Kohdo oh Towehda
Se luke Sapwellimen Koht seri koaros nan sampah en iang kiht nan doahkdoahk poatoapoat kesempwal wet.
Rioai mwanakapw oh peinakapw akan koaros, kompokepahi kan koaros, nan ehu ehu wihk toweh kan en Mwomwohdiso en Souleng en Imwin-rahn Akan nan sampah kin papah Samatail Nanleng, iei Koht oh Nanmwarki en wasa koaros, oh Sapwellime Pwutak Kempoake, Sises Krais. Kitail kin loaloale duen mour oh padahk kan en Sises Krais—ih kelehpw me sohte dipe, iei emen sihp en Koht sohte mie mwahi. Nan ansou kan ma kitail kak, kitail kin ale kamadipw sarawi pwehn katakataman Sapwellime tohnmetei oh pohnese me Ih me wia poahson en atail mour kan.
Kitail kin poakpoake oh kitail kin wahuniki. Pwehki Sapwellime sapan oh limpoak poatoapoat, Sises Krais lokolokehr oh pwoula pwehki kowe oh ngehi. Eh ketin kawela ritingada wenihmw en mehla, itikada kahpwal akan me mih nan pwungen kempoakepah kan oh me limpoak kan1 oh wahdo koapwoaroapwoar ong me sohte ahniki, kamwahuila me soumwahu, oh doarehla me sensel kan.2
Ohng Ih kitail kiohng atail mwohngiong kan, atail mour kan, oh atail ansou ohng Ih. “Ihme karehda kitail kin koasoia Krais, kitail kin kapingki Krais, [oh] kitail kin kalohngki Krais, kitail kin kokohpki Krais, … pwe nait serihkan en kak ese ia wasa re kak diar ie lapwepen diparail kan.”3
Kasikuhlki Duen Tohnpadahk
Ahpw, wia tohnpadahk en Sises Krais pidada mehkot me laudsang koasoakoasoaia oh padapadahngki duwen Krais. Pein Sises kelehpw kapwurehdo Sapwellime Mwomwohdiso pwehn sewese kitail ohng nan ahl en duwehla Ih. Mwomwohdiso en Sises Krais en Souleng en Imwin-rahn Akan koukouda pwehn wia kamengei en kasikuhlki duwen tohnpadahk ni oaralap. Sang ni atail pahn patpatehng Mwomwohdiso, kitail esehla kehnda oh idawehn kepitien Ngehn Sarawi. Kitail kalaudehla atail kalapw sawas ohng ekei ni atail poakehla oh kadekohng mehteikan.
Ngoang wet pahn kokohlate erein, oh mie anahnepen kasikuhl en wiawi.
Tohn mwadong kan me kin pweida re kin doadoahngki awa tohto kaskaskuhlki duwen arail mwadong kan. Nin duwen tohn doadoahk en imwen wini kan, inderned, pwihn en sains, oh iangahki sounsiai en kuk nan Harriet kin koahiekla oh kin samaniala ma kitail kin ngoangki.
Ni ei wia Kapitin en sounpihr men, I kin kalapw padahkiong pwailet kan en kin doadoahngki dipwsou iou me adahniki simulater—dipwsou ehu me kin sawas ni ansou en pipihr. Simulader wet sohte sewesehte pwailet kan en esehla duwen pipihr; eh kareiong irahil en pil esehla oh kak katanga sounpihr ma mie kahpwal sohkasikpe pwarada.
Padahk kan duwehte tohnpadahk mehlel men en Sises Krais.
Nantiohng kalapw patehng nan Mwomwohdiso en Krais oh soangen mehn kamengei tohto kan pahn sewese kitail en onopada mwahu ohng mour soh kasikpe, me kakete pwarada. Ni atail wia toweh en Mwomwohdiso, kitail anahne duhkila mahsen en Koht sang Sapwellime soukohp kan, en mahs oh rahn pwukat. Sang ni atail mehlel oh kapakap karkarahk ong Samatail Nanleng, kitail esehla rong Ngehn Sarawio. Kitail kin alehda pwukoah kan pwehn sewese, padahk, oh plahn, oh papah, oh kihwei anahn. Mepwukat kitail kin ahniki ansou mwahu en kekehirda ni palingehn, madmadau, oh wiewia.
