet. Mie sapwellime koasondi ong amwail papah. Oh ni amwail pahn tohnmetei, kumwail pahn diar popohl ni amwail sewese mehteikan en onopada ong Sapwellime sapahldou.
I kadehdehiong kumwail me Koht Sahm ieias. Sises iei ih me Krais. Sapwellime Mwomwohdiso met. E mwahngih ihs kowe oh poakong uhk. E kin kaweid kumwail. E ketin kaunopadahr ahlo ong komwi. Ni lengileng sarawi en Sises Krais, amen.