Mehn Ketemen Kesempwal kan en Palingehn
Ansou me pein atial kahpwal kan de kahpwal mwuledek kan en sampa kin karotongala eletail kan, mehn ketemen kesempwal kan en palingehn en nan atail mour kan kin duwehla takai melengileng kan me kin kamarainda ahlo mwohtail.
Sounpar eisek walu mwurin Sansal Keieuo, Soukohp Joseph Smith ntingiedi iretikitik kan en irairo. Aramas uhkiongehr, kalokehki, kamwamwahli, kamasak oh kemehier.1 Ahpw e doula oh ni eimah kadehdehki duwen ah Sansal Keieuo: “I udahn kilangada marain ehu, oh nan werengen maraino I kilang Aramas riemen, oh ira mahsendohng ie; oh tetehn aramas kailongkihkinie oh kalokehkinie ahi nda me I kilangehr sansalo, ahpw met mehlel. … I esehier, oh I esehier me Koht ketin mwahngiher, oh I sohte kak kamahmkihla.“2
Nan eh ansou apwal, Joseph katamando duwen en Koht ah poakohng ih kereniong sounpar riesek samwalahro oh mwekid kan me kahluwahdo Kopwurpwurdohu. Ni eh katamanda seilok en palingene, Joseph koasoia: “I sohte kasapwunge aramas me sohte kamehlele ahi poadopoado. Ma I sohte pehm dahme I loiengo, I sohte pahn kamehlele mepwukat.“3
Ahpw dahme wiawihongo uhdan mehlel, oh e sohte manokehla de kamahmkihla, kin katakataman ni meleilei nan ah kadehde ni eh keseula Carthage. “I duwelahr sihpw me pahn kamakamala,“ e nda, “ahpw I me meleilei duwehte masal en menseng, sohte ahi madmadau en uhwong Koht, oh pil ong aramas koaros.“4
Amwail Ire Kesempwal kan en Palingehn
Mie ehu irehn kasukuhl ong kitail nan en Soukohp Joseph ah karasaraso Me iang kaweid meleilei me kitail kin ale sang Ngehn Sarawi, ni ansou kan, manaman en Koht kin kamehleleiong emenemen kitail me E mwahngi kitail oh poakohng kitail oh me E ketin kapai kitaildahr ni sansal. Eri, nan atail ansou apwal kan, Sounkomouro kin katamanohng kitail ire pwukat.
Medmedewe pein amwail mour. Nan erein sounpar kan, I rongehr kiden irair en palingehn loal kan sang Souleng en Imwin Rahn-akan nan sampa, me kamehlelehiongie ni sou peikasal me Koht ketin mwahngi oh poakohng emenemen kitail oh E ketin kupwurki kasalehiong kitail pein Ih. Irair pwukat kak pwarada ni ansou kesempwal kan en atail mour kan, de ni ansou me sohte mwomwe, ahpw mie pepehm kehlail en palingehn duwen limpoak en Koht kin pwarada ni ansou pwuko.
Tamataman irair kesempwal kan en palingehn kin kahrehiong atail kelepwidi, oh inda dahme Soukohp Joseph ndahier: “Dahme I alehier pwilsang nanleng. I ese oh I ese me Koht ketin mwahngi me I ese.“5
Karasaras Pahieu
Medewe pein amwail mehn ketemen kesempwal kan en palingehn ni ahi ehukihda ekei karasaras sang mehteikan.