Re pahn sewesei kitail onopada en wiahda oh kolokol kosonned sarawi kan me pahn kapai kitailda nan mour wet oh me pahn kohdo.
Kohdo, Iang kiht!
Se luke Sapwellimen Koht seri koaros nan sampah en iang kiht nan doahkdoahk poatoapoat kesempwal wet. Kohdo oh Kilang! Pil lel ansou en kahpwal en coronavirus, tuhwong kitail nan wehwe. Tuhwong nait misineri kan nan wehwe. Pein rapahki oh diarada ia mwomwen mwomwohdiso wet! Mwurin kahpwal wet, tuwong kiht nan imwaht kan oh nan wasahn kaudok kan!
Se luke kumwail en kohdo oh sawas! Kohdo iang kiht, papah sapwellimen Koht seri kan, idawehn karasaras en Sounkomouro, oh kamwahuwiala sampah.
Kohdo oh Towehda Ke pahn kareiong aht pahn kelahilda. Oh ke pahn mwahula, kadekla, oh pil iangahki peren. Amwahil pwoson pahn laudla oh kekehirda laud—oh kak en kesihnenda oh pelian kahpwal me sohte kasikpe en mie nan mour.
Oh ia mwomwen atail pahn tepda? Mie soahng wiepe tohto.
Se luke ken wadek Pwuhk en Mormon. Ma sohte noumw pwuhk, ke kak wadek nan ChurchofJesusChrist.org4 de dahunlohud Pwuhk en Mormon Ahp. Pwuhk en Mormon wia ehu kadehdepen Sises Krais oh iengen Kadehde Mering oh Kadehde Kapw. Se pereniki pwuhk sarawi pwukat oh esehla sang loale.
Se luke kumwahil en kohla nan ComeuntoChrist.orgekei pak pwe kumwahil en esehla dahme toweh kan en Mwomwohdiso kin padahki oh kamehlele.
Luke misinery kan en kin pwarek kumwail nan wehwe de kelehpwla nan ihmwomw mah e kak—mie arail rohng en koapwoaroapwoar oh kamwahula. Misineri ka iei nahit pwutak oh serepein kesepwal kei me wie papah nan wasa tohto nan sampah ni pein arail ansou oh neirail mwohni.
Nan Mwomwohdiso en Sises Krais, kumwail pahn diar peneinei kan en aramas me sohte weksang kumwail. Ke pahn diar aramas me anahne ohmw sawas oh me men sewesei iuhk ni ohmw soangosong en wiahla ihs kowe—aramas me Koht wiahda pwe ken wiahla.
Sounkomouro kasamwoh aramas koaros
Mwehin ke pahn medemedewe, “I wiadahr sapwung nan ei mour. I seselahr ma I kak pwurehng kehnda ei wia toweh en Mwomwohdiso en Sises Krais. Koht sohte pahn pereniki aramas me duehte ngehi.”
Sises iei Krais, mendahte ma E wia “Nanmwarki en nanmwarki kan,”5 iei Mesaia, “Sapwellimen Koht Ieias,”6 me udahn kesempwaliki emen emen sapwellime seri kan. Eh kesemwpalkin kitail mendahte—ma kitail semwehmwe de kepwehpwe, ia uwen atail sohte unsek de uwen atail kak. Erein Kauno Eh wie momour pohn sampah wet, Sounkomouro papah aramas koaros: ohng me peren oh pweida, ohng me tiwohla oh salongala, oh ong irail me solahr arail kapwoaropwoar. Ekei pak, aramas me E sewese oh papah iei kaidehn aramas en wadawad, masamwahu, de insenamwahu. Ekei pak, aramas me e sewesehda sohte ahniki mehkot laud mehn kasapahl kalangan ahpw kadehk, mwongiong karkarahk, oh ahniki ineng laud en pwoson.
Ma Sises Krais nan ah ansouo wie papah ohng “aramas pwukat,”7 E sohte pahn poakpoake irahilda rahnwet? Mie wasa nan Mwomwohdiso me sohte dowen Sapwellime seri kan koaros? Pil ong irail me ahniki peikasal en warohng, salongala, de kelekelehpw.
Sohte mehkot me ke kak wia pwehn unsekla pwe ken kak warohng limpoak en Koht. Ohmw kapakap sohte anahne en ngihl laud de mwohmw mwahu de inda pwung pwehn lel dahla nanleng.
Ni mehlel, Koht sohte lipilipil8—Eh sohte wiahki mehkot dipwsou kesempwal kan en sampah. Eh wewehki ohng mwongiong, oh Eh poakpoakei uhk sohte lipilipil ihs kowe, ma dir en nohmw mwohni de dir aramas me kin dawehn uhk nan Instekram.
Ma kitail pahn kainenehla atail mwohngiong kan ong Samatail Nanleng oh kohdo Reh, kitail pahn kehn me e mihmi retail.9
Kitail wia Sapwellime seri kesempwal.
Iangahki irail kan me sohpeisang Ih.
Iangahki irail me, sohte kin men rong, duwehte seri ketihwo, me insenuedla rehn Koht oh Sapwellime Mwomwohdiso, mwomwedahte wahda arail dipsou kan, oh pidohi sang nan ihmw ni arail koasoanehdi en samwalahteiou oh sohla pwuredo.
Ni ansou me seri men kin tangasang nihmwe, mwehin re ese duwen papah oh nohno kan arail kin kilikilang wei nan wenihmw tok. Sang ni mwohngiong mwuterek, re kilang neirail seri kan kokohla—ni koapwoaroapwaor me neirail seri keneinei pwukat pahn esehla mehkot sang nan mwekid wet oh mweihn kak pwurehng kilangada wasa duwen mour—oh pwuredo nimwarail.
Pil duwehte limpoak en Samatail Nanleng. Eh ketin awiawi iahd kitail pahn pwurodo.
Atail Sounkomour, pilenmese dirikila limpoak oh poakehla, awiawih ni ohmw pahn pwurodo. Mendahte ma ke kehn ohmw dohsang Koht, Eh pahn kilang uhk; Eh pahn poakehiuhkala oh mwadangete kasamwo iuhk10
Kohdo oh Towehda.
Koht kupwurki kitail en esehla ni atail wiahda sapwung.
Kitail wia soun seilok kei me wie aliualu pohn ahl ni atail wie raparapahki duwen me mehlelo. Ekei pak, kitail kin kilangte ahl me mih mwotahil—kitail sohte kak kilang iawasa me ahlo pahn waikitahila ie. Samatail Koht me limpoak saikinte kihong kitail pasepeng koaros. Eh kupwurki kitahil en esehla me tohto sang pehin kitahil. Eh kupwurki kitahil en kamehlele—pil lel ni ansou me kitahil apwaliki en wia.
Eh kasik kitail en kainenekitahilda oh kalaudehla ekis atail pweidahkan—ekis ngoangki—oh pwurehng sokala mwowe.
Ih mwomwen atail pahn kak esehla oh kekeirda.
Ni mehlel ke pahn mwahuki soang koaros en kin kawehwe ni pisetik? Ke men peidek koaros en mie pasapengpe? Wasa koaros miher nan mapo?
I kamehlele me pali tohto en kitail pahn mwadangete pwangakihda kisin koasoandi kaperen wet. Kitail esehla padahk kesempwal kan duen mour sang ni atahil wiwiakan. Sang ni atail pahn esehla sang atail sapwung kan. Sang ni koluhla oh pein esehda me wiewiahn “dihp sohte kin wia mehkot kaperen.”11
Sises Krais, Sapwellimen Koht Iehros o, ketin pwoukin kitaila pwe atail sapwung kan en dehr soikitaila oh dehr pweida. Pwehki Ih, kitail kak koluhla, oh atail sapwung kan kak wiahla atail mehn kakelahil ong nan wehi lapalapo.
Ke sohte anahne kelehpw alu nan ahl wet. Samatail Nanleng sohte kin mweidohng kitail en mihmi seli nan rotorot.
Ihme karehda, nan spring pahr 1820, Ih oh sapwellime Iehros, Sises Krais, pwarehng pwutak pwulopwul men, iei Soseph Smith.
Na ekis medemedewe duwen met! Koht en nanleng oh sampah pokon pwarehng aramas emen!