Sounpar kei samwalahr, steik peidriark mah men me sahl en ah mohngiongko olahr oh peki rehn Dr. Russell M. Nelson ah sawas, tetehn ansouo sohte wiepen kamwahuwiala sahl keriapwoto. Dr. Nelson eri pwungkihla en wia koadoahko. Met iei dahme Presiden Nelson koasoia:
“Mwurin aht kamwahuwiala sahl keieuo, se kilangada sahl keriapwoato. Se diar me e mihmite nan dewe ahpw e inenen umpwospeseng oh solahr kak wia ah pwukoa. Ni ahi kaskasawih sahlo, madmadau pwoat lelohng nan mongei: Kamwoatehla reirei en rihngo. I padahkihong nei sounsawaso ire wet. ‘Uduk en sahlo kak lella apali ma kitail kak kamwoatehla rihngo ong uhdahn eh saiso.‘
“Ahpw ia mwomwe? … Kilel ehu pwarada nan mongei, kasalehda mwomwen deidei kin wiawi—pwehn peusepene ehu wasa oh kadillong pah nan ehu wasa. … I tamatamante kilelo nan mongei—lella wasa me deidei kan anahne wiawi ie. Koadoahko kaneknekla nin duwen kilel me mih nan mongei. Se sohngada sahlo oh diar me nta solahr kusukusla mwahl. Nei sounsawaso koasoia ‘manaman ehu met.’”6 Peidriarko ahpw momourki sounpar tohto.
Dr. Nelson alehier kaweid. Oh e ese me Koht ketin mwahngi me e esehier me e alehier kaweid.
Ngehi oh Kathy tepin tuhwongdi Beatrice Magré nan France sounpar 30 samwalahro. Beatrice apwtehn ndahieng ie duwen irair ehu me sairada palingene mwurinte eh pepdaisla ni eh wia peinakapw men. Iet eh koasoi kan:
“Me pwulepwul kan en aht pranso iang arail sounkaweid kan kohla ni orohr en Lacanau, awa ehu elep sang Bordeaux.
“Mwohn arail pwurala nimwerail, emen sounkaweidko medewehda en wia ehu lahs en pampap oh eri dikoudihla nan illok ko nah ahi kilahsko mihmihte ni meseko. Ni eh pwarada, nah ahi kilahsoko solahr mie. … Ahi kilahsko salongalahr nan sehdo.
“Salongalahn ahi kilahskoo kahrehda e sohte kak diraipi were sidohsau. Se pahn tengala wasa dohsang nimwatko.
“Emen lih diren pwoson nda me sen kapakap.
“I mwengininginki me kapakap sohte pahn katehda mehkoat, oh ngehi eri seirenla iang pwihno kapakap sansal ni aht keskesihnen nan pihl kiriedo lel nan lukopat.
“Ansou me kapakapo nek, I kadangpeseng pehika pwe ien weisipi irail koaros. Ni ahi kadkadahre pehika pohn sehdo, nah ahi kilahsko pa lel nan pehika. Pepehm kehlail ehu lel ie me Koht uhdahn kin ketin karonge atail kapakap kan.“7
Sounpar pahisek limau mwuri, liho kin kataman ire wet likamw e wiawi aio. Beatrice kapaidahr oh esehier me Koht ketin mwahngiher me e esehier me e kapaidahr.
Irair kan en Presiden Nelson oh Sister Magré inenen wekpeseng, ahpw, ong ira koaros, mehn ketemen kesempwal en palingehn duwen limpoak en Koht tengedier nan ara mohngiong kan sohte kak manoknokla.
Ire kesempwal pwukat kin kalap pwarada ni ansou me kitail kin kaskasukuhlki duwen rongamwahu kopwurpwurdohu de ehukihda rongamwahuo ong mehteikan.
Kilel wet alahldi nan São Paulo, Brazil, nan 2004 Floripes Luzia Damasio sang Ipatinga Brazil Steik sounpar 114. Me pid en liho eh weliakapw, Sister Damasio ndahiengie me misineri kan nan ah kousapwo kihongehr kapai en prihsduhd ong seri soumwahu doar men me uhdahte kehlailda. Liho men esehla douluhl. Ni en liho kapakapki ara mwekido, sounkadehde en Ngehno kamehlelehiong ih me Joseph Smith wia emen soukohp en Koht. Ni eh sounpar 103, liho pepdaisla, oh ni eh sounpar 104, liho ale ah kapai sarawi. Sounpar koaros mwuri liho kin iang bus ki awa 14 pwehn pwarek tehnpas sarawi ki wihk ehu. Sister Damasio alehier kamehlel sang nanleng oh liho esehier me Koht ketin mwahngier me liho esehier me sounkadehdeo me mehlel.