Met me wia keiou en mwekid kan me wiawieng Sohsep rehn Koht oh rehn ekei tohnleng en nanleng. Koasoai tohto me tohnleng pwukat masanih ohng ih ntingdier nan pwuhk sarawi kan en Mwomwohdiso en Sises Krais en Souleng en Ihmwin-dahn Akan. E mengei en alahldi. Emen emen kak wadek oh pein esehla rohng kan me Koht Sapwellimankiong kitail rahn wet.
Se luke kumwail en pein onopiki mepwukat.
Soseph Smith udahn pwulopwul ni ansou me eh alehdi kaudiahl pwukat. Pali laud eh alehdi mwohn eh sounpar 30.12 Eh sohte nohn koahiok, oh ong ekei aramas, eh mwomwen me e sohte lel irahir en wia Sapwellimen Koht soukohp.
Apw iet Kauno pil likwerih—ideidawen ni pwung kitail pahn diarada sohng koaros nan iren pwuhk sarawi kan.
Koht sohte awih pwe en diarada aramas me unsek pwehn kapwurehdo rongamwahuo.
Ma Koht pahn awih, E pahn wie awiawihete.
Sohsep duwehte kowe oh ngehi. Mendahte Joseph ah pil kin wiahda sapwung, Koht doadoahngki ih pwehn kapwaiada Sapwellime koasondi kesempwalo.
President Thomas S. Monson kin kalapw koasoaia lokaiahn koangoang wet: “Me Koht Ketin Malipe, Ihme Koht ketin Kupwurki.”13
Wahnpoaron Paul wewehieng Souleng kan nan Korint: “Riei ko, kumwail tamataman ia duwen kumwail ahnsou me Koht ketin malipei kumwail. Me malaulau rehmwail me loalokong, de manaman, de lapalap, nin duwen lamalam en sampah”14
Koht kin ketin doadoahngki aramas luwet oh mengei pwehn kapwaiada sapwellime koasondi kan. Mehlel wet wia ehu kadehde me sang en Koht manaman, kaidehn en aramas, me kin kapwaiada sapwellime doadoahk pohn sampah.15
Rong Ih, Idawehn Ih
Ni ansou me Koht pwarehng Sohsep Smith, Eh ketin kasalehdo sapwellime Iehros, Sises Krais, oh masanih, “Rong Ih!”16
Erein en Sohsep momour e kin wie rongorong oh kalapw idawehn Ih.
Rasehng Joseph, atail wia tohnpadahk tepseng ni atail pilada en rong oh idawehn Sounkomour Sises Krais.
Ma ke inengieng en idawehn Ih, ahniki pwoson kelahil oh kapahikada Sapwellime lohpwuo.
Ke pahn kilang me ieike wia kisehn sapwellime mwomwohdiso—wasa me kansenamwahu oh saledek me ke kak iang patehng pwihn en papah oh kaperen.
I kapwoaroapworki me, nan pahr riepwuki wet sang ni Keioun Kokohp, ni atail mengimengiloaliki oh esehla kepwurupwurdohn Mwowmohdiso en Sises Krais, kitail pahn kilang me eh sohte wiahte ehu rahn me poadoapoad. Kowe oh ngehi wia kisehn poadoapoad kesempwal wet, me sohte ihmwi.
Eri, ia ahmw oh ahi pwukoah?
Iei en esehla Sises Krais. En onopiki sapwellime mahsen kan. En rong Ih oh idawehn Ih sang ni ngoangki patpatehng nan doadoahk kesempwal wet. I luke kumwahil en kohdo oh towehda!
Ke sohte anahne wia aramas unsek men. Ke anahnete ahniki ineng en kalaudehla ohmw pwoson oh karanih ih nan ehu ehu rahn.
Atail pwukoah iei en poakohng oh papah Koht oh poakohng oh papah sapwellimen Koht seri kan.
Ni amwail pahn wia met, Koht pahn kapilkin kumwailpene Sapwellime limpoak, peren, oh mehn kaweid kan en nan mour wet, mendahte ma mie kahpwal me laud, de pil laud sang.
Sang ni mepwukat I kadehdeki oh pwulikihdi ong kumwahil ahi kapai ni karakarahk oh ei limpoak ohng emen emen kumwail, ni mwar sarawi en ai Soundor, atail Kaun—ni mwaren Sises Krais, amen.