Iet ehu mehn ketemen en palingehn sang ahi tepin misin nan France sounpar 48 samalahro.
Ni aht kalkalohk, ngehi oh iengeio pwilikihdi Pwuhk en Mormon ehu rehn lih laud men. Ni aht pwurala ni imwen liho wihk ehu mwuri, liho ritingada ah wenihmwo. Mwohn aht tepda koasoi, I kehn manaman sansal ehu. Pepehm kehlail wet wie doudoula ni en Sister Alice Audubert lukei kiht long oh nda me e wadekehr Pwuk en Mormono oh esehier me pwuhko mehlel. Ni aht pwurasang ni imwen liho rahno, I kapakap, “Sahm Nanleng, menlau sewese ie ien dehr manokehla dahme I apwtehn pehmo.“ I sohte manokehla.
Nan ehu ansouo, ni ehu wenihmw me duwehte wenihmw epwiki kei, I kehnehr manaman en nanleng. Oh I esehier me Koht ketin mwahngiher me I esehier me ehu wenihmw en nanleng ritidahr.
Dokedokeie oh Sohte sapwung
Mehn ketemen kesempwal en palingehn pwukat kin kohdo ni ansou oh ni mwohmw wekpeseng kei, ahpw kin doke emenemen kitail.
Medewe karasaras akan me kumwail kin pwungki nan pwuhk sarawi kan. Irail me rongorong Wahnparon Peter “kehn mehkoat nan arail mohngiong [kan].“8Lih mehn Lamano Abish kamehlele “sansal lingano en ah pahpao.“9 Ngihl ehu ahpw peido nan en Enos ah mwahlielo.10
Kempoakepai Clayton Christensen kawehwe ehu irair ansou me e kapakapki eh wadek Pwuken Mormon ni mwohmw wet: “Ehu ngehn lingan, karakar, limpoak … kapeliepene oh kadirehla palingeni, kidimkinie pepehm en limpoak me I sohte kin medewe, [oh pepehm pwukat kin lellelie pwohng koaros].”11
Mie ansou kei me pepehm kan en ngehno kin kohdihla nan mohngiongo likamw kisiniei, eri kamarainda palingenitail. Joseph Smith kawehwe me ekei ansou kitail kin ale “pwildohn madmadau kan“ oh ekei ansou “pwildohn me mehlel rir kan.“12
Presiden Dallin H. Oaks, ni eh sapsapeng ohl emen me nda e saikinte ahneki songen irair wet, kaweidki, “Mwein ahmw kapakap kan pasapenglahr pangkei, ahpw ke kasik me pasapengo pahn wiawi ni mwohmw me laud de ngihl laud ehu me kahrehda ke medewe me ke saikinte ale pasapengo.“13 Pein Sounkomouro mahsaniher duwen pwoson laud en aramas “me [kapaikidahr] kisinie oh pil Ngehn Sarawi, [ahpw re] sohte ese.“14
Ia Mwomwen Amwail kin Rong Ih?
Kitail rongehr en Presiden Russell M. Nelson nda, “I luke kumwail en kin kalap douloalli peidek kesempwal wet. Ia mwomwenamwailkin rong Ih? I pil luke kumwail en koasonehdi kumwail en kin kalap rong Ih mwahu.“15 E kapwurehiong luhko ni mensengo.
Kitail kin rong Ih nan atail kapakap kan, nan imwatail kan, nan pwuhk sarawi kan, nan atail koul kan, ni atail kin warehng ale kamadipw sarawi, ni atail kin kasalehda atail pwoson, ni atail papah mehteikan, oh ni atail kin iang souleng kan pwarek tehnpas sarawi. Ansou kesempwal kan en palihngehn kin pwarada ni atail kin kapakapki rong kapokon lap oh ni atail kin kapwaiada kosonned akan. Oh serihkan, kumwail pil ahneki irair pwukat. Tamataman me Sises “pil padahk oh sewese serihkan … oh [serihkan] pil kin koasoia … me lap oh kaselel kan.“16 Kauno ketin mahsanih:
“[Marain wet me] pwilsang Ngehno ong kumwail, … oh ma sohte ahi manaman kumwail sohte kak ahneki;
“Kahrehda, kumwail kak kadehde me kumwail rongehr ngilei, oh ese ei mahsen kan.“17
Kitail kak “rongada Ih“ pwehki kapai en Sounkomouro Tomwo me sohte me rasohng.
Ni atail sohte kak pilada ansoun ale ansou kesempwal kan, Presiden Henry B. Eyring kihda kaweid wet ni atail kin kaukaunop: “Pwohng wet oh nihpwongen lakapw, kumwail kak kapakap oh wie medemedewe oh peidengki peidek pwukat; Koht ketin mahmahsen ongie? I kin kilang limehkan nan ahi mour de nan mour kan en ahi [peneinei]?“18Pwoson, peik, karakarahk, oh ineng mehlel kin langahda wenihmw kan en nanleng.19
Ehu Karasaras
Kumwail kak medewe amwail mehn ketemen kesempwal en palingehn kan ni mwohmw wet. Ni amwail kin kapakap ni ngidingid, koasonehdi en kolokol atail inou kan, oh kisakis en Ngehn Sarawi, kitail kin kakainene eletail nan mour wet. Ansou me pein atail kahpwal, peikasal de mwaros kin karotongala eletail, de ansou me kahpwal en sampah kin kahrehiong atail peikasalki mwohtail, mehn ketemen kesempwal en palingehn sang nan neitail pwuhk en mour wia dipwisoun kamarain kei pohn ahlo mwohtail, kamehlelehiong kitail me Koht ketin mwahngi kitail, poakohng kitail, oh kadaredohr Sapwellime Ieros, Sises Krais, en sewese kitail pwurala Reh. Oh ansou me aramas emen sohla kin doadoahngki ah mehn ketemen kesempwal kan oh salongalahr de rotalahr, kitail wekid irail dohng Sounkomouro ni atail kin ehukihong irail atail pwoson oh mehn ketemen kan oh sewese irail en diarada mehn ketemen kesempwal kan me irail ahnekiher mahso.
Ekei irair kan me inenen sarawi kahrehda kitail kin neknekid nan atail mehn ketemen kesempwal en palingehn oh sohte men ehukihda.20
“Tonleng kan kin koasoiki manaman en Ngehn Sarawi; kahrehda, irail kin koasoia mahsen en Krais.“21
“Tonleng kan [saikinte] uhdihsang arail sewese serihkan.
“Pwe kilang, irail kin ehuiong [Krais], pwehn sawas nin duwen … kupwure, kasalehda pein irail ong irail me pwoson kehlail oh ahneki madmadau kehlail ong wiewia koaros ni mwomwen koht kan.“22
Oh “Sounkapohlo, iei me wia Ngehn Sarawi, … pahn padahkihong kumwail mehkoaros, oh katamankin kumwail mehkoaros.“ 23
Kesempwaliki amwail mehn ketemen sarawi kan. Kamehlele ahmw mehn ketemen kan. Ntingiedi. Ehukihda ong amwail peneinei kan. Likih me mepwukat pwildohng kumwail sang Samamwail Nanleng oh Sapwellime Ieroso.24 Mepwukat en kahrehiong amwail kanengamahiong amwail peikasal kan oh wehwehki amwail kahpwal kan.25 I inoukihong kumwail me ni amwail pwungki ale oh apwali ni keneinei mwekid kesempwal kan en palingehn nan amwail mour, pil ekei me tohto pahn kodohng kumwail. Sahm Nanleng ketin mwahngi oh poakong kumwail!
Sises iei Krais, Sapwellime rongmwahuo kopwurpwurdohr, oh ni atail kolokol atail pwoson, I kadehde me kitail pahn wiahla Sapwellime kohkohlahte, ni mwaren Sises Krais, amen